ভারতকী প্রধানমন্ত্রী

ঐহাক্কী নুংশিরবা লৈবাক মীয়াম পুম্নমক, নমস্কার!

হৌখিবা নুমিৎ খরনি অসিদা, ঐখোয় পুম্নমক্না ঐখোয়গী লৈবাক অসিগী মপাঙ্গল অমসুং খাঙবা কনবগী শক্তি অনিমক উবা ফংলে। অহানবদা, ভারতকী মীয়ামগী মায়কৈদগী ঐনা ভারতকী থৌনা ফরবা লান্মীশিং, আর্মদ ফোর্সেস, ঐখোয়গী ইন্তেলিজেন্স এজেন্সীশিং অমসুং ঐখোয়গী সাইন্তিস্তশিংদা ইকায় খুম্নবা উৎচরি। ঐখোয়গী থৌনা ফরবা লান্মীশিংনা ওপরেসন সিন্দুরগী পান্দমশিং ফংনবগীদমক চাউরবা থৌনা উৎখি। ঐহাক্না মখোয়গী থৌনাগীদমক ইকায় খুম্নবা উৎচরি। ঐহাক্না মসিগী থৌনা অসি লৈবাক অসিগী মমা ওইবীশিং, ইচে ইচল অমসুং ইচানুপী খুদিংমক্তা কত্থোকচরি।

মরুপশিং,

এপ্রিল ২২দা পহলগামদা তেরোরিস্তশিংনা উৎখিবা মীনুংশি লৈতবগী থৌওং অদুনা লৈবাক অপুনবা অমসুং মালেম পুম্বা নুংনাংহনখি। মখোয়গী ধর্মদা য়ুম্ফম ওইদুনা মখোয়গী ইমুং-মনুং অমসুং মখোয়গী অঙাংশিংগী মমাংদা ইচম চমজরবা মীওইশিংবু মীনুংশি লৈতনা হাৎপীখিবা অসি তেরোরিজম অমসুং অকি তুজুংবগী মশক অমনি। মসি লৈবাক অসিগী অপুনবা অমসুং অমত্তা ওইববু থুগায়নবা থোইদোক হেন্দোকনা হোৎনবা অমনি। ঐগী ওইনা মসি য়াম্না অৱাবা ওইখি। মসিগী তেরোরিস্ত এতেক্কী মতুংদা, লৈবাক পুম্বনা, নাগরিক খুদিংমক, খুন্নাই খুদিংমক, কাংলুপ খুদিংমক, রাজনিতীগী দল খুদিংমক্না অমত্তা ওইনা তেরোরিজমগী মায়োক্তা অকনবা থবক লৌখৎনবা লেপখি। ঐখোয়না তেরোরিস্তশিং মুত্থৎনবা ভারতকী লান্মীশিংদা মপুং ফানা অয়াবা পীখি। অমসুং ঙসিদি তেরোরিস্ত খুদিংমক, তেরোরিস্ত ওর্গনাইজেসন খুদিংমক্না ঐখোয়গী ইচে ইচল অমসুং ইচানুপীশিংগী সিন্দুর মুত্থৎপগী মহৈ অদু ফংখ্রে।

মরুপশিং,

ওপরেসন সিন্দুর অসি মমিং অমা খক্তা নত্তে অদুবু মসি লৈবাক অসিগী মীওই মিলিয়ন কয়াগী পুক্নিংগী ইথিল অমনি। ওপরেসন সিন্দুর অসি অচুম্বা ৱায়েলগীদমক ঐখোয়গী অচেৎপা থৌদাং অমনি। মে ৬কী অথেংবা নুমিদাং অমসুং মে ৭গী অঙনবা অয়ুক্কী মতমদা, মালেম পুম্বনা মসিগী অচেৎপা ৱাফম অসি তশেং তশেংনা ওইরকপা উখি। ভারতকী লান্মীশিংনা পাকিস্তানদা লৈবা তেরোরিস্তশিংগী মফমশিং অমসুং মখোয়গী ত্রেনিং সেন্তরশিংদা অকনবা মওংদা লান্দারকখি। তেরোরিস্তশিংনা ভারতনা অসিগুম্বা অচৌবা ৱারেপ অমা লৌবা ঙমগনি হায়না খল্লমদে। অদুবু লৈবাক অসি অমত্তা ওইনা লৈরবা, নেসন ফার্ষ্তকী ৱাখল্লোন লৈরবা অমসুং নেস্নেল ইন্তরেস্ত অসি খ্বাইদগী মরু ওইরবা মতমদা, অচেৎপা ৱারেপশিং লৌগনি অমসুং মহৈশিং ফংলগনি।

