ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি জুনাগর জিলাদা তোঙান তোহানবা প্রোজেক্ত কয়া মরুম শঙ্গাখ্রে মদুগী মনুংদা সরকারগী সিবিল হোস্পিতাল, মিল্ক প্রোসেসিং প্লান্ত অমা অমসুং জুনাগর এগ্রিকলচর য়ুনিভর্সিতীগী শঙলেন খরা য়াওরি।
থৌরম অদুদা মীয়ামগী মীফম অমদা ৱা ঙাংলদুনা প্রধান মন্ত্রীনা হায়খি মদুদি লুপা কোতি ৫০০দগী হেনবগী ইনিসিয়েতিব ৯ কৎথোকখ্রে নত্রগা ঙসি মখোয়গী উরেপ উয়ুং তমখ্রে। মহাক্না হায়খি মদুদি ভারতকী চাউখৎপগী খোংচৎতা অনৌবা থৌনা অমসুং মঙাল অমা উবা ফংলক্লে।

প্রধান মন্ত্রীনা হায়খি মদুদি গুজরাত্তা রাজ্যগী মফম পুম্নমক্তা ঈশিং মরাং কাইনা ফংহন্নবা লেপ্তনা হোৎনরি। ঐখোয়না ঈশিং য়োকশিনবগী মাইকৈদসু থবক পাইখৎলি।

প্রধান মন্ত্রীনা হায়খি মদুদি গুজরাত্তা মেদিকেল কোলেজ অমসুং হোস্পিতাল শাগৎলি। মহাক্না হায়খি মদুদি মসিনা শুপ্নগী অনাবশিংগী মতেং ওইনবতা নত্তনা মেদিকেল তম্বা পাম্বাশিংদসু কান্নবা ফংলগনি। মহাক্না জন ঔশধি য়োজনাগী মতাংদা পনখি, মদুগী মখাদা জন ঔশধি কেন্দ্র হাংদোক্লি, মদুনা মরম ওইদুনা হিদাকশিং মমল হন্থরি। মহাক্না হায়খি মদুদি লাইরবা অমসুং ময়াই ওইবা কাংলুপশিংদা অহোংবা মমলদা হিদাক ফংহনবা অসি মরু ওই।

প্রধান মন্ত্রীনা হায়খি মদুদি লুবা নানবদা সরকারনা শাফু পীবা অসিগীদমক মাইকৈ মরিদগী থাগৎনরক্লি। মহাক্না হায়খি মদুদি লুবা নানবদা শাফু পীবা মরু ওই মরমদি তরু তনানবা ভারতনা মীয়াম্বু লাইনাদগী ঙাকথোকহনগনি।

প্রধান মন্ত্রীনা হায়খি মদুদি হকশেলগী লমদা অফবা দোক্তরশিং অমসুং পেরামেদিকেল স্তাফকী মথৌ তাই। মেদিকেলগী খুৎলাইশিং লৈবাক অসিদা শাজবা ঐখোয়না পাম্মি। মহাক্না হায়খি মদুদি লম অসিদা তেক্নিকেলগী খুদোং চাবশিংগা লোইননা মালেমগা থোং মান্ননা চৎমিন্নগদবনি।

প্রধান মন্ত্রীনা শাফু পীরদুনা হায়খি মদুদি প্রধান মন্ত্রী জন আরোগ্য য়োজনা-আয়ুশ্মান ভারত অসিনা হকশেলগী লমদা অহোংবা পুরক্কনি অমসুং লাইরবশিংদা অহোংবা মমলদা খ্বাইদগী ফবা হকশেলগী খুদোংচাবশিং ফংহনবা ঙমহনগনি।

***