ভারতকী প্রধানমন্ত্রী

ইন্তরনেস্নেল ৱুমেন্স দেগী তঞ্জা লাকপদা প্রধান মন্ত্রী শ্রী নরেন্দ্র মোদীনা ঙসি রাজস্থানগী ঝুনঝুনুদা নেস্নেল ন্যুত্রিসন মিসন হৌদোকখ্রে অমসুং বেতি বচাও বেতি পঢ়াও প্রোগ্রাম হেন্না পাকথোক চাওথোকহনখ্রে।

প্রধান মন্ত্রীনা চাওখৎপা ৱাৎলিবা জিলাশিংগী দিস্ত্রিক্ত মেজিস্ত্রেতশিংগা উন্নদুনা ৱারি শান্নখি। বেতি বচাও বেতি পঢ়াও প্রোগ্রাম অসিনা কান্নবা ফংলবা মমাশিং অমসুং অঙাং নুপীমচাশিংগশু মহাক্না ৱারি শান্নখি।

বেতী বচাও বেতী পঢ়াও প্রোগ্রামগী মখাদা খ্বাইদগী ফজনা মথৌ তৌরিবা জিলাশিং অদুদা প্রধান মন্ত্রীনা সর্তিফিকেৎশিং য়েন্থোকখ্রে।

থৌরম অদুদা ৱা ঙাংলদুনা, রাজস্থানগী মুখ্য মন্ত্রী শ্রীমতি ভাসুন্ধরা রাজেনা হায়খি মদুদি, মরুওইবা স্কিম অমা হৌদোক্নবা প্রধান মন্ত্রীনা রাজস্থান খনবিরকপদা মহাক নুঙাইবা ফাওই। ৱুমেন এমপৱার্মেন্তকী মায়কৈরোমদা প্রধান মন্ত্রীনা হোৎনরিবশিং অসিদা রাজস্থান্না মতম পুম্নমক্তা শৌগৎকনি হায়না মহাক্না মখা তাখি।

থৌরম অদুদা তিনখিবা মীয়াম অদুদা ৱা ঙাংলদুনা প্রধান মন্ত্রীনা হায়খি মদুদি তেক্নোলোজীগী শক্তিগী খুত্থাংদা ঝুনঝুনু অসি লৈবাক্কী মফম পুম্নমক্কা শম্নহল্লে। বেতি বচাও, বেতি পঢ়াও খোংজং মায় পাক্না চত্থবগীদমক মহাক্না ঝুনঝুনু জিলাবু থাগৎপা ফোংদোকখি। নুপীমচা অমসুং নুপামচাশিংগী মরক্তা করিগুম্বা মখল অমত্তগী খেৎনবা থম্লোয়দবনি হায়না মহাক্না হায়খি। নুপামচাশিংগুম্না নুপীমচাশিংশু ক্বালিতী এজুকেসন ফংহনবগী মরুওইবা অদু প্রধান মন্ত্রীনা কন্না পনখি। ইচানুপীশিং অসি পোৎলুম নত্তে, মখোয়না ঐখোয়গী লৈবাক্কীদমক মীংচৎ পুরক্লি অমসুং লম কয়াদা মকোক থোংলি হায়না মহাক্না হায়খি।
অঙাংশিংদা মচি ওইবা চিঞ্জাক ফংহনবগী মরুওইবা অদুশু প্রধান মন্ত্রীনা পনখি। মিসন ইনদ্রধণুশনা নুপী অমসুং অঙাংশিংগী পুন্সিদা চাওনা অহোংবা পুরক্লে হায়না মহাক্না হায়খি।

***