ভারতকী প্রধানমন্ত্রী

ঙসি প্রধান মন্ত্রী শ্রী নরেন্দ্র মোদীনা কর্নাতকাগী মাইসুরুদা শ্বামী বিবেকানন্দ কলচরেল য়ুথ সেন্তর-বিবেকা স্মারকা শঙ্গাখ্রে। থৌরম অদুদা তিনখিবা শক্নাইরবশিং অমসুং মীয়াম তরাম্না ওক্লদুনা, প্রধান মন্ত্রীনা সহর অসি কোল্লিবী লাইরেম্বী চামুন্দেশ্বরিদা কোক নোন্দুনা ইকায়খুম্নবা উৎখি।

রামকৃষ্ণ মিশন্দগী মহাক্না অধ্যাতিক্কী মরমদা তম্লকখিবশিং অদু নিংশিংলদুনা, মহাক্না য়াম্না নোল্লুক্না হৌরকপদগী হৌজিক মহাক্না পাংথোক্লিবা থবকশিং অসি ফাওবগী মহাক মশাগী পুন্সি খোঙচত্ত লুপ অসিনা পীখিবা অকনবা ইথিল প্রধান মন্ত্রীনা পনখি। প্রধান মন্ত্রীনা হায়খি মদুদি অদোম ময়াম শরুক য়াবা মরম্না, ঙসি মাইসুরুগী শেংলবা লমদম অসিদা ঐনা য়াম্না তোঙানবা অমসুং মপাঙ্গল কল্লবা শক্তি অমা ঐনা থেংনরে।

সহর অসি ভারতকী নাৎকী ৱাখল্লোনগী মরমদা খঙনবগী মুৎপা নাইদ্রবা মফম অমনি হায়না শিংথারদুনা, প্রধান মন্ত্রীনা হায়খি অচৌবা কোনুংশিং, ফজরবা কুহ্মৈশিং অমসুং পুৱারি ওইরবা চৎনবীশিং য়াওনা ইনাকখুল্লবা নাৎকী পুক্কৈ অমা সহর অসিনা ঙাক-শেন্দুনা থম্লি। সহর অসিগী পোৎশক খুদিংমক্ত ভারতকী হেরিতেচকী মমি তারি অমসুং কমদৌনা সহর অসিনা মসি মপুংফানা ঙাক-শেনবগে অমসুং হেন্না ফজহনবগে হায়বা উবদা অপেনবা ফাওই।

বিবেকা স্মারকা হায়না খঙনবা নৌনা শঙ্গারিবা শ্বামী বিবেকানন্দ য়ুথ সেন্তরগী পুৱারি ফোঙদোক্লদুনা, শক্নাইরবা সাধু, কুভেম্পুগুম্বা লমদম অসিগী পন্দিৎশিং অমসুং সহর অসিগী ৱাখল-লৌশিংগী মরক্ত লৈনরিবা পুৱারি ওইরবা মরী অদু প্রধান মন্ত্রীনা ইকায়খুম্নবা উৎখি। প্রধান মন্ত্রীনা হায়খি পুৱারি ওইরবা মফম অসি শঙ্গাবগা লোয়ননা, অচৌবা মিসন অসিদা ঐখোয়না থৱায় য়াওনা নৌনা পাকথোক-চাউথোকহল্লে।

অচম্বা মীওই অমা মশক থোকপা মীওই অমা ওইরক্নবা অকনবা অধ্যতিক্কী চাংয়েংশিং দরকার ওইবা অদু পল্লদুনা, প্রধান মন্ত্রীনা হায়খি মদুদি অচুম্বা থিরিবা মীওই অমনা হৌরকপা মফমদা মীৎয়েং শানবা মীওইশিংগী মতেংনা অচৌবা থৌদাং লৌই। অৱা-অনা মায়োক্নদুনা অচুম্ব থিরিবা মীওই অমা ইকায়খুম্নবা মীওই অদু মখোয়গী অধ্যতিক্কী পান্দম অদু ফংনবা মরুওইবা খোঙলোয় অমনি।

