ভারতকী প্রধানমন্ত্রী

প্রধান মন্ত্রী শ্রী নরেন্দ্রা মোদী ২০১৯গী ফেব্রুৱারী ৮দা জলপাইগুরিদা চৎকনি। মফম অদুদা মহাক্না এন.ঐচ. ৩১ দিগী ফালাকাতা-সালসালাবরি সেক্সনগী লেন মরিগীদমক উরেপ উয়ুং তমগনি। মসিগী কিলোমীতর ৪১.৭ শাংবা নেস্নেল হাইৱেগী সেক্সন অসি ৱেস্ত বেঙ্গোলগী জলপাইগুরি জিলাদা লৈরি, অমদি লুপা কোতি ১৯৩৮গী মমল চংনা শেমগৎকনি।

প্রোজেক্ত অসিনা সলসালাবরি অমসুং অলিপুরদ্বারদগী সিলিগুরি ফাওবগী অরাপ্পা চাওরাক্না কিলোমীতর ৫০ হন্থরগনি। নেস্নেল হাইৱে অসিনা লমদম অসিদগী কৈথেল ফাওবা চা মনা অমসুং অতোপ্পা লৌউ-শিংউবগী পোত্থোকশিং পুথোক পুশিন তৌবদা হেন্না লায়থোকহল্লগনি। কনেক্তিবিতী ফগৎহনবা অসিনা লমদম অসিদা লমকোইবগী মশিংসু হেঙ্গৎহল্লগনি। পুম্নমক অসিনা রাজ্য অসিদা সোসিও-ইকোনোমিক এক্তিবিতীদা অচৌবা ইনোৎ অমা পীরগনি, লমদম অসিগী মীওইশিংদা এমপ্লোইমেন্তকী খুদোংচাবাশিং লৈহল্লগনি।

নেস্নেল হাইৱে অসি লম্বী শিজিন্নরিবশিংদা অৱা অনা লৈহন্দনবা দরকার লৈবা শেফতী ফিচর পুম্নমক য়াওগনি। নেস্নেল হাইৱেগী সেক্সন অসিদা রেলৱে ওভর ব্রিজ ৩, ফ্লাই ওভর অনি, ভেহিকুলর অন্দরপাস ৩, অচৌবা থোং ৮ অমসুং অপিকপা থোং ১৭ লৈগনি।

প্রধান মন্ত্রী শ্রী নরেন্দ্র মোদীনা জলপাইগুরিদা ন্যু হাই কোর্ত সর্ক্যুইৎ বেঞ্চসু শঙ্গাগনি। জলপাইগুরিদা লৈরিবা কলকত্তা হাই কোর্তকী সর্ক্যুইৎ বেঞ্চ অসিনা নোর্থ বেঙ্গোলগী দার্জলিং, কলিমপোং, জলপাইগুরি অমসুং কুচ বিহারগী মীয়ামদা খোংজেল য়াংনা জস্তিজ ফংহল্লগনি। জিলা মরি অসিদা লৈরিবা মীওইশিংনা কলকত্তা হাই কোর্ত্তা কিলোমীতর ৬০০ চৎপগী মহুৎ কিলোমীতর ১০০ য়ৌদনা বেঞ্চ অসিদা লাক্তুনা থবক চত্থবা য়ারগনি।