ভারতকী প্রধানমন্ত্রী

মফম অসিদা মশিং য়াম্না তিনবীরিবা ঐগী নহা ওইরিবা মরূপশিং অমসুং ঐগী ইচিল-ইনাওশিং অমদি ইচল-ইচেশিং। নখোয় ময়ামদা ঐনা য়াইফ পাউজেল পীজরি।

হর হর মহাদেব!

বাবা বিশ্বনাথ অমসুং ইমা গঙ্গাগী থৌজালদগী লৈবাক অসি সেবা তৌনবগী অনৌবা চহি অমা হৌরকপা অসি ঐগী ওইনা লাইবক য়াম্না ফবনি। নখোয় ময়ামগী থৌজালনা মরম ওইদুনা ঐনা লৈবাক অসিগী মীয়াম সেবা তৌনবা ৱারেপ লৌবদা থৌনা পীরি।

মরূপশিং,

মসিগী থাজবা অসি থবক ওইনা ওন্থোক্তুনা লুপা ক্রোর ৫৫০ হেনবগী প্রোজেক্তশিং শঙ্গারে নৎত্রগা উরেপ-উয়ুং তম্লে। মসিগী প্রোজেক্তশিং অসি বনারসী খক্তগী নত্তে মসি অকোয়বগী খুঙ্গংশিংগীসু য়াওরি। হায়রিবা প্রোজেক্তশিং অসিনা লৌমীশিং, ফিশাবশিং অমসুং খুৎহৈবশিংদা দরকার ওইবা মৈ অমসুং ঈশিং ফংহল্লগনি ।

২১শুবা চহিচা অসিদা বেনারস হিন্দু য়ুনিভর্সিতী অসি লৌশিংগী মরুওইবা মফম অমা ওইহন্নবা অনৌবা প্রোজেক্ত কয়া পায়খৎলে। হায়রিবা প্রোজেক্তশিং অসিগীদমক ঐনা বনারসকী মীয়াম থাগৎচরি।

মরূপশিং,

কাসীগী কলচর অমসুং হেরিতেজ অসি কাইহন্দনা থম্লগা অওনবশিং পুরক্নবা থবক কয়া পায়খৎলে। ঙসিগী চহি মরি মখাইগী মমাংদা লৈরম্বা কাসী অদুগা হৌজিক্কী কাসী অসিগা খেন্নবা কয়া উবা মীয়াম্না ফংলে। নখোয়না অহোংবশিং উবা ঙম্বরা ? ময়াম থাগৎচরি ।

চহি কয়াগী মমাংদগী কাসীদা লাকপা মীওইশিং শহর অসিগী নাতৈ চাদবা ফিবমশিং অসিনা খুদোংচাদবা থোকহনখি। মথোং-মরম খঙদ্রিবা শহর অসি হিরম খুদিংদা চাউখৎহন্নবা ঐনা ৱারেপ লৌখি।

ঙসিদি কাসী অসি হিরম খুদিংদা চাউখৎপা নখোয়না উবা ফংলে। ঐনা এম পি অমা ওইদ্রিঙৈ মতমদা কাসীদা লাকখি, ইলেকত্রিক্কী তারা ময়াম অমা য়ানদুনা লৈবা অদু উবদা করম্বা মতমদা বনারসী অসি মসিগী কোকহনবা ঙমগনি হায়না ঐনা খনখি। শহর অসি মফম অমত্তদা হায়রিবা তারাশিং অদু নখোয়না মখা তানা উরম্লরোই। লেমহৌরিবা মফমশিংদা লৈনুংদা তারা পুনবা থবক য়াংনা পায়খৎলি।

মৈ পীবগা মরি লৈনবা প্রোজেক্ত মঙা ঙসি হৌদোকলে। হায়রিবা প্রোজেক্তশিং অসিনা বনারসীগা লোয়ননা মসিগী অকোয়বদা লৈরিবা খুঙ্গংশিংদা মৈ মরাং কাইনা ফংহল্লগনি। মসিগী মথক্ত অতোপ্পা ইলেকত্রিসিতী সব-স্তেসন অমগী উরেপ-উয়ুং তম্লে।
মরূপশিং,

