ভারতকী প্রধানমন্ত্রী

ইকায় খুম্নজরিবা ফ্রান্সকী নাগরিকশিং অমদি মফম অসিদা ইশাগী হোৎনবা কনবা অমসুং খুৎশা হৈবনা মরম ওইদুনা ভারত অমসুং ফ্রান্সকী মীংচৎ হেঙ্গৎহনবীরিবা মরূপ পুম্নমকপু খুরুমজরি।

ইচিল-ইনাও অমসুং ইচল-ইচেশিং, ভারত অমসুং ফ্রান্সকী মরূপ ওইবগী মরী অসি অচেৎপা মরী অমনি অমদি চহী কয়া লীরবা মরীনি। ঐখোয়গী লৈবাক অনি অসিনা অমনা অমগী মতেং পাংনখিদবা অমদি পুন্না থবক তৌখিদবা তাঞ্জা অমদি গ্লোবেল ফোরম অমত্তা লৈরমলোই, মরম অদুনা ঙসিগী নুমিৎ অসি মরূপকী মিংদা কৎচরি।

মরূপশিং, অফবা মরূপকী ৱাহন্থোক্তি… অৱা-নুংঙাইদা ফিভম অমা হেক্তদা অমনা অমগীদমক লেপ্পনি। ভারত নত্ত্রগা ফ্রান্সতা করিগুম্বা অফবা অমা এচিব তৌবা মতমদা ঐখোয়না অমনা অমগীদমক নুংঙাইবা ফোংদোকই। ফ্রান্সকী ফুতবোল তীমদা ঙাওজবা মীগী মশিং ফ্রান্সতা লৈরিবা অদুদগী হেন্না ভারত্তা লৈরমগনি হায়বা ঐহাক থাজৈ। ফ্রান্সনা ফুতবোলগী ৱার্ল্দ কপ লৌখিবা মতমদা মদুগী নুংঙাইবা অদু ভারত্তসু য়াম্না চাউনা পাংথোক্নখি।

মরূপশিং, মতৌ অসুম্না ঐখোয়না অৱাবা মতমদসু মতৌ অদুম্না পুক্নিং চংনা অমনা অমগীদমক লেপলি। মসিগী খুদমদি ফ্রান্সতা থোকখিবা এয়র ইন্দিয়াগী এরোপ্লেন অনি কায়খিবগী নীংশিং য়ুম্বী অসিসুনি। খুদোংথিবা থৌদোকশিং অদুদা ভারতকী লমকোয়বা কয়া পুন্সি মাংখি। মদুগী মরক্তা ভারতকী অফাওবা বিজ্ঞানিকশিংগী মরক্তা অমা ওইরিবা দোক্তর হোমী জহাঙ্গীর ভাভাসু য়াওখি। ভারতকী অদুগুম্লবা অথোইবা মপারী অদুদা অমদি খুদোংথিবা থৌদোক অদুদা থৱায় থাখ্রবা ভারতমচাশিং অদুগী মফমদা ঐহাক্না ইকায় খুম্নবা উৎচরি।

মরূপশিং, মেমোরিয়েল অসিদা লৈরিবা নুঙ খুদিংমক ঐখোয়গী নাগরিকশিংনা অমনা অমগীদমক পাংথোক্লিবা অদুগী অহিংবা খুদম্নি। খুদোংথিবা থোকখ্রবা মতুং এরোপ্লেনগী অতেক অকায়শিং থিবদা অহিং নুংথিল খাক্তনা থবক তৌখিবা সৈনজর্বেগী গাইদশিং অদুবুসু ঐহাক্না খুরুমজরি। খুদোংচাদবা ফিভমদা থবক তৌখি। ঙসি গাইদশিং অদুগী ইমুং মনুংগী মীওইশিংসু তেক্নোলোজীগী খুত্থাংদা পাও ফাওনবগী খুদোংচাবা ফংজখি। ঐহাক্না গাইদশিং অদুবু অমদি মখোয়গী ইমুং মনুংগী মীওইশিংবুসু ভারতকী মায়কৈদগী ইকোক নোন্না তৌবীমল খঙবা উৎচরি। ঐহাক্না সৈনজর্বেগী মেয়রবুসু তৌবীমল খঙবা উৎচরি। মেমোরিয়েল অসি শাবদা মহাক্না য়াম্না মরুওইবা থৌদাং লৌবীখি। ঐহাক্না ফ্রান্সকী সরকার, রাস্ত্রপতি মেক্রোন অমসুং ফ্রান্সকী মীয়াম্বু ঐহাকপু বার্তন তৌবীরক্তুনা ময়াম পুম্নমক্কা উননবা তাঞ্জা পীনবীবগীদমক তৌবীমল খঙবা উৎচরি।

ৱাশক অমা শকখিবদু ময়াম নীংশিংলিবরা নত্ত্রগা নীংশিংদ্রবরা হায়বা ঐহাক খঙদ্রে… ঐহাক্তি নীংশিংলি। মহৌশানা রাজনীতিগী লুচিংবশিংনা মখোয়না শকখিবা ৱাশক কাওথোকখিবা অসি হৈনবী ওইনা তৌনৈ। অদুবু ঐহাক্তি অদুগুম্বা নত্তে মরম অদুনা ঐহাক ইশানা ৱাশক অদু নীংশিংজরি। ঐহাক্না হায়খি মদুদি ভারত আশা অমসুং অনীংবা অপাম্বগী অনৌবা খোংচৎ অমা চৎপা হৌগদৌরে অমদি ঙসি অদোমগী মরক্তা লাকচবা অসিদা য়াম্না থাজবগা লোয়ননা হায়জবা ঙমজরে মদুদি ঐখোয়না ইজ ওফ দুয়িং বিজিনেস অমদি ইজ ওফ লিভিংদা মিৎয়েং থম্বা অনৌবা ভারত ওইহন্নবগীদমক খোংথাং পুম্নমক থাংজিল্লে।

মরূপশিং, হৌখিবা চহী মঙাদা ভারত্তা পোজিতিব ওইবা অহোংবা কয়া অমা পুরকখ্রে। অহোংবা পুরকখিবশিংদা ভারতকী নহাশিংগী শক্তি, ভারতকী খুঙ্গং, লায়রবা, লৌমী, নুপীদা শক্তি শিন্নবা য়াওরি। ঐহাক ফুতবোল পামজবশিংগী লৈবাক্তা লাক্লি অদুনা গোল অসি কয়া য়াম্না মরুওইবগে হায়বদু অদোম্না নীংথিজনা খঙবীরম্লগনি। মরম অদুনা এচিব তৌগে হায়রবদি গোল চনবা তাই। ঐখোয়না হৌখিবা চহী মঙাদা অসগুম্বা গোল খরা থমখি, মদু অহানবদদি ওইথোক্লোই হায়না খরনা খল্লম্মি। অদুবু তীম স্পিরিৎকী ৱাখল্লোন্দা ঐখোয়না মখোয়শিং অদুবু, পান্দমশিং অদুবু পাংথোক্তুনা উৎলে।

মরূপশিং, মালেম পুম্বদা অরেপ্পা মতম অমগী মনুংদা বেঙ্ক একাউন্ত খ্বাইদগী য়াম্না হাংখিবা লৈবাক অদু ভারতনি। ঙসিদি মালেম পুম্বগী খ্বাইদগী চাউবা হেল্থ ইন্সুরেন্স স্কিম ভারত্তা পায়খৎলি, স্কিম অসিনা কান্নবা ফংহল্লিবা মীশিং অসি অমেরিকা, কানাদা অমদি মেক্সিকোগী অপুনবা মীশিংদগী হেল্লি।

মরূপশিং, মালেম পুম্বদা তি.বি. মুথৎনবা পান্দম অসি ২০৩০ চহী ফাওবা থম্লি। অদুবু অনৌবা ভারত অসিগীদমক অদোম্না চাউথোকচবা ফাওগনি মদুদি ভারতনা পান্দম অসি চহী মঙা ঙনখৎনা ২০২৫দা মপুং ফানা পাংথোক্লগনি। মতৌ অসুম্না কোপ-২০২১দা ক্লাইমেৎ চেঞ্জগী পান্দম অসি ২০৩০গী মতম ফাওবা অকক্নবা মতম লেপ্নখি। মদুগী মনুংদা অয়াম্বা পান্দমশিংদি ভারতনা মথংগী চহী অমা-অমা মখায়গী মনুংদা ফংবা ঙম্লগনি।

মরূপশিং, ঙসিদি স্তদী তৌবা কয়া অমা লাক্লি, মদুদা হায়রিবদি ভারত খোংজেল য়াংনা মশাগী লায়রবা কোকহনবগী থবক চত্থরি, ঐখোয় লায়ররম্বা অদুদগী মপান থোরক্লে, মসিসু ঐখোয়গী গোল অমা ওইখি, মদু ঐখোয়না খোংজেল য়াংনা মপুং ফাহন্নবা হোৎনরি। ঙসিদি ভারত অনৌবা ইনর্জীনা থল্লে মদুনা মরম ওইরগা ঙসিদি ভারত স্তার্ত অপকী মালেমদসু খুমাং য়াম্না চাউশিল্লে। অপিক অপীকপা শহরশিংগী তেলেন্ত লৈবা নহা কয়ানা ইনোবেসন অমা নত্ত্রগা অমা তৌরি।

মরূপশিং, অনৌবা ভারত্তা চোকথবা পোত্থাবগী ৱাফম লৈতে। অনৌবা সরকার শেমখিবা নুমিৎ মশিং য়ামদ্রি। হৌজিক শুপ্নতগী নুমিৎ ৭৫ খক্তমক ফাবদা ঙায়রি নুমিৎ চামা ফাগদবা ৱাৎলি। অদুবু অচুম্বা মায়কৈদা অচৌবা ৱারেপ কয়া অমা মথং মথং লৌখ্রে। অনৌবা সরকার হেক শেম্বগা জল শক্তিগীদমক অনৌবা মন্ত্রালয় অমা শেম্লে, মদুনা ঈশিংগা মরী লৈনবা হিরম খুদিংমকপু মপুংফানা যেংশিল্লগনি। লায়রবা লৌমীশিং অমসুং ললোন-ইতিক তৌরিবশিংবু পেন্সনগী খুদোংচাবা ফংহন্নবা ৱারেপসু লৌখ্রে। নুপীগী ইকায় খুম্নবা অমসুং মখোয়গী পুন্সিদা খুদোংচাদবা মায়োক্নহল্লম্বা ত্রিপল তলাক অদু ঐখোয়না মুত্থৎলে। কনা কনাগুম্বনা লৌগেরা নত্ত্রগা লৌরোইগেরা, কনা কনাগুম্বনা ইগেরা নত্ত্রগা ইরোইগেরা, কনা কনাগুম্বনা হায়গেরা নত্ত্রগা হায়রোইগেরা, কনা কনাগুম্বনা হায়বা ঙমগেরা নত্ত্রগা ঙমলোয়গেরা অদুবু ইচানুপী কোতি কয়া অদুগী অশীর্বাদনা লাক্কদৌরিবা চহী চা কয়া অমা ফাওবা ভারতপু য়াইফহল্লগনি।

ময়াম পুম্নমক্না খঙবীরিবা অদুনি মদুদি সেপ্তেম্বরগী তাং ৭তা ঐখোয় পুম্নমক্কী চন্দ্রয়ান থাগী লৈমায়দা তারগনি। এচিবমেন্ত অসিগী মতুংদা ভারত থাগী লৈমায়দা খোংদাবা মালেমগী মরিশুবা লৈবাক ওইরগনি।

ইচল-ইচে অমদি ইচিল-ইনাওশিং, ভারত্তা ওইরিবা প্রোগ্রেস অসিগী মরক্তা ফ্রান্সকা লোয়ননা ঐখোয়গী চহী চা কয়া লীরবা মরী অসি নুমিৎ খুদিংগী চেৎশিনবা হেল্লক্লি। অমনা অমগী দরকার ওইবশিং অদু খঙনা, অমনা অমদা থম্লিবা থাজবা অদুগা লোয়ননা ঐখোয় মাংলোমদা চংশিল্লি। ভারত অমসুং ফ্রান্সনা অমনা অমগীদমক লান্থেংনখি অমদি হিংমিন্নখি। লৈবাক অনিমক্না লেংবান্ননা লেপমিন্নদুনা য়েক্নবশিং মায়োক্নখি। অহানবা মালেমগী লাঞ্জাওদা ভারতকী লান্মী লিশিং ৯না ফ্রান্সকী লান্মীশিংগা লোয়ননা মীওইবা জাতিগী য়াইফনবা লান্থেংনদুনা মথৱাই থাখিবা মফম অদু লমদম অসিনি। অদুনা মফম অসিদা লৈরিবা ভারত মচা খুদিংমক্না লিশিং ৯গী মশিং অসি কৈদৌনুংদা কাউরোইদবনি।

মরূপশিং, ঐখোয়না ফাসিজম অমসুং এক্সত্রিমিজম অসি ভারত্তদা নত্তনা ফ্রান্সকী লৈবাক লৈহাওদসু মায়োক্নরি। ঐখোয়গী মরূপ ওইবগী মরী অসি অচেৎপা ফিদম্নফম ওইবা মওংদা শেম্বনি। লৈবাক অনিমক্কী করেক্তর শেমখিবা অসি লিবর্তী, ইক্বেলিতী অমসুং ফ্রেতর্নিতীগী অপুনবা ভেল্যুনা শেমখিবনি। ঙসি ভারত অমসুং ফ্রান্সনা মালেমগী চাউরবা খুদোংথিবশিংগা লান্থেংনবদা নক্ননা মতেং পাংনরিবা অসিগী মরমসু মসিগী অপুনবা ভেল্যু অসিননি। মালেম অসিদা ক্লাইমেৎ চেঞ্জগী মতাংদা ৱারী কয়া শান্নখ্রে, অদুবু মদু থবক ওইনা পাংথোকপদি কয়া উদে। ফ্রান্স অমসুং ঐখোয়না অমত্তা ওইনা পুল্লগা ইন্তর্নেস্নেল সোলর এলাইন্স হৌদোকখি, ঙসিদি মসিদা মালেম অসিদা লৈরিবা চাউরাক্না লৈবাক ৭৫না মসিদা য়াওররে।

