ভারতকী প্রধানমন্ত্রী

ফিক্কীগী প্রসিদেন্ত শ্রী পঙ্কজ আর. পতেলজি, প্রসিদেন্ত খল্লবা শ্রী রামেশ সাহজি, সেক্রেতরি জেনরেল দা. সঞ্জয় বারুজি অমসুং মফম অসিদা তিনবিরিবা অতোপ্পা শক্নাইরবশিং,

ময়াম পুম্নমক্না মফম অসিদা ফমদুনা মমাং চহিদা পাংথোকখিবা থবকশিং অদুগী স্তোক লৌবিরি । চহি অসিদা, ফিক্কী অসি চহি ৯০ মপুং ফারে । মসি ওর্গনাইজেসন অমা হেক্তগী য়াম্না চাওথোকচনিঙাইনি । ময়াম পুম্নমক্তা ঐহাক্না নুঙাইবা ফোংদোকচরি ।

মরূপশিং,

সাইমন কম্মিসন লিংখৎখিবা অদু ইং ১৯২৭ অদুৱাইদনি । মতমদুদা কম্মিসনগী মায়োক্তা ইন্দিয়ান ইন্দস্ত্রীনা পুনখিবা মতৌ অদু তশেংনা পুক্নিং থৌগৎনিঙাই অমসুং পুৱারি ওইরবা থৌদোক্নি । ইন্দস্ত্রীনা মসিগী সেল্ফ ইন্তরেস্তকী মথক্তা লান্দুনা সাইমন কম্মিসনগী মায়োক্তা খোংজেল হৌনা লাওখি । জাতিগী য়াইফনবা ভারত সমাজকী কয়াৎ খুদিংমক্না মাংলোমদা চংশিল্লকখি মদুগা মান্ননা ইন্দিয়াগী ইন্দস্ত্রিয়েলিস্তশিংনশু মখোয়গী ইনর্জী অদু জাতি শেমগৎপদা কৎথোকখি । 

ইচল ইচে অমসুং ইচিল ইনাওশিং,

চহি ৯০ মমাংদা মীচম প্রজানা মহাক্কী নোংমগী মথৌদাংশিং অদুগা লোয়ননা জাতিগী থৌদাং লৌনবা মাংলোমদা চংশিল্লকখি, মদুগা মান্নবা য়ুগ অমা অমুক হৌরে ।  হৌজিক্কী মতম অসিদা মীয়ামগী এক্সপেক্তেসন, এন্তিসিপেসনগী থাক অদু অদোম্না খংবা ঙমগনি । ইন্তরনেল ভাইসশিং, শেঞ্জা-থুমজা, ব্লেক মনি অদিগী মীয়াম্ন অসি পেন্নরে অমসুং মসি পুম্নমক অসি চুমথোকপা পাম্লে ।

মরূপশিং,

নিং তম্বা ফংলবা মতুং লৈবাক অসিদা পোৎশক কয়া অমা ফংলে অদুবু চহি খরা অসিদা ঐখোয়গী মাংদা অহোংবা কয়া অমা লাকলিবা অসিসু অচুম্বনি । নিং তম্বা ফংলবা চহি ৭০গী মতুং ফাওবা ঐখোয়গী সিস্তেম অমা লৈরি মদুগী মখাদা লাইরবা মীওইশিংনা অমনা নত্রগা অমদা সিস্তেম অসিগী মায়োক্তা লানথেংনরি । মহাক্না অপিকপা পোৎশক অমগী লানথেংনরি ।

মদুগুম্বা লাইরবা মীওই অদুনা বেঙ্ক একাউন্ত অমা হাংবা পাম্বদা সিস্তেমনা অয়েৎপা পিরকই । করিগুম্বা মহাক্না গ্যাস কনেক্সন অমা লৌবা পাম্লবসু মহাক্না তোঙান তোঙনবা থোং তরা থিল্লুবা তারম্মী । মহাক মশাগী পেন্সন নত্রগা স্কোলরশিপ ফংনবগীদমক্তা তোঙান তোঙানবা মফমশিংদা কম্মিসন পিবা মথৌ তারম্মী ।

সিস্তেমগী মায়োক্তা লানথেংনরিবা অসি লোইশিন্নবা ঐহাক্কী সরকারনা থবক তৌরি । ঐখোয়না অদুগুম্লবা সিস্তেম অমা শেম্লে মদুনা ত্রান্সপরেন্ত ওইবগা লোয়ননা সেন্সিতিব ওইবা । অসিগুম্লবা সিস্তেম অমা মদুনা প্রজানা মায়োক্নরিবা প্রোব্লেমশিং ৱারোইশিন পুরক্লিবা ।

