ভারতকী প্রধানমন্ত্রী

ঙসি পুলিস কম্মেমোরেসন নুমিৎতা, প্রধান মন্ত্রী নরেন্দ্র মোদীনা লৈবাক মীয়ামদা নেস্নেল পুলিস মেমোরিয়েল কৎথোকখ্রে।

অমাং–অতা থোরকপা মতমদা শরুক য়াবা পেরামিলিতরী অমসুং পুলিসকী মীওইশিং ইকাইখুম্নবা উৎনবা নেতাজী সুভাস চন্দ্র বোসকী মিংদা মনা অমা প্রধান মন্ত্রীনা লাউথোকখ্রে। মনা অদু চহি খুদিংগী ওইনা, অমাং–অতা থোরকপা মতমদা মীওইবগী থৱায় কন্নবা থৌনা ফনা থবক তৌবশিংদা পীগনি।

নেস্নেল পুলিস মেমোরিয়েল অদুদা প্রধান মন্ত্রীনা লৈ কৎতুনা লৈখিদ্রবা অথৌবশিংগী মফমদা ইকাইখুম্নবা উৎখি। অশাবা ইফুৎকী থৌদোক্তা হিংহৌরবা মীওই অহুমদা মহাক্না ইকাই খুম্নবা উৎখি। মহাক্না নেস্নেল পুলিস মেমোরিয়েলগী ম্যুজম হাংদোকখি অমসুং ভিজিতরগী লাইরিক্তা খুৎয়েক পীখি।

থৌরম অদুদা প্রধান মন্ত্রীনা লৈবাক্কীদমক থৱায় কৎখ্রবা পুলিসকী মীওইশিংদা ইকাইখুম্নবা উৎখি। লাদাক্কী অশাবা ইফুৎ থৌনা ফনা মায়োক্নখিবা থৌনা ফরবা পুলিসকী মীওইশিং মহাক্না নীংশিংখি অমসুং মখোয়গী ইমুং অমসুং লৈহৌরিবা মীওইশিংদা ইকাইখুম্নবা উৎখি।

নেস্নেল পুলিস মেমোরিয়েল কৎথোকপদা হরাওবা ফোংদোক্লদুনা প্রধান মন্ত্রীনা হায়খি, মেমোরিয়েল অসিনা পুলিসকী তৌবা ঙম্বা, থৌনা অমসুং থবক অদু উৎলি। নেস্নেল পুলিস মেমোরিয়েল অসিদা লোয়নরিবা খুদিংমক অসিনা মীয়ামদা পুলিস অমসুং পেরামিলিতরী ফোর্সকী মরমদা খঙহনগনি। লৈবাক অসিনা ইংতপ্পা, ঙাকশেন অমসুং নুংঙাইবা ফংলিবা অসি পুলিস, পেরামিলিতরী অমসুং আর্মদ ফোর্সশিংনা কৎথোকপগা লোয়ননা থবক তৌবদগীনি। নেস্নেল দিজাস্তর রেন্সপোন্স ফোর্সেস অমসুং স্তেৎ দিজাস্তর রেন্সপোন্স ফোর্সেসনা পাংথোকলিবা থবকশিং প্রধান মন্ত্রীনা শিংথাখি।

নেস্নেল পুলিস মেমোরিয়েলগী মতাংদা প্রধান মন্ত্রীনা হায়খি, মেমোরিয়েল অসি এন দি এ সরকারনা পুক্নীং চংনা পাইখৎপদগী মতম চানা লোইশিনবা ঙম্বনি। লৈবাক শেমগৎপদা অচৌবা মরুওইবা থৌদাং লৌরিবা মীওইশিং মতিক চানা ইকাইখুম্নবা উৎপা হায়বা সরকার অসিগী পান্দম অদু মেমোরিয়েল অসিদা উবা ফংলি।

মহাক্না হায়খি, মখোয়গী মথৌ পাংথোকপদা পুলিসনা মতমগা চুনবা তেক্লোলোজী শীজিন্নগদবনি। পুলিস ফোর্স অসি মতমগা চুনবা মওংদা শেমগৎনবা মোদর্নাইজেসন ওফ পুলিস ফোর্স স্কিম পায়খৎলে।

প্রধান মন্ত্রীনা হায়খি, পুলিস অমসুং মীয়ামগা অকনবা মরি থম্বদা পুলিস ফোর্সনা অচৌবা থৌদাং লৌরি। পুলিস ফোর্সনা পুলিস স্তেসনশিং মীয়াম্না নুংঙাইগদবা মওংদা থবক তৌগদবনি।

নেস্নেল পুলিস মেমোরিয়েল অসিদা লৈরিবা স্কল্পচর অসিদা মথৌ তৌবদা লৈখিদ্রবশিংগী মমিং হক্তুনা থম্লি অমসুং ম্যুজম অদুদা থৱায় কৎখ্রবা পুলিসকী মীওইশিংগী নীংশিংবা য়াবা পোৎলমশিং থম্লি।