ভারতকী প্রধানমন্ত্রী
প্রধান মন্ত্রী শ্রী নরেন্দ্র মোদীনা ঙসি বহরেন্দা লৈরিবা ভারতমচাশিংদা ৱা ঙাংখ্রে।
প্রধান মন্ত্রীনা হায়খি, “বহরেন্দা লাক্লিবা ঐহাক্কী খোংচৎ অসি সরকারগী মকোক অমা ওইনা, প্রধান মন্ত্রী অমা ওইনা লাকপা ওইরম্বা য়াই, অদুবু ঐহাক্কী পান্দমদি মফম অসিদা খুন্দারিবা ভারত মচাশিং অমসুং বহরেনগী মরূপ মিলিয়ন কয়াগা লোয়ননা উনবনি। ঙসি অসি জন্মস্তমীগী শেংলবা কুমহৈ নুমিৎনি। গল্ফ লমদম অসিদা জন্মাস্তমী নুমিৎতা কৃষ্ণগী ৱারী লীবগী চৎনবী অদু হৌজিকসু লৈরি হায়বা ইফমদা তাকপীরে। হয়েং ঐহাক শ্রীনাথজীগী লাইশংদা চৎকনি অমদি অদোম ময়াম পুম্নমক্কী অমদি অদোমগী য়ুম্বু ওইরিবা লৈবাক অসিগী চাউখৎ থৌরাং অমসুং শান্তিগীদমক থৌনীজগনি।”
প্রধান মন্ত্রীনা হায়খি মদুদি বহরেনগী সোসিও–ইকোনোমিক পুন্সিদা মখোয়গী থমোই শেংবা, রাজভক্তি, তৌবা ঙম্বা অমসুং থৌদাং অদুনা ভারতমচাশিংগীদমক বহরেন্দা চাউখ্রবা গুদৱিল লৈরি। “নখোয়গী শুব–নোম্বা কনবা অদুনা মফম অসিবু নখোয় নশাগী ওইবা মফম অমা শেম্লে। ঐখোয়না গুদৱিল অসি চেৎশিলহনবা তাই। ঐহাক্না মফম অসিগী সরকারদা থবক তৌমিন্নরিবা, মফম অসিদা করবার তৌরিবা, মফম অসিদা খুন্দারিবা ভারতকী মীওইশিংবু থাগৎপা ফোংদোকপা তারুবা খুদিং ঐহাক্কী থমোই অসি নুংঙাইবনা থুমহৎলি।”, প্রধান মন্ত্রীনা মখা তাখি।
প্রধান মন্ত্রীনা হায়খি মদুদি ঙসিদি ভারত্তা লৈরিবা য়ুমথোং খুদিংমকপু বেঙ্কিং সর্বিসকা শম্নহল্লে হায়না। ভারতকী ইচম চম্বা ইমুং খুদিংমক্তা মোবাইল ফোন অমসুং ইন্তরনেৎ য়ৌহল্লে। মালেমদা খ্বাইদগী হোংবা ইন্তরনেৎ দাতা ভারত্তা লৈরে। ভারত্তা লৈরিবা সর্বিস অয়াম্বা দিজিতেল ওইবা মওংদা থাদোকপা ঙমহন্নবা য়াম্না কন্না হোৎনরি।
ভারতকী মংলান মাংফাওনহনবা ঙম্লগনি হায়না ভারত মচা খুদিংমক্না থাজবা থমলক্লে হায়না প্রধান মন্ত্রীনা মখা তাখি। প্রধান মন্ত্রীনা হায়খি, “ঐখোয়গী পান্দমশিংদি ৱাংই, অদুবু নহাক্না মীওই কোতি ১৩০গী পাম্বোম অদু লৈবা মতমদা, নহাক্কী পুক্নিং থৌগৎলকই। সরকারনা হোৎনবা খক্তা নত্তনা, ভারত মচা কোতি কয়ানা শরুক য়ারকপগা লোয়ননা ঙসিদি ভারত মাংলোমদা চংশিল্লে। সরকারদি মমায় চুম্বা খক্তনি, এসেলরেতর নেৎলিবদি লৈবাক অসিগী প্রজাশিংনি।”
ভিম এপ্লিকেসন, য়ু.পি.আই. অমসুং জন ধন একাউন্তগুম্বা খুদোংচাবশিংনা ভারত্তা বেঙ্কিংবু মীচম প্রজানা শিজিন্নবা ঙমহল্লে হায়না মহাক্না ফোংদোকখি। ঐখোয়গী রুপে কার্দ অসি হৌজিক্তি মালেম পুম্বদা ত্রাঞ্জেক্সনগী মেদিয়ম অমা ওইরক্লে। হৌজিক্তি ঐখোয়গী রুপে কার্দ অসি মালেম পুম্বদা লৈরিবা বেঙ্কশিং অমসুং সেল্লরশিংনা লৌশিল্লে।
