ভারতকী প্রধানমন্ত্রী

রাজ্যপালশিংগী ৫০শুবা চহিগী ওইবা মীফম ঙসি নই দিল্লীগী রাস্ত্রপতি ভবন্দা হৌদোকপগী থৌরমগা লাইননা হৌখ্রে। মীফম অসিদা তোঙান তোঙানবা রাজ্যশিংগী রাজ্যপাল অমসুং য়ুনিয়ন তেরিতোরীগী উপ–রাজ্যপালশিংনা শরুক য়ারি মসিদা অহানবা ওইনা ফম পাইরকপা রাজ্যপাল/উপ–রাজ্যপাল ১৭সু য়াওরি। লোইননা মীফম অসিদা নৌনা শেমলবা য়ুনিয়ন তেরিতোরী জম্মু–কশ্মীর অমসুং লদাখকী উপ–রাজ্যপালসু শরুক য়ারি। থৌরম অসিদা ভারতকী রাস্ত্রপতি, উপ–রাস্ত্রপতি, প্রধান মন্ত্রী, গৃহ মন্ত্রী অমসুং জল শক্তি মন্ত্রীনা শরুক য়াখি।

প্রধান মন্ত্রীনা থৌরম অদুদা ৱা ঙাংলদুনা ১৯৪৯দগী হৌরকখিবা মীফম অসিগী শাংলবা পুৱারী অদু পনখি। মহাক্না হৌজিক্কী ৫০শুবা তাঙ্কক্কী মীফম অসিবু মমাংগী মীফমশিংদা ফংলকখিবা অমসুং ফলশিং অদুগী মমল লেপ্ননবা অমসুং তুংলমচৎকী মশক–মওং লেপ্ননবগীদমক অমত্তা ঙাইরবা তাঞ্জা অমনি হায়না ফোংদোকখি। মহাক্না হায়খি মদুদি কোওপরেতিব অমসুং কম্পিতেতিব ফেদরেল স্ত্রকচর অসি মাই পাকহনবদা রাজ্যপালগী ফম অসিগী চাউরবা থৌদাং য়াওই। মীফম অসি রাজ্যপালশিং অমসুং উপ–রাজ্যপালশিংগীদমক্তা ৱাখল্লোনশিং পীথোক–পীশিন তৌনবা অমসুং অমনা অমগী খঙ–হৈবশিং অদু তম্নবগা লোইননা রাজ্য খুদিংমক্কী অমসুং য়ুনিয়ন তেরিতোরীশিংগী থোইদোক–হেন্দোকপশিং অমসুং তোঙান তোঙানবা তঙাইফদবশিং অমসুং মখোয়গী মনুংচনবা খ্বাইদগী থোইবা মালেমগী ওইবা চৎনবীশিং অদু শিজিন্ননবা তাঞ্জা পীরি। প্রধান মন্ত্রীনা হায়খি মদুদি মখোয়গী এদমিনিস্ত্রেতিব স্ত্রকচরগী মরমদগী য়ুনিয়ন তেরিতোরীশিং অসি চাউখৎপগী খোংজেলদা ফিদম অমা ওইহনবা য়াই।

প্রধান মন্ত্রীনা হায়খি মদুদি ২০২২দা ভারতনা মসিগী মনীং মখা তম্বগী চহি ৭৫ শুবা কুমওন অমসুং ২০৪৭তা ১০০শুবা কুমওন থৌরম পাংথোক্কনি। মসিদা এদমিনিস্ত্রেতিব মেচিনরী অসি লৈবাক্কী মীয়ামগা নকশিন্নহনবা অমসুং অচুম্বা লম্বী উৎপদা রাজ্যপালগী থৌদাং অদুক্কী মতিক মরু ওই। ঐখোয়না ভারতকী সংবিধান চৎনখিবগী ৭০শুবা মপোক কুমওন পাংথোক্কদৌরি। মসিদা রাজ্যপালশিং অমসুং রাজ্য সরকারশিংবুসু ভারতকী সংবিধানগী তোঙান তোঙানবা সর্বিস এস্পেক্তশিং অদু ফোংদোক্নবগী মাইকৈদা থবক তৌগদবনি, মরু ওইনা মীয়ামগী থৌদাং অমসুং মথৌগী মরমদা। মসিদগী অচুম্বা মওংদা পুম্নমক্না শরুক য়াবা লৈঙাক অমা শেমগৎপদা মতেং ফংগনি।

প্রধান মন্ত্রীনা হায়খি মদুদি চহি অসিদা ঐখোয় মহাত্মা গান্ধীগী ১৫০শুবা মপোক কুমওন পাংথোক্লি। মরম অসিনা রাজ্যপাল অমসুং উপ–রাজ্যপালনা তাঞ্জা অসি গান্ধীবাদীগী ৱাখল্লোন অমসুং মগুনশিং অদু ঐখোয়গী সংবিধানগা মরু ওইবা য়ুম্ফম অমা ওইরিবা অদুগা মরী লৈনৈ হায়বদু উৎননবগীদমক শিজিন্নবা য়াই। য়ুনিভর্সিতীশিংগী চাঞ্ছেল্লর ওইনা মখোয়গী থৌদাংশিংদা রাজ্যপালনা ঐখোয়গী নহারোলশিংগী মরক্তা লৈবাক শেম্বা অসিবু য়োকখৎনবা অমসুং মখোয়বু অহেনবা এচিবমেন্তলোমশিংদা পুশিন্নবা ইথিল পীবা য়াই।

প্রধান মন্ত্রীনা ৱা ঙাংবা লোইশিল্লকপদা রাজ্যপাল অমসুং উপরাজ্যপালশিংদা হায়খি মদুদি মখোয়না মীচম মীয়ামগী মথৌ তাবশিং অদুদা পুক্নীং থিংজিন্দুনা মখোয়গী সংবিধান্না পীবা থৌদাং অদু পাংথোকপীয়ু। প্রধান মন্ত্রীনা রাজ্যপালশিংদা হায়খি মদুদি মখোয়না সেদ্যুল ত্রাইবশিং, মাইনোরিতী কম্যুনিতীশিং, নুপীশিং অমসুং নহারোলশিং য়াওনা শোৎথহৌরবা কাংলুপশিংবু শৌগৎনবগী মাইকৈদা থবক তৌবীয়ু। মসিগীদমক্তা মখোয়না রাজ্য সরকারশিংদা পুন্না থবক তৌমিন্নবতা নত্তনা লৈরিবা স্কিমশিং অমসুং প্রোগ্রামশিং অসিবু থবক্তা ওন্থোক্নবা হোৎনবদা পুক্নীং চংবা য়াই। প্রধান মন্ত্রীনা থবক পীবা অমসুং লাইরবশিং অমসুং দলিৎশিংবু হেন্না য়াইফহন্নবগী তাঞ্জা লৈরিবা হকশেলগী থবক, মহৈ–মশিং অমসুং তুরিজমগী লমদা অখন্ননা পনখি। মহাক্না হায়খি মদুদি রাজ্যপাল ওফিস অসি অখন্নবা পান্দমশিং খুদম ওইনা ত্যুবর্কুলোসিসকী মতাংদা এৱ্যার্নেস শন্দোকপগুম্বা অমসুং ২০১৫ ফাওবগী মনুংদা লাইনা অসি মুথৎপগী থবক্তা শিজিন্নবা য়াই।

প্রধান মন্ত্রীনা হরাওবা ফোংদোকখি মদুদি চহি অসিগী মীফম অসিদা ত্রাইবেলগী ৱাফম, লৌই–শিংউ ফগৎহনবা, জল জীবন মিশন, অনৌবা মহৈ–মশিংগী পোলিসী অমসুং হিংবদা লাইথোকহন্নবগীদমক লৈঙাক্না অসিগুম্বা ৱাফমশিং অমসুং সমস্যাশিংদা সব–গ্রুপ মঙাদা পাক–শন্না খন্ন–নৈনগনি মদুগী রিপোর্তকী মতুং ইন্না কোন্না শরুক য়ারিবা রাজ্যপাল পুম্নমক্না অচৌবা ফোর্মেত্তা খন্ন–নৈনগনি।