ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি জয়পুরদা মীয়ামগী মীফম অমদা ৱা ঙাংখ্রে।

মহাক্না রাজস্থান রাজ্যগী অর্বান ইনফ্রাস্ত্রকচর প্রোজেক্ত ১৩গীদমক উরেপ উয়ুং তম্নবা প্লেক অমা মায়খুম হাংদোকখি।
তুংদা মহাক্না ভারত সরকার অমসুং রাজস্থান সরকারগী স্কিমশিংগী কান্নবা ফংলবা খনগৎলবা মীওইশিংনা থেংনরকপশিং সেয়র তৌবা ওদিও-ভিজুয়েল প্রজেন্তেসন অমা মীৎয়েং তমখি। প্রজেন্তেসন অদু রাজস্থানগী মুখ্য মন্ত্রী শ্রীমতী বসুন্ধরা রাজেনা ৱাতেমখি। স্কিমশিং অদুদা প্রধান মন্ত্রী উজ্জ্বলা য়োজনা, প্রধান মন্ত্রী মুদ্রা য়োজনা অমদি প্রধান মন্ত্রী আৱাস য়োজনা য়াওরি।

মীয়াম তিনখিবা অদুদা ৱা ঙাংলদুনা রাজস্থান্না মতৌ করম্না মরমদা লাকপা মীওইশিংবু তরাম্না ওকপগে হায়বা অদু খঙলে হায়না প্রধান মন্ত্রীনা ফোংদোকখি। মহাক্না রাজস্থানবু থৌনা ফবশিংগী লমদম অমা ওইনা শিংথাখি। মহৌশাগা লোয়ননা ৱাখল্লোন তিন্ননা হিংমিন্নবা ওইগেরা নত্রগা ঐখোয়গী লৈবাকপু ঙাক শেনবা ওইগেরা, রাজস্থান্না মতম পুম্নমক্তা লম্বী তাক্লি হায়না মহাক্না মখা তাখি।

রাজস্থানগী মুখ্য মন্ত্রী শ্রীমতী বসুন্ধরা রাজেবু থাগৎলদুনা রাজ্যদা মহাক্না ৱার্ক কলচরদা অহোংবা পুরক্লে হায়না প্রধান মন্ত্রীনা হায়খি। রাজস্থানগী প্রোগ্রেসকীদমক কেন্দ্র সরকার অমসুং রাজ্য সরকারনা পুন্না থবক তৌমিন্নরি হায়না মহাক্না হায়খি। ঙসিগী প্রজেন্তেসন্দা শরুক য়াখিবা কান্নবা ফংলবা মীওইশিং অদুগী নুংঙাইবা মতৌ অদু মফম অসিদা তিনবীরিবা মীপুম খুদিংমক্না উবীখ্রে হায়না মহাক্না ফোংদোকখি।

লৌমীশিংগী য়াইফনবগীদমক মতৌ করম্না কেন্দ্র সরকারনা থবকশিং পায়খৎলিবগে হায়বগী মতাংদা প্রধান মন্ত্রীনা শন্দোক্না হায়খি। মহাক্না হৌজিক হৌজিক্কী খরিফ সিজনগীদমক লাওথোকখিবা তোঙান তোঙানবা মহৈ মরোংশিংগীদমক মিনিমম সপোর্ত প্রাইস হেঙ্গৎলক্লিবা অদুগী মতাংদা ৱা ঙাংখি।

প্রধান মন্ত্রীনা স্বচ্ছ ভারত মিশন, জন ধন য়োজনা, প্রধান মন্ত্রী আৱাস য়োজনা, উজ্জ্বলা য়োজনা, প্রধান মন্ত্রী মুদ্রা য়োজনা অমসুং সৌভাগ্য য়োজনা য়াওনা রাজস্থান্দা কেন্দ্র সরকারগী তোঙান তোঙানবা স্কিমশিংগী প্রোগ্রেস অদুসু পনখি।
মথং চহিদা রাজস্থান্না চহি ৭০ মপুং ফারক্কদৌরিবা অদু নোৎ তৌরদুনা চাউখৎলবা রাজস্থান অমা শেম্নবগী ৱাশক অদু শোয়দবনি, মদুনা অনৌবা ভারত অমা শাগৎপদা অচৌবা থৌদাং অমা লৌরগনি হায়না প্রধান মন্ত্রীনা ফোংদোকখি।

***