ভারতকী প্রধানমন্ত্রী
প্রধান মন্ত্রী শ্রী নরেন্দ্র মোদী ওক্তোবর ১১ দা চেন্নাইদা চৎকনি। অয়ুক্কী পুং ১১:৩০ রোম তাবদা, মহাক্না পোরুর বাইপাস ষ্টেসন্দগী পোনামালী বাইপাস ষ্টেসন ফাওবা চেন্নাই মেত্রো তোংগনি অমসুং অমুক হল্লক্কনি। নুমিৎ য়ুংবা পুং ১২:১৫ রোম তাবদা মহাক্না চেন্নাইদা জলাকন্দেশ্বরর লাইশঙদা দর্শন অমসুং পুজা পাংথোক্কনি। তুংদা, মহাক্না আই.আই.তি মাদ্রাসদা ব্রেন সেন্তর অমা য়েংগনি।
নুংথিল পুং ১:৩০ তাবদা, প্রধান মন্ত্রী শ্রী নরেন্দ্র মোদীনা লুপা করোর ১৩,০০০ হেনবগী চাউখৎ-থৌরাংগী প্রোজেকশিং উরেপ-উয়ুং তমগনি, শঙ্গাগনি অমসুং কৎথোক্কনি। থৌরম অদুদা মহাক্না মীয়ামদা ৱা ঙাংগনি। নুংথিল পুং ৩ রোম তাবদা, প্রধান মন্ত্রীনা জয়গোপাল গরোদিয়া হিন্দু বিদ্যলয় মেত্রিকুলেসন হয়ার সেকেন্দরি স্কুলগী গোল্দন জুব্লি থৌরম শরুক য়াগনি অমসুং মীয়ামদা ৱা ঙাংগনি।
প্রধান মন্ত্রীনা লুপা করোর ৪,৯০০ রোম চঙনা শেমগৎপা চেন্নাই মেত্রো রেল প্রোজেক্কী ফেজ-২ গী পোনামালী-বিদাপালানি পরিং শঙ্গাগনি। কোরিদোর অসিদা কিমি ৩.৭ গী দবল-চেক্কর অমা য়াওরি। মসিদা দ্রাইভর য়াওদনা থৌবা য়ানবা অৱাংবা থাক্কী শিঙ্গনেল পীনবা থবকশিংসু য়াওরে। মসিনা চেন্নাইগী য়াংনা চাউখৎলক্লিবা নোংচুপ থংবা শরুক অমসুং সহরগী ময়োলগী মরক্ত চৎথোক-চৎশিন্দা মতম চঙবা হন্থহনগনি হায়বগী থাজবা থম্লি।
প্রধান মন্ত্রীনা তামিল নাদুদা লুপা করোর ৩,৭০০ রোমগী মরুওইবা নেসনেল হায়ৱে প্রোজেকশিং উরেপ-উয়ুং তমগনি অমসুং শঙ্গাগনি। প্রোজেকশিং অদুনা রাজ্য অসিদা লম্বী-থোং ফগৎহনগনি, চৎথোক-চৎশিন্দা মতম চঙবা হন্থহনগনি, লম্বী চিনবা হন্থহনগনি অমসুং শেন-থুম চাউখৎপদা মতেং পাংগনি।
প্রধান মন্ত্রীনা এন.ঐচ-৭৪৪ গী কিমি ৩৬ গী লেন মরি ওইরবা বাদুগাপাতি-তেরকুবেঙ্গানালুর সেক্সন শঙ্গাগনি। প্রোজেক অসিনা লমদম অসিদা মরুওইবা লাইফমশিং, উদ্যোগ অমসুং ললোন-ইতিক্কী মফমশিংদা শম্নবা হেনগৎহনগনি, মীয়াম চৎথোক-চৎশিন অমসুং পোৎ-চৈ পুথোক-পুশিন হেন্না নুংঙাইহনগনি। প্রধান মন্ত্রীনা এন.ঐচ-৭৪৪এ গী কিমি ৩০ গী লেন মরি ওইরবা মদুরাই রিং রোদ সেক্সনসু শঙ্গাগনি। প্রোজেক অসিনা সহর মনুংদা গারি চিনবা হন্থহনগনি অমসুং মদুরাইগী অকোয়বদা চৎথোক-চৎশিন নুংঙাইবা হেনগৎহনগনি।
