ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদী ঙসি অহেমদবাদতা চৎখ্রে অমদি চাউখৎ–থৌরাংগী প্রোজেক্ত কয়া হৌদোকখ্রে।

অহেমদবাদকী বস্ত্রাল গাম মেত্রো স্তেসন্দা প্রধান মন্ত্রীনা অহেমদবাদ মেত্রো সর্বিসকী অহানবা ফেজ হৌদোকখি। মহাক্না অহেমদবাদ মেত্রোগী অনিশুবা ফেজগীদমক উরেপ–উয়ুং তমখি। ভারতকী অহানবা মশানা শেমগৎচবা পেমেন্ত ইকো–সিস্তেম অমসুং ৱান নেসন, ৱান মোদেলদা য়ুমফম ওইবা ওতোমেতিক ফেয়র কল্লেক্সন সিস্তেমসু মায়খুম হাংদোকখি। তুংদা মহাক্না মেত্রো ত্রেন লমথাখি অমদি মেত্রো তোংদুনা চৎথি।

প্রধান মন্ত্রীনা অহেমদবাদতা ফমুং ১২০০ লৈবা অনৌবা সিবিল হোস্পিতাল, অনৌবা কেন্সর হোস্পিতাল, দেন্তেল হোস্পিতাল অমদি মিৎকী হোস্পিতাল শঙ্গাখি। মহাক্না দহোদ রেলৱে ৱার্কশোপ অমদি পতান– বিন্দী রেলৱে লাইনসু লৈবাক মীয়ামদা কত্থোকখি অমদি লোথল মেরিতাইম ম্যুজিয়মগী উরেপ–উয়ুংসু তমখি।

বি.জে. মেদিকেল কোলেজ গ্রাউন্দা তিনখিবা মীয়ামদা ৱা ঙাংলদুনা প্রধান মন্ত্রীনা হায়খি মদুদি অহেমদবাদ মেত্রোগী মংলান মংফাওনবা অসি পুৱারী ওইরবা নুমিৎ অমনি। মেত্রো অসিনা অহেমদবাদকী মীয়ামগীদমক খুদোংচাবা অমদি এনভাইরনমেন্ত ফ্রেন্দলী ওইবা ত্রান্সপোর্তেসন অমা ফংহল্লগনি হায়না মহাক্না ফোংদোকখি। ২০১৪গী মমাংদা লৈবাক অসিদা মেত্রোগী ওপরেস্নেল নেৎৱার্ক অসি শুপ্নতগী কিলোমীতর ২৫০ খক্তমক ওইরম্মি, মদু হৌজিক্তি কিলোমীতর ৬৫৫ য়ৌরে হায়না প্রধান মন্ত্রীনা ফোংদোকখি।

ঙসি মায়খুম হাংদোকখিবা কমন মোবিলিতী কার্দনা লৈবাক্কী মফম কয়াদা মেত্রো অমদি ত্রান্সপোর্তেসনগী অতোপ্পা পাম্বৈশিং শিজিন্নদুনা চত্থোক–চৎশিন তৌনবগীদমক কার্দ মখল কয়া অমা শিজিন্নবগী মথৌ তাররোই হায়না প্রধান মন্ত্রীনা হায়খি। কার্দ অসিনা মোবিলিতীগীদমক ‘ৱান নেসন – ৱান কার্দ’ চৎনহল্লগনি হায়না মহাক্না ফোংদোকখি। চত্থোক–চৎশিন তৌনবগীদমক ৱান নেসন – ৱান কার্দ অমা লৈরিবা মালেমগী লৈবাক খরগী মনুংদা ভারতসু অমা ওইরে হায়না প্রধান মন্ত্রীনা মখা তাখি।

প্রধান মন্ত্রীনা গুজরাতকী চাউখৎ–থৌরাংগীদমক রাজ্য সরকার অমদি কেন্দ্র সরকারনা পায়খৎলিবা ৱাতর সপ্লাই স্কিমশিং, মীপুম খুদিংদা মৈ ফংহনবা, ইনফ্রাস্ত্রকচর দিবেলপমেন্ত, মীপুম খুদিংবু য়ুম ফংহনবা লাইরবশিংগী স্কিমশিং অসিনচিংবা অনৌবা খোংথাং কয়া অমগী মতাংদা ঙাংখি। রাজ্য অসিদা ত্রাইবেল কমুনিতীগী য়াইফনবগীদমক পায়খৎলিবা স্কিম কয়াগী মতাংদসু মহাক্না শন্দোক্না ঙাংখি।

প্রধান মন্ত্রীনা হায়খি মদুদি লোথাল মেরিতাইম হেরিতেজ কমপ্লেক্স অসি শাবা লোইবগা ভারতকী অরিবা মতমগী মেরিতাইমগী পাঙ্গল শক্তি অদু উৎলগনি। ম্যুজিয়ম অসিদা ৱার্ল্দ ক্লাস ফেসিলিতীশিং লৈগনি অমদি রাজ্য অসিগী তুরিজম পোতেন্সিয়েল হেঙ্গৎহল্লগনি হায়না মহাক্না হায়খি।

হকশেল অসি কেন্দ্র সরকারগী প্রায়োরিতী অমা ওইনা ফোংদোক্লদুনা প্রধান মন্ত্রীনা হায়খি মদুদি সরকার অসিনা ৱেলনেস সেন্তরশিংদগী হৌরগা মেদিকেল কোলেজ ফাওবা লৈবাক্কী মফম কয়াদা ক্বালিতী হেল্থ কেয়ার ইনফ্রাস্ত্রকচর শেমগৎলি।

শেঞ্জা–থুমজাদগী হৌরগা তেরোরিজম ফাওবগী থাক্তা লৈবাক অসিদা কিহনলক্লিবা পুম্নমক মায়োক্ননবগী মায়কৈদা সরকার অসিনা অচেৎপা ৱারেপ লৌরে হায়না নরেন্দ্র মোদীনা হায়খি। লৈবাক মীয়ামগী মায়োক্তা থবক তৌরিবা মীওইশিংগী মথক্তা অকনবা এক্সন লৌখৎকনি হায়না মহাক্না মীয়ামদা থাজবা পীখি। লৈবাক মীয়ামগী সেক্যুরিতীগী মথক্তা ভোৎ ফংনবা রাজনিতী তৌদনবা মহাক্না ওপোজিসন্দা খংহনখি। অসিগুম্লবা থৌওংশিং অসিনা আর্ম ফোর্সেসকী পুক্নিং হন্থহনগনি অমদি য়েক্নবগী মপাঙ্গল কনখৎহনগনি হায়না মহাক্না হায়খি।