ভারতকী মিসাইল অমসুং দ্রোনশিংনা পাকিস্তানদা লৈবা তেরোরিস্ত বেজশিংদা লান্দাবা মতমদা, তেরোরিস্ত ওর্গনাইজেসনশিংগী বিলদিংশিং অদু খক্তা নত্তনা মখোয়গী থৌনা অদুসু য়াম্না শোকহনখি। বাহাৱলপুর অমসুং মুরিদকেগুম্বা তেরোরিস্ত বেজশিং অসি মালেমগী তেরোরিজমগী য়ুনিভর্সিতীশিংনি। মালেমগী অচৌবা তেরোরিস্ত এতেক্তশিং, সেপ্তেম্বর ১১ ওইরো, লন্দন ত্যুব বোম্বিং ওইরো, নত্রগা হৌখিবা দিকেদ কয়াদা ভারত্তা থোকখিবা অচৌবা তেরোরিস্ত এতেক্তশিং ওইরো মখোয়গী হৌরকফম অসি তেরোরিস্তশিংগী মফমশিং অসিগা মরী লৈনৈ। তেরোরিস্তশিংনা ঐখোয়গী ইচে ইচলশিংগী সিন্দুর মুত্থৎখি অমসুং ভারতনা মখোয়গী তেরোরিস্ত হেদক্বার্তৱার্তশিং মুত্থৎতুনা পাউখুম পীখি। ভারতনা লান্দাবদা তেরোরিস্ত ১০০ হেন্না শিখ্রে। তেরোরিস্ত লুচিংবা কয়ানা হৌখিবা চহী কুনলোম অমসুং কুন্থ্রারোম অসিদা পাকিস্তানদা অথিংবা লৈতনা চৎথোক চৎশিন তৌরি অমসুং মখোয়না ভারতকী মায়োক্তা লেপ্লি। ভারতনা মখোয়বু অমুক্তা হাৎখি।

মরুপশিং,

ভারতকী থৌওং অসিনা পাকিস্তানবু থোইদোক হেন্দোক্না নুংঙাইতবা ফাওহল্লি। মসিদা পুক্নীং লাংতক্নহনখি অমসুং মসিনা অতোপ্পা শিংননীংঙাই ওইবা থৌওং অমা অমুক পাংথোকখি। তেরোরিজমগী মায়োক্তা ভারতনা চত্থরিবা স্ত্রাইক অসিদা মতেং পাংবগী মহুৎতা, পাকিস্তান্না ভারত মক্তদা ওনশিন্দুনা লান্থেংনবা হৌরকখি। পাকিস্তান্না ঐখোয়গী স্কুলশিং, কোলেজশিং, গুরুদ্বারাশিং, লাইশঙশিং অমসুং মীচমশিংগী য়ুমশিংবু পান্দম থমখি। পাকিস্তাননা ঐখোয়গী মিলিতরী বেজবু পান্দম থমখি। অদুবু মসিগী থৌওং অসিদা পাকিস্তান মশামক মীয়াম্না খঙনখি। ভারতকী মাংদা পাকিস্তানগী দ্রোনশিং অমসুং মিসাইলশিং অদু করম্না চরুগুম্না কেনখিবগে হায়বদু মালেমনা উখি। ভারতকী মপাঙ্গল কনবা এয়র দিফেন্স সিস্তেম্না মখোয়বু অতিয়াথক্তা অদুমক থুগাইখি। পাকিস্তাননা ঙমখৈদা লান্দারক্নবা শেম শাদুনা লৈরম্মি, অদুবু ভারতনা পাকিস্তানগী হেক ময়োল মক্তদা লান্দাখি। ভারতকী দ্রোনশিং অমসুং মিসাইলশিংনা ময়েক শেংনা লান্দাখি। মখোয়না পাকিস্তানগী এয়র ফোর্সেসকী এয়র বেজশিং নংহনখি, মদুগীদমক পাকিস্তাননা চাউথোকচখি। ভারতনা পাকিস্তানদা অহানবা নুমিৎ অহুম অসিদা অমুক্তা উখিদ্রিবা মওংদা তৌদ্রিবা মওংদা য়াম্না চাউনা অশোক-অপন থোকহনখি। মরম অদুনা ভারতকী লান্দাগী মতুংদা, পাকিস্তাননা লান্থোক্নবগী পাম্বৈ থিবা হৌরকখি। পাকিস্তাননা মালেমদা তেন্সন হন্থহন্নবা হায়জখি। অমসুং য়াম্না চাউনা মাং-তাকখ্রবা মতুংদা, পাকিস্তানগী লান্মীনা মে ১০গী নুমিদাংৱাইরমদা ঐখোয়গী দি.জি.এম.ও.গা পাউ ফাওনখি। মতম অদুদা ঐখোয়না তেরোরিজমগী ইনফ্রাস্ত্রকচরবু পাক-শন্না থুগাইখি। তেরোরিস্তশিং অদু মুত্থৎখি। ঐখোয়না পাকিস্তানগী ময়াইদা লিংখৎখিবা তেরোরিস্ত কেম্পশিংবু থুগাইখি। মরম অদুনা, পাকিস্তান্না আপিল তৌরকপা মতমদা অমসুং মসিনা তেরোরিস্তকী থবক থৌরমশিং নৎত্রগা মিলিতরী ওপরেসন্দা মখা তানা য়াওররররোই হায়না হায়রকপা মতমদা, ভারতনা মদু খন্নখি। অমসুং ঐহাক্না অমুক্কা হন্না হায়জরি, ঐখোয়না পকিস্তানগী তেরর অমসুং মিলিতরী কেম্পশিংগী মায়োক্তা পাংথোকপা পাউখুমগী থবকশিং লেপখ্রে। লাক্কদৌরিবা নুমিৎ খরনি অসিদা ঐখোয়না পাকিস্তানগী খোঙথাং খুদিংমক পাকিস্তাননা মখা তানা করম্বা ফিরেপ লৌগদগে হায়বগী ক্রাইতেরিয়াদা য়ুম্ফম ওইরগা য়েংশিনগনি।