বনারস অসি নোংপোক ভারতকী থোঙ্গাল ওইহন্না থবক কন্না পায়খৎলি। মরম অদুনা বনারস অসি মালেম থাক্কী মচাকশিং লৈহন্নবা সরকারনা অখন্নবা মীৎয়েং থম্লি। ২১শুবা চহিচাগী দরকার ওইবা চৎথোক-চৎশিন, মেদিকেল অমসুং এজুকেসনগী খুদোংচাবশিং ফংহন্নবা শেমগৎলে।

ঙসিদি কাসী অসি এল ই দিগী মখাদা পুমঙান ঙাল্লে। শহর শীনবা থুংনা ইমা গঙ্গাগী ঈচেল অসি ইরাই লাইনা উবা ফংলে। এল ই দি ব্লবশিংনা নহাক্কী পুন্সি ঙালহলবতা নত্তনা মৈগী বিলসু হন্থহল্লে। এল ই দি ব্লবশিং থানবদগী বনারসী নগর নিগমনা শেনফম কয়া কনবা ঙম্লে।

মরূপশিং,

বনারসকী অকোয়বদা রিং রোদ অমা শেম্নবা ৱাফম চহি কয়াগী মমাংদগী খন্নদুনা লাকখিবা থৌরাং অদু ফাইল ওইনা অদুম লৈখি। ২০১৪গী মীখল মতুংদা রিং রোদ শেমগৎপা হৌখি। রোদ অসিগী মাইপাকপগী মনা মোদীনা লৌখিগনি হায়না মখোয়না কিবদগী ফাইল অদু নমশিন্দুনা থমখি ।

নখোয় ময়াম্না য়োগী জিগী সরকার খল্লকপদগী থবকশিং খুমাং চাউশিল্লে। হারহুৱাদগী গাজিপুর ফাওবা লেন মরি ওন্থোকপগী থবক লোইরে। হারহুৱাদগী রাজা তালাব অমসুং চান্দাঔলি ফাওবগী অনৌবা সর্কুইত অমা শেম্লে ।মসিগী লম্বী অসিদা গঙ্গা মথক্ত অনৌবা থোং অমা শাগনি অমসুং বনারসীদা ত্রক চংলকপা হন্থহনগনি।

কাসী রিং রোদ শেমগৎপা অসিনা কাসী খক নত্তনা অকোয়বগী জিলাশিং চাউখৎহনগনি। মফম অসিগী শেমখিবা লম্বীশিং অসিনা বিহার, নেপাল, ঝাখান্দ অমসুং মৈধ্য প্রদেস য়ৌবদা কান্নহল্লগনি। মরম অসিনা বনারসীগা শম্নবা লম্বীশিং পাকথোকহল্লিবা।

মরূপশিং,

বনারসী মনুংদা লুপা ক্রোর কয়াগী প্রোজেক্তশিং পায়খৎলি। চহি কয়াগী মতুংদা মন্দুৱাদি লৈকং থোংগী থবক মপুং ফানা লোইশিল্লে। গঙ্গা তুরেলগী মথক্ত শারিবা সামনেঘাত থোং অসি লোইশিল্লকপদা রামনগরদা চৎথোক চৎশিন তৌবা লাইহল্লগনি।

ভাগৱাত থোং অমসুং কোর্ত রোদ অনিগী মরক্ত লম্বীশিং শেম্নবা লুপা ক্রোর ৭৫০ কাইথোক্লে। মসি মতম অমদা য়াম্না খুদোংচাদবা লম্বী অমা ওইরমবা অদু নখোয়না খঙলমগনি। লম্বী য়াম্না চিনবদগী মীওই কয়া মখোয়গী ফ্লাইতশিং অমসুং ত্রেনশিং নংহৌদবা য়াওখি। মসিগী লম্বী অসি লোইশিনবদগী হায়রিবা খুদোংচাদবশিং অদু কোক্লগনি।

