ভারতকী প্রধানমন্ত্রী

ঙসি প্রধান মন্ত্রী নরেন্দ্র মোদীগা ইন্দোনেসিয়াগী প্রসিদেন্তজোকো ৱিদোদোগা তেলিফোন্দা ৱারী শানখ্রে।

হন্দক য়ুহা হাবা অমসুং সুনামী থোকপদগী ইন্দোনেসিয়াগী সুলাৱেসী লমদমদা মমল য়াম্লবা পুন্সি কয়া মাংখিবা অদুদা মহাক মশাগী মাইকৈদগী অমসুং ভারতকী মীয়ামগী মাইকৈদগী প্রধান মন্ত্রীনা অৱাবা ফোঙদোকখি।

শাথিরবা মহৌশাগী খুদোংথিবা অসিনা পাকশন্না অমাং-অতা থোকপদগী থেংনরিবা অৱাবশিং ইন্দোনেসিয়াগী মীয়াম্না থৌনা লৈনা মায়োক্নখিবা অদু প্রধান মন্ত্রীনা থাগৎখি।

মালেমগী তেংবাংগীদমক ইন্দোনেসিয়ানা অপীল তৌরিবা অদুদা ঈশিংগী শরুক্তা য়ুম্নোন্নরিবা অমসুং ইন্দোনেসিয়াগী মরূপ অমা ওইনা ভারতকী মাইকৈদগী প্রধান মন্ত্রীনা ইন্দোনেসিয়াগী প্রসিদেন্তা মতেং পীখি।

অৱাবা ফোঙদোকপা অমসুং তেংবাং পীরকপগীদমক প্রসিদেন্ত ৱিদোদোনা প্রধান মন্ত্রী থাগৎখি।

ভারতনা মতেং পীগদৌরিবা অদু দিপ্লোমতিক অমসুং ওফিসিয়েল চেন্নেলশিংগী খুৎথাংদা থবক পাংথোকপা হায়না লুচীংবা অনিনা য়ানখি।

****