ভারতকী প্রধানমন্ত্রী

ভারতকী সুপ্রিম কোর্তকী জষ্টিস সুর্য়া কান্ত; কেন্দ্রগী মন্ত্রীমন্দলগী ঐগী মরুপ, শ্রীভুপেন্দ্র যাদব; ভারতকী এত্তোর্নি জেনেরেল, শ্রী আর. ভেনকাতরামনি; নেসনেল গ্রিন ত্রাইবুনেলগী চিয়ার্পসন, জষ্টিস শ্রীভাস্তবা অমসুং শক্নাইরবশিং, হোল অসিদা তিল্লিবা ইবেম্মাশিং অমসুং ইবুংঙোশিং।

চহি চা কয়া, মহৌশাগী অকোয়গী ফিবমগা মরী লৈনবা থবকশিংদা লম্বী অমদা ভারতনা মালেম লমজিংদুনা লাক্লি। ঐখোয়গী ৱাখল্লোন অমসুং ঐখোয়গী নাৎকী থবকশিংদা য়ুম্ফম ওইদুনা, মীওইবা খুন্নাইগীদমক মালেমগী অপুনবা থবক অমা পায়খৎনবা তকশিল্লিঙৈদা মতম অসিগী অইং-অশাগী খল হোংলকপগী পাম্বৈশিং হৌজিক ভারতনা পীরি। এন.জি.তিগী মীফম অসিনা পান্দম অদু খুমাঙচাউশিনবদা ঐ অপেনবা ফাওই। থৌরম অসিগা মরী লৈনবা এন.জি.তিগী থৌপুবশিং অমসুং শক্নাইরবা লনাই মীওইশিং ঐনা থাগৎচরি অমসুং য়াইফ পাউজেল পীজরি।

মরুপশিং,

কার্বোন থাদোকপগী দাইত্ব চাউখৎলক্লিবা লৈবাকশিংদা লান্না থংজিল্লে হায়বা ঐখোয়না খঙলে। মীফম অসিদা গ্লোবেল সাউথকী ঐগী মরুপ কয়া য়াওরি। অদুবু পুৱারিগী অচুম্বা অমা ওইনা ভারতনা মীকোক অমদা কার্বোন থাদোকপ অসি হৌজিক ফাওবা মালেমগী চাংচৎকী তঙ্খায় ফাওবা য়ৌদ্রি। চাউখৎলবা লৈবাকশিংদা মীকোক অমনা কার্বোন থাদোকপা অসি ভারত্তগী শরুক ৬ হেল্লে। মসিগী অচুম্বা ৱাফম অসি ভারতনা মালেমগী মীফমশিংদা পুথোক্লে। মসিগী ৱারেপ অসিসু থবক ওইনা উৎনবা ভারতমচা খুদিংমক্ত ঐনা তকশিল্লি। ঐখোয়গী চৎনবীশিং অমসুং মখোয়গী মপাঙ্গল ঐখোয়না মালেমদা উৎলে। থিমশিং অসি পুক্নিংদা থমদুনা ঐখোয়না পেরসিতা কোপ-২১ মনুংদা “কনভিনিয়েন্ত এক্সন-কন্তিন্যুতি ফোর চেঞ্জ” লাইরিক ফোঙখ্রে। মালেমগী লৈবাকশিং ঐখোয়গা লোয়ননা চৎমিন্নদুনা মহৌশাগী অকোয়বগী ফিবম ঙাক-শেন্নবা অনৌবা থবকশিং ঐখোয়না পায়খৎলে। মসি ‘নুমিৎ অমা, মালেম অমা, গ্রিদ অমা’ নত্ত্রগা ইন্তরনেসনেল সোলার এল্লাইন্স, সি.দি.আর, গ্লোবেল বাইওফ্যুএল এল্লাইন্স, ইন্তরনেসনেল বিগ কেত এল্লাইন্স, নত্ত্রগা ‘মিসন লাইভ’ (লাইভষ্টাইল ফোর ইনভাইরোনমেন্ত)গী পান্দম ওইবা য়াই, অসিগুম্বা মফম অমমম্না ভারতনা মহৌশাগী অকোয়বগী ফিবম ঙাক-শেন্নবা অমসুং ক্লাইমেতকী পায়খৎলিবা থবকশিংগী খুদম অমা ওইরে।