মরূপশিং,

এয়রপোর্ততা লাকপা মীওইশিংনা বনারসী চাউখৎলে হায়বা খঙলমগনি। ফ্লাইত তোংলগা বনারসীদা লাকপা লমকোয়বা মীশিং হেনগৎলে। চহি মরিগী মমাংদা বাবাতপুর এয়রপোর্ত্তা মীওই লাখ ৮ লাকখি। মসি হৌজিক লাখ ২১ য়ৌরে।
স্মার্দ বনারস অমা ওইহন্নবা বনারসীগী ত্রান্সপোর্ত সিস্তেম অসি মতমগা চুনবা মওংদা শেমগৎলে। শহর অসিগী অপুনবা লৈঙাক অমসুং মীয়ামগী খুদোংচাবশিং কন্ত্রোল তৌনবা মফম অসিদা ইন্তেগ্রেতেদ কমান্দ এন্দ কন্ত্রোল সেন্তর অমা শেমগৎলে।
মল্তি-মোদাল তরমিনেল অসি থবক লোইশিনবগা বনারসী অসি ত্রান্সপর্ত অমসুং লোজিস্তিক্কী মরুওইবা মফম অমা ওইরগনি। মসিনা লম্বী,রেলৱেজ অমসুং ঈশিং লম্বী শম্নবা হেনগৎহনগনি অমসুং ললোন-ইতিক অমসুং উদোগকী থবকশিংদা কান্নবা ফংহল্লগনি।

কাসী য়েংবা লাকপশিংগী লম্বী চৎপদা মতম চংবা হন্থহন্নবা ফেরি সর্বিস অমা শেমগৎলি। বনারসী অমসুং হালদিয়াগী মরক্ত নেসনেল ৱাতরৱে নম্বর ১ শেমগৎলি। গারিশিং সি এন জি ওন্থোকপগী থবক য়াংনা পায়খৎলি ।

মরূপশিং,

মীয়াম্না সোসিয়েল মেদিয়াদা বনারসী কন্তোমেন্ত স্তেসনগী ফোতোশিং হরাওনা থাগৎলকপা উবা ঐ হরাওবা শরুক অনি হেনগৎলি। কন্তোমেন্ত স্তেসন ম মন্দুৱাদি অমসুং সিতি স্তেসন শেমগৎপগী থবক য়াংনা পায়খৎলি। ত্রেন তোংদুনা কাসীদা লাক্লিবশিংনা অনৌবা কাসী স্তেসন উবা ফংলগনি।

মরূপশিং,

রেল লম্বীগা বানরসিগা লৈবাক অসিগী অতৈ মফমশিংগা শম্নবগী মচাক-মথুমশিং শরুক কয়া হেনগৎলে। হৌখিবা চহি মরি অসিদা বনারসীদগী ত্রেন কয়া চেল্লে। বনারসী-দিল্লি, বদোদারা, পতনা মহানামা এক্সপ্রেস, বনারসী-পতনা জনসাতাবদি এক্সেপ্রেস হায়রিবা ত্রেনশিং অসিনা মীয়ামদা খুদোংচাবা কয়া ফংহল্লে। বনারসীগা গুহাৱাতী, হুব্লি অমসুং মাইশোরগা শম্নবা রেল মপাঙ্গল কনখৎহল্ল।

মরূপশিং,

কাসী অসি হৌজিক ফজহনবগী থবক পায়খৎলে। হৌজিক ঘাতশিং অসিদা অমোৎ-অকায়শিংনা তরাম্না ওকত্রে মৈঙালশিংনা তরাম্না ওক্লে। ইমা গঙ্গাগী ঈশিং অসি হৌজিক হি নৎত্রগা ক্রুইজশিং তোংবা ফংলগনি। লাইখুরুম্বা লাকপশিং ইরাই লাইনা লাইশঙশিং য়ৌনবা থবক পায়খৎলে। তুরিজমগী খুৎথাংদা অওনবা পুরক্নবা থবক অসি লেপ্তনা পায়খৎলি।
মরূপশিং,

কাসীগী মমাংঙৈগী মশক অমসুং ঐখোয়গী ফজরবা হেরিতেজ অসি ঙাক্তুনা থম্নবা হৌখিবা চহি মরি অসি থবক পায়খৎতুনা লাক্লি। মাইদাগিন তাউন হোলদগী মহাত্মা গান্ধীনা মহাক্কী নিংতম ইহৌ হৌখি। হেরিতেজ ভাবনগী চাউথোকচবা অদু অমুক হিংগৎহন্নবা থবক পায়খৎলি ।মসি হান্নগী ফিবমদা অমুক হঞ্জিনহল্লে ।

বনারসীগী মরুওইবা পার্কশিং অমসুং অচৌবা পার্কশিং শেমজিল্লে অমসুং ফজহল্লে। সারনাথতা লমকোয়বশিং পুক্নিং চিংশিন্নবা মঙাল অমসুং খোঞ্জেলগী সো পাংথোক্লি। বুধা থিম পার্ক, সারাঙ্গনাথ পোন্দ, