ভারতকী প্রধানমন্ত্রী

ঙসি প্রধান মন্ত্রী শ্রী নরেন্দ্র মোদী অমসুং নিংথৌ অবদুল্লাহ সেকেন্দ অম্মানদা ইন্দিয়া-জোরদান ব্যুজিনেস ফোরমদা ৱা ঙাংখ্রে। ফোরম অদুদা যুবরাজ হুসেন অমসুং জোরদানগী ত্রেদ অমসুং ইন্দষ্ট্রি মিনিষ্টর অমসুং ইনভেষ্টেমেন্ত মিনিষ্টর শরুক য়াখি। লৈবাক অনিগী মরক্ত ব্যুজিনেস-তু-ব্যুজিনেসগী মরীশিং মরুওইবা হেনগৎলকপা অদু নিংথৌ অমসুং প্রধান মন্ত্রীনা খঙখি আমসুং নাকল অনিমক্কী উদ্যোগশিংগী লুচিংবশিংদা খুদোংচাবশিং অসি চাউখৎনবা অমসুং নুংঙাই-য়াইফনবা থবকশিংদা ওন্থোক্নবা তকশিনখি। নিংথৌনা হায়খি মদুদি সাউথ এসিয়া অমসুং নোংচুপ এসিয়া অমসুং মসিগী ৱাংমদা ইকোনোমিক কোরিদোর অমা শেম্নবা জোরদানগী ফ্রি ত্রেদ এগ্রিমেন্তশিং অমসুং ভারতকী শেন-থুমগী শক্তি পুনশিনবা য়াগনি।

ফোরমদা ৱা ঙাংবদা, প্রধান মন্ত্রীনা হায়খি মদুদি ভারত অমসুং জোরদান মখোয়গী সভেত্যাগী মরীশিংদা শাগৎপা অচেৎপা মরী অমা লৈনরি। কৈথেলশিং অমসুং লমদম অসিগা শম্ননবা অমসুং লমদম অসিগী ললোন-ইতিক অমসুং চাউখৎপা হেনগৎনবা নিংথৌগী লমজিং মখাদা জোরদান্না থোঙ অমা ওইবদা প্রধান মন্ত্রীনা থাগৎপা ফোঙদোকখি। মথং চহি ৫ দা লৈবাক অনিগী ললোন-ইতিক দোল্লার বিল্লিয়ন ৫ য়ৌহন্দুনা শরুক অনিদা হেনগৎহন্নবা ৱাফম প্রধান মন্ত্রীনা পুখৎখি। প্রধান মন্ত্রীনা হায়খি ভারত য়াংনা চাউখৎলক্লিবা ইকোনোমি অমা ওইনা মালেমদা অহুমশুবা খ্বাইদগী চাউবা ইকোনোমি ওইনবা লম্বীদা লৈরে। লৈবাক অসিগী মরুপ জোরদান অমসুং মালেম শীনবা থুংনা অঙকপা ললোন-ইতিক্কী খুদোংচাবশিং ভারতনা পীরি।

ভারতকা পুন্না থবক তৌমিন্ননবা অমসুং লৈবাক অসিগী বিল্লিয়ন ১.৪ গী কঞ্জুমর মার্কেত, লৈবাক অসি অফবা মেনুফেকচরিংগী থবক অমসুং লৈবাক অসিগী তুংদু-লৈতাবা, অরোন-অথুপ লৈতবা অমসুং মশক খঙলবা থৌশিলগী কান্নবশিং লৌনবা প্রধান মন্ত্রীনা জোরদানগী কম্পেনিশিংদা খঙহনখি। প্রধান মন্ত্রীনা হায়খি মদুদি মালেম্না থাজবা লৈবা সপ্লাই চেনগী খোঙলোয়শিং ওইনবা লৈবাক অনিমক পুন্না চৎমিন্নবা য়াগনি। ভারতকী ইকোনোমিগী গ্রোথ চাদা ৮ হেল্লে অমসুং মসি পোৎথোক পুথোকপদা মাঙজিল থাবা লৈঙাক অমা অমসুং ইন্নোবেসনদা মীৎয়েং চঙবা থৌশিলশিংনা ওইহনবনি।

প্রধান মন্ত্রীনা হায়খি মদুদি দিজিতেল পব্লিক ইনফ্রাষ্ট্রকচর, আই.তি, ফিনতেক, হেল্থ-তেক অমসুং এগ্রি-তেকগুম্বা হিরমশিংদা ভারত অমসুং জোরদান পুন্না থবক তৌমিন্নবগী খুদোংচাবশিং লৈরি অমসুং হায়রিবা হিরমশিং অসিদা পুন্না চৎমিন্ননবা লৈবাক অনিমক্কী ষ্টার্দ-অপশিংদা হায়জরি। ফার্মা অমসুং মেদিকেলগী খুৎলায়শিংগী হিরমশিংদা ভারতকী মপাঙ্গল লৈরি অমসুং জোরদাগী লম্মিৎ-তুমিৎকী খুদোংচাবা অসিনা অমনা অমগী মতেং পাংনবা য়াগনি অমসুং হায়রিবা হিরমশিং অসিদা নোংচুপ এসিয়া অমসুং অফ্রিকাদা জোরদান মতিক চাবা মফম অমা ওইবা য়াগনি। প্রধান মন্ত্রী মোদীনা হায়খি মদুদি লৌউ-শিংউ, কোল্দ চেন, ফুদ পার্কশিং, হার, ইনফ্রাষ্ট্রকচর, ওতোমোবাইল, গ্রিন মোবিলিতি অমসুং হেরিতেচ অমসুং কলচরেল তুরিজমদা লৈবাক অনিমক ললোন-ইতিক্কী খুদোংচাবা কয়া লৈরি। রিন্যুএবল ইনর্জি, গ্রিন ফাইনান্সিং, দিসেলিনেসন অমসুং ৱাতর সাইক্লিংগী হিরমশিংদা ভারত অমসুং জোরদান ললোন-ইতিক পাংথোক্নবা হেন্না থবক তৌমিন্নবা য়াগনি।

ফোরম অদুদা ইনফ্রাষ্ট্রকচর, হকশেল, ফার্মা, হার, লৌউ-শিংউ, রিন্যুএবল ইনর্জি, তেক্সতাইল, লোজিষ্টিক্স, ওতোমোবাইল, ইনর্জি, দিফেন্স অমসুং মেনুফেকচরিংগী হিরমশিংদা লৈবাক অনিমক্কী ললোন-ইতিক্কী লুচিংবশিং শরুক য়াখি। মীহুৎ কাংবুগী মনুংদা এফ.আই.সি.সি.আই অমসুং জোরদান চেম্বর ওফ কম্মর্সগী মীহুৎশিং য়াওখি অমসুং লৈবাক অনিগী মরক্ত ললোন-ইতিক অমসুং শেন-থুমগী থবকশিং চাউখৎনবা হৌজিক এম.ও.য়ু অমা লৈরি।

***