প্রধান মন্ত্রীনা এন.ঐচ-৮৩ গী নাগাপতিনম-তঞ্জাবুর সেক্সন্দা লেন মরিগী বাইপাসকী উরেপ-উয়ুং তমগনি। প্রোজেক অসিনা তঞ্জাবুরদা লম্বী-থোঙ ফগৎহনগনি অমসুং সহরগী অকোয়বদা চৎথোক-চৎশিন নুংঙাইনবা অতোপ্পা লম্বী অমা পীগনি।
প্রধান মন্ত্রীনা লুপা করোর ৭৫০ রোমগী রেলৱে ইনফ্রাষ্ট্রকচর প্রোজেকশিং কৎথোক্কনি অমসুং শঙ্গাগনি। মহাক্না করাইকাল-পেরালম রেলৱে লাইন কৎথোক্কনি, মসিনা মখা তানা লমদম অসিদা রেলদা চৎথোক-চৎশিন তৌবা ফগৎহনগনি। মহাক্না কোয়ম্বদোর অমসুং মসিগী অকোয়বা মফমশিংদা রেল ফ্লাইওভর অহুমসু মীয়ামদা কৎথোক্কনি। প্রধান মন্ত্রীনা পলানি, ভেল্লোর কন্তোমেন্ত, অম্বাসমুদ্রম, পারামাক্কুদি অমসুং নমাক্কালদা অমৃত ষ্টেসন ৫ শঙ্গাগনি, মসি অমৃত ভারত ষ্টেসন স্কিমগী মখাদা অমুক হন্না শেমগৎপনি।
প্রধান মন্ত্রীনা তামিল নাদুদা মেরিতাইম ইনফ্রাষ্ট্রকচর ফগৎনবা, কার্গো পুথোক-পুশিনগী থবক ফগৎনবা অমসুং পোৎ-চৈ পুথোক-পুশিনগী থবক হেন্না ফগৎনবা তোঙান তোঙানবা হিথাংফমগা মরী লৈনবা প্রোজেকশিং উরেপ-উয়ুং তমগনি অমসুং শঙ্গাগনি।
প্রধান মন্ত্রীনা চেন্নাই হিথাংফমদা ইনফ্রাষ্ট্রকচর প্রোজেক মরি: পেব ষ্টোরেজ য়ার্দ অমা, একজিম গোদাউন মরি, শেমগৎলবা ক্রুইজ তর্মিনেল অমা অমসুং সিফারর্স ক্লব অমা শঙ্গাগনি। প্রোজেকশিং অসিনা কার্গো থম্বা অমসুং পুথোক-পুশিন ফগৎহনগনি, পোৎ-চৈ থম্ফম হেনগৎহনগনি, ক্রুইজ পেসেঞ্জর মশিং য়াম্না মতম অমতদা তোঙবা অমসুং কুম্বা ঙম্নবা অনৌবা খুদোংচাবশিং পীগনি অমসুং মফম অসিদা লাকপা হিরোয়শিং অমসুং মেরিতাইম পর্সোনেলশিংদা অনৌবা, নুংঙাইবা খুদোংচাবশিং ফংহনগনি। প্রধান মন্ত্রীনা ভি.ও চিদম্বরম হিংথাংফমদা মরুওইবা প্রোজেক মরি শঙ্গাগনি অমসুং উরেপ-উয়ুং তমগনি। প্রোজেকশিং অসিনা কার্গো অমসুং কন্তেন্নরগী থবক হেনগৎহনগনি, মৈখু থাংদবা মেরিতাইম ইনর্জি শীজিন্ননবা ইনফ্রাষ্ট্রকচর শেমগৎকনি অমসুং হিথাংফম মনুংদা কার্গো লৌথোকপা অমসুং পুথোক-পুশিনগী থবক হেন্না ফগৎহনগনি। প্রধান মন্ত্রীনা কোএল বার্থ-৩ প্রোজেকসু শঙ্গাগনি অমসুং কমারাজ হিথাংফমদা কন্তেন্নর তর্মিনেল ফেজ-১, ষ্টেজ-২ গীদমক কেপিতেল দ্রেজিং থবকশিংগীদমক উরেপ-উয়ুং তমগনি।