মহাক্না মখা তাখি, “ঐহাক্না নুংঙাইবা ফাওই মদুদি অথুবা মতমদা অদোম্না বহরেন্দা রুপে কার্দ ত্রাঞ্জেক্ত তৌবা য়ারগনি। রুপে কার্দ শিজিন্ননবা ঙসি য়ানা ৱারোল অমা খুৎয়েক পীনখ্রে। ঐখোয়গী অপাম্বদি রুপে কার্দকী খুত্থাংদা ভারত্তা লৈরিবা অদোমগী য়ুমদা পৈশা থানবা খুদোংচাবা অদু অদোমগী মফমদা ফংহনবনি।”
মহাক্না হায়খি মদুদি হৌখিবা চহী মঙাদা ঐখোয়না হোৎনরিবা অদুদি ভারত্তা লৈরিবা মীওই কোতি ১৩০গা লোয়ননা মীরৈবাক্তা লৈরিবা ভারত মচা কোতি কয়াবুসু মতম পুম্নমক্তা অৱাংবা থাক্তা লৈহনবনি। ঙসি, করিগুম্বা মালেম অসিনা ভারতপু ইকায় খুম্নবগা লোয়ননা য়েংলকক্লগদি মদুগী তুংদা লৈরিবা অচৌবা মরমদি নখোয়গুম্বা খোংলোয় লাখ কয়াননি।
ভারত্তা চাউখৎ থৌরাংশিংগী মতাংদা ঙাংলদুনা মহাক্না হায়খি মদুদি অপনবা লৈতবা মোবিলিতীগীদমক ভারতনা ‘ৱান নেসন ৱান তেক্স’কী মায়কৈদা চংশিল্লি। ভারত পুম্বা ‘ৱান নেসন ৱান গ্রিদ’ অমদি জি.এস.তি.গী থৌওংদা ‘ৱান নেসন ৱান তেক্স’না শম্নহল্লে। ভারতনা ইজ ওফ লিভিং অমসুং ইজ ওফ বিজিনেসকীদমক লৌখৎপা য়াবা খোংথাং পুম্নমক লৌখৎলে। ভারতকী নহাশিংনা গ্লোবেল এপ্লিকেসনশিংগা লোয়ননা লোকেল সোলুসনশিং পুথোক্নবা থমোই শেংনা থবক তৌরি। ভারতকী তেলেন্ত অসি মালেম পুম্বনা মশক খঙলে। গ্লোবেল প্রোজেক্তশিং অমসুং ইন্সতিত্যুৎশিংদা মসিনা অঙকপা ফংনা থবক তৌরে। ভারতকী বিজ্ঞানিকশিংনা অপীকপা বজেৎতা চন্দ্রয়ানগুম্বা এচিব তৌবা ঙমখিবগীদমক মালেম পুম্বনা থাগৎনরক্লি।
ইং কুমজা ২০২২দা ভারতনা নীংতমখিবা চহী ৭৫ মপুং ফারগনি। অদোমগী থাক্তা অনৌবা ৱারেপ খরা লৌনবা ঐহাক্না হায়জরি। চহী খুদিংগী বহরেনগী মরূপশিংবু ভারত্তা কোয়বা চৎনিংবা ফাওহন্নবা হোৎনবীয়ু। ইং কুমজা ২০২২ ফাওবদা ভারতপু সিঙ্গল য়ুজ প্লাস্তিক্তগী ফ্রী ওইহন্নবা ঐখোয়না হোৎনরি হায়না প্রধান মন্ত্রীনা ফোংদোকখি।
প্রধান মন্ত্রীনা হায়খি, “ভারত অমসুং বহরেন্না ঐখোয়গী সেয়র তৌরিবা ভেল্যুশিং অমসুং ইন্তরেস্তশিংগী মায়কৈদা পুন্না থবক তৌরসি। ভারত অমসুং বহরেন অসি লীরবা সভ্যতা লৈজবা অনৌবা য়ুগকী লৈবাকশিংনি। অনিমক্না মপাল নায়দ্রবা পোতেন্সিয়েল লৈরি। বহরেন্দা লৈরিবা ঐহাক্কী খোংলোয় ভারতমচাশিংনা মরী অসি হেন্না চেৎশিলহন্দুনা ভারত–বহরেনবু অনৌবা অৱাংবা থাক অমদা পুখৎলগনি হায়না ঐহাক্না মপুং ফানা থাজবা থম্লি।”
