ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি, মাইভারত ভোলুন্তিয়রশিংনা হিমাচল প্রদেশ, উত্তরাখন্দ অমসুং লদাখকী ঙমখৈগী খুঙ্গংশিংদা থেংনরকপশিং পাউদমখিবা ভিক্সিত ভাইব্রেন্ত ভিলেজ প্রোগ্রাম ২০২৬তা শরুক য়াখিবশিংগা ভর্চুএল ওইনা ৱারী ৱাতায় শানখ্রে। ৱারী শানবদুদা নুপীনা লমজিংদুনা পুরকপা চাওখৎপা, তুরিজম, মীয়াম্না শরুক য়াবা অমসুং হেন্না কনবা নেস্নেল ইন্তিগ্রেসনগা লোয়ননা ফীভম ফগৎলপা ইনফ্রাস্ত্রকচর, কন্নেক্তিবিতী অমসুং পব্লিক সর্ভিসশিংগী খুত্থাঙদা হায়রিবা খুঙ্গংশিং অসিদা পুরক্লিবা অওনবশিং পুথোক্তুনা নৈনখি। লৈবাক পুম্বগী দিস্ত্রিক্ত ২৪৫ হেনবদগী মাইভারত ভোলুন্তিয়র ৫,০০০ হেনবনা থৌরম অদুদা ভর্চুএল ওইনা শরুক য়াখি।

থৌরম অদুগী মতাঙদা পাউদম্লদুনা, দদ্রা এন্দ নগর হবেলী অমসুং দামন এন্দ দিউদগী মাইভারত ভোলুন্তিয়র শ্রী দিব্যান্স জোসীনা ভিক্সিত ভারত য়ং লীদর্স দাইলোগ, ভিক্সিত ভারত য়ুথ পার্লিয়ামেন্ত, বজেৎ ত্বিস্ত, মেন্তরসিপ অমসুং ভোলুন্তিয়রিংগী থৌরমশিং য়াওনা পায়খৎলিবা থৌশিলশিংগী মরমদা শম্লপ্না খঙহনখি। মাইভারত থৌশিলদগী নহা করোর ২.৩০ হেনবনা কান্নবা ফংখ্রে, অদুগা নহা লাখ ২.৮৬ না লৈবাক থুংনা পাঙথোকখিবা ৱাহং পাউহংগী থৌরমদা শরুক য়াদুনা মখোয়গী মরক্তগী ঙমখৈগী খুঙ্গংশিংদা চৎননবা ভোলুন্তিয়র ৪০৩ খনগৎখি। হিমাচল প্রদেশকী কিন্নৌর দিস্ত্রিক্তা লৈবা লিও খুঙ্গংদা চৎলুবা খোঙচৎ নীংশিংলদুনা, মহাক্না মফমদুগী মীয়াম, অহলশিং অমসুং মহৈরোয়শিংগা ৱারী শানরকখিবা, নহাশিংগীদমক পাঙথোকখিবা করিয়র কাউন্সেল্লিং, শান্ন-খোৎনবা অমসুং নাৎকী থৌরমশিং, সর্পঞ্চ নুপী অদুগী লুচিং মওং অমসুং অয়ুস্মান অরোগ্য মন্দির মথৌবগী মওংশিং পুথোক্তুনা তমখি। মহাক্না লৈরুরিবা হোমস্তেদা থেংনরকপশিং অদুনা লৈবাক নুংশিবগী ইহুল অসি লোল অমসুং স্তেতশিংগী ঙমখৈ ৱাংমা লান্না চৎলি হায়বা উৎলি হায়বগা লোয়ননা ভোলুন্তিয়রশিংনা কার্গিল ৱার মেমোরিএলদা লৈবাক্কী থৌনা ফরবা লান্মীশিংগী মফমদা শ্রদ্ধাঞ্জলি কৎখি অমসুং ভিক্সিত ভারতকী মঙলানগীদমক লেপ্পগা লোয়ননা মখোয়না থেংনরকপশিং প্রধান মন্ত্রীদা লানখৎনবা খোমজিন-তাশিনগনি হায়না ফোঙদোকখি।

দদ্রা এন্দ নগর হবেলী অমসুং দামন এন্দ দিউদগী মাইভারত ভোলুন্তিয়র মিস নিকিতা প্রবিন সোলাঙ্কিনা মহাকপু মাইভারত ক্বীজকী খুত্থাঙদা খনখিবনা কিন্নৌর দিস্ত্রিক্তকী ধার চঙ্গো নিচ্লা খুঙ্গংদা অহানবা ওইনা মনিং তম্না চৎপা ঙমহনখি হায়খি। খুঞ্জাশিংনা তরাম তরাম্না ওকপিখিবা অদুনা মহাক্কী থাজবা হেনগৎহনখি অমসুং নুপীশিংগী মফমদা খুন্নাইনা য়েংলিবা মীৎয়েঙদা লাক্লিবা অহোংবা অদুগী মমি তাখি। নুপী প্রধান, পঞ্চায়তকী মীহুৎশিং, লৌমীশিং, অহল অমসুং অঙাংশিংগা ৱারী শানবদা মহাক্না খুঙ্গংগী নুপীশিংনা লৌরিবা য়াম্লবা থৌদাংশিং খঙলকখি অমসুং মহাক্না হান্না খল্লুবদুগী তাইওন্নবদা খুঞ্জাশিংনা হায়বগী মতুং ইন্না প্রধান মন্ত্রী গ্রাম সরক য়োজনা, জল জীবন মিসন অমসুং অয়ুস্মান ভারতনা পুরকপা অফবা লম্বী, চৈ চাং নাইনা লাকপা, তোতী ঈশিং কন্নেক্সন অমসুং দিজিতেল কন্নেক্তিবিতী নীংথিনা লৈরম্বা থেংনখি। মহাক্না লম-তু শেংবা, শান্ন-খোৎনবা অমসুং নাৎকী ওইবা থৌরমশিংদসু শরুক য়াখি হায়রদুনা খুঙ্গংদুগী অঙাংশিংনা মহাক্কী লমগী মরমদা খঙনিংবশিং নীংশিংখি অমসুং মহাক্না মখা তানা মহাক্না লৈরম্বা ইমুংদুগা পাউ ফাওনরি হায়খি।

২০১৬ দা চাঙ্গোদা দিৱালীগী চৎখিবা খোঙচৎ নীংশিংলদুনা, প্রধান মন্ত্রীনা মিস সোলাঙ্কিগী খোঙচত্তা ভারতকী মমোমশিংদা হেনগৎলক্লিবা থাজবগী মমি তাই অমদি মাইভারতনা নাইতোম চৎপা খোঙচৎপু লৈবাক পুম্বগী ইমুং অমা ওইহল্লে হায়না ফোঙদোকখি। “নাইতোম চৎপা খোঙচৎ হায়বসি মশাবু খঙজনবা লম্বী অমা ওইবগা লোয়ননা মালেম অসিবু খঙননবা লম্বী অমসুনি,” হায়না শ্রী মোদীনা ফোঙদোকখি।

রাজস্থানগী জলোরদগী মাইভারত ভোলুন্তিয়র শ্রী সুনিল কুমার কেলানা মহাক মশামক ঙমখৈগী খুঙ্গংদগী ওইবনা হিমাচল প্রদেশগী ধার চঙ্গো উপ্রেলাগী মীওইশিংগা থুনা মরী শাগৎপা ঙমহনখি হায়খি। মফম অমসুং ঈশিং নুংশিৎ খেন্নজরবসু, মহাক্না মফম অনিগী মীয়ামশিং থৌনা, মরৈবাক নীংবা অমসুং তরাম তরাম্বা মতৌনা অমত্তা ওইহনবা থেংনখি। মহাক্না মাগী ইমুংগা ভিদিও কোলগী খুত্থাঙদা পাউ লেপ্তনা ফাওনখি অদুগা মহাক্কী সোসিএল মেদিয়া পোস্তশিংনা মহাক্কী মরূপশিংবু মাইভারতকী মরমদা খঙননবা পুক্নিং থৌগৎখি। মহাক্না হান্না খল্লম্বা লম্বী-থোং, লৈফম-চাফম, মৈ অমসুং মোবাইল কন্নেক্তিবিতীগী চীংনবা অদু হোমস্তে য়ৌবা অফবা লম্বী, সোলার-ইনর্জী খিল্লম্বা অমসুং নুংতিগী পুন্সিদা অওনবা পুরক্লিবা ফীভম ফগৎলবা ইনফ্রাস্ত্রকচরনা কোকহনখি। মহাক্না লৈরুরিবা ইমুংদাগা মখা তানা পাউ ফাওনরি অমসুং মখোয়বু রাজস্থান্দা লাক্নবা পাউজেল পীরমখি হায়খি।

প্রধান মন্ত্রীনা রাজস্থান, কাস্মির, হিমাচল প্রদেশ অমসুং অৱাং-নোংপোক্কী ঙমখৈগী খুঙ্গংশিংগী নহাশিংনা মান্নবা মীৎয়েঙ থম্লি অমসুং ঙমখৈগী মীওইশিংনা লম লাপ্নজরবসু, পুক্নিংগী ইহুলনা লৈবাক্কা মরী ফনা থম্লি হায়বা ৱাফম থমখি। “প্রাইওরিতীদা মমৈদা লৈরম্বশিং হৌজিক্তি মকোক্তা লৈরে,” হায়না শ্রী মোদীনা ফোঙদোকখি।

অন্ধ্র প্রদেশকী চিত্তুর দিস্ত্রিক্তগী মাইভারত মোলুন্তিয়র মিস ভাব্য শ্রীনা একাদমিক্সকী ৱাংমদা করিগুম্বা খরা খঙনিং-হৈনিংবনা মহাকপু মাইভারত্তা অমসুং উত্তরাখন্দগী উত্তরকাসি দিস্ত্রিক্তকী হর্সিল খুঙ্গংদা চিংশিনখি হায়খি। মান্নদবা ঈশিং নুংশিৎ, চীঞ্জাক, নাৎ অমসুং পুন্সি মহিংগী মতাঙদা মঙোন্দা লৈরম্বা নুংনাংবা ৱাফমশিং মফমদুগী মীয়াম অমসুং ওফিসিএলশিংগী তরাম তরাম্বা মতৌনা কোকহনখি, অদুগা ইন্দো-তিবেতন বোর্দর পুলিস পর্সনেলশিংগা ৱারী ৱাতায় শানবনা মখোয়গী লীচৎ, অচম্বা মতৌ, কত্থোকপা অমসুং লৈবাক্কীদমক লেপ্লিবা খোঙফমশিংবু চেৎনা থাগোন্নবা ঙমহনখি। তোঙান তোঙানবা স্তেত, লোল অমসুং নাৎশিংগী শরুক য়ারিবা মীওইশিংনা লম্লানবশিং ওইনা থুংলখি অদুবু এক ভারত শ্রেস্থ ভারতকী ৱাখল্লোন মমি তাদুনা ইমুং অমগুম হন্নখি হায়খি। নেলং অমসুং জাদুং তম্পাক অমসুং সেম হৈকোলগী ফোতোগ্রাফশিংনা মহাক্কী মরুপ মপাংশিংগী মরক্তা খঙনিংবা নীংথিনা পোকহনখি, অমদি মখোয়গী মরক্তা কয়া অমদি মাইভারত্তা রেজিস্তর তৌনখি। অইংবা ঈশিং নুংশিৎকা চুশিন্নহন্নবা শরুক য়ারিবশিংদা পীরিবা খুৎশু খুৎলায়শিং, মহাক্কী চীং নিংখায়বনা শোকহল্লবা পোক্নফম খুঙ্গংদা অৱাবা কয়া মায়োক্নরবসু মখা তানা লৈথনবা ফীরেপ লৌখিবা মীওইশিংগী খাঙবা কনবা মতৌ, অমসুং মহাক্কী স্তেতকী ইচঙ থৌরবা ফোল্ক জগোয়গা তাইওন্নবদা গর্ৱালী জগোয়গী ইং-তপ্পা, অমসুং হীরী কোনবগী মচৎ য়াওবা মওং মতৌবু মহাক্না নীংশিংখি।

মহাক্না উত্তরাখন্দগী মুখ্বা খুঙ্গংদা চৎখিবা খোঙচৎ নীংশিংলদুনা, প্রধান মন্ত্রীনা ৱারী ৱাতায় শানবা অসিনা ভারতকী নহাশিংনা লৈবাকপু মাঙদা থম্লি হায়বা মহাক্কী থাজবা অদু হেন্না চেৎশিলহনখি হায়খি। “ময়াম পুম্নমক্না এক ভারত, শ্রেস্থ ভারতকী ৱাখল্লোনবু তশেংনা মায়োক্নখিবা মওং মতৌনা নহা কয়াবু হেন্না পুক্নিং থৌগৎলগনি,” হায়না শ্রী মোদীনা ফোঙদোকখি।

