ভারতকী প্রধানমন্ত্রী

ভিদিও কনফরেন্সকী খুৎথাংদা ঙসি প্রধান মন্ত্রী নরেন্দ্র মোদীনা রেদিও জোক্কিশিংগা ৱারি শানখি ।

কোভিদ-১৯গী মতাংদা মীয়ামদা ভাব তাহনবদা রেদিও জোক্কিশিংনা লৌরিবা থৌদাং প্রধান মন্ত্রীনা থাগৎখি । মহাক্না হায়খি অথিংবা লৈরবা ফাওবদা রেদিও জোক্কিশিংনা মখোয়গী মথৌ পাংথোকপা অমসুং য়ুমদগী থৌরমশিং রেকোর্দ তৌবা অসি থাগৎলি ।

প্রধান মন্ত্রীনা হায়খি ভারতকী য়ুমথোং মিল্লিয়ন কয়াদা রেদিও জোক্কিশিং অসি ইমুংগী মীওইশিংগুমবনি । রেদিও জোক্কিশিংনা মীয়ামগী পুক্নিং থৌগৎপদা অমসুং অরানবা থাজবশিং কোকহনবদা অচৌবা থৌদাং লৌরি ।

সরকারনা য়াম্না য়াংনা মীয়ামগী য়াইফনবা থবকশিং পায়খৎনবা মীয়াম্না থেংনরিবা খুদোংচাদবশিং খঙহল্লক্নবা প্রধান মন্ত্রীনা রেদিও জোক্কিশিংদা হায়জখি ।

লৈবাক অসি অমতা ওইনবা কোরোভাইরস নাবদগী ফারবা মীওইশিংগী অফবা ৱারিশিং লৈবাক্কী মফম কয়াদা রেদিও জোক্কিশিংনা য়ৌহনগনি হায়না প্রধান মন্ত্রীনা থাজবা থমখি । মহাক্না হায়খি রেদিও জোক্কিশিংনা থবক ফজনা পাংথোকপা পুলিস ওফিসারশিং, দোক্তরশিং, নর্সশিং, ৱার্দ বোইজশিংগী ৱারি মীয়ামদা খঙহনগদবনি ।

প্রধান মন্ত্রীনা হায়খি মখোয় ভাইরস পকলমগনি হায়না মীয়াম্না অকিবা ফাওবদগী দোক্তরশিং, হকশেলগী মীওইশিং অমসুং এয়রলাইনগী স্তাফশিংদা তাথি-তাওইনা তৌবগী ৱারি লিবা অসি য়াম্না মরুওই , অসিগুম্বা শিংনবশিং অসি মায়োক্নগদবনি । মীয়ামগী য়াইফনবা পুলিসকী মীওইশিংনা কৎথোকপগা লোয়ন্না থবক তৌরিবা অসি মীয়ামদা খঙহনগদবনি । লাইচৎ অসি থেংন্নবা ভারতমচা ক্রোর ১৩০না মশানা য়ানা থবক মতেং পাংগদবনি ।

প্রধান মন্ত্রীনা হায়খি ৱারবা মতম অসিদা লায়রবশিং অমসুং তোল্লবশিং মতেং পাংনবা থবক কয়া সরকারনা লাউথোক্লে । হায়রিবা পাউ অসি কান্নবা ফংগদৌরিবা মীওইশিংদা য়াংনা য়ৌহনবা অসি য়াম্না মরুওই । মীয়ামদগী লাপ্না লৈবা অমসুং মশা-মরোমদোম নাইতোম লৈবগী মতাংদা মীয়ামদা খঙহনবা অমসুং লাউথোকপগী মতাংদা রেদিও জোক্কিশিংগী মরুওইবা থৌদাং লৌগনি ।

২০১৪দগী হৌনা মাইপাক্লবা রেদিওগী থৌরম মন কি বাত্তা মহাক্না শরুক য়াদুনা রেদিও জোক্কিশিংগী কাংলুপতা প্রধান মন্ত্রীসু য়াওরে হায়না রেদিও জোক্কিশিংনা ফোংদোকখি । প্রধান মন্ত্রীনা কৌখিবা মীয়ামগী কারফিয়ুদা অমুক্তা ওইখিদ্রিবা মওংদা মীয়াম্না শরুক য়াখিবা অমসুং মহাক্কী অনৌবা ৱাখল্লোন অদু রেদিও জোক্কিশিংনা থাগৎখি অমসুং হায়খি লাইচৎ অসি থেংন্নবা মখোয়না লৈবাক্কী খোল্লাউ অমা ওইবদা মখোয় হরাওগনি ।

তোকঙাশিং শন্দোকপা থিংবদা ওল ইন্দিয়া রেদিওনা মরুওইবা থৌদাং লৌরি হায়না প্রধান মন্ত্রীনা থমখি । তোকঙাশিং শন্দোকপা থিংবদারেদিও জোক্কিশিংনা মরুওইবা থৌদাং লৌনবা মহাক্না হায়জখি।

খুন্নাইদা অফবা অমসুং অচুম্বা লিচৎ অমা লৈহন্নবা থবক পায়খৎনবা প্রধান মন্ত্রীনা রেদিও জোক্কিশিংদা তকশিনখি । মহাক্না হায়খি কোভিদ-১৯গী পীরক্লিবা শিংনবশিং থেংনবদা পুন্না থবক তৌমিন্নবগী ৱাখল্লোন লৈবা অসি য়াম্না মরুওইবা অমনি ।

ৱারি শানবা অদুদা ইনফোরমেসন এন্দ ব্রোদকাস্তিংগী য়ুনিয়ন মিনিস্তর অমসুং ইনফোরমেসন এন্দ ব্রোদকাস্তিংগী সেক্রেতরিসু শরুক য়াখি ।