ইন্দিয়ন রেলৱেজকী মেক ইন ইন্দিয়াগী হোৎনরিবা অসি ভারতকী অহানবা সেমি হাই স্পিদ ত্রেন বন্দে ভারত এক্সপ্রেস ওইনা শাফোংলে।
প্রধান মন্ত্রী নরেন্দ্র মোদীনা নই দিল্লী–কানপুর–ইলাহবাদ–বরানসীগী রুৎতা চেনগদবা ত্রেন অসি হয়েং অয়ুক নই দিল্লী রেলৱে স্তেসনদগী লমথাগনি। থৌরম অসিদা মহাক্না ত্রেন মনুংদা ফংলিবা খুদোংচাবশিং অদু য়েংশিনগনি অমদি মীয়ামদা ৱা ঙাংগনি।
ত্রেন অসিগী অহানবা খোংচৎতা রেলৱেজ অমসুং কোয়লাগী কেন্দ্রগী মন্ত্রী শ্রী পিয়ুশ গোয়লনা ওফিসিয়েলশিং অমসুং মীদিয়াগী মীওইশিংগী তীম অদু লুচিংগনি। ত্রেন অসি মরক্তা কানপুর অমসুং ইলাহবাদতা খামগনি মফমশিং অদুদা শক্নাইরবশিং অমসুং মীয়াম্না তরাম্না ওক্কনি।
বন্দে ভারত এক্সপ্রেস অসি খ্বাইদগী য়াংবা ওইনা পুংদা কিলোমীতর ১৬০ ফাওবা চেনবা ঙম্মি অমসুং শতাবদি ত্রেনগুম্না ত্রাভেল ক্লাসশিং হেন্না ফবা খুদোংচাবশিংগা লোয়ননা য়াওরি। মসিনা পেসেঞ্জরশিংদা মপুংফানা অনৌবা ত্রাভেল এক্সপরিয়েন্স অমা ফংহন্নবা পান্দম থম্লি।
ত্রেন অসিনা নই দিল্লী অমসুং বরানসীগী মরক্তা লৈরিবা অরাপ্পা অসি পুং ৮দা য়ৌগনি অমসুং নিংথৌকাবা অমসুং শগোলশেল নত্তনা নুংতিগী চেনগনি।
কোচ খুদিংমক্তা ওতোমেতিক ওইবা থোংশিং, জি.পি.এস.তা য়ুমফম ওইবা ওদিও–ভিজুয়েল পেসেঞ্জর ইনফোর্মেসন সিস্তেম, ইন্তর্তেনমেন্ত পর্পজকীদমক হোৎস্পোৎ ৱাই–ফাই, অমসুং য়াম্না নুংঙাইরবা ফমফম য়াওরি। তোইলেৎ খুদিংমক বাইও–ভেক্যুম মওংনি। মৈ থানবগী মওংসু মখল অনি লৈরি। কোচ খুদিংমক্তা পেন্ত্রীগী খুদোংচাবা ফংগনি মদুনা ফোং ফোং শাবা চাকলেন অমসুং অশাবা অমসুং অইংবা থক্নবশিং ফংহনগনি।
বন্দে ভারত এক্সপ্রেস অসিগী এয়র কন্দিসন কোচ ১৬ লৈরি মদুগী মনুংদা ২দি একজিক্যুতিব ক্লাসকী কোচশিংনি। মসিদা অপুনবা পেসেঞ্জর ১,১২৮গী ফমফম য়াওরি।
গ্রীন ফুৎপ্রিন্তশিং হাপচিনবনা বন্দে ভারত এক্সপ্রেসকী কোচশিংদা রিজেনেরেতিব ব্রেকিং সিস্তেম য়াওবনা ইলেক্ত্রিকেল ইনর্জী চাদা ৩০ কনবা ঙম্লগনি।
স্পীদ, সেফতী অমসুং সর্বিস অসি ত্রেন অসিগী খুদমশিং ওইগনি। রেলৱে প্রদক্সন য়ুনিৎ অমা ওইরিবা ইন্তিগ্রেল কোচ ফেক্তরী (আই.সি.এফ.), চেন্নাইনা থা ১৮গী মনুংদা দিজাইন তৌদুনা মপুং ফানা শাবা লোইদুনা পুথোকখি।
প্রধান মন্ত্রীগী মেক ইন ইন্দিয়াগী মীৎয়েং অদু তুংইন্দুনা ত্রেন অসিগী শরুক অয়াম্বগী দিজাইন অমসুং মেনুফেকচরিং লৈবাক অসিদা পাংথোক্লি।
