ভারতকী প্রধানমন্ত্রী

খুরুমজরি!

‘জাতির পিতা’ বঙ্গবন্ধু শৈখ মুজিবুর রহমনগী ১০০শুবা মপোক কুমওনগী য়াইফরবা তঞ্জা অসিদা বঙ্গলাদেশ পুম্ববু ভারতকী ইচিল–ইনাও অমসুং ইচল–ইচে কোতি ১৩০গী মায়কৈদগী য়াইফ পাউজেল পীজরি।

মরূপশিং,

শৈখ হসিনা জীনা ঐহাকপু পুৱারী ওইরবা থৌরম অসিগী শরুক ওইনবা মশামক্না ঐহাকপু বার্তন তৌরকখি অদুবু কোরোনা ভাইরসনা মরম ওইদুনা মসি ওইথোকপা ঙমখিদ্রে। তুংদা শৈখ হসিনা জী মশামক্না ভিদিওগী খুত্থাংদা ঐহাকপু অদোমগা শম্ননবা সজেস্ত তৌবীরকখি।

মরূপশিং,

বঙ্গবন্ধু শৈখ মুজিবুর রহমন হৌখিবা চহিচাগী খ্বাইদগী অথোইবা পর্সোনেলিতীশিংগী মরক্তা অমা ওইরম্মি। মহাক্কী পুন্সী পুম্বা ঐখোয় পুম্নমক্কী য়াম্না চাউবা ইন্সপিরেসন্নি।

বঙ্গবন্ধু হায়বদি —

থৌনাগী লুচিংবা অমা

অরানবা থবকপু প্রমান তৌবা মীওই অমা

শান্তিগী ঝৃশি অমা

জস্তিস, ইক্বেলিতী অমসুং দিগনিতীগী চেম্পিয়ন অমা

তমথিবা মতৌগী মায়োক্তা ঙাকথোক্নবা খুৎ অমা, অমসুং

নম্ফু সাসনগী মায়োক্তা চুঙ্গোয় অমা

মহাক্কী অসিগুম্লবা মগুনশিং অসিনা মতম অদুদা নহারোল লাখ কয়াবু বঙ্গলাদেশকী লিবরেসনগীদমক শিংনরকপা কয়া মায়োক্ননবা অনৌবা ইনর্জী অমা পীরম্মি। ঙসিদি, শৈখ মুজিবুর রহমন্না মংলম্বা ‘সোনার বঙ্গলা’ শেম্নবগী মায়কৈদা বঙ্গলাদেশকী প্রজাশিংনা মখোয় মশাবু অয়ুক নুমিদাং কত্থোক্লিবা অদু উবদা ঐহাক য়াম্না নুঙাইবা ফাওই।

মরূপশিং,

বঙ্গবন্ধুগী পুন্সিনা ২১শুবা চহিচাগী মালেমদা অচৌবা পাউজেল অমা পীরি। ঐখোয় পুম্নমক্না নিংথিজনা খংলিবা অদুনি, মতৌ করম্না নমথবা অমসুং তমথিবা লৈবাক ঙাক্লোন্না, দেমোক্রেতিক ভেল্যু পুম্নমকপু থওই–ৱাওইদবা সিস্তেম্না মতৌ করম্না বঙ্গলা ভুমিদা ইনজস্তিস চত্থরম্বগে।

মতম অদুদা মাংহন তাকহনখিবা, জেনোসাইদ তৌখিবা অদুদগী বঙ্গলাদেশপু মপান্দা পুথোরক্নবগীদমক পোজিতিব অমসুং প্রোগ্রেসিব সোসাইতী অমা লিংখৎনবগীদমক মহাক্না মহাক্কী মীৎকুপ খুদিংমক কত্থোকখি। মহাক য়াম্না ময়েক শেংলম্মি মদুদি লৈবাক অমা হেক্তগী দিবেলপমেন্তকী য়ুমফম অসি কৈদৌনুংদা তুকৎচবা অমসুং নেগতিবিতীনা ওইবা য়ারোই।

অদুম ওইনমক, মহাক্কী ৱাখল্লোনশিং অমসুং হোৎনরিবশিং অসি মীওই খরনা পামলমদে অমদি মহাকপু ঐখোয়দগী মুন্দুনা পুবীখি। মসি বঙ্গলাদেশ অমসুং ঐখোয় পুম্নমক্কী লাইবক ফবনি মদুদি প্রধান মন্ত্রী শৈখ হসিনা জী অমসুং শৈখ রেহনা জীবু ইশ্বরনা থৌজানবীরি। মদু নত্রগদি হিংসা অমসুং তুকৎচবগী সপোর্তরশিংনা করিগুম্বা অমত্তা থাদোক্লমদে।

তেরর অমসুং হিংসাবু পোলিতিক্স অমসুং দিপ্লোমেসীগী খুৎলাই ওইহনবনা মতৌ করম্না সমাজ পুম্ববু মাংহন তাকহনবগে হায়বা ঐখোয় পুম্নমক্না উরে। তেরর অমসুং হিংসাগী সপোর্তর অদু ঙসি কদায়দা লৈরি, করম্বা ফিভমদা লৈরি অদুগা নাকল অমরোমদা ঐখোয়গী বঙ্গলাদেশ করম্বা অৱাংবা থাক্তা য়ৌরবগে হায়বসু মালেম অসিনা উবা ফংলি।

