ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি ৭, লোগ কল্য়ান মার্গতা লৈবা মহাক্কী য়ুমদা ভারত লৈঙাক্কী সেক্রেতরীশিংগা অনিরকশুবা ওইনা অৱাংবা থাক্কী মীফম পাঙথোকখ্রে। মহাক্না শেল-থুম অমসুং শেন্মিৎলোন, কম্মর্স অমসুং ইন্দস্ত্রী, অমদি তেক্নোলোজী সেক্তরদা থবক পায়খৎলিবা মন্ত্রালয়শিং অমসুং দিপার্তমেন্তশিংগী তুংদা পায়খৎকদবা থবক থৌরমশিং য়েংশিনখি। মীফম অদুনা ভিক্সিত ভারতকী পান্দমগী মায়কৈদা খোঙজেল য়াঙ্খৎহন্নবা ৱাফমশিংদা মীৎয়েঙ থমখি।

প্রধান মন্ত্রীনা মন্ত্রালয় অমসুং দিপার্তমেন্তশিংদা তীম শেমগৎপদা অকনবা মীৎয়েঙ থম্নবা ফোঙদোকখিপগা লোয়ননা ওফিসরশিংদা মান্নবা পান্দমগী ৱাখল্লোনদা থবক পায়খৎনবা ৱাফম থমখি। দিপার্তমেন্তশিংনা নক্ননা খুৎশম্নদুনা থবক তৌমিন্ননবা অমসুং অপুনবা মহৈ ফংহন্নবগীদমক লৈঙাক্কী মনুংদা লৈরিবা হোরাইজন্তেল অমদি ভর্তিকেল পলশিং নমখায়বা মথৌ তাই হায়না মহাক্না ফোঙদোকখি।

মীয়ামদা মীৎয়েঙ থম্বা লৈঙাক্লোনগী মরুওইবা ৱাফমশিং থম্লদুনা, প্রধান মন্ত্রীনা ভারতকী মীয়াম্না লৈঙাক্লোনগী ময়ায়দা থমগদবনি হায়খি। ফিরেপ অমসুং খুজিল থৌরাং খুদিংমক মীচম মীয়ামগী য়াইফগদবা অমসুং অনিংবা অপাম্বনা লমজিংগদবনি হায়না মহাক্না নীংশিংখি।

ভারতনা ইনফ্রাস্ত্রকচরদা শেল য়াম্না থাদবগা লোয়ন-লোয়ননা লমদমসিগী ওইবা তেক্নোলোজীশিং শেমগৎপদসু চপ মান্ননা মরুওইবা মীৎয়েঙ থমগদবনি হায়না প্রধান মন্ত্রীনা ফোঙদোকখি। মরুওইবা সেক্তরশিংদা তেক্নোলোজীগী লমদা মরোমদোম লেপচবা ঙমবা অমসুং লমদমসিগী ওইবা মতিং শেমগৎপগী মরুওইবা ৱাফমশিং মহাক্না ফোঙদোকখি।

প্রধান মন্ত্রীনা ইনর্জী সিক্যুরিতী অসি লৈবাক্কী সিক্যুরিতী, শেন্মিৎলোন মরা চেৎপা অমসুং মীয়ামগী য়াইফবগা য়াম্না নক্নবা মরী লৈনৈ হায়না ফোঙদোকখি। ভারতনা ইনোভেসন, দাইভর্সিফিকেসন অমসুং এসেলেরেতেদ কেপাসিতী ক্রিএসনগী খুত্থাঙদা ইনর্জী সেক্তরদা মরোমদোম লেপচবা ঙম্নবা হোৎনগদবনি হায়না প্রধান মন্ত্রীনা হায়খি।

রিফোর্ম হায়বসি চুম্নখক্কী মপান্থোংগী ফজনবা ৱাহৈ অমা নত্তে, মতিং লৈবা লৈঙাক্লোন লৈহন্নবা লেপ্পা লৈতনা মথৌ তাবা ৱাফম অমনি হায়রদুনা, প্রধান মন্ত্রীনা থৌওংশিংদা অহোংবা পুরকপা, থবক শুবগী হৈনবী হেনগৎহনবা অমসুং ইন্সতিত্যুসনশিংগী মতিং হেনগৎহনবা মথৌ তাই হায়না ফোঙদোকখি।

তেক্নোলোজী শীজিন্নবা হেনগৎলক্লিবা অসিগা ইরোয়ননা দিজিতেল সিস্তেম অমসুং ইনফ্রাস্ত্রকচর ঙাক-শেন্দুনা থম্নবগীদমক সাইবরসিক্যুরিতীদা অকনবা মীৎয়েঙ থম্বা মথৌ তাই হায়না প্রধান মন্ত্রীনা হায়খি। মহাক্না নৌনা থোরক্লিবা সাইবর থ্রেতশিংগী মায়োক্তা লেপ্পা লৈতনা মীৎ-না শিংনা লৈবা মথৌ তাই হায়খি। মহাক্না সাইবরসিক্যুরিতী ইকোসিস্তেমদা নহা ওইরিবা ইনোভেতরশিং অমসুং ওন্ত্রপ্রিন্যুরশিং হেন্না শরুক য়ারকপদা পুক্নিং থৌগৎনবা ৱাফম থমখি অমসুং মসি লৈবাক পুম্বগী ওইবা ইহৌ ওইহনগদবনি হায়খি।

প্রধান মন্ত্রীনা লান্না পাউ শন্দোকপা অমসুং পায়খৎলিবা থবক থৌরমশিংগী মতাঙদা মরম চাদনা অকিবা পোকহল্লিবশিং থেংননবগীদমক লৈবাক অসিনা অচৌবা থৌশিলশিং পায়খৎলিবা স্ত্রেতেজিক সেক্তরশিংদা ইচঙ থৌবা কম্ম্যুনিকেসন লৈহনবগী মরুওইবা ৱাফমশিংসু ফোঙদোকখি।

প্রধান মন্ত্রীনা ৱর্কফোর্সপু নৌনা থোরক্লিবা অমসুং তুংগী ইন্দস্ত্রীশিংগী মথৌ তাবা স্কিলশিং লৈহন্নবগীদমক অনৌবা একাদমিক কোর্সশিং ইন্দস্ত্রীশিংগা খোঙবু ওইদুনা থৌরাং য়াৎকদবনি হায়খি। লৈঙাক অমনা মতম পুম্বদা নহাগী মতৌগুম থবক তৌগদবনি, ইচঙ থৌনা অমসুং মাঙদা মীৎয়েঙ থমদুনা, খোঙজেল য়াঙবা অমসুং ইনোভেসনগা লোয়ননা অনৌবা শিংনবশিং অমসুং খুদোংচাবশিং মায়োক্ননবগীদমক লেপ্পা লৈতনা হোংলক্লিবা ফীভমগা চুশিন্নহনগদবনি হায়বা ৱাফমসু মহাক্না ফোঙদোকখি।

মীফম অদুদা সেক্রেতরীশিংনা মখোয় মখোয়গী লমশিংদা লৈরিবা খোঙজেল, মরুওইবা মীৎয়েঙ থম্লিবশিং অমসুং থবক পায়খৎপদা থেংনরিবা খুদোংচাদবা ফীভমশিংগী মতাঙদা কুপ্না খন্ন-নৈনখি। মীফম অদুদা কেবিনেত সেক্রেতরী, মরুওইবা মন্ত্রালয় অমসুং দিপার্তমেন্তশিংগী সেক্রেতরীশিং, অমসুং প্রধান মন্ত্রীগী ওফিসকী মকোক থোংবা ওফিসিএলশিংনা শরুক য়াখি।

***