ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি ওস্ত্রেলিয়াগী প্রধান মন্ত্রী ইকাইখুম্নজরিবা শ্রী এন্থোনী অলবানিজ অমসুং প্রিমিয়র ওব ভিক্তোরিয়া ইকাইখুম্নজরিবা জসিন্তা এলানগা লোইননা ভারত-ওস্ত্রেলিয়াগী মরক্তা লৈরক্লিবা শান্নখোৎনবগী মরী অসিবু হরাওবা ফোংদোকপা থৌরম অমগীদমক চৎখি। ওস্ত্রেলিয়াগী শক্নাইরবা শান্নরোইশিংগী মরক্তা স্তিব ৱোগ অমসুং মিস লিসা স্থালেকরসু থৌরম অদুদা শরুক য়াখি। খোংচৎ অদুনা শান্নখোৎনবা, নাৎকী থৌরমশিং লান্নবা অমসুং মীয়ামগী মরক্তা লৈনবা মরীনা ভারত ওস্ত্রেলিয়া কম্প্রিহেন্সিব স্ত্রেতেজিক পার্তনরশিপতা পীরিবা মরুওইবশিং পুখৎলি।

থৌরম অদুদা প্রধান মন্ত্রী অনিনা ইন্দিয়া-ওস্ত্রেলিয়া স্পোর্তস কোলাবোরেসন রোদমেপ অমা ফোংখি, মসিনা শান্নখোৎনবগী ত্রেনিং অমসুং কেপাসিতী শাগৎপা, স্পোর্তস সাইন্স অমসুং তেক্নোলোজী, অমসুং স্পোর্তস ইন্দস্ত্রী অমসুং ইনভেস্তমেন্ততা মতেং পীনহনগনি।

তিল্লিবা মীয়ামদা ৱা ঙাংলদুনা প্রধান মন্ত্রী মোদীনা শান্নখোৎনবনা মীয়াম্বু অমত্তা ওইনা পুনশিল্লিবা লিপুন অসিবু পনখি অমসুং রোদমেপ অসিনা লৈবাক অনি অসিগী শান্নখোৎনবগী মরী অসি হেন্না পাকথোক চাউথোকহনগনি হায়না ফোংদোকখি। মহাক্না ওস্ত্রেলিয়াবু নুপীগী ৱর্ল্দ কপ লৌরকপদা হরাওবা ফোংদোকখি। প্রধান মন্ত্রী মোদীনা হায়খি মদুদি ভারত অমসুং ওস্ত্রেলিয়ানা পুন্না মালেমগী শান্নখোৎনবগী লমদা মশক থোকনা চহি তরারোম অসিদা চৎমিন্নরি। ভারতনা কম্মনৱেল্থ গেম্স ২০৩০ গী য়ুম্বু ওইবগা লোইননা ব্রিসবেন ওলিম্পিক্স ২০৩২ না ওস্ত্রেলিয়ানা য়ুম্বু ওইগদৌরি। মহাক্না পনখি মদুদি হায়রিবা খুমাং চাউশিনবশিং অসিনা শান্নখোৎনবা অমসুং মসিগা মরী লৈনবা হীরমশিংদা হেন্না নক্ননা মতেং পীনরগনি।

খোংচৎ অসিগী মনুংদা লুচিংবশিংনা কবাদি, ওস্ত্রেলিয়ন ফুতবোল অমসুং ক্রিকেত একজিবিসন গেম্সতা শরুক য়ারিবা নহা ওইরিবা শান্নরোইশিংগা ৱারী ৱাতাই তৌই।

খোংচৎ অসিনা মশক নাইরবা শান্নখোৎনবা অমসুং মীয়ামগী মরক্তা লৈনরিবা ভারত অমসুং ওস্ত্রেলিয়াগী মরী অদু উৎলি।  

 ***