প্রধান মন্ত্রীনা চেন্নাইদা চেন্নাই পেত্রোলিয়ম কোর্পোরেসন লিমিতেদ (সি পি সি এল) গী হৌজিক লৈরিবা মনালি রিফাইনরিদা গ্রুপ ২/৩ লুব ওইল বেজ ষ্টোক্স (এল ও বি এস) গী উরেপ-উয়ুং তমগনি। লুপা করোর ১,৬২০ চঙদুনা অমসুং ২৭০ থাউজন মেত্রিক তন্স পর এনম (তি এম তি পি এ) গী কেপাসিগা লোয়ননা, প্রোজেক অসিনা ভারত্ত মালেম থাক্কী অফবা গ্রুপ ২/৩ লুব ওইল বেজ ষ্টোক্স পুথোক্নবা পান্দম থম্লি।
প্রধান মন্ত্রীনা আই.আই.তি মাদ্রাসদা সুধা গোপালকৃষ্ণন ব্রেন সেন্তর মীয়ামদা কৎথোক্কনি। মমাগী মবুক মনুংদা লৈরিঙৈদগী হৌরগা অহল ওইরকপা মতম ফাওবগী মীওইবগী পুন্সি শীনবা থুংনা, সেল্লুলার রিজোলুসন্দা মীওইবগী ব্রেন ১০০ হেন্না থ্রি-দিদা এতলাস শেম্নবা মালেমগী মরুওইবা সাইন্তিফিক ওইরবা মিসন অসি প্রধান মন্ত্রীনা হৌদোক্কনি। প্রধান মন্ত্রীনা মখল অসিগী ওইনা অহানবা হুমেন স্কেমিক ষ্ট্রোক এতলাস অমা, সি-ষ্ট্রোকসু ফোঙগনি। মসিদা ষ্ট্রোক্না শোকহল্লবা ব্রেন অমগী এন্নোতেদ মাইক্রোস্কোপিক সেক্সন ১০০০ হেন্না য়াওরি, এতলাস অসিনা অনৌবা লাইয়েংবগী থবকশিং মশক খঙদোক্নবা মালেম শীনবা থুংবগী থিজিল্লোয়শিংদা মতেং পাংগনি।
প্রধান মন্ত্রীনা চেন্নাইদা জয়গোপাল গরোদিয়া হিন্দু বিদ্যলয় মেত্রিকুলেসন হয়ার সেকেন্দরি স্কুলগী গোল্দন জুব্লি থৌরম শরুক য়াগনি। লাইরিক-লাইশু, থকসি-খাসি, নাৎকী গুনশিং অমসুং অফবা লাইরিক তম্বগী লমদা মীরোল কয়াগী মহৈরোয়শিং শেমগৎনবা মহৈলোয়শঙ অসিনা চহি ৫০ রোমদা লৌরকখিবা থৌদাংশিং মশক খঙবা ওইনা থৌরম অসি পাংথোক্কদবনি। মসিগী পান্দম “সা বিদ্যা যা বিমুক্তয়ে” ( মনিংতমহল্লিবা লৌশিং) না লমজিংদুনা, খুন্নাইদা অফবা থবক পাংথোকপা মীওইশিং শেমগৎনবা স্কুল অসিনা হোৎনরি। চহি কয়া অসিদা, মহৈ-মশিং তম্বগী লমদা হোংলক্লিবশিংগা চুন্নবা থবক পায়খৎনবা হোৎনদুনা লাক্লি, লোয়ননা লমচৎ শেমগৎপা, লৌশিং লৈহনবা অমসুং মথৌ মশক খঙবা মীওই ওইহন্নবা অকনবা মীৎয়েং থম্লি।
***
