ভারতকী প্রধানমন্ত্রী
প্রধান মন্ত্রী শ্রী নরেন্দ্র মোদীনা মীখলদা পুৱারী ওইবা মওংদা মায় পাক্লকপদা মালেমগী মফম কয়াদগী নুংঙাইবা ফোংদোকপগী পাওজেল মখা তানা ফংলি। প্রধান মন্ত্রীনা ঙসি সাউদি অরবকী ক্রাউন প্রিন্স মোহম্মদ বিন সলমান, কতারগী অমীর শৈখ তমীম বিন ঙমদ অল-থানী, জর্মনগী চান্সেলর শ্রীমতী এঞ্জেলা মার্কেল, য়ুনাইতেদ কিংদমগী প্রধান মন্ত্রী তেরেসা মে অমসুং শ্রীলঙ্কাগী হান্নগী রাস্ত্রপতি শ্রী মহেন্দ্র রাজপক্সাগী মফমদগী তেলিফোন্দা নুংঙাইবা ফোংদোকপগী পাওজেলশিং ফংখি।
প্রধান মন্ত্রীনা ক্রাউন প্রিন্সপু মহাক্কী য়াইফ-পাওজেলগীদমক থাগৎপা ফোংদোকখি অমদি ভারতকী মীয়ামদা থম্লিবা মহাক্কী মমল য়াম্লবা মরূপ ওইবগী মতৌ অমসুং লৈবাক অনিগী মরক্তা লৈরিবা মরি অসি মখা তানা চেৎশিলহনবদা মহাক্না লৌরিবা থৌদাং অদুদা তৌবীমল খঙবা উৎখি।
অমীরনা প্রধান মন্ত্রীগী মফমদা নুংঙাইবা ফোংদোকখি অমদি ভারত অমসুং কতারগী মরক্তা লৈরিবা অচেৎপা মরি অদু ফোংদোকখি। প্রধান মন্ত্রীনা অমীরবু থাগৎপা ফোংদোকখি অমদি লৈবাক অনিগী মরক্তা অচেৎপা পার্তনরশিপ শেমগৎপদা মহাক্না লমজিংলিবা অদুগীদমক তৌবীমল খঙবা উৎখি।
প্রধান মন্ত্রীবু নুংঙাইবা ফোংদোক্লদুনা চান্সেলর মার্কেলনা লৈবাক অনিগী মরক্তা লৈনরিবা মরি হেঙ্গৎলক্লিবা অদু ফোংদোকখি অমদি লৈবাক অনিগী কান্নগদবা লমশিংদা মথা তানা তেংবাং পীনবা হেঙ্গৎপগী অপাম্বা ফোংদোকখি। প্রধান মন্ত্রীনা মহাকপু থাগৎপা ফোংদোকখি অমদি লৈবাক অনিগী মরক্তা লোয়ননা মালেমগী শান্তি অমসুং চাউখৎপা পুরক্নবগীদমক লৈবাক অনিগী মরি মখা চত্থবদা মহাক্না লৌরিবা থৌদাং অদু থোইদোক হেন্দোকপনি হায়না শিংথাখি। লুচিংবা অনিমক্না জাপানগী ওসাকাদা পাংথোক্কদৌরিবা জি ২০ মীফমদা অমসুং ভারত্তা চহী অসিগী লোইশিল্লকপদা পাংথোক্কদৌরিবা লৈবাক অনিগী ইন্তর গবর্নমেন্তেল কন্সলতেসন্দা উন্নদুনা ৱারী শান্ননবা লেপ্নখি।
প্রধান মন্ত্রীনা চাউনা মায় পাক্লকপদা প্রধান মন্ত্রী মেনা নুংঙাইবা ফোংদোকখি। মীখল অসি দেমোক্রেসীগী মরুওইবা শক্তম্নি হায়না ফোংদোক্লদুনা প্রধান মন্ত্রী মেনা ভারতকী মায়াম্বু মরুওইবা থৌদাং অসি মপুং ফানা লৌখিবদা থাগৎপা ফোংদোকখি। প্রধান মন্ত্রী মোদীনা মফমদা থাগৎপা ফোংদোকখি অমদি লম খুদিংমক্তা ব্রিতেনগা লোয়ননা লৈবাক অনিগী কোওপরেসন মখা তানা চেৎশিলহন্নবগীদমক থবক তৌনীংবগী অপাম্বা ফোংদোকখি।
প্রধান মন্ত্রীনা শ্রীলঙ্কাগী হান্নগী রাস্ত্রপতি শ্রী রাজপক্সাবু মহাক্কী নুংঙাইবা ফাংদোকপগী পাওজেল অদুগীদমক থাগৎপা ফোংদোকখি অমদি হায়খি মদুদি য়ুম্লোন্নবা লৈবাক অমা ওইনা ভারত অমসুং শ্রী লঙ্কাগী মরক্তা মতম শাংলবা অচেৎপা মরূপ ওইবগী মরি লৈনরি। লৈবাক অনিগী মীয়ামগী কান্ননবা অমদি লমদম অসিগী শান্তি অমসুং চাউখৎনবগীদমক মরি অসি মখা তানা হেন্না চেৎশিলহল্লগনি হায়না প্রধান মন্ত্রীনা থাজবা পীখি।