মরুপশিং,

ঙসি, ভারতনা লৈবাক অসিগী মহৌশাগী অকোয়বগী ফিবম ঙাক-শেন্নবা ৱাখল্লোনশিং অদু অনৌবা পান্দম অমনা য়োমশীন্দুনা মাঙলোমদা চঙশিল্লি। হৌখিবা চহি ১২ দা, ভারতনা মহৌশাগী অকোয়গী ফিবমগা মরী লৈনবা হিরম খুদিংমক্ত শিংথাবা য়ানা খুমাঙচাউশিল্লে। মহৌশাগী অকোয়বগী ফিবম ঙাক-শেনবদা অচৌবা থৌদাং অমা লৌরিবা রিন্যুএবল ইনর্জিদা অকনবা মীৎয়েং অমা থম্লে। পেরিস কোপ-২১ গী ৱাশকশিং অপীবা মতমগী মমাঙদা পাংথোকপা ঙম্বা অমতা ঙাইরবা জি-২০ লৈবাক ভারতনা ওইরে অমসুং ঐ জি-২০ গী শক্নাইরবা লুচিংবশিংগী মমাঙদা লেপ্লি। মফম অসিদা ঐনা ভারতকী মপাঙ্গলগী মরমদা ৱা ঙাংলি। মসি নন-ফোসিল ফ্যুএল শীজিন্নবা, সোলার ইনর্জি পুথোকপা নত্ত্রগা কার্বোন থাদোকপা লাকশিনবা ওইবা য়াই, হিরম খুদিংমক্ত ভারতনা পায়খৎপা থবকশিং মালেম শীনবা থুংনা থাগৎনরে। মশিংশিং অসিদা য়েংসি: চহি ১২ গী মমাংদা, ভারতনা সোলার ইনর্জি পুথোকপা ঙম্বা অসি শুপ্নগী গিগাৱাত ২ রোম খক ওইখি। করিগুম্বা মফম অসিদা উকিলশিং য়াওরবদি, ইশিনবীয়ু; মশিং অসি লাইনা ফংবা ঙমগনি। ঙসিদি, সোলার ইনর্জি পুথোকপা গিগাৱাত ১৬০ হেল্লে- চহি ১২ দা গিগাৱাত ২ দগী গিগাৱাত গিগাৱাত ১২ দা হেনগৎলে। য়ুমথোঙশিং সোলার ইনর্জি পুথোক্নবা মফমশিং ওন্থোক্নবা ঐখোয়না ‘পি.এম সু্র্যা ঘর মুফ বিজলি য়োজনা’ গী মখাদা মিসন অমা হৌদোক্লে। স্কিম অসিগী মখাদা হৌজিক ফাওবদা য়ুমথোঙ লাখ ৫০ হেনবদা সোলার পেনেলশিং থম্লে- মসিনা লৈবাক কয়াগী অপুনবা য়ুমথোঙ মশিংদগী হেল্লে। থবক অসিগীদমক সরকারনা য়ুমথোঙ অমদা লুপা ৮০,০০০ গী শেন্থং অমা পীরে। কুসুম য়োজনাগী মখাদা, লৌমী লাখ ৩০ গী লৌবুকশিংদা সরকারনা সোলার পম্পশিং থম্লে। ঐখোয়না থাজবা য়াম্না থম্লিবা ‘লৈবাক অমা, গ্রিদ অমা’ প্রোজেকশিং মপুংফানা পায়খৎলে। মৈ তুংশিনবা ঙম্নবা ঐখোয়না য়ুমথোঙ করোর কয়াদা এল.ই.দি ব্লবশিং য়েন্থোকখ্রে। থবকশিং অসিগী ফলশিং ঙসি ঐখোয়গী মাঙদা উরে। সোলার ইনর্জি খক্তনা ভারতনা কার্বোন তন মিল্লিয়ন ২০০ থাদোকপা থিংবা ঙম্লে।

মরুপশিং,

সোলার ইনর্জিগা লোয়ননা, অতোপ্পা ক্লিন ইনর্জিগী হিরমশিংদসু ভারতনা শিংথানিঙাই ওইনা মাইপাক্লে। হৌখিবা চহি ১২ দা, লৈবাক অসিনা নুংশিত্তগী মৈ পুথোকপা শরুক অহুম হেনগৎলে। হায়দ্রো ইনর্জ পুথোকপা শিংথাবা য়ানা হেনগৎলে অমসুং হৌজিক লৈবাক অসি য়াম্না য়াংনা ন্যুক্লিয়ার ইনর্জি পুথোকপা ঙম্বা হেনগৎলক্লি। অদুবু, মহৌশাগী অকোয়গী ফিবমগী মরমদা ৱা ঙাংলিবশিং অসিনা ঐখোয়না চাউখৎলকপা মতমদা ন্যুক্লিয়ার ইনর্জিগী থবকশিং অসি লেপহন্নবা কোর্ততা চৎনবা হোৎনগনি। সেক্তর অসিদা লনাই কাংবু শরুক য়াহন্নবা লম্বী অমসু শেম্লে। ভারতকী নন-ফোসিল ফ্যুএল পুথোকপা ঙম্বা শরুক মরি হেনগৎলে। মৈ থাংহন্দনা কয়লা শীজিন্নবা য়ানবা কোএল গ্যাসতিফিকেসনগুম্বা তেক্নোলোজিশিংসু ভারতনা শেমগৎলে।

মরুপশিং,

ক্লিন মোবিলিতি অমসুং গ্রিন হায়দ্রোজেনগুম্বা হিরমশিংদা হৌজিক ভারতনা য়াংনা চঙশিল্লি। হন্দক, ভারতকী অহানবা হায়দ্রোজেন ত্রেন লমথাখ্রে- মসি মালেমদা খ্বাইদগী শাংবা হায়দ্রোজেন ত্রেন্নি অমসুং মসিনা মৈখু থাংদনা চৎথোক-চৎশিন তৌনবা অনৌবা যুগ অমা হৌদোক্লে।

মরুপশিং,

হৌখিবা চহি ১২ দা, ঐখোয়গী লৈবাক্ত ইলেক্ত্রিক গারি মশিং শরুক ৯৫০ হেনগৎলে। ২০১৪ গী মমাংদা, ভারত্ত ইলেক্ত্রিক গারি ৩,০০০ খক য়োনখি। অদুবু হৌখিবা চহিদা ই.ভি মিল্লিয়ন ২.৫ য়োনখি। মহৌশাগী অকোয়গী ফিবম কান্নবগা লোয়ননা ভারতনা ই.ভিগী অওনবা মপুংফানা পায়খৎলে। ঐখোয়গী হায়ৱেশিং অমসুং এক্সপ্রেসৱেশিংদা অনৌবা ফাষ্টেগকী থবক পায়খৎপদগী তোল বুথশিংদা ঙাইবগী মতম হন্থহল্লে, মসিনা মফম অদুদা অরেম্বদা থাউ শীজিন্নবা লৈহন্দ্রে।

মরুপশিং,

২০১৪ দা, ঐখোয়গী লৈবাক্ত সহর ৫ দা কিলোমিতর ২৫০ রোমগী মেত্রো নেতৱার্ক অমা লৈরমখি-ঐগী উকিল মরুপ অমনা নিংশিংলমগনি। ২০১৪ গী মমাংদা, সহর ৫ খক্তদা কিমি ২৫০ য়ৌদনা নেতৱার্ক অমা লৈরমখি; ঙসিদি সহর ২০ হেনবদা মেত্রো সর্বিসশিং লৈরে অমসুং কিমি ১,০০০ হেনবগী মেত্রো নেতৱার্ক অমা লৈবা লৈবাকশিংগী মরক্ত ভারত য়াওরে।