মরুপশিং,

ভারতকী ফোর্স অহুম, ঐখোয়গী এয়র ফোর্স, ঐখোয়গী আর্মী অমসুং ঐখোয়গী নেভী, ঐখোয়গী বোর্দর সেক্যুরিতী ফোর্স- বি.এস.এফ. সর্জিকেল স্ত্রাইক অমসুং এয়র স্ত্রাইককী মতুংদা, হৌজিক ওপরেসন সিন্দুর অসি তেরোরিজমগী মায়োক্তা ভারতকী পোলিসী ওইরে। ওপরেসন সিন্দুরনা তেরোরিজমগী মায়োক্তা ঐখোয়গী লান্থেংনবদা অনৌবা থাক অমা থম্বা ঙমখ্রে অমসুং অনৌবা পেরামিতর অমসুং অনৌবা মওং অমা শেমখ্রে।

অহানবদা, করিগুম্বা ভারততা তেরোরিস্ত এতেক্ত অমা থোক্লবদি, মদুগী চপ চাবা পাউখুম পীরগনি।

ঐখোয়না ঐখোয়গী তর্মদা খক্তদা চুনবা পাউখুম অমা পীগনি। তেরোরিজমগী হৌরকফম ওইরিবা মফম খুদিংমক্তা ঐখোয়না অকনবা থবক লৌখৎলগনি।

অনিশুবদা, ভারতনা ন্যুক্লিয়র ব্লেকমেল অমত্তা খাঙদুনা লৈরোই। ভারতনা ন্যুক্লিয়র ব্লেকমেলগী মরুমদা শেমগৎলক্লিবা তেরোরিস্তশিংগী মফমশিংদা অকনবা অমসুং পুক্নিং চিংশিন্নিংঙাই ওইবা মওংদা লান্দাগনি।

অহুমশুবদা, ঐখোয়না তেরোরিজম স্পোন্সর তৌরিবা সরকার অমসুং তেরোরিজমগী মাস্তরমাইন্দশিংগী মরক্তা খেন্নবা থম্লোই। ওপরেসন সিন্দুরগী মতমদা মালেমনা অমুক হন্না পাকিস্তানগী অরুবা মশক অদু উখি, মদুদা পাকিস্তানগী মকোক থোংবা লান্মী ওফিসরশিংনা শিখিবা তেরোরিস্তশিং অদুদা নুংঙাইবা ফোংদোক্নবা লাকখি। মসি স্তেত-স্পোন্সর তৌরিবা তেরোরিজমগী মপাঙ্গল লৈরবা খুদম্নি। ঐখোয়না ভারত অমসুং ঐখোয়গী প্রজাশিংবু খুদোংথীবা অমহেক্তদগী ঙাকথোক্নবা লেপ্পা লৈতনা খোঙথাং লৌখৎকনি।