মদুমক্না ঐখোয়না জন ধন স্কিম হৌদোকপা মতমদা পাক চাওনা পাওখুম ফংখিবা অদুনি । ময়াম্না খংলগদি অঙকপা ফাওগনি মদুদি মসিগা মরি লৈনবা মখল অমত্তগী দাতা, মখল অমত্তগী ইনফোর্মেশন সরকারদা লৈতবনা ঐখোয়না লাইরবা মীওইশিংগী একাউন্ত কয়া য়াম্না হাংবা মথৌ তারিবনো হায়বা অদু ঐখোয়না লেপথোকপা ঙমখিদে ।

বেঙ্কশিংনা লাইরবশিংবু করিগুম্বা মতমদা চৈ থাংদুনা নত্রগা মখোয়গী চে চাংশিংদা অরানবা পুথোক্তুনা হন্থনা য়েংলি হায়বা ইনফোর্মেশন অদু খক্তা ঐখোয়দা লৈরম্মী । ঙসিদি লাইরবা মীওই কোতি ৩০ হেনবনা জন ধন স্কিমগী খুথাংদা মখোয়গী বেঙ্ক একাউন্তশিং হাংদোকপা উবা মতম অদুদা প্রজাগী চাওনা মথৌ তারম্বা অমা ফংহল্লে হায়না ঐঙোন্দা ফাওজখি ।

ইচল ইচে অমসুং ইচিল ইনাওশিং,

ঐখোয়গী সরকার অসিনা মসিগী ওইবা স্কিমশিং অসি প্রজানা থেংনরিবা প্রোব্লেমশিং অমসুং মখোয়গী মথৌতাবশিং অদু য়েংদুনা শেম শাই । প্রজাগী পুন্সি মহিং অসি হেন্না অরাইবা মওং মতৌ ওইহন্নবা মসিগী মীৎয়েং অসিনা প্রায়োরিতী পিরি ।

চাকখুমগী লৈরংগী মৈখুদগী লাইরবা প্রজাবু ঙাকথোকপা ঙমহন্নবা উজ্বালা স্কিম হৌদোক্লে । ঐখোয়না নুপী কোতি ৩ হেনবদা লেম্না গ্যাস কনেক্সন ফংহল্লে । স্কিম অসি হৌদোকপদগী খুঙ্গংগী লমদমশিংদা ফুএল ইনফ্লেসন হন্থহল্লে । মসিনা হায়বদি হৌজিক্তি লাইরবা প্রজানা ফুএলদা চাদিং হন্থনা তৌরগনি ।

লাইরবা প্রজাশিংনা মায়োক্নরিবা প্রোব্লেম অমমম, মথৌতাবা অমমম সোল্ব তৌনবা ঐখোয়না থবক তৌরি । লাইরবা নুপীশিংনা ইকায় ফিরুক খুম্দনবা, মখোয়গী হকশেল অমসুং সেফতি অদু রিক্স লৈতনবা তোইলেত কোতি ৫ হেন্না শেম শারে ।

ময়ুম লৈজদবা লাইরবশিংদা মখোয়না য়ুমগী ভরাদা চাদিং তৌরিবা মমল অদুদা মখোয় মশাগী য়ুম শাবা ঙমজনবা লাইরবশিং অদুগীদমক প্রধানমন্ত্রী অভাস য়োজনা হৌদোক্লে ।

মরূপশিং,

অথাপ্পা তাম্লবা মফমশিংদা তোপ তোপ্পা সংসার অমা নখোয়না উবা ফংগনি, লৈবাক অসিগী খুঙ্গংশিংদা বিগ্যান ভবনগী অসিগুম্লবা মঙাল অসিদগী মপুংফানা তোঙাল্লি, মসিগী দেকোরেসন অমসুং এতমোসফিয়ার অসিদগী তোঙাল্লি । অদুগুম্লবা লাইরবগী সংসার অদুদগী থোক্লক্তুনা ঐহাক্না নখোয় ময়ামগী মরক্তা পুল্লরি ।

অকক্নবা রিসোর্সশিং, অকক্নবা এদুকেসন অদুবু লেপ্পা নাইদবা, য়েৎপিনবা য়াওদবা মংলানশিং । অদুগুম্লবা সংসার অদুনা ইফমদা থবক শুবা, ৱারেপশিং লৌবা তম্বিরম্মী  অমসুং লাইরবা প্রজাগী ওইবা, লৈবাক্কী ওইবা মথৌতাবশিং অদু খংনা ৱারেপশিং অদু চৎনহনবানি ।

মুদ্রা স্কিমনা নহা ওইরিবা প্রজাশিংগী মথৌতাবশিং অদু ফংহল্লে । বেঙ্ক গরেন্তিগী মথৌতাবা অদু ফংহল্লে । কনাগুম্বা নহা অমনা মশাগী ওইবা করিগুম্বা খরা তৌবা পাম্বা মতমদা অহানবা হংলক্লিবা ৱাহং অসি মতৌ করম্না শেল পুথোক্কদগে অসিনি ।