পুৱারিগী ৱারি মচা অমা লীরদুনা, প্রধান মন্ত্রীনা হায়খি মদুদি চহি ১৩০ গী মমাংদা নহা ওইরিবা, মীয়াম্না মশক খঙনদ্রিবা কোইনা চৎপা সাধু অমা মাইসুরুগী মহারাজানা মশক খঙখি অমসুং মতেং পাংখি অমসুং মরুওইবা থবক অদুনা তুংদা শ্বামী বিবেকানন্দা অমেরিকাদগী মতিক চাবা ইকায়খুম্নবা ফংখি। মহাক মমিং চৎত্রিঙৈদা মহাক মশক খঙখিবা মীওইগী মনুংদা মশক থোকপা মীওই অমা ওইনা মতম অদুগী মহারাজা য়াওখি।

রামকৃষ্ণ আশ্রমগী মরুওইবা ৱাঙুলোনগা শ্বামী বিবেকানন্দগী মশাগী ওইজবা থিদনা মীয়ামগী থবক তৌবগী থাজবগা মান্নবা অদু পল্লদুনা, প্রধান মন্ত্রীনা হায়খি রামকৃষ্ণ আশ্রম অসিনা চহি ১০০ রোম লাইরিক-লাইশু, মেদিকেল অমসুং মহৌশাগী ওইবা অমাং-অতাশিংদা মতেং পাংবগীদমক কৎথোকখিবা অদু থাগৎলি। তশেংনা, অতোপ্পশিংগীদমক মহাক মথন্থ হিংখি অমসুং লাইৱা অদুগী মতুংইন্দুনা, রামকৃষ্ণ আশ্রম অসি চহি ১০০ মপুংফারে।

নৌনা শঙ্গারিবা মেমোরিএল অসিগী তুংগী কান্নবা পল্লদুনা, প্রধান মন্ত্রীনা হায়খি লৈবাক অসিনা হেন্না মরুওইনা লৌবা অমসুং মখোয় মশাগী লনাই পান্দমশিং মনিংদা থম্বা অনৌবা মীরোলগী নহারোল অমা ইন্সতিতুৎ অসিনা পুথোক্কদবনি। ইমা ভারতকী সেবা তৌবা অমসুং লায়রবগী অৱাবশিং কোকহনবনা মখোয়গী পুন্সিগী পান্দম ওইবা অসিগুম্বা নহারোলশিং পুথোক্কদবনি।

শ্বামী বিবেকানন্দগী মতমদা ভারতকী নহারোলশিং মীনাই ওইখিবা অমসুং হৌজিক্না মালেমদা মাংজিল থারিবা অদুগী খেন্নবা অদু পল্লদুনা, প্রধান মন্ত্রীনা হায়খি মদুদি নহারোলশিং লাইরিক হৈহনবা হায়বসি লৈবাক শেমগৎনবগী অমতা ঙাইরবা য়ুম্ফমনি হায়না ফিলোসোফর অসিনা উখি। মতম অমদা চেনশিংনা পুল্লম্বা ভারতকী নহারোলশিং হৌজিক মালেম শীনবা থুংনা চাউখৎপগি খোঙজেলদা থৱায় য়াওনা শরুক য়ারি।

নহারোলশিংনা তেক্নোলোজি অমসুং শেন-থুমগী মাইপাকপা কয়া পুরক্লিবা অসি পল্লদুনা, প্রধান মন্ত্রীনা হায়খি  মদুদি লৈবাক অসি মালেমদা লৈবাক অসি খ্বাইদগী য়াংনা চাউখৎলক্লিবা ইকোনোমি অমা, অহুমশুবা খ্বাইদগী চাউবা ষ্টার্দঅপ ইকোসিষ্টেম অমসুং অনিশুবা খ্বাইদগী চাউবা মালেম শাবা লৈবাক ওইহনবগী মনা নহারোলশিংদা পীরি। ঙসি, ভারতনা এ.আই, অরুবা তেক্নোলোজি, স্পেস তেক্নোলোজিদা অনৌবা পন্দুবশিং ইরে অমসুং ইন্নোবেসন অসি ঐখোয়গী নহারোলশিংগী তৌবা ঙম্বা ওইরে। 

