ভারতকী প্রধানমন্ত্রী
“লান অসিদা য়ুমগী মপান্দা লৈদুনা কোরোনা ভাইরসকা লান্থেংনরীবা লান্মী কয়াসু লৈরি। মখোয়গী ঐখোয়গী মাংজিল থারিবা লান্মীশিংনি। মরু ওইনা নর্স ইচল-ইচেশিং, নর্সকী থবক তৌরিবা ইচিল ইনাও, দোক্তর, পেরামেদিকেল স্তাফশিং অসিনি। কোরোনাবু মায়থিবা পীখ্রবা মরূপশিংগী মতৌ তমগদবনি। হৌখিবা নুমিৎশিং অসিদা ঐনা মখোয়গা ফোন্দা ৱারী শানখি, মখোয়গী থৌনা হাপখি, মখোয়গা ৱারী শানবদগী ঐগীসু অনৌবা থৌনা লাকখি।”
প্রধান মন্ত্রী শ্রী নরেন্দ্র মোদীনা হায়খি মদুদি মদুদি সোসিয়েল দিস্তেন্সিং অসি কোবিদ-১৯গী ময়োক্তা থেংনরিবা অসিদা খ্বাইদগী ইফেক্তিব ওইবা লম্বীনি অমদি লোকদাউনগী পালন তৌদুনা মীয়াম্না মখোয় মশাবু ঙাকথোকপা ঙমগনি।
ঙসি মন কী বাত ২.০গী ১০শুবা তাঙ্ককতা মহাক্কী ৱাখল্লোন শেয়র তৌরদুনা শ্রী মোদীনা হায়খি, “লোকদাউন অসি ইশা অমদি ইমুং মনুংবু কন্ননবগীদমক্তনি। অদোম্না লেমহৌরিবা নুমিৎশিং অসি পুক্নিং তপথনা ঙাইবীয়ু, চিংলিবা লক্ষমন রেখা অসি নান্থোকপীগনু।”
মহাক্না হায়খি, “মালেম পুম্বসি কোরোনা ভাইরসনা কোন্সিনখ্রে। মসিনা লাইরিক হৈরবশিং, সাইন্তিস্ত, লাইরবা ইনাক খুনবা, অশোনবা ইনাক খুনবা পুম্নমকপু শিংনরক্লি। মসিনা ঙমখৈ লম অমদি রিতু য়ুগ অমত্তা খায়দ্রি। ভাইরস অসিনা মীওইবা জাতিবু লোইশিন্নবগীদমক হোৎনরক্লি। মরম অসিনা ঐখোয়নসু ভাইরস অসিদগী ঙাকথোক্নবা অমত্তা ওইনা পুন্সিন্দুনা হোৎনবা ফৈ।”
প্রধান মন্ত্রীনা হায়খি মদুদি ভারতকী মীয়াম কোতি ১৩০ অসিবু কোরোনাদগী ঙাকথোক্নবগীদমক্তা লোকদাউন নত্রবদি পাম্বৈ শুকলৈ লৈতে। মহাক্না অকনবা ৱাফম থমখি মদুদি কোরোনাগী মায়োক্তা শোক্নরিবা লান অসি শিবা নত্রগা চংবনি। লান অসি ঐখোয়না ঙম্বা তাবনি অদুবু খোংথাং অসি লৌখৎত্রবদি ওইথোকপা ঙম্লোই।
শ্রী মোদীনা হায়খি মদুদি কোবিদ-১৯গী য়েংদুনা থম্লিবা লোকদাউন মনুংদা রুল থুগায়রিবা মখোয়শিং অসি মখোয় মশাগী পুন্সীগা শানরিবনি। মহাক্না ময়েক শেংনা ফোংদোকখি মদুদি লোকদাউনগী নিয়ম ঙাক্ত্রবদি কোরোনা ভাইরসতগী ঙাকথোকপা লুগনি।
প্রধান মন্ত্রীনা হায়খি, “মালেমদা নুঙাইবা পাম্বা মীওই কয়া লৈ, মখোয়দু হৌজিক্তি লোয়না নিংঙমলক্ত্রে। মরূপশিং হায়নবা অমা লৈ, লাইনা চেন্দবা হায়বসি খ্বাইদগী লাইবক ফবা অমনি। মালেমদা খ্বাইদগী নুংঙাইবদি হকচাং ফবনি। নিয়ম থুগায়রিবশিং অসি মখোয় মশাগী পুন্সীবু শিংনরীবনি।”
প্রধান মন্ত্রীনা হায়খি মদুদি কোরোনা শন্দোরকপা থিংনবা ভারত মচাশিংনা লৌখৎলিবা খোংথাংশিং অমসুং হোৎনরিবশিং অসিনা লাইচৎ অসিদগী ভারতনা শোইদনা মায় পাক্কনি।
শ্রী মোদীনা হায়খি, “লাইরবশিংগীদমক ঐখোয়গী মীনুংশিসু হেঙ্গৎকদবনি। ক্রাইসিসকী মতম অসিদা ঐখোয়না অহানবদা মখোয়বু পীজ-পীথক তৌনবা হোৎনগদবনি।”
শ্রী মোদীনা লৈবাক মীয়াম পুম্নমক্তা থমোয় শেংনা ঙাকপীনবা হায়জখি অমদি ফোংদোকখি মদুদি ঐগী থম্মোইনদি খঞ্জৈ ময়াম্না ঐবু ঙাকপীগনি। অদুবু তৌদবা য়াদবা লৌখৎতবা য়াদবা খোংথাং খরনা ময়াম্বু খুদোং চাদবা থোকহল্লে।