মরুপশিং,

রেলৱেশিংগী অয়াম্বা শরুক মৈ ফংহনবদগী লুপা করোর কয়াগী দিজলশিং শীজিন্নবদগী কনবা ঙমলে, মসিনা মহৌশাগী অকোয়বগী ফিবম ঙাক-শেনবা ঙমহল্লে। নুমিৎ খরগী মমাংদা, কিমি ৩,০০০ হেনবগী ফ্রেদ কোরিদোর অমা শঙ্গাখ্রে। কোরিদোর অসিদা চেল্লিবা ত্রেন খুদিংমক্না ত্রক চা কয়ানা খোঙচৎ অমদা পুবগা মান্নবা পোৎ-চৈশিং পুরে। দবল-ষ্টেক কন্তেন্নর ফ্রেদ ত্রেনশিং অসিমক পুৱারি ওইরে; মসিনা মহৌশাগী অকোয়বগী ফিবম ঙাক-শেনবদা কয়া য়াম্না কান্নবা পীবগে হায়বা কনাগুম্বা অমনা ৱাখলদা শাগৎপা য়াগনি।

মরুপশিং,

ঙসি, লৈবাক অসিদা কিমি ৫০০০ রোমগী কংফালগী ঈশিং লম্বীশিংদা চৎথোক-চৎশিন তৌরে- মসি মহৌশাগী অকোয়বগী ফিবমদা খ্বাইদগী শোকহন্দবা মখলগী চৎথোক-চৎশিন ওইরে। হায়রিবা ঈশিং লম্বীশিং অসিদা চৎলিবা ইনলেন্দ ভেসেল অমনা খোঙচৎ অমদা ত্রক ১২ রোমগা মান্নবা পোৎ-চৈশিং পুরে, মহৌশাগী অকোয়বগী ফিবম ঙাক-শেনবদা শিংথাবা য়ানা মতেং পাংলে।

মরুপশিং,

চৎথোক-চৎশিনগী হিরম খক্তদা লাক্লিবা অহোংবশিং অসিদা ঐখোয়গী চাউখৎ-থৌরাং অসি খোঙজেল য়াংবা অমসুং তুংকোইনা চৎনবা য়াবা অনিমক্নি হায়বা উৎলে। 

মরুপশিং,

ঙসি, মীওই করোর কয়া শরুক য়াদুনা, ঈশিং তুংশিন্নবা মমাংদা অমুক্ত পাংথোকখিদ্রিবা থবক ভারত্ত পাংথোক্লে। লৈবাক অসিদা ইকোন (পুখ্রি) ৭০,০০০ হেন্না তৌবদা ঐ অপেনবা ফাওই। নোংগী ঈশিং লোকশিন্নবা খোঙজংগী মখাদা, নোংগী ঈশিং তুংশিন্নবা পুখ্রি মিল্লিয়ন ১৫ রোম শেমগৎলে। প্রধান মন্ত্রী কৃষি সিঞ্চাই য়োজনাগী মখাদা, ঙসি লৌমী মিল্লিয়ন ২০ হেন্না অনৌবা ইথৈগী খুদোংচাবশিং ফংলে। পর দ্রোপ মোর ক্রোপগুম্বা থবকশিংনসু ঈশিং তুংশিনবা ঙম্লে। শ্রী অন্ন-মিল্লেতশিং অসি অতোপ্পা অচৌবা মাইপাকপগী খুদম অমনি। ঈশিং য়াম্না চঙদবা মিল্লেতশিং থানবা ভারতনা পুক্নিং থৌগৎলি। চহি খর অসিদা, লৈবাক অসিদা মিল্লেতশিং পুথোকপা হেনগৎলে অমসুং তন ১৫,০০০ রোম মপান্দা থাদোক্লে। মসিনা লৌমীশিংদা অনৌবা খুদোংচাবশিং ফংহনবগা লোয়ননা ঈশিংসু কল্লে। নমুনা অসিনা মরম ওইদুনা, মালেমগী লৈবাকশিংনা ঐখোয়গা শম্নরে। ২০২৩ অসি মালেমগী মিল্লেতশিংগী চহি ওইনা পাংথোকখিবা ভারতকী থবকশিং থাগৎপা ফোঙদোক্লি।

