ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদী ঙসি উত্তর প্রদেশকী গ্রেতর নোইদাদা চৎখ্রে অমদি চাউখৎ-থৌরাংগী প্রোজেক্ত কয়া হৌদোকখ্রে।

পন্দিৎ দীনদয়াল উপধ্যায় ইন্সতিত্যুৎ ওফ আর্কিওলোজীদা প্রধান মন্ত্রীনা মেত্রোগী নোইদা সিতী সেন্তর-নোইদা ইলেক্ত্রোনিক সিতী সেক্সন ভিদিও লিঙ্ককী খুত্থাংদা লমথাখি। মহাক্না উত্তর প্রদেশকী খুর্জা অমসুং বিহারগী বুক্সারদা মেগা ৱাৎ ১৩২০গী থর্মেল পাৱর প্লান্তশিংসু উরেপ-উয়ুং তমখি।

প্রধান মন্ত্রীনা পন্দিৎ দীনদয়াল উপধ্যায় ইন্সতিত্যুৎ ওফ আর্কিওলোজী শঙ্গাখি। মহাক্না কেম্পস মনুংদা পন্দিৎ দীনদয়াল উপধ্যায়গী মীতম মায়খুম হাংদোকখি অমদি লৈ কত্তুনা ইকায় খুম্নবা উৎখি। তুংদা মহাক্না ইন্সতিত্যুৎকী কেম্পস মনুংদা লৈবা দীনদয়াল ম্যুজিয়মদসু চৎখি।

মীয়াম তিনখিবা মীফম অমদা ৱা ঙাংলদুনা নোইদা অসি মপুং ফানা ত্রান্সফোর্ম তৌরে হায়না প্রধান মন্ত্রীনা ফোংদোকখি। হৌজিক্তি নোইদা অসি দিবেলপমেন্ত অমসুং নহাশিংগীদমক্তা এম্প্লোইমেন্তকী খুদোংচাবা পীবগীদমক খঙনরে হায়না প্রধান মন্ত্রীনা ফোংদোকখি। নোইদা অসি লৈবাক অসিগী মেক ইন ইন্দিয়া হব অমগুম দিবেলপ তৌরে হায়না মহাক্না মখা তাখি। মসিগা মরী লৈননা প্রধান মন্ত্রীনা মালেমগী খ্বাইদগী চাউবা মোবাইল ফেক্তরী য়াওনা ইলেক্ত্রোনিক কম্পেনী কয়া নোইদাদা লৈরিবা অদু পনখি।

লৈবাক অসিগী খ্বাইদগী চাউবা এয়রপোর্ত অসি উত্তর প্রদেশকী জেৱারদা শেমগৎলি হায়না প্রধান মন্ত্রীনা ফোংদোকখি। মহাক্না লৈবাক অসিগী তোঙান তোঙানবা মফমশিংদা শেমগৎলিবা এয়ারপোর্ত কয়াগী মতাংদসু পনখি। কেন্দ্র সরকারনা উরান য়োজনাগী খুত্থাংদা শহর মচাশিংবু এয়র কনেক্তিবিতী ফংহন্নবগী মায়কৈদা ৱারেপ লৌরে হায়না মহাক্না মখা তাখি।
ভারত্তা পাৱর সেক্তর ফগৎহন্নবগী মায়কৈদা সরকারগী অনৌবা খোংথাংশিংগী মতাংদা ঙাংলদুনা মহাক্কী সরকারনা পাৱর জেনরেসনগী মওং মতৌ মরি, মখোয় অদুদি প্রদক্সন, ত্রান্সমিসন, দিস্ত্রিব্যুসন অমসুং কনেক্সন্দা মীৎয়েং থম্লি হায়না প্রধান মন্ত্রীনা হায়খি। অসিগুম্লবা থৌওংশিং অসিনা পাৱর সেক্তর মপুংফানা ত্রান্সফোর্ম তৌরে অমদি ৱান নেসন-ৱান গ্রীদ অদু অচুম্বা অমা ওইহল্লে হায়না মহাক্না ফোংদোকখি। সরকার অসিনা রেন্যুয়েবল ইনর্জী সেক্তরদসু মতিক চাবা পাঙ্গল শক্তি অদু পীরি হায়না প্রধান মন্ত্রীনা ফোংদোকখি। মহাক্কী মংলান্দি ‘ৱান ৱার্ল্দ, ৱান সন, ৱান গ্রীদ’নি হায়না মহাক্না মখা তাখি।
বুক্সার অমসুং খুর্জাদা হৌদোক্লিবা থর্মেল পাৱর প্লান্তশিংনা ভারতকী গ্রোথ হেঙ্গৎহল্লগনি অমদি উত্তর প্রদেশ, বিহার অমসুং অতোপ্পা য়ুম্লোন্নবা রাজ্যশিংদা মৈ ফংবগী চাং হেঙ্গৎহল্লগনি হায়না প্রধান মন্ত্রীনা হায়খি। হৌখিবা চহী মরিরা মখাই অসিদা পাৱর জেনরেসন্দা চাউনা থাক হেঙ্গৎলক্লিবা অদুগী মতাংদা মহাক্না ঙাংখি।

পন্দিৎ দীনদয়াল উপধ্যায় ইন্সতিত্যুৎ ওফ আর্কিওলোজী শঙ্গারদুনা প্রধান মন্ত্রীনা হায়খি মদুদি ইন্সতিত্যুৎ অসিনা ভারত অমসুং মালেমগী মফম কয়াদগী রিসর্স স্কোলরশিং অমসুং মহৈরোইশিংগীদমক অনৌবা খুদোংচাবশিং ফংহল্লগনি।