প্রধান মন্ত্রীনা হায়খি মদুদি লান অসিদা কোরোনা ভাইরস থেংনরিবা লান্মী কয়া অমা লৈরি, মখোয়না য়ুম মনুংদগী নত্তনা য়ুম মপান্দগী লান্থেংনরি।
মহাক্না হায়খি, “মখোয়শিং অসি মাংজিল থারিবা লান্মীশিংনি মরু ওইনা কোরোনা ভাইরসপু মায়থিবা পীরিবা নর্স ইচল-ইচেশিং, নর্সকী থবক তৌরিবা ইচিল ইনাও, দোক্তর, পেরামেদিকেল স্তাফশিং অসিনি।”
প্রধান মন্ত্রীনা কোবিদ-১৯গী মায়োক্তা লান্থেংদা শরুক য়ারিবা মীওই খরগা মহাক্না ফোন্দা ৱারী শানখিবা অদু শেয়র তৌখি, মদুনা মহাক্কী থৌনা হাপ্লি অমদি মখোয়দগী কয়া অমা তম্বা ফংলে ফোংদোকখি।
প্রধান মন্ত্রীনা হায়খি মদুদি মীওইশিং অসিনা খুদোংচাদবা অসিদগী নান্থোকহন্নবগীদমক হোৎনবা য়াবা হোৎনরি।
মহাক্না হায়খি, “মখোয়না হায়রিবশিং অসি ঐখোয়না তানবা খক্তা নত্তে মসিবু অশেংবা স্পিরিৎকা লোয়ননা পুন্সীদা প্রেক্তিস তৌগদবনি।”
প্রধান মন্ত্রীনা নর্সশিং অমসুং অতোপ্পা মেদিকেল স্তাফশিংগী সেলফলেস স্পিরিৎপুসু থাগৎখি।
মহাক্না হায়খি, “ভারতনা দোক্তর, নর্স, পেরামেদিকেল স্তাফ, অশা, এ.এন.এম. ৱার্কর্স, সফাই কর্মচারীগুম্বা কয়াগী থৌনানা লান অসি থেংনবা ঙম্লিবনি। ঐখোয়গী মরূপ ময়াম অসিগী হকশেলগীদমকসু লৈবাক অসিনা নুংনাংলি মরম অদুনা সরকারনা লান অসিদা লমশিং অসিগী মরূপ লাখ ২০গীদমক লুপা লাখ ৫০ ফাওবগী হেল্থ ইন্সুরেন্স কোভর অমা লাউথোকখ্রে।”
মহাক্না লৈবাক অসিগী চংদ্রবা য়াদ্রবা পোৎলমশিংগী সপ্লাই চেনগীদমক থবক তৌরিবা য়ুম্লোন্নবদা লৈরিবা অপিকপা রিতেল স্তোরকীপর, দ্রাইবরশিং অমসুং ৱার্করশিংবু থাগৎখি। শ্রী মোদীনা হায়খি, বেঙ্ককী ইচিল-ইনাওশিংনা ময়ামগী সেবা তৌরিবা অসি লান্থেং অসি লুচিংলিবনি। মহাক্না হায়খি মদুদি মশিং য়াম্লবা মরূপ কয়া অমনা ই-কমর্স তৌদুনা কম্পেনীশিংগী দেলিবরী পর্সন ওইনা থবক তৌরি। মখোয় অসিনা খুদোং চাখিদ্রবা মতম অসিদা গ্রোসরী দেলিবরী তৌরি।
প্রধান মন্ত্রীনা অপনবা য়াওদনা তি.ভি. য়েংবা ফংহল্লিবা মীওইশিং অমসুং দিজিতেল পেমেন্তপু লাইথোকহল্লিবা মীওইশিংগী মফমদা তৌবিমল খংবা উৎখি। মহাক্না মখোয়দা মখোয় মশা অমসুং ইমুং মনুংগীদমক চেকশিন থৌরাং লৌখৎনবা খংহনখি।
প্রধান মন্ত্রীনা হায়খি মদুদি মীয়াম্না হৌজিক ওইরিবা ফিভম অসি খংবা মথৌ তাই, ঐখোয়না সোসিয়েল দিস্তেন্স ঙাক্না চৎকদবনি, হ্যুমেন নত্রগা ইমোস্নেল দিস্তেন্স ঙাক্না চৎকদবা নত্তে।
মহাক্না হায়খি মদুদি কোরোনা ভাইরসনা নারে হায়না চিংনবা নত্রগা হোম ক্বরেন্তাইন তৌদুনা লৈবা মীওইশিংদা তাথি তাওইনা তৌবগী ৱাফম তাবদা মহাক নুঙাইতে। অতোপ্পা মীওইশিংদা ইনফেক্ত তৌবদগী ঙাকথোক্নবা মখোয় মশাবু ক্বরেন্তাইন তৌরিবা মখোয়শিং অদুবু মহাক্না থাগৎখি।
প্রধান মন্ত্রীনা হায়খি মদুদি সোসিয়েল দিস্তেন্সিং অসি কোবিদ-১৯গী ময়োক্তা থেংনরিবা অসিদা খ্বাইদগী ইফেক্তিব ওইবা লম্বীনি। মহাক্না অমুক হন্না লৈবাক মীয়ামদা য়ুমদা লেংদনা লৈনবা, লান অসি মায় পাক্নবগীদমক চেকশিন্না অমসুং সেফ ওইনা লৈনবা অপীল তৌখি।
