ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি মালদীবতা হন্দক্তা পাংথোকখিবা পর্লিয়ামেন্তকী ওইবা মীখলশিংদা মালদিবিয়ান দেমোক্রেতিক পার্তী (এম.দি.পি.)না মায় পাক্লকপদা মালদীবকী রাস্ত্রপতি শ্রী ইব্রাহিম মোহমদ সোলিহগী মফমদা নুংঙাইবা ফোংদোকখ্রে।
প্রধান মন্ত্রীনা ফোংদোকখি মদুদি এম.দি.পি.গী অসিগুম্লবা মায় পাক্লকপা অসিনা মসিগী লুচিংবশিংগী পোলিসীশিং অমসুং হোৎনরিবশিং অদু খঙবা ঙমলে। পার্তী অসিনা মালদীব মীয়ামগী য়াইফনবগীদমক অচেৎপা ৱারেপ লৌরি। প্রধান মন্ত্রীনা মীখলদা মায় পাক্লকপদা তরাম্না ওকখি অমদি মালদীবকী দেমোক্রেসী অমসুং দেমোক্রেসীগী ইন্সতিত্যুৎশিং হেন্না চেৎশিলহল্লগনি হায়খি।

প্রধান মন্ত্রীনা ফোংদোকখি মদুদি ভারতনা ‘অহানবদা য়ুমলোন্নবা’ পোলিসীগী মতুং ইন্না অচেৎপা ৱারেপ লৌরি অমদি মালদীবকা লোয়ননা ঐখোয়গী পার্তনরশিপ হেঙ্গৎহন্নবগীদমক মখা তানা থবক তৌগনি। মহাক্না ফোংদোকখি মদুদি ভারতনা মালদীবকী খুন্নাইগী ওইবা অমদি শেল-থুমগী ওইবা চাউখৎ-থৌরাংগী মথৌ তাবশিং অদু মপুং ফাহনগনি।

প্রধান মন্ত্রীনা হান্নগী রাস্ত্রপতি মোহমদ নশীদকসু ৱারী শান্নখি অমদি মহাক্কী মায় পাক্লকপদসু নুংঙাইবা ফোংদোকখি। প্রধান মন্ত্রীনা মালদীবতা দেমোক্রেসীগী মগুনশিংবু চেৎশিলহনবদা শরুক য়ারিবা পুম্নমকপু থাগৎপা ফোংদোকখি অমদি মসিগীদমক ভারতকী মায়কৈদগী মখা তানা মতেং পাংগনি হায়না ফোংদোকখি।