মরূপশিং,

বঙ্গবন্ধুদা ইন্সপায়র ওইদুনা, অমদি প্রধান মন্ত্রী শৈখ হসিনা জীগী লুচিং মখাদা বঙ্গলাদেশনা ঙসি ইনক্লুসিব অমসুং দিবেলপমেন্ত ওরিয়েন্তেদ পোলিসীগা লোয়ননা মাংলোমদা চংশিল্লিবা অসি থাগৎনিঙাইনি।

ইকোনোমী ওইগেরা, অতোপ্পা সোসিয়েল ইন্দিসেস নত্রগা স্পোর্তস ওইগেরা, ঙসি বঙ্গলাদেশনা অনৌবা বেঞ্চমার্ক থম্লি। স্কিল, এজুকেসন, হেল্থ, ৱুমেন এমপৱারমেন্ত, মাইক্রো ফাইনান্স, অসিগুম্লবা লম কয়াদা বঙ্গলাদেশনা মমাংদা অমুক্তা ওইখিদ্রিবা মওংদা প্রোগ্রেস তৌরে।

ঐহাক্না ৱাফম অসিগীসু নুঙাইবা ফাওই মদুদি হৌখিবা চহি ৫–৬তা ভারত অমসুং বঙ্গলাদেশনা নাকল অনিগী লৈনরিবা মরীশিংগী গোল্দন চেপতর অমা লেংলে অমদি ঐখোয়গী পার্তনরশিপতা অনৌবা মায়কৈ অমসুং দাইরেক্সন অমা পীরে। মসি ঐখোয় লৈবাক অনিগী মরক্তা থাজবা হেঙ্গৎলকপননি, মদুনা মরম ওইদুনা ঐখোয়না দিকেদ কয়াদগী চত্থরক্লিবা লেন্দ বাউন্দরী, মেরিতাইম বাউন্দরীগা মরী লৈনবা চয়েৎনবা ইশুশিং শান্তি লৈনা ৱারোইশিন পুরকপদা মায় পাকপা ঙম্লে।

ঙসিদি বঙ্গলাদেশ সাউথ এসিয়াদা ভারতকী খ্বাইদগী চাউবা ত্রেদিং পার্তনরসুনি অমদি খ্বাইদগী চাউবা দিবেলপমেন্ত পার্তনরসুনি। ভারত্তা জেনরেৎ তৌবা ইলেক্ত্রিসিতীনা বঙ্গলাদেশকী য়ুম লাখ কয়া অমসু ফেক্তরীশিং ঙালহল্লি। ফ্রেন্দশিপ পাইপলাইনগী থোংদা অনৌবা দাইমেন্সন অমা ঐখোয়গী মরীদা হাপচিল্লে।

লম্বী–থোং ওইগেরা, রেল ওইগেরা, ৱাতরৱে নত্রগা ইন্তরনেৎ ওইগেরা, অসিগুম্লবা সেক্তর কয়াদা ঐখোয়গী তেংবাং পীনবনা ঐখোয়গী লৈবাক অনিগী প্রজাশিংবু হান্নদী হেন্না শম্নহল্লে।

মরূপশিং,

ঐখোয়গী হেরিতেজ অসি তেগোর, কাজী নজরুল ইস্লাম, উস্তাদ অলাউদিন খান, লালোন শাহ, জিবানন্দ দাস অমসুং ইশ্বর চন্দ্র বিদ্যসাগরগুম্বা ইন্তেলেকচুয়েলশিংদগী লাক্লি।

ঐখোয়গী হেরিতেজ অসিবু বঙ্গবন্ধুগী লেগেসী অমসুং ইন্সপাইরেসন্না হেন্না খংনবগী শক্তি চেলহল্লি। মহাক্কী আইদিয়েলশিং অমসুং ভেল্যুশিংদা ভারতনা মতম পুম্নমক্তা শম্নরি।

মথংগী চহি অসি বঙ্গলাদেশকী লিবরেসনগী ৫০শুবা চহী ওইগনি অমদি চহি ২০২২ অসি ভারতকী নিং তম্বগী ৭৫শুবা চহী ওইরগনি। ঐহাক্না থাজবা থম্লি মদুদি মসিগী মাইলস্তোন অনি অসিনা ভারত–বঙ্গলাদেশকী দিবেলপমেন্তবু অনৌবা অৱাংবা থাক অমদা য়ৌহনবগা লোয়ননা লৈবাক অনিগী মরক্তা লৈরিবা মরূপ ওইবগী মরীসু হেন্না চেৎশিলহল্লগনি।

অমুক হন্না বঙ্গলাদেশ পুম্ববু বঙ্গবন্ধুগী চামশুবা মপোক কুমওন চহি থৌরমদা ঐহাক্না য়াইফ পাউজেল পীজরি।

জয় বঙ্গলা, জয় হিন্দ!!