মরুপশিং,

মহৌশাগী লৌউ মখলগী নেসনেল মিসনগী মখাদা, ঙসি লৌফম হেক্তর মিল্লিয়ন ১.২৫ রোমদা মহৌশাগী ওইবা লৌউ মখলী ক্লষ্টর ২৪,০০০ রোম শেমগৎলে। মসি খক নত্তনা, লৈবাক অসিদা ইকং মায়োক্নবা ঙম্বা মহৈ-মরোং মখল ৩,০০০ পুথোক্লে। এগ্রো-ফোরেষ্ট্রি য়োকখৎতুনা ঐখোয়না কার্বোন থাদোকপসু হন্থহল্লি।

মরুপশিং,

ঐখোয়না পায়খৎলিবা থবকশিং অসি ভারতকী উমংগী পাক-চাউবদা উবা ফংলে। মসি ঐগী উকিল মরুপশিংসু ঐনা পল্লি। হৌখিবা চহি ১২ দা, ঐখোয়গী উমংগী শরুক চাদা ২২ হেন্না হেনগৎলে। মসি অচৌবা মাইপাকপা অমনি। এক পের মা কে নাম খোঙজংগী মখাদা, লৈবাক শীনবা থুংনা উ পাম্বী করোর কয়া থাখ্রে। খোঙজং অসি মখা চৎথরি।

মরুপশিং,

ফত্তবা প্লাষ্টিক অসি মহৌশাগী অকোয়বা ফিবমদা অচৌবা শিংনবা অমা ওইরে। মরম অদুনা ভারতনা অমুক্তং শীজিন্নবা মখলগী প্লাষ্টিক থিংলে। রিদক্স, রিয়্যুজ অমসুং রিসাইকলগী লাইৱাগা লোয়ননা, ঐখোয়না সর্কুলার ইকোনোমি ফগৎহল্লে। ঙসি ভারত্ত অমোৎপা তন লিশিং কয়া রিসাইক্লিং তৌরে। গোবর্ধন য়োজনাগী মখাদা, খুঙ্গংশিংদা ষন্থি অমসুং অতোপ্পা অমোৎপশিং কান্নরবা পোৎলমশিংদা ওন্থোক্লে। ঐখোয়গী থবক্তি অমোৎপা অসি খুদোংচাদবা অমা ওইনা উরোইদবনি, অমোৎপদগী শেন ওন্থোক্নবা নমুনাগী মখাদা কান্নরবা পোৎশক অমদা ওন্থোক্কদবনি।

মরুপশিং,

পল্লিবা মশিং কয়া অসি শুপ্নগী ভারতকী চাউখৎপগী মশিং নত্তে- মখোয়না মীওইবগী তুংলমচৎকীদমক ভারতনা পায়খৎপা থবকশিংনি।

মরুপশিং,

ঐখোয়গী ৱাখল্লনদি- “মাতা ভুমিহ, পুত্রো অহাম পৃথিবয়াহ” – হায়বদি, মালেম অসি ঐখোয়গী ইমানি অমসুং ঐখোয়না মহাক্কী মচাশিংনি। ৱাখল্লোন অসিগা লোয়ননা, দাইত্ব খঙবা অমসুং তুংকোইনা চৎনবা য়াবা তুংলমচৎ অমা শেমগৎনবা ভারতনা থবক পায়খৎলি। মীফম অসিদা খন্ন-নৈনদুনা অমসুং মসিদগী অনৌবা ৱাখল্লোনশিং অমসুং পাম্বৈশিং ফংদুনা, তুংগী মীরোলশিংগী অচৌবা মতেং অমা ওইগনি হায়না ঐনা থাজৈ। অমুক হন্না, মীফম অসিদা শরুক য়াবগীদমক অদোম ময়ামদা ঐগী য়াইফ পাউজেল পীজরি। অদোম থাগৎচরি।

*****