এরোস্পেস সেক্তরদা হন্দক পুৱারি ওইরবা মাইপাকপশিং পুরকখিবা অদু পল্লদুনা, প্রধান মন্ত্রীনা হায়খি মদুদি লনাই শাজবা রোক্কেত অমা মাইপাক্না থাগৎখিবা অদু লৈবাক অসিগী দিজিতেল অমসুং মেনুফেকচরিংগী অওনবশিং থিংবা ঙমদনা চাউখৎলকপগী ময়েক লারবা খুদম অমনি। মসি অত্মনির্ভর ভারত নত্ত্রগা মেক ইন ইন্দিয়া কেম্পেন ওইবা য়াই, মাইপাকপা অসিগী তুংদা লৈরিবা অসি ভারতকী নহারোলশিংগী মপাঙ্গলনি।

নহারোলশিংগী কান্নবা লৌনবা সরকারগী থৌদাং অদু পল্লদুনা, প্রধান মন্ত্রীনা হায়খি মদুদি অচুম্বা খুদোংচাবশিং পীরবা, মাইকৈ চুম্লবা অমসুং অফবা লাইরিক-লাইশুগী ইনফ্রাষ্ট্রকচর লৈরবা মতমদা নহারোলশিংগী তৌবা ঙম্বশিং লৈবাক অসিগী মপাঙ্গল ওন্থোকপা ঙমগনি। মখোয় মশাগী লমদমদা অচৌবা মঙ মঙনবা মখোয়না চপ চানবা থাজবা লৈরবা মতমদা নহারোলশিং লৈবাক অসিগী অমতা ঙাইরবা মপাঙ্গল ওইরক্কনি।

চহি ১০ হেন্না অৱাংবা থাক্কী মহৈ-মশিং তম্বগী ইনফ্রাষ্ট্রকচর পাকথোক-চাউথোকহল্লিবা অসি পল্লদুনা, প্রধান মন্ত্রীনা হায়খি অনৌবা য়ুনিভর্সিতি ৬৫০ হেন্না, কোলেজ ১৪,০০০, আই.আই.এম.এস অমসুং আই.আই.তিশিংগুম্বা মরুওইবা ইন্সতিতুসনশিং লিংখৎলে অমসুং মেদিকেলগী সিতশিং শরুক অনি হেনগৎহন্দুনা এম.বি.বি.এস সিত ১,৪০,০০ হেল্লে। ভারত শীনবা থুংনা অপুনবা মহৈলোয়শঙ মশিং মখা তানা য়াংনা হেনগৎলকপদা হরাওবা ফাওই।

লাইরিক-লাইশুগী থবক মতমগা চুনবা মওংদা শেমগৎলিবা অসিগী মতাংদা প্রধান মন্ত্রীনা হায়খি মদুদি ২১শুবা চহিচাগী দরকার ওইবশিং ফংনবা নেসনেল ইজুকেসন পোলিসিনা লাইরিক-লাইশু তম্বগী থবকশিং অমুক হন্না শেমদোক্লে। অমরোমদা, ঐখোয়না ইনফ্রাষ্ট্রকচর মতমগা চুনবা মওংদা মপুংফানা শেমগৎলে লোয়ননা অনৌবা মতমগী দরকার ওইবা মতুংইন্না অপুনবা লাইরিক-লাইশু তম্বগী থবক শেমগৎলি। 

