ভারতকী প্রধানমন্ত্রী

খুরুমজরি!

অদোম্না খেলো ইন্দিয়া সংবাদ থৌরম ফজনা শীল্লে। ময়াম পুম্নমক্কী মফমদা ঐনা ঐগী য়াইফ পাউজেল পীজরি। কেন্দ্রগী মন্ত্রীমন্দলগী ঐগী মরুপশিং, চীফ মিনিষ্টরশিং, তোঙান তোঙানবা রাজ্য সরকারশিংগী মিনিষ্টরশিং, সংসদকী ঐগী মরুপশিং, তেক্নোলোজিগী খুৎথাংদা থৌরম অসি শরুক য়ারিবা মাই ভারত ভোলুন্তিয়ার লাখ কয়া ঐনা তরাম্না ওকচরি। ঙসিগী থৌরম অসিদা লৈবাক শীনবা থুংবগী শান্নরোয়শিং অমসুং শান্নবগী লমদা শক্নাইরবশিং শরুক য়ারে।

মরুপশিং,

ওগষ্ট ২৯ দা নেসনেল স্পোর্তস দে থোক্লে। শান্নবগী নুমিৎ অসিগীদমক ঐনা মাঙজৌননা অদোম ময়াম, লৈবাক শীনবা থুংবগী নহারোলশিং অমসুং শান্নবগী লমদা থবক তৌরিবশিংদা ঐগী য়াইফ পাউজেল পীজরি। নুমিৎ অসি ভারত ইমাগী অচৌবা মপারি মেজর ধ্যান চান্দ নিংশিংনবা থৌরম অমসুনি। চহি ১০০ গী মমাংদা, ভারত লান্মগী হোক্কিম তিম ন্যু জিলেন্দা চৎপদা ধ্যান চান্দসু শরুক য়াখি। খোঙচৎ অদুনা ভারত অমসুং ন্যু জিলেন্দগী মরক্ত লৈনবা চহি ১০০ শুরবা শান্নবগী মরীগী য়ুম্ফম থোনখি। মতম খরগী মমাঙদা ঐ ন্যু জিলেন্দদা চৎলুরে অমসুং লৈবাক অদুগী মীওইশিংনা মহাক নিংশিংবা অদু কাউদ্রি। মেজর ধ্যান চান্দনা মতেং পাংদুনা শেমগৎলম্বা মরীশিং ফগৎহন্নবা ভারত মখা তানা থবক পায়খৎলি।

মরুপশিং,

হৌখিবা ওগষ্ট ১৫ দা, ঐনা লাল কিলাদগী লৈবাক অসিদা ভারতকী শান্নবগী পান্দম ঐনা পুথোকখি। ঐনা শান্নবগী ৱা ঙাংবা মতমদা, মদু মেদলশিং খক ফংবগী নত্তে; মসি বিকসিত ভারত অমা শেমগৎনবা মাইকৈদা লৈবাক অসিগী নহারোলশিংগী শক্তিগা লোয়ননা ভারতকী শান্নবগী থৌনা অমতা ওইনা পুনশিন্নবা মিসন অমনি। ঐনা মতম পুম্নমক্ত হায়খি- ‘জো খেলে, সো খিলে (শান্নবা মীওই খক্তনা মাইপাকই)। শান্নবদা, মাইপাকপা হায়বসি শান্নবুংদা থোইবা খক নত্তে; মসি কান্নগুম্বা অমগী লনাই অমসুং ইমুং-মনুংগী গুন হেনগৎহনবা অমসুং লৈবাক্কী মিংচৎ পুরকপনি।

