ভারতকী প্রধানমন্ত্রী

ভারত লৈঙাক্কী সেক্রেতরীশিংগা লোয়ননা অহুমশুবা অৱাঙবা থাক্কী মীফম  অমা প্রধান মন্ত্রী শ্রী নরেন্দ্র মোদীনা লুচিংদুনা ঙসি অয়ুক ৭, লোক কল্যান মার্গতা লৈবা মহাক্কী ময়ুমদা পাঙথোকখ্রে। ইনফ্ৰাস্ত্রকচর অমসুং কনেক্তিবিতী, সেক্যুরিতী অমসুং এক্সতর্নেল এফিয়র্স, অমসুং গভর্নেন্সকী থবক তৌরিবা মন্ত্রালয়শিং অমসুং দিপার্তমেন্তশিংগী তুংদা পাংথোক্কদবা থবকশিংগী মতাংদা মহাক্না খন্ন-নৈনখি।

সেক্রেতরীশিংগী কাংলুপ অনিগা লোয়ননা হান্ননা খন্ন-নৈনবা লোইখ্রে হায়বা পল্লদুনা, সেক্রেতরীশিংনা হৌজিক্কী ওইবা ৱাফমশিং অমসুং স্তেতিস্তিক্সকী মতাংদা খনবগী মথক্তা, লৈবাকসিগী তুংগী ফীভম করম্না শেমগৎকদগে হায়বগী মতাংদা অশানবা মীৎয়েঙগা লোয়ননা য়েংগদবনি হায়না প্রধান মন্ত্রীনা ফোঙদোকখি।

তোঙান-তোঙান্না খায়দোক্তুনা থবক তৌবগী খুদোংচাদবশিং মপুং ফানা লোইশিন্নবগী মতাংদা খন্নরদুনা, ফীভম অসি ওর্গনাইজেসনগী ওইবা ৱাফম অমা খক্তা নত্তনা ৱাখল্লোনগী ওইবা খুদোংচাদবা ৱাফম অমসু ওই হায়না প্রধান মন্ত্রীনা ফোঙদোকখি। মহাক্না অসিগুম্বা পলশিং অসি অয়ুংবা অমসুং অফৈবা ম‌ওং অনীমক্তা লৈবা য়াই হায়না ফোঙদোকখি। ওফিসিএলশিংনা মশাগী থৌদাংশিং মপুং ফানা লৌগদবনি অমসুং মশাগীনি খনবা ৱাখল্লোনগা লোয়ননা থবক তৌগদবনি হায়না মহাক্না ফোঙদোকখি।

পুন্না হোৎনমিন্নবগী মরুওইবা ৱাফমশিং ফোঙদোক্লদুনা, তোঙান-তোঙানবা দিপার্তমেন্তশিংগী ওফিসিএলশিংনা পুন্না মপুং ফানা থবক তৌমিন্নখিবা  COVID-19 লাইচৎ অমসুং নোংচুপ এসিয়াগী খুদোংথিবা ফীভমগী মতাঙদা প্রধান মন্ত্রীনা খুদম ওইনা পনখি। মহাক্না অসুম্না পুন্না খুৎশম্নদুনা থবক তৌবগী পথাপ অসি লৈঙাক্কী থবক তৌবগী মহৌশাগী মওং অমসুং চৎনবী অমা ওইহনগদবনি হায়না ফোঙদোকখি।

মীওইবনা খুৎ থিংজিনবা অমসুং ৱারেপ লৌবগী থৌওং য়াওহনবগা লোয়ননা আর্তিফিসিএল ইন্তেলিজেন্স (AI) বু মতিং লৈনা শীজিন্ননবা প্রধান মন্ত্রীনা হায়খি। মহাক্না AI গী পাঙ্গলবু মীওইবগী হৈথোই-শিংথোইবগা লোয়ননা পুনশিন্নবগী অনৌবা মওং-পথাপশিং থিদোক্নবা ৱাফম থমখি।

দেতা অসি লৈবাক্কী লন-থুম অমসুং তুংগী রিসোর্স অমনি হায়না প্রধান মন্ত্রীনা ফোঙদোকখি। দেতা খোমজিনবা, থমজিনবা অমসুং শিন-লাঙবদা লৈঙাক্না রিসোর্সশিং শীজিন্নরি অদুবু দিপার্তমেন্তশিং তোঙান-তোঙান্না খায়দোক্তুনা থবক তৌবা অমসুং মচেৎ মচেৎ তাবা পথাপশিংনা মরম্না ওইরগা মসিবু মপুং ফানা শীজিন্নবা মতম পুম্নমক্তা ঙমদে হায়না মহাক্না ফোঙদোকখি। তোঙান-তোঙানবা পান্দমশিংগীদমক দেতা খোমজিনবা অমসুং শিন-লাঙবগী মওংদা লৈরিবা তোঙান-তোঙানবা ফীভমশিং মহাক্না পনখি, অমসুং দেতাবু হেন্না চুনবা মওংদা মথৌ তৌহন্নবা অমসুং মতিং লৈনা শীজিন্নবা ঙমহনগদবা পাম্বৈশিং থিদোক্নবা তকশিনখি।