মুদ্রা স্কিমগী মখাদা সরকার অসিনা মসিগী গরেন্তি পিরি । হৌখিবা চহি অহুমদা ঐখোয়না চাওরাক্না লোন কোতি ৯.৭৫ সেঙ্কসন তৌখ্রে । বেঙ্ক গরেন্তি য়াওদনা নহাশিংদা লুপা কোতি লাখ ৪ হেনবা শেনফম য়েন্থোকখ্রে । ভারত সরকারনা নহাশিংগীদমক লেপ্লি অমসুং হৌখিবা চহি অহুম অসিদা লৈবাক অসিনা অনৌবা এন্ত্রেপ্রিনর্স লাখ অহুম অমগা ফংলে ।

মখোয়শিং অদু মুদ্রা স্কিমগী মখাদা মখোয়গী অহানবা বেঙ্ক লোন ফংলবা প্রজানি । মসিগী প্রজা কোতি অহুম অসিনা মখা তানা শন্দোক্তুনা লৈবাক্কী স্মোল ইন্দস্ত্রীজ সেক্তর, এমএসএমই সেক্তর হেন্না মপাঙ্গল কনখৎহল্লগনি ।

সরকার অসিনা স্তার্ত-অপসতশু পুক্নিং থৌগৎলি । স্তার্ত-অপসকী খ্বাইদগী চাওনা মথৌ তারিবা অসি রিক্স কেপিতেল লৈবনি । মসিগী মথৌতাবা অসি ফংনবা সরকারনা সিদবিগী মখাদা ফন্দ অমা শেমগৎলে । ৱারেপ অসিগী মতুং ইন্না, সিদবিনা ইনভেস্ত তৌখিবা অদু অতোপ্পা ইনভেস্তরশিংগী মতেংগা লোয়ননা শরুক মরি হেন্না লিবরেজ তৌরে ।

ইচল ইচে অমসুং ইচিল ইনাওশিং,

অল্তরনেত ইনভেস্তমেন্ত ফন্দসনা ইনভেস্ত তৌরিবা অসি স্তার্ত অপসকীদমক ইকো-সিস্তেমদা মরু ওইরি । সরকারনা লৌখিবা ৱারেপকী মতুং ইন্না হৌখিবা চহি অহুম অসিদা ইনভেস্তমেন্ত অসি চাং নাইনা হেঙ্গৎলক্লি । মতম অসিমক্তদা লুপা বিল্লিয়ন কয়াগী ওইবা লোন মকোকথোংবা ইন্দস্ত্রীএলিস্ত খরদা পিখ্রে ।

মরূপশিং,

ঐখোয়গী বেঙ্কিং সিস্তেম মপাঙ্গল কনখৎহন্নবা ঐখোয়গী বেঙ্কিং সিস্তেমগী অসোইবা মওং মতৌ অদু চুমথোক্নবা সরকার অসিনা চাং নাইনা খোংথাং লৌখৎলি । বেঙ্ককী ইন্তরেস্তশিং প্রোতেক্ত ওইবা মতমদা, কস্তমরশিংগী ইন্তরেস্তশিং প্রোতেক্ত ওইবা মতমদা লৈবাক্কী ইন্তরেস্ত খক্তমক সেফ ওইগনি ।

অসিগুম্বা তানফম অমদা ফিকীগুম্বা ইনস্তিত্যুসনশিংনা এৱার্নেস শন্দোক্তুনা মরুওইবা থৌদাং অমা লৌদুনা প্রজা অমসুং ইন্দস্ত্রীদা অচুম্বা ৱাফম অদু খংহনবনি । খুদম ওইনা হৌখিবা নুমীৎ খরা অসিদা ফাইনান্সিএল রিজোলুসন এণ্ড দিপোজিৎ ইন্সুরেন্স বিল-এফআরদিআই বিলগী মতাংদা হৌজিক ঙাংনবা তারি ।

সরকার অসিনা কস্তমরশিংগী ইন্তরেস্ত ঙাক শেন্দুনা বেঙ্কশিংদা দিপোজিৎ তৌরিবা মখোয়গী পৈশা অদু ঙাক শেন্নবা থবক তৌরি । অদুম ওইনমক, মপুং ফানা তাইওন্নবা পাও কয়া পংশন শন্দোক্লি । ইন্দস্ত্রী অমসুং মীচম প্রজাশিংবু লান্না লমজিংনবা হোৎনরিবা অসিগুম্বা ফিভম অসিদা ফিক্কীগুম্বা ইনস্তিত্যুসনশিংগী কন্ত্রীব্যুস অদু য়াম্না মথৌ তাই ।