মরুপশিং,

শান্নরোয় অমা মাইপাকপা মতমদা, মদু মহাক মথন্থতা মাইপাকপা নত্তে, মসিনা মখোয়গী ইমুং-মনুংগী মিংচৎ হেনগৎহল্লি। মসিনা মখোয়না লাইরিক তম্লিবা স্কুল নত্ত্রগা কোলেজগী মিংচৎ হেনগৎহল্লি অমসুং মখোয়গী জিলা অমসুং রাজ্যগী মিংচৎ হেনগৎহল্লি। শান্নরোয় অদুগী সহর নত্ত্রগা রাজ্য অদু মালেম্না মমিং চৎপা হৌরকই। অসিগুম্বা মাইপাকপা কয়ানা লমদম অমা মালেমগী শান্নবগী মেপতা য়াওবা ঙম্মী, সহর অদুদা মালেমগী লৈবাকশিংনা য়েংবা মীৎয়েংসু হোংহনবা ঙম্মী। ঙসিগী থৌরম অসিদা শরুক য়ারিবা জিলা চা কয়াগী শান্নারোয়শিং মালেমগী শান্নবগী মেপতা য়াওহন্নবা থৌনা লৈরি। মসিগী তৌবা ঙম্বা অদু খঙলদুনা ঐখোয়না ঙসিগী থৌরম অসি পাংথোকপনি।

মরুপশিং,

হন্দক লাল কিলাদা, শান্নবগী লমদা অচৌবা খুদোংচাদবা অমগী ঐনা লৈবাক অসিগী পুক্নিং চিংশিনখি। খুদোংচাদবা অসি ওলেম্পিক্সকী মতাংদনি। ওলেম্পিক্সতা য়াওরিবা তোঙান তোঙানবা মশান্নশিংগী তঙ্খায় অমা ফাওবা ভারতকী শান্নরোয়শিংনা শরুক য়াদ্রি। অতোপ্পা ৱাহৈশিংদা, মেদল তেল্লিগী মরুওইবা শরুক অমগীদমক ঐখোয়না লাম্বা তৌদ্রি অমসুং মসি চহি কয়া চৎথদুনা লাক্লি। ২০১২ ওলেম্পিক্সতা ভারতনা মশান্না ১৩ খক্তদা শরুক য়াখি; মশান্না ২০ হেনবদা ভারতকী শান্নরোয় অমতা শরুক য়াখিদে। মশান্না ২০ হেনবদগী মনুংদা, ঐখোয়গী লৈবাক অসিদা মমিং তাদ্রিবা মশান্না কয়া য়াওরি। অতোপ্পা লৈবাকশিংনা মেদলশিং ফংলবা হায়রিবা মশান্নশিং অসিদা ঐখোয়না হৌজিক ফাওবা শরুক য়াদ্রি। ঐখোয়না মেদল ফংবা হেনগৎহন্নবা, হায়রিবা মশান্নশিংদা ঐখোয় ফগৎহনগদবনি। খুদম ওইনা, সরফিং অমসুং স্পোর্তস ক্লাইম্বিংগীদমক, মশা মরোমদোম অসিগুম্বা মশান্নশিং ফগৎলকপা য়াগদবা শাংলবা সমুদ্র খোঙবাল অমসুং অচৌবা চীঙজাউশিং ঐখোয়গী লৈরি। ঈশিংগী মশান্নদগী হৌরগা নিংথমথাগী মশান্নশিং ফাওবা য়াওনা খুদিংমক শৌগৎনবা ঐখোয়গী মীওইশিং অমসুং লম লৈরি। অদুবু হায়রিবা মশান্নশিং অসিদা হৌজিক ফাওবা ঐখোয়গী শান্নরোয়শিং উদ্রি। মরম অদুনা, অকক্নবা স্পোর্তশিং শেমগৎপা য়াগদবা ফিবম অমা লৈনবা জিলাশিং ঐখোয়না মশক খঙদোকপা দরকার ওই অমসুং থবক অসিদা ঙসিগী থৌরম অসিনা মরুওইবা থৌদাং অমা লৌগনি।

মরুপশিং,

ঐখোয়না ২০৩৬ ওলেম্পিক্সকী থৌরাং তৌবা মতমদা, ক্বালিফাই ওইবা ঙমগদবা অমসুং ২০৩৬ দা তোঙান তোঙানবা মশান্নশিংদা চাংদম্নবা ঙমগদবা শান্নরোয়শিং হৌজিক্তগী হৌনা শেমগৎনবা ঐখোয়না মীৎয়েং চঙগদবনি। মরম অদুনা, চহি ৫ দগী ১৫ ফাওবগী মনুংদা লৈবা শান্নরোয়শিং মশক খঙদোক্নবা অচৌবা কেম্পেন অমা হৌদোক্নবা লাল কিলাদগী লাউথোকখিবনি। মসিদা অঙাং অমগী অকক্নবা স্পোর্তসতা থৱায় য়াওবা য়েংবগী মথক্ত স্পোর্ত অদু মখোয় চুনগদরা হায়নসু য়েংগদবনি। মদুগী মতুংইন্না ঐখোয়না ত্রেনিং পীগনি। থবক অসিগীদমক সরকারনা অদোমগা য়াম্না নক্না চৎমিন্নগনি অমসুং দরকার ওইবা মতেং খুদিংমক পীগনি।

