ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা নই দিল্লীগী ইন্দিরা গান্ধী ইন্দোর স্তেদিয়মদা নবেম্বর 7, 2025গী অয়ুক পুং 9:30 রোম তাবদা জাতিগী ঈশৈ ‘ভন্দে মাতারম’গী চহি অমা চুপ্না পাংথোক্কদবা থৌরম হৌদোক্কনি।

থৌরম অসিদা প্রধান মন্ত্রীনা কোম্মেমোরেতিব স্তাম্প অমসুং কোইন অমসু ফোঙগনি। থৌরম অসিনা ভারতকী নীংতম ইহৌদা ইথিল পীখিবা অমসুং জাতিগীদমক চাউথোকচবা অমসুং অপুনবগী ৱাখল্লোন মখা তানা পোকহল্লিবা মমল য়াম্লবা ঈশৈ অসিনা চহি 150 শুরকপগী চহি অমা চুপ্না লৈবাক শিনবা থুংনা 2025গী নবেম্বর 7দগী 2026গী নবেম্বর 7 ফাওবা পাংথোক্কদবা থৌরম হৌদোকপগী তাঙ্কক ওইরি।

মপুং ওইবা থৌরম অসিগা লোয়ননা খুন্নাইগী শরুক পুম্নমক্তগী প্রজাশিংনা শরুক য়াদুনা মীয়াম তিনবা মফমশিংদা অয়ুক 9:50 রোম তাবদা ‘ভন্দে মাতারম’গী মপুংফাবা ভর্সনগী মাস সিঙ্গিং পাংথোক্কনি।

2025দা ভন্দে মাতারমগী চহি 150 মপুং ফারগনি। বঙ্কিমচন্দ্র চত্তরজীনা ইবা ঐখোয়গী জাতিগী ঈশৈ ‘ভন্দে মাতরম’ অসি অক্ষয় নবমীগী য়াইফরবা থৌরম নবেম্বর 7, 1875দা ইখিবনি। ভন্দে মাতারম অসি অহানবা ওইনা মহাক্কী নোভেল অনন্দমথকী শরুক অমা ওইনা লিতরেরী জর্নেল বঙ্গদর্শন্দা ফোঙখি। মপাঙ্গল, চাউখৎপা অমসুং লাইনিংগী মশক মওং ওইরিবা মমা লৈবাক অসিবু ইকায় খুম্নবা উৎলিবা ঈশৈ অসিনা ভারতকী অমত্তা ওইবগী অমসুং ইকাই খুম্নবগী ৱাখল্লোন অদুবু শৈরেংগী মওংদা ফোংদোকখি। মসিনা লৈবাক নীংবগী মুৎনাইদ্রবা খুদম অমা অথুবদা ওইরকখি।

***