সরকারগী খোল্লাও, ইন্দস্ত্রীগী খোল্লাও অমসুং প্রজাগী খোল্লাওগী মরক্তা খল অমা মতৌ করম্না ঙাক্তুনা থমগদগে হায়বা অদু নখোয়না খনগদবনি ।

মরূপশিং,

জিএসতি অয়াবা পিদুনা মপুং ফানা চৎনহনগদবনি হায়না ইন্দস্ত্রীনা কুইরবা মতমদগী তান্দুনা লাক্লি । হৌজিক চৎনরবা মতম অসিদা মসিবু হেন্না মগুন লৈহন্নবা অদোমগী ওর্গনাইজেসন্না করি থৌদাং লৌরিবগে । 

অসিগুম্বা তঞ্জা অসিদা সরকারনা মসাগী ওইবা মওংদা দিল তৌরি । অদুম ওইনমক ফিক্কীনা প্রজাগী মরক্তা, ললোন ইতিক্কী মরক্তা এৱারনেস ক্রিএত তৌনবা হোৎনখিবা লৈব্রা ।

ইচল ইচে অমসুং ইচিল ইনাওশিং,

জিএসতিগুম্বা সিস্তেমশিং অসি অহিং অমদা শেম্বা ঙম্বা নত্তে । হৌখিবা চহি ৭০ মমাংদা শেমখিবা সিস্তেম অদু অহোংবা পুরক্নবা ঐখোয়না হোৎনরি । অমসুং মসিগা লোয়ননা মশিং য়াম্লবা ললোন ইতিক লিঙ্ক তৌবা অসি ঐখোয়গী পান্দমনি ।

মসিগী তর্নওবর অসি লুপা লাখ অমা নত্রগা লুপা লাখ ১০ ওইবা য়াই, ঐখোয়না অপিকপা ত্রেদরশিংবু ফোর্মেল সিস্তেমদা পুরক্নবা হোৎনরি । মসি সরকারনা রেভেন্যু নত্রগা পৈশা খরা খোমগৎনবা পাম্বগী নত্তে । সরকারনা মসি পুম্নমক তৌবগী মরমদি সিস্তেমদা হেন্না ফোর্মেল ওইবা, হেন্না ত্রান্সপরেন্ত ওইবনা লাইরবশিংদা চাং মান্ননা কান্নবা ফংহল্লগনি ।

মসিগী মথক্তা, মসিগী ফোর্মেল সিস্তেম অসিনা মরম ওইদুনা মখোয়না বেঙ্কশিংদগী য়াম্না লাইনা ক্রিদিত ফংলগনি, রো মেতরিয়েলগী ক্বালিতী ফগৎলগনি অমসুং লোজিস্তিক্কী মমল হন্থহল্লগনি । মসিনা হায়বদি অপিকপা ললোন ইতিক ফাওবা গ্লোবেল বিজিনেসতা হেন্না কম্পেতিতিব ওইরগনি । ঐহাক্না থাজবা থম্লি মদুদি ফিক্কীনা অপিকপা ললোন ইতিক্কী গাইদেন্সকীদমক্তা অচৌবা স্কেল প্রোগ্রাম অমা শেমলগনি ।

মরূপশিং,

ইং ২০২২ দা ঐখোয়গী লৈবাক অসিনা নিং তম্বা ফংখিবগী চহি ৭৫ মপুং ফারকপগী থৌরম পাংথোক্কদৌরি । ঐখোয় পুম্নমক্না অনৌবা ভারত অমা শেম্নবা চংশিল্লি । ফিক্কীগুম্বা ইনস্তিত্যুসনশিংগী থবক্কী স্কোপ অসি য়াম্না পাক চাওই, অনৌবা ভারত অমা শেম্বদা মখোয়না লৌরিবা থৌদাং অসি অথোইবনি । ফুদ প্রোসেসিং, আর্তিফিসিএল ইন্তেলিজেন্স, সোলর পৱার, হেল্থ কেয়রগুবা সেক্তরশিং অসি ফিক্কীগী এক্সপরিয়েন্সতগী কান্নবা ফংগনি । লৈবাক্কী এমএসএমই সেক্তরগীদমক্তা অদোমগী ওর্গনাইজেসন অসিনা থিঙ্ক তেঙ্ক অমগুম থবক তৌবা ঙমগদ্রা?

ফিক্কী অমসুং মসিগী মীহুৎ খুদিংমকপু ঐহাক্কী মায়কৈদগী অমুক হন্না য়াইফ পাওজেল পিজবগা লোইননা ঐহাক্কী ৱাফম অসি মতাং অসিৱাইদা লোইশিনজরি ।

ময়াম পুম্নমকপু হাইনিঙাই লৈতনা থাগৎচরি ।

 ****