ভারতকী প্রধানমন্ত্রী

রাজ্য সভাগী চিয়রমেন অমসুং লোক সভাগী স্পীকরগী অপুনবা বার্তন্দা ভারত্তা লাক্লিবা মালদীবকী পিপল্স মজলিসকী স্পীকর মোহমদ নশীদনা ঙসি নই দিল্লীদা প্রধান মন্ত্রী শ্রী নরেন্দ্র মোদীগা উনখ্রে।

স্পীকর নশীদপু তরাম্না ওক্লদুনা প্রধান মন্ত্রীনা ফোংদোকখি মদুদি পার্লিয়ামেন্ত অনিগী মরক্তা মরী থম্বা অসি ভারত–মালদীব মরীদা মরুওইবা মচাক অমনি। খোংচৎ অসিনা নাকল অনিগী মরক্তা মরূপ ওইবগী অচেৎপা থোংশিং শেমগৎপদা মতেং ওইরগনি হায়না থাজবা ফোংদোকখি। চহী অসিগী জুন থাদা মালেদা চৎখিবা মহাক্কী অকোনবা খোংচৎ অমসুং মফম অদুদা মহাক্না পিপল্স মজলিসতা ৱা ঙাংখিবা অদু নৌহৌনা নিংশিংলদুনা প্রধান মন্ত্রীনা মালদীবতা লোকতন্ত্রবু হেন্না মপাঙ্গল কলহন্নবগীদমক স্পীকর নশীদনা অকনবা মওংদা লুচিংলিবা অদু থাগৎপা ফোংদোকখি। তংদু লৈতাবা, চাউখৎপা অমসুং শান্তি লৈবা মালদীব অমগীদমক মালদীব সরকারগা থবক তৌমিন্ননবা ভারতকী ৱাফম অদু প্রধান মন্ত্রী মোদীনা অমুক হন্না ফোংদোকখি।

হৌখিবা চহীদা মালদীবতা অনৌবা সরকার শেমখিবা মতুংদগী হেন্না চেৎপা ভারত–মালদীব মরী পুর্ক্নবগীদমক মহাক্না লেপ্পা লৈতনা হোৎনরিবা অদুগীদমক স্পীকর মোহমদ নশীদনা প্রধান মন্ত্রীবু থাগৎপা ফোংদোকখি। মালদীবকী প্রজাশিংগী য়াইফনবগীদমক মালদীবতা পায়খৎলিবা দিবেলপমেন্ত কোওপরেস ইনিসিয়েতিবকীদমকসু মহাক্না প্রধান মন্ত্রীবু থাগৎপা ফোংদোকখি।