খুজিল থৌরাং য়াৎপদা অনৌবা ৱাখল্লোনশিং পুখৎনবা লৈঙাক্কী দিপার্তমেন্তশিং, য়ুনিভর্সিতীশিং অমসুং নহাশিংগী মরক্তা হেন্না পাউ ফাওনদুনা থবক তৌমিন্ননবা প্রধান মন্ত্রীনা হায়খি। মহাক্না য়ুনিভর্সিতীশিং অমসুং নহাশিংগা হেন্না পাউ ফাওনদুনা থবক তৌমিন্নবনা অনৌবা অমসুং মহৌশাগী মান্নদবা ৱাখল্লোনশিং পুথোকপা ঙমগনি হায়না ফোঙদোকখি।

প্রধান মন্ত্রীনা দিফেন্স সেক্তর য়াওনা রিসর্চ অমসুং ইনোবেসন্দা হেন্না মীৎয়েং থম্নবা পাউতাকসু পীখি। ভারতকী দিফেন্স ইন্দস্ত্রী হেন্না মপাঙ্গল কনখৎহন্নবা অমসুং মসিবু মালেমগী থাক্তা হেন্না কম্পিতিতিব ওইহনবা মথ তাই হায়বসিদা মহাক্না অকনবা মীৎয়েং থমখি। মহাক্না অনৌবা দিফেন্স কোর্সশিং শেমগৎপা অমসুং দিফেন্স সেক্তরদা হ্যুমেন রিসোর্স দিবলপমেন্ত মপাঙ্গল কনখৎহনবগী মরুওইবশিংসু ফোঙদোকখি।

ভারতকী মেরিতাইম সেক্তর হেন্না মপাঙ্গল কনখৎহন্নবা মপুং ফাবা মওং অমদা চঙশিনবগী মথ তাবশিংগী মতাংদসু প্রধান মন্ত্রীনা খন্ন-নৈনখি। সিপবিল্দিংগী থবক অসিদা ইনফ্ৰাস্ত্রকচরগী ফীভম পীখ্রবনি হায়বসি মহাক্না নীংশিংখি অমসুং মসিনা থম্লিবা পান্দমশিং অসি মিসন মোদতা ফংবা ঙম্লিব্রা হায়বা য়েংশিন্নবা পাউতাক পীখি। মহাক্না ভারতনা পোর্ত দিবলপমেন্ততগী পোর্ত-লেদ দিবলপমেন্তলোমদা ওন্থোকপা মথৌ তাই হায়বা ৱাফম অমুক হন্না ফোঙদোকখি।

মেন্যুফেকচরিং য়ুনিতশিং অমসুং এক্সপোর্ত-ওরিএন্তেদ য়ুনিতশিংগী মরক্তা হেন্না ফবা কনেক্তিবিতী লৈহনবা মথৌ তাই হায়বসিদা প্রধান মন্ত্রীনা মীৎয়েং থমখি, মরমদি অসুম্না তৌবনা ভারতকী মেন্যুফেকচরিং অমসুং এক্সপোর্ত তৌবগী মতিংশিংনা লৈবাকসিগী মেরিতাইম ইনফ্ৰাস্ত্রকচরদগী মপুং ফানা কান্নবা লৌবা ঙমগনি।

প্রধান মন্ত্রীনা লোইশিল্লকপদা লৈবাকসিগী তুংগী ফীভম অশানবা মীৎয়েঙদা য়েংবগা লোয়ননা শেমগৎনবা অমসুং অৱাবা শিংনবশিং কোকহন্নবা হোল-ওফ-গভর্নমেন্ত এপ্রোচ অমা চৎনহনবা, হেন্না খুৎশম্নদুনা থবক তৌবা, অনৌবা ৱাখল্লোনশিং পুখৎপা অমসুং অপুনবগী ওইবা থৌদাং লৌমিন্নবা মথৌ  তাই হায়না অমুক হন্না ফোঙদোকখি।

প্রধান মন্ত্রীনা ওফিসরশিংগী মরক্তা ইনফোর্মেল ওইবা মওংদা পাউ ফাওনবা অমসুং তীম স্পিরিৎ শাগৎপগী মরুওইবদা মীৎয়েং থমখি। মহাক্না সিনিয়র ওফিসরশিংবু জুনিয়র খোঙলোয়শিংগা লোয়ননা লনাই অমসুং ইনফোর্মেল ওইনা মরী লৈননবা অমসুং কেদরশিং অমসুং দিপার্তমেন্তশিংগী মরক্তা হেন্না চেৎপা নেতৱর্ক শাগৎনবা পুক্নিং থৌগৎখি।

সেক্রেতরীশিংনা সেক্তোরেলগী মরুওইবা পান্দমশিং, খুদোংচাদবা অনৌবা শিংনবশিং অমসুং থবক ওইনা পাঙথোকপদা থেংনরকপা খুদোংচাদবা ৱাফমশিং ফোঙদোকখি। মীফম অদুদা কেবিনেত সেক্রেতরী, মরুওইবা মন্ত্রালয়শিং অমসুং দিপার্তমেন্তশিংগী সেক্রেতরীশিং, অমসুং প্রাইম মিনিস্তর ওফিসকী সিনিয়র ওফিসিএলশিংনা শরুক য়াখি।

****