ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদী ২০১৯গী জনুৱারী ৩০দা গুজরাতকী সুরত অমসুং দান্দিদা চৎকনি।

খোংচৎ মনুংদা প্রধান মন্ত্রীনা সুরত এয়ারপোর্ত্তা তর্মিনেল বিলদিং পাকথোক চাওথোকপগী উরেপ উয়ুং তমগনি। তর্মিনেল বিলদিং অসি লুপা কোতি ৩৫৪ হেন্না চংনা স্ক্ব্যার মীতর ২৫,৫০০গী এরিয়াদা শাগনি। মসি সোলর ইনর্জী অমসুং এল.ই.দি. লাইতিং শিজিন্নবা ইকো-ফ্রেন্দলী সস্তেনেবল বিলদিং অমা ওইগনি। শাবা লোইবগা মসিনা পেসেঞ্জর ১৮০০ হেনবগী পীক হেন্দলিং কেপাসিতী অমা লৈরগনি। সুরত এয়ারপোর্ত অসি এয়ারক্রাফ মুবমেন্ত অমসুং পেসেঞ্জর ত্রাফিক অনিমক্তা অহমেদাবাদ অমসুং বদোদরাগী মতুংদা গুজরাত্তা অহুমশুবা মী খ্বাইদগী চিনবা এয়ারপোর্তনি।

চাওখৎ থৌরাংগীদমক ইনফ্রাস্ত্রকচর হেঙ্গৎহনবা অসি সরকার অসিগী প্রায়োরিতীশিংগী মরক্তা অমনি। তোঙান তোঙানবা সেক্তরশিংদা ইনিসিয়েতিব কয়া অমা পায়খৎখ্রে অমদি এভিয়েসন সেক্তর অসিসু মদুগী মরক্তা অমনি। গুজরাত্তা, সিভিল এভিয়েসন ইনফ্রাস্ত্রকচর হেঙ্গৎহনবতা নত্তনা এয়ার কনেক্তিবিতীসু হেঙ্গৎহল্লে। মসিদা উরান স্কিমগী থোংদা কান্দলাবু মুম্বাইগা অমসুং পোরবন্দরবু অমমেদাবাদ অমসুং মুম্বাইগা শম্নহনবা য়াওরি। হিরাসর, রাজকোত্তা গ্রীনফিল্দ এয়ারপোর্ত, অহমেদাবাদ অমসুং বদোদরাদা অনৌবা এ.তি.সি. তৱার/ তেক্নিকেল ব্লোক দিবেলপ তৌবা অসিনচিংবশিং য়াওরি।

সুরত্তা প্রধান মন্ত্রীনা ন্যু ইন্দিয়া য়ুথ কনক্লেবতা শরুক য়ারিবা নহাশিংগা উনদুনা ৱারি শান্নগনি। মহাক্না শ্রীমতী রশিলাবেন সেবান্তিলাল শাহা ভেনস হোস্পিতালসু শঙ্গাগনি অমসুং মদুদা ফংলিবা ফেসিলিতীশিং অদুসু য়েংগনি।

প্রধান মন্ত্রীগী মথংগী পন্থুংফম গুজরাতকী নবসারি জিলাদা লৈরিবা দান্দিদা ওইগনি। মফম অসিদা মহাক্না বাপুনা লৈখিদবগী নুমীৎতা নেস্নেল সোল্ত সত্যগ্রহ মেমোরিয়েল জাতিদা খুৎশিন্নগনি। মেমোরিয়েল অসিদা মহাত্মা গান্ধী অমসুং পুৱারি ওইরবা দান্দি সোল্ত খোংচৎ মনুংদা মহাক্কা লোয়ননা খোংচৎ য়াওখিবা সত্যগ্রহিস ৮০গী মীতম য়াওরি। মেমোরিয়েল অসিদা পুৱারি ওইরবা ১৯৩০গী থুমগী খোংচৎকী তোঙান তোঙানবা থৌদোকশিং অমসুং ৱারিশিং য়েকথোক্লিবা নেরেতিব ম্যুরেল ২৪সু য়াওরি। প্রধান মন্ত্রীনা মেমোরিয়েল ফাওদুনা খোংনা চৎকনি অমসুং মীয়ামগী মীফম অমদা ৱা ঙাংগনি।

দান্দি খোংচৎ হায়না খংনবা ১৯৩০গী সোল্ত সত্যগ্রহ খোংচৎ অসি ভারতকী নিংতম খোংজংগী পুৱারিদা মরুওইবা থৌদোক অমা ওইরি। ব্রিতিস লৈঙাক্কী মায়োক্তা সিভিল দিসওবেদিয়েন্স মুবমেন্তকী শরুক অমা ওইনা মহাত্মা গান্ধীনা লুচিংদুনা সত্যগ্রহিস ৮০না অহমেদাবাদকী সবরমতি অশ্রমদগী মাইল ২৪১ লাপ্না দান্দিগী শমুদ্র মপালগী খুঙ্গংদা ব্রিতিসনা থম্লিবা সোল্ত লো থুগায়দুনা সমুদ্রগী ঈশিংদগী থুম শুংনবা খোংচৎ চৎখি।

মসিনা থা অসিদা প্রধান মন্ত্রীগী অনিশুবা গুজরাত খোংচৎ ওইরগনি। প্রধান মন্ত্রীনা মমাংদা হজারিদা আর্মোর্দ সিস্তেম কমপ্লেক্স খুৎশিন্ননবা ২০১৯গী জনুৱারী ১৯দা সুরত্তা চৎখ্রে। গুজরাতকী গান্ধীনগরদা ২০১৯গী জনুৱারী ১৬ অমসুং ১৭তা পাংথোকখিবা বাইবরেন্ত গুজরাত সম্মিত্তা মহাক্না শরুক য়াখি।