মরুপশিং,

ঐখোয়না লানফম অসিদা পাকিস্তানবু মতম খুদিংদা মাইথিবা পীখি। অমসুং মসিগী মতম অসিদা ওপরেসন সিন্দুরনা অনৌবা মায়কৈ অমা হাপচিনখ্রে। ঐখোয়না লৈকংলা অমসুং চীংশিংদা ঐখোয়গী তৌবা ঙম্বশিং উৎলি অমসুং ন্যু এজ ৱারফেয়রদা ঐখোয়গী মপাঙ্গল অদুসু উৎলি। মসিগী ওপরেসন অসিগী মনুংদা ঐখোয়গী মেদ ইন ইন্দিয়া খুৎলায়শিংগী থাজবা অসিসু চাংয়েং তৌখি। ঙসি মালেম অসিনা ২১শুবা চহিচাগী লানফম অসিদা মেদ ইন ইন্দিয়া দিফেন্স ইক্বিপমেন্তকী মতম লাক্লে হায়বা উবা ফংলি।

মরুপশিং,

তেরোরিজমগী মওং খুদিংমক্কী মায়োক্তা ঐখোয় অমত্তা ওইবনা ঐখোয়গী খ্বাইদগী চাউবা শক্তি ওইরি। মসি লানগী মতম নত্তে অদুবু মসি তেরোরিজমগী মতমসু নত্তে। তেরোরিজমগী মায়োক্তা জিরো তোলরেন্স লৈবা অসি হেন্না ফবা মালেম অমগী গেরেন্তীনি।

মরুপশিং,

পাকিস্তানগী লান্মী, পাকিস্তান সরকারনা তেরোরিজমবু পুক্নিং থৌগৎলিবা মওংদা, মসিনা নোংমদি পাকিস্তানবু থুগায়গনি। করিগুম্বা পাকিস্তাননা হিংবা পাম্লবদি, মসিনা মসিগী তেরোরিস্ত ইনফ্রাস্ত্রকচরবু থুগাইগদবনি। শান্তি পুরক্নবা অতোপ্পা লম্বী অমত্তা লৈতে। ভারতকী স্তেন্দ অসি য়াম্না ময়েক শেংলে… তেরোর অমসুং ৱারী শানবসি অমত্তা ওইনা চৎমিন্নবা য়ারোই… তেরোরিজম অমসুং ললোন-ইতিক অসি অমত্তা ওইনা চৎমিন্নবা ঙম্লোই… ঈশিং অমসুং ঈশিং অসি অমত্তা ওইনা চেল্লোই।

ঙসি, ঐহাক্না মালেমগী কম্ম্যুনিতীদা মসিসু হায়জনীংই মদুদি ঐখোয়না ফোঙদোক্লিবা পোলিসী অসিদি: করিগুম্বা পাকিস্তানগা ৱারী শান্নরবদি, মসি তেরোরিজমগী মতাংদা খক্তা ওইগনি; অমসুং করিগুম্বা পাকিস্তানগা ৱারী শান্নরবদি, মসি পাকিস্তাননা পায়শিল্লিবা কাশ্মীর (পি.ও.কে.) গী মতাংদা খক্তনি।

ইকায় খুম্নরবা লৈবাক মীয়াম,

ঙসি বুদ্ধ পূর্ণিমা নুমিৎনি। ভগবান বুদ্ধনা ঐখোয়দা শান্তিগী লম্বী তাকপীরি। শান্তিগী লম্বী অসিসু শক্তিগী খুত্থাংদা চৎলি। মীওইবা খুন্নাইনা শান্তি অমসুং চাউখৎপগী মায়কৈদা চংশিনগদবনি। ভারত মচা খুদিংমক্না শান্তি লৈ হিংবা ঙমগদবনি, অমসুং বিক্সিত ভারত (চাউখৎলবা ভারত) অমগী মঙলান মপুং ফাহনবা ঙমগদবনি। মসিগীদমক্তা, ভারতনা মপাঙ্গল কনবা য়াম্না মথৌ তাই। অমসুং মথৌ তাবা মতমদা মসিগী শক্তি অসি শীজিন্নবা অসিসু মথৌ তাই। অমসুং হৌখিবা নুমিৎ খরনি অসিদা, ভারতনা মসিমক পাঙথোকখ্রে।

ঐহাক্না অমুক্কা হন্না ভারতকী লান্মী অমসুং আর্মদ ফোর্সেসতা ইকায় খুম্নবা উৎচরি। ভারত মচা খুদিংমক্কী থৌনা, ভারতকী মীয়ামগী অপুনবগী অচেৎপা ৱাশক অমসুং অচেৎপা ফিরেপ অসিদা ঐহাক্না ইকায় খুম্নবা উৎচরি।

থাগৎচরি,

ভারত মাতা কী জয়!

ভারত মাতা কী জয়!

ভারত মাতা কী জয়!

খঙহঞ্জবা: মসি প্রধান মন্ত্রীনা থমখিবা ৱারোলগী চাউরাকপা হন্দোকপনি। অশেংবা ৱারোলদি হিন্দীদা পীখি।

***