ইচিল-ইনাও অমদি ইচল-ইচেশিং, ভারত্তা স্মার্ত অর্বান এরেঞ্জমেন্ত অমসুং ইন্তিলিজেন্ত ত্রান্সপোর্তেসনদা থৌদাং য়াবনসু লৈবাক অনিমক্তা কান্নবা ফংলে। ইচিল-ইনাও অমদি ইচল-ইচেশিং ঐহাক্না ফ্রান্সতা ভারতকী বিজ্ঞানিকশিং অমসুং ভারত্তা ফ্রেন্স তেক্নোলোজীবু য়াম্না ইকায় খুম্নৈ। তিনবীরিবা ময়ামগী মরক্তগী মীওই কয়া অমদি ফ্রান্সতা ভারতকী বিজ্ঞানগী শক্তম অদু রিপ্রজেন্ত তৌবীরি। একাদমিক ইনর্জী এরোস্পেস তেক্নোলোজী অমসুং অতোপ্পা হাইতেক এরিয়াশিংদা লৈবাক অনিমক্কী সিগনেচর প্রোজেক্তশিং শম্নরি। ফ্রান্সতা মালেমগী অমত্তা ঙাইবা ফ্যুজন রিয়েক্তর শাবদসু ভারতকী তেলেন্ত য়াওরি। মসি হন্দক্কী চহীচা অসিগী য়াম্না মরুওইবা সাইন্তিফিক প্রোজেক্তনি। তেক্নোলোজী অসিনা লাক্কদৌরিবা জেনরেসনশিংদা মশিং থিঙমদ্রবা ইনর্জী ফংহনবা মতমদুদা অদোমগী থৌদাংসু য়াওরগনি। ভারত মচাশিংনা কয়া য়াম্না চাউথোকচগনি হায়বা খন্দুনা য়েংবীয়ু।

মরূপশিং, চহী অসিদা ঐখোয়না মহাত্মা গান্ধীগী ১৫০শুবা মপোক কুমওন অমসুং গুরুনানক দেবজীগী ৫৫০শুবা প্রকাশ পর্বসু পাংথোক্কদৌরি। অদোমগী মরক্তগী মীওই খরনা গান্ধী ক্বিজদা শরুক য়ারমগনি হায়বা ঐহাক্না থাজবা থম্লি, করিগুম্বা চিত্থহৌরগদি হৌজিকসু মতম লৈরি।

ইচিল-ইনাও অমদি ইচল-ইচেশিং, লৈবাক্কী চাউখৎ থৌরাংগীদমক অদোমগী থৌদাং অদু ভারতকীদমক অচৌবা থৌনা অমনি। ভারত অমসুং ফ্রান্সকী মরক্তা লৈরিবা অচেৎপা মরীশিং অসিদা সরকারশিং অসি খক্তা নত্তনা নখোয়গুম্বা নাগরিকশিংগীসু থৌদাং য়াওরি। নখোয় নশামক ফ্রান্সতা ভারতকী মীহুৎনি, নখোয় নশামক ভারতকী খোঞ্জেলনি, নখোয় নশামক ভারতপু মশক তাক্লিবনি। ভারতকী অসিগুম্লবা খোঞ্জেল অসিবু নখোয়না মতম পুম্নমক্তা অৱাংবা থাক্তা পুখৎকনি হায়বা ঐহাক্না থাজবা থম্লি।

মরূপশিং, রিফোর্ম, পর্ফোর্ম, ত্রান্সফোর্ম অমসুং পর্মনেন্ত ওইবা সিস্তেমশিংগা লোয়ননা অচেৎপা য়ুমফমগা লোয়ননা লৈবাক অসি মাংলোমদা চংশিল্লি, চংশিনখিগনি, পান্দম অদুসু মপুং ফাহনগনি, পন্থুংফম অদুসু য়ৌগনি… থাজবশিং অসিগা লোয়ননা অমুক হন্না ময়াম পুম্নমকপু হন্না-হন্না ইকায় খুম্নজরি।

থাগৎচরি…

ভারত ইমানা য়াইফরে…

ভারত ইমানা য়াইফরে…

ভারত ইমানা য়াইফরে…