অন্দমান এন্দ নিকোবার ঈথত্তগী চহি কুনমাথোই শুরবা মাইভারত ভোলুন্তিয়র মিস সায়ন্তিকা মিস্ত্রীনা মাইভারতপু নহা করোর কয়া লৈবাক শেমগৎপদা থৌদাং লৌনবা ফম্পাক অমা ওইনা শেমগৎপগীদমক প্রধান মন্ত্রীবু থাগৎপা ফোঙদোকখি। সমুদ্রগী ঈমায়দগী ফীত ১৭,০০০ রোম ৱাংবা লদাখকী মান খুঙ্গং ফাওবগী খোঙচৎপু নীংশিংলদুনা, মহাক্না চীং কাবগী খুদোংচাদবা শাথিনা মায়োক্নখিবা অমসুং মখোয় মশাগী হান্না য়েংদনা মহাকপু মখোয়গী মীথুংগুম্না মহাকপু লায়েংবিখিবা দোক্তরশিং য়াওনা মাইভারত তীম অমসুং আই.তি.বি.পি. পর্সনেলশিংনা মহাকপু য়েংশিনবিখিবা পুম্নমক মহাক্না শন্দোক্না পাউদমখি। মহাক্না থেংনরকপশিং অদুনা আই.তি.বি.পি. পর্সনেলশিংনা ঙমখৈ ঙাকপখক নত্তনা মীয়ামগীদমক য়াম্না চেকশিন্না হোৎনজবা মতৌ উৎলি অমসুং মহাকপু অৱাংবা মফমদা লৈবদা মথৌ তারিবা খাঙবা কনবগী মচৎপু শাগোন্নবা ফংহনখি হায়খি। মহাক্কী ইমুং মনুংনা লম্বী-থোং ফরম্লোই হায়না খল্লম্বদুগী তাইওন্নবদা, মহাক্না ঙমখৈগী লমদমদুদা থাজবা য়াবা ইন্তরনেৎ, ক্যু.আর. কোদ অমসুং য়ু.পি.আই. পেমেন্ত ফেসিলিতী অমসুং ৱাই-ফাই লৈরম্বা থেংনখি। মহাক্না মফমদুগী অঙাংশিংগা ৱারী ৱাতায় শানখি, মখোয়গী মরক্তগী অমনা অন্দমান এন্দ নিকোবর ঈথত্তা লাক্নিংই হায়না ফোঙদোরকখি অমদি অপুনবগী থৌওংনা লুহোংবা অমসুং মোনাস্তরীগী থৌরমশিং পাঙথোকপা, ফীভম শোক্লবা মোবাইল তৱার শেমজিনবা অমসুং স্তোরেজ ফেসিলিতী অমগী বেত্তরীশিং শেনজিনবা পুম্নমনক পাউদমখি।

লৈবাক অসিগী পাক চাউবা, মীয়াম অমসুং লৈবাক নীংবগী ইহুল অতৈ মীওইশিংনসু হেন্না মমুৎ তানা খঙজনবা মিস মিস্ত্রীগী মফমদা মহাক্না থেংনরকপশিং আর্তিকলশিং ওইনা নৎত্রগা লাইরিক অমদা নীংথিনা দোকুমেন্ত তৌনবা পুক্নিং থৌগৎলদুনা, “অদোম্না হরাও নুংঙাইবা অতোপ্পদা পাউদম্বদা নুংঙাইবা অদু শরুক কয়া হেনগৎলক্কনিো” হায়না শ্রী মোদীনা ফোঙদোকখি।