প্রাইমারি অমসুং সেকেন্দরি থাক্কী মহৈ-মশিং তম্বগী লমদা অওনবা পুরক্লিবা অসিগী মতাংদা, প্রধান মন্ত্রীনা হায়খি মদুদি পি.এম শ্রী স্কুল ১৪,০০০ হেন্না লিংখৎলে অমসুং ঙল্লিঙৈদগী হৌনা সাইন্তিফিক ওইবা অনৌবা থবকশিং পায়খৎপা হেনগৎহন্নবা অতল তিনকরিং লেব ১০,০০০ হেন্না লিংখৎলে। মহৈ তম্বা অসি শুপ্নগী লাইরিক খক পাবা ওইরোইদবনি; ঐখোয়না অঙাংশিংদা অনৌবা থবক পাংথোক্নবা অমসুং অকনবা সাইন্তিফিক ওইবা ৱাখল্লোন চেনহনগদবনি।

মতমগা চুনবা লাইরিক-লাইশুগী অওনবশিং পুরকপদা মগুন লৈহন্নবা শ্বামী বিবেকানন্দগী পান্দম ফোঙদোক্লদুনা, প্রধান মন্ত্রীনা হায়খি মদুদি অথিংবা কয়া লৈরম্বা অদু লৌথোক্লে, সাইনিক স্কুলশিং অমসুং এন.দি.এদা নুপীমচাশিং মিং চল্লে অমসুং মমালোলশিংদা প্রোফেসনেল দিগ্রি কোর্সশিং তম্বা য়ারে। লাইরিক-লাইশু তম্বদা মীচং-মীখায় নাইবা অমতা লৈরোইদবনি অমসুং ঙসি ফংলিবা খুদোংচাবশিং অসি লৈবাক অসিগী অপুনবা পান্দম অমা ওইরে।

লমচৎ-শাজৎ শেমগৎপদা হকচাং ফবা অমসুং থকসি-খাসি লৈবনা লৌরিবা মরুওইবা থৌদাং পল্লদুনা, প্রধান মন্ত্রীনা হায়খি মদুদি খেলো ইন্দিয়া গেমসগুম্বা থবকশিং পাকথোক-চাউথোকহন্দুনা লৈবাক অসিগী শান্ন-খোৎনবগী চৎনবী অমা সরকারনা পুক্নিং থৌগৎলে। ঙসিদি, শান্নবা অসি ওফিসিএল ওইনা মশক খঙলে অমসুং ঐখোয়গী লৈবাক শেমগৎপগী থবক্ত মরুওইবা শরুক অমা ওইনা মপুংফানা য়োকখৎলে।

মালেমগী ওইনা মাইপাকপগা লোয়ননা মখোঙদগী হৌনা শান্নবগী মচাক-মথুমশিং পাক-শন্না শেমগৎলিবা অসি পল্লদুনা, প্রধান মন্ত্রীনা হায়খি অপীকপা সহরশিংদগী হৈথোই-শিংথোইরবা শান্নরোয়শিং থোক্লকপদগী লৈবাক অসিনা মালেমগী ওইনা চাংদম্নবদা মশক থোক্না ফিবম ফগৎলে। ঐখোয়গী অখন্নবা শান্নরোয়শিংনা ফজরবা অনৌবা রেকোর্দশিং থম্লে অমসুং ঐখোয়গী ইচানুপীশিং লেপ্তনা লৈবাক অসিগী চাউথোকচবা ওইরে।

খুন্নাইগী হেন্না চাউবা পান্দমশিং থবক ওইনা পাংথোক্নবা নৌনা শঙ্গারিবা মেমোরিএল অসিনা হকথেংননা ইথিল পীগনি হায়না পল্লদুনা, প্রধান মন্ত্রীনা হায়খি মদুদি লমদম অসিগী নহারোলশিংনা খুন্নাইগী ওইবা খুদোংচাদবা কয়া মায়োক্নরি। শ্বামী বিবেকানন্দ জি গুম্না, হেন্না ৱাংবা পান্দম অমগীদমক চোকথবা নাইদনা থবক তৌনবা বিবেকা স্মারকা অসিনা ঐখোয়দা অকনবা ইথিল পীরে।

লৈবাক অসিগী খ্বাইদগী নানবা সহরশিংগী মরক্ত সহর অসি য়াওবগীদমক থাগৎলদুনা, প্রধান মন্ত্রীনা হায়খি মদুদি মহৌশাগী অকোয়বগী ফিবম ঙাক-শেন্নবা অমসুং ঈশিং তুংশিন্নবা মীয়াম্না অকনবা, মিসনগী মওংদা থবক পায়খৎকদবনি। মমল য়াম্লবা ঈশিংগী মরিক অমা ফাওবা তুংশিন্নবা অকনবা পান্দম অমগী মওংদা ঐখোয়না থবক পায়খৎকদবনি।

কন্নরাদা হন্দোক্লবা বালমিকি রামায়ন ফোঙবদা হরাওবা ফোঙদোক্লদুনা, প্রধান মন্ত্রীনা হায়খি স্মার্দফোন্না পুক্নিং চোইথোকহনবা নহারোলশিংনা কন্না থিংগদবনি অমসুং রাজ্য অসিগী ইনাকখুল্লবা সাহিত্যগী পোৎথোকশিংগা শম্নগদবনি। নহারোলশিং স্ক্রিনশিংদগী লাপথোকহন্নবা অমসুং ঐখোয়গী ফজরবা কন্নরা সাহিত্যগা মপুংফানা মরী লৈন্নবা ঐখোয়না কন্না ইথিল পীবা য়াগদরা?

‘ভোকেল ফোর লোকেল’ ৱাখল্লোনগী মতাংদা, প্রধান মন্ত্রীনা হায়খি মদুদি মখোয়না খুদোলপোৎশিং পীবা দরকার ওইরকপা মতমদা লমদম অসিগী হেন্দিক্রাফশিং, মুগা অমসুং চা চন্দনগী পোৎথোকশিং লৈদুনা মীয়াম্না লমদম অসিগী খুৎহৈবশিং মপুংফানা শৌগৎকদবনি। ঐখোয়গী খুদোলপোৎশিং ভারতমচা অমনা ৱানা পুথোকপা পোৎথোক ওইহনবনা লমদম অসিগী ইমুংশিংদা মরুওইবা শেন-থুমগী মতেং পাংবগা লোননা ফজরবা ঐখোয়গী নাৎ অমসুং চৎনবীশু য়োকখৎকনি।  

মহাক্কী ৱারোল লোইশিল্লকপদা, প্রধান মন্ত্রীনা হায়খি মদুদি লৈবাক অসিগীদমক শ্বামী বিবেকানন্দনা মঙজরম্বা মঙলান অদু মঙফাওনবা ঙম্নবা হৌজিক্কী মীরোলদা অচৌবা থৌদাং শীন্নরে অমসুং নহারোলশিংগী ফিবম ফগৎহন্নবা মৈরা অমা ওইনা মেমোরিএল অসিনা তুংদা অকনবা থৌদাং লৌগনি। হৌজিক্কী মীরোল অসিনা অচৌবা থৌদাং অসি থবক ওইনা পাংথোকপদা মতেং পাংনবা বিবেকা স্মারকা অসিনা অকনবা শক্তিগী হৌরকফম অমা ওইনা থবক তৌগনি হায়না ঐনা চেৎনা থাজৈ।

Speaking at the inauguration of Viveka Smaraka at Sri Ramakrishna Ashrama in Mysuru.
https://t.co/IqVEAM1gy9

— Narendra Modi (@narendramodi) August 1, 2026

Swami Vivekananda truly embodied the spirit of India. pic.twitter.com/gTNpyET9qX

— PMO India (@PMOIndia) August 1, 2026

India’s youth are driving global growth. pic.twitter.com/qhOcHyFI7U

— PMO India (@PMOIndia) August 1, 2026

It is for today’s generation to turn Swami Vivekananda’s vision of India into reality. pic.twitter.com/oK58ejuZpg

— PMO India (@PMOIndia) August 1, 2026

***