মরুপশিং,

ভারত্ত ২১শুবা চহিচাগী মতমগা চুনরবা অনৌবা শান্নবগী থবক অমা শেমগৎনবা ঐখোয়না থবক পায়খৎলে। স্পোর্তস অমসুং স্পোর্তস য়ুনিভর্সিতিশিংদগী হৌরগা অনৌবা ত্রেনিং সেন্তরশিং ফাওবদা, মালেমগী থাক্ত শান্নরোয়শিং শেমগৎনবা হৈথোই-শিংথোইবা শান্নরোয়শিং মশক খঙদোক্নবা থবক অমা লৈবাক অসিদা লৈরে। স্পোর্তস সাইন্স,  ত্রেনিং অমসুং কোচিংদা মখোয়না খঙবশিং শরুক য়ানবা ঐখোয়না অতোপ্পা লৈবাকশিংগা মতেং পাংনবসু হেনগৎলে।

মরুপশিং,

শান্নবগী মতাংদা কমদৌনা সরকারনা লুম্না লৌবগে হায়বগী খুদম অমা ঙসিগী থৌরম অসিনা ওইরে। খেলো ইন্দিয়া সংবাদ অসি শান্নবগী খন্ন-নৈনবা থৌরম অমা খক নত্তে; মসি লৈবাক অসিগী শান্নবগী মাইওন অনৌবা মাইকৈ অমদা পুনবা অনৌবা ৱাখল্লোন খুদিংমক খন্নবা মফম অমনি। মফম অসিদা নহারোলশিংগা ৱারি শানবা অসি লৈবাক অসিগী মঙলানশিংগা অদোমগী অনৌবা ৱাখলশিং অমসুং অপাম্বশিংগা পুন্না চৎমিন্ননবা শক্তি লৈরবা পাম্বৈ অমনি। থৌরম অসিদা, শান্নবগী থবকশিং, তেলেন্ত শেমগৎপা, লৈঙাক অমসুং বিকসিত ভারত অমগী মতাংদা নহারোলশিংগী ৱাখল্লোনশিং অমসুং পাউতাকশিং ঐখোয়না তাগনি অমসুং মখোয় থৌশিল শেম্বগী থবকশিংদা য়াওহনগনি। মরম অদুনা, মফম অসিনা ফজনা শীজিন্ননবা অমসুং অনৌবা ৱাখলশিং পুথোক্নবা ময়ামদা ঐনা হায়রি অমসুং ঐখোয়গী নহারোলশিংদগী ফংবা অনৌবা ৱাখলশিংনা বিকসিত ভারত অমগী পান্দম থবক ওইনা পাংথোক্নবা শক্তি অমা ওইগনি।

মরুপশিং,

মশা ফবা খুন্নাই অমা, নুংঙাইবা ইমুং অমসুং অফবা থবক শুবগী চৎনবী অমা লৈনবা ‘শান্নবগী থৌনা’ অসি তঙাইফদে হায়বা ঐখোয়না তোইনা তারি; অদুবু, শান্নবুংদা থোক্তনা মসিগী শান্নবগী থৌনা অসি লৈহনবা য়াম্না লুবা অমনি। কমদৌনা চেম্পিয়নশিং ওইগনি হায়বা শান্নবনা ঐখোয়গী তম্বী খক নত্তনা কমদৌনা চাংদম্নবা ঙম্বা মীওইশিং ওইগনি হায়বা তম্বীরি। মাইপাকপা, মাইথিবা অমসুং অমুক মাইপাকপা- মসিগী খাংবা কনবগী গুন অসি শান্নবনা ঐখোয়দা চেনহল্লি।

মরুপশিং,

কমদৌনা শান্নবনা পুন্সি কয়া অওনবশিং পুরকপগে হায়বগী ময়েক লারবা খুদমশিং ঐখোয়গী পেরা-এথলেতশিংনা ওইরে। পেরা-এথলেতশিংনা শান্নবা উবদা কনাগুম্বা অমগী পুন্সিগী মীৎয়েং অহোংবা পুরক্লে। মখোয়না মাইপাকপা মতমদা, মসিনা শান্নরোয় খক্তগী পুন্সিদা অনৌবা পুন্সি অমা পুরকপা খক নত্তনা, অপুনবা ইমুংগী অওনবা পুরক্লে। মখোয়গী অঙাংশিংনা লান্থেংনবা উরিবা মপা-মমাশিং অমসুং মচিন-মনাওশিংগীদমক, হকচাংগী ফিবমদা মীমান্নদ্রবা শান্নরোয়শিংনা মাইপাকপনা মখোয়গী মঙলানশিং অমসুং থৌনা অনৌবা থাকশিংদা পুখৎলে।

মরুপশিং,

অসিগুম্বা শান্নরোয়শিংদা ঐঙোন্দা ইথিল পীরি। তেন কাপ্পগী মমিং লৈরবা শান্নরোয় অমা অদোম মমিং তাররবা; অদোম মহাক্কী মমিং খঙবরা? মহাক সিতল কৌই। মহাক্না পেরালেম্পিক্সতা মেদল ফংবা মতমদা, জম্মু অমসুং কাস্মির শীনবা থুংনা অমসুং ভারতকী মীওই খুদিংমক চাউথোকচবা পোকখি। অতোপ্পা ঐখোয়গী ইচানুপী অভানি লেখারানা পেরালেম্পিক্স মেদল অনি ফংখি। ঐনা এভানি উনবা মতমচা চাউথোকচবা ফাওখি। সুমিত অন্তিল, নিতেস কুমার অমসুং ঝান্দু কুমারগুম্বা ঐখোয়গী শান্নরোয়শিং লৈরি। অসিগুম্বা পেরা-এথলেতশিং অমসুং শান্নরোয়শিংনা ঐখোয়দা ইথিল পীরি। 

মরুপশিং,

শান্নবনা হেন্না ফবা পুন্সি ফংহল্লি। শান্নবনা ঐখোয় হকচাং ফহল্লি অমসুং ঐখোয়গী পুন্সিগী মগুন হেনগৎহল্লি। মশাগী চহি ১০০ হেনবা মতমদা হৌখিবা চহিদা লৈখিদ্রবা ফৌজা সিংহ জিগী মরমদা ঐখোয়না খঙলে। কমদৌনা শান্নবা অমসুং হকচাং ফনা লৈবদা ঙাউজবনা কনাগুম্বা অমগী পুন্সি শাংনা হিংবগে হায়বগী খুদম মহাক্না ওইরে। শান্নবা অমসুং মগুন লৈবা পুন্সিগী মরক্ত লৈনরিবা অচেৎপা মরীগী মতাংদা মহাক্কী পুন্সিনা অকনবা ইথিল অমা ওইখি।

মরুপশিং,

শান্নবগী অতোপ্পা কান্নবা লৈরি: অশেংবা শান্নরোয়না দ্রগ অমসুং ময়াই কাবা চীঞ্জাকশিংদগী লাপথোক্নবা থৌনা শেমগৎলি। ঐখোয়গী নহারোলশিং দ্রগ লান্না শীজিন্নবগী অচৌবা অৱাবা অমা মায়োক্নবা মতমদা, অৱাবা অসি কোকহনবদা শান্নবা কান্নরবা থৌদাং অমা লৌখি।

মরুপশিং,

ঙসি ভারত্ত শান্নবনা অফবা শীনফম অমা ওইরকপদা ঐ হরাওই। খুন্নাইনা শান্নবদা য়েংলিবা মীৎয়েং হোংলে। ঙসি ঐখোয়গী লৈবাক্কী মীয়াম ত্রাইথলোনশিংদা শরুক য়ারে অমসুং ৫কে অমসুং ১০কে লমজেলশিং শরুক য়ারে। হায়রোক্সগুম্বা শরুক য়ানবা মরুপশিং পুল্লে। অতোপ্পা খৃনা পিক্কলবোল শান্নরে। থবকশিং অসি অপীকপা ওইনা উরম্বা য়াই, অদুবু করিগুম্বা অচৌবা মীৎয়েং অমদগী য়েংলবদি, অচৌবা অহোংবা অমা লাকপা উরে-শান্নবা অসি ঐখোয়গী পুন্সিগী তৎন-থানবা য়াদ্রবা শরুক অমা ওইরকপা উরে। ঐখোয়না লাইরিক পাবা অমসং শীনফমশিংগী মতম কাইথোকপগা লোয়ননা, হৌজিক ঐখোয়গী নোংমগী থবকশিংদা শান্নবনা অনৌবা মফম অমা কল্লে। মসিগী অওনবা অসিনা ভারতকী শান্নবগী তুংলমচৎকী থাজবা হেনগৎহল্লে।

মরুপশিং,

মীচম মীয়াম্না শান্নবদা শরুক য়াবা মতমদা খক্তদা লৈবাক অসিদা শান্নবগী চৎনবী মরা তাগনি-স্কুলশিংনা শান্নবগী পেরদশিং কো-করিকুলারগী থবক ওইনা লৌদবা মতমদা, পুন্সিগী তঙাইফদবা শরুক অমা ওইনা লৌবা মতমদা শান্নবা চাউখৎলক্কনি। মসি পাংথোকপা মতমদা, হৈথোই-শিংথোইবা শান্নরোয় মশিং হেনগৎলক্কনি অমসুং শান্নবনা শীনফম ওইনিংবা অঙাংশিংদা মখোয়গী ইমুংশিংগী মতেং ফংগনি। মরম অদুনা ঐনা হায়রি: শান্নফমশিংনা স্কৃনশিংদগী হেন্না মরুওইরে অমসুং লম্পাকশিংনা প্লেষ্টেসনশিংদগী হেন্না মরুওইরে। থবক অসিদা নহারোলশিংনা মাংজিল থারবা মতমদা মসি ওইথোকপা ঙমগনি।

মরুপশিং,

ভারতকী যুব শক্তিগী তৌবা অমসুং মাইপাকপদা ঐনা মপুংফানা থাজবা থম্লি। শান্নবগী লমদা নত্ত্রগা খুন্নাইদা লৈবা ওইগেরা, লৈবাক অসিগী নহারোলশিংদা ঐনা হায়নিংলি, অদোম্না শরুক য়াবা অসি ভারতকী মপাঙ্গলনি। করিগুম্বা অদোম শান্নবা পাম্লবদি, শরুক য়ানবা লম্বী কয়া লৈরি। শান্নবগী অনৌবা খুৎলায় অমসুং তেক্নোলোজিশিং থুংলরে। ত্রেনিং অমসুং কোচিং মোদেলশিং লৈরে। থৌরমশিং শীন্নবা দরকার ওইবশিং, চাংদম্নবগী মওং অমসুং শান্নবগী হীরম খুদিংমক্ত অহোংবশিং লৈরে। খুৎলায় দিজাইন তৌবা, স্পোর্তস তেক্নোলোজিশিং, স্পোর্তস মেদিসিন, ন্যুত্রিসন, সাইকোলোজি অমসুং এনালাইতিক্সগুম্বা হিরম কয়াদা নহারোলশিংগী অনৌবা খুদোংচাবশিং লৈরে। অদোম্না হায়রিবা খুদোংচাবশিং অসি নান্থোকহল্লোইদবনি। মরম অদুনা, খন্ন-নৈনবা অসিগী মনুংদা অদোমগী অনৌবা ৱাখলশিং ফোঙদোক্কদবনি। নহারোলশিং শরুক য়াবা অসি বিকসিত ভারত অমগী খ্বাইদগী কনবা মপাঙ্গলনি। অমুক হন্না, অদোম নহারোলশিংদা ঐনা ঐগী য়াইফ পাউজেল পীজরি।

অদোম থাগৎচরি।

বন্দে মাতারম।

দিসক্লেমর: মসি প্রধান মন্ত্রীগী ৱারোলদগী চাউরাকপা হন্দোকপনি। অশেংবা ৱারোল হিন্দীদা পীখি।

***