সিভিল সর্ভিসেস একজামিনেসনগীদমক শেম শারিবা উত্তর প্রদেশকী জোনপুর দিস্ত্রিক্ততগী মাইভারত ভোলুন্তিয়র শ্রী অসিস সোনীনা নহাশিংবু বজেত শেম্বগী থৌওংদা ৱাখল্লোন ফোঙদোকপা ঙমহনবগীদমক প্রধান মন্ত্রীবু থাগৎখি। হিমাচল প্রদেশকী স্পিতী লমদমগী কাজা খাসতা থেংনরকপশিং পাউদম্লদুনা, মহাক্কী মমা মপানা মনুং হঞ্জিনবা মফমশিংদা মোবাইল কন্নেক্তিবিতী নীংথিনা লৈরমদবা নীংশিংলদুনা ফীত ১৪,০০০ রোম ৱাংবা মফমদগী মহাক্না ভিদিও কোল তৌরকদবা অঙকপা ফাওখি হায়না পাউদমখি। মাইভারতপু অৱাবা কয়া থেংনরক্লবা মীরোলগা অওনবা কয়া থেংনরিবা মীরোলগগী মরক্তা শম্নহল্লিবা থোং অমনি হায়রদুনা হিক্কিমদা লৈবা মালেমগী খ্বায়দগী ৱাংবা পোস্ত ওফিসতগী প্রধান মন্ত্রী, মহাক্কী ইমুং মনুং, মিনিস্ত্রী ওফ য়ুথ এফ্যার্স, দিফেন্স মন্ত্রী অমসুং মহাক্কী দিস্ত্রিক্ত মেজিস্ত্রেত্তা ফাওনচে ইখিববু নীংশিংখি। ভারত অসি মেত্রো অমসুং এয়রপোর্তশিংখক্তা নত্তনা মাগী খ্বায়দগী মনুং হঞ্জিনবা মফমদা মথৌ তৌরিবা ইন্সতিত্যুসনশিংগী খুত্থাঙদসু শম্নহল্লি হায়না মহাক্না হায়খি, অমসুং ফীত ১৪,৫০০ রোম ৱাংবা মফমদা ক্যু.আর.-কোদ পেমেন্ত তৌবনা দিজিতেল ইন্দিয়া অসি লৈবাক পুম্বদা থাজবগী হৌরকফম অমা ওইরে হায়বগী খুদম্নি হায়খি। নুপীশিংগী সেল্ফ-হেল্প গ্রুপশিংগা ৱারী ৱাতায় শানবনা হোমস্তে, দিজিতেল প্লেতফোর্ম অমসুং সী বকথোর্ন-বেজ প্রদক্তশিংগী খুত্থাঙদা ওন্ত্রপ্রিন্যুরসিপকী মরমদা খঙহনখি, অদুগা পি.এম. মুদ্রা য়োজনা অমসুং দীনদয়াল অন্ত্যোদয়া য়োজনাগী মরমদা খন্নবনা হিংনবগী লম্বী পাকথোক চাউথোকহনবদা মীৎয়েঙ থম্লি হায়না ফোঙদোকখি। লমদম অদুগী নুমিদাংগী তুরিজমগী মতিংশিং ফোঙদোকপগী মথক্তা বোর্দর রোদ ওর্গনাইজেসন্না শাখিবা চিচম থোংনা লমদম অদুগী কন্নেক্তিবিতী, তুরিজম অমসুং শেন্মিৎলোনগী থবক থৌওংশিং ফীভম ফগৎহনবদা লৌরিবা থৌদাংবু মহাক্না ফোঙদোকখি।

তেক্নোলোজীনা লৈবাক্কী কাচিন কোয়া থুংনা য়ৌবা ঙম্লে অমসুং লমদমদুগী পোত্থোকশিং লৈবনা থবক পীরি, হিংনবগী লম্বীদা ঙাক্লৌ পীরি অমসুং লম লমগী শক্তমশিং ভারত শিনবা থুংনা পুদুনা চৎহল্লি হায়রদুনা, “অদোম্না চৎলুবা মফম অমা হেক্তদা অদোমগী খোঙচৎকী শেনফমগী য়ামদ্রবদা চাদা মঙাদি মফমদুগী মীয়ামদগী মখোয়গী পোত্থোকশিং লৈবদা শীজিন্নৌ,” হায়বা ৱাফম শ্রী মোদীনা থমখি।

ৱারী ৱাতায় শানবা অদু লোইশিল্লদুনা, প্রধান মন্ত্রীনা শরুক য়ারিবা নহাশিংগী মফমদা য়াইফ-পাউজেল পীখি। থৌরম অদুনা নহাশিংবু ভারতকী ঙমখৈ খুঙ্গংশিংদা পুরক্লিবা অওনবশিং হকথেংননা থেংনহনবা, মতমগা চুনদ্রবা মীৎয়েঙ হোংদোকহনবা অমসুং লৈবাক অসিগী নাৎকী খেন্নবা, চাওখৎ খোঙজেল, মীয়াম্না শরুক য়াবা অমসুং এক ভারত, শ্রেস্থ ভারতকী ৱাখল্লোন হেন্না মমুৎ তানা খঙহনবদা মাইভারতনা লৌরিবা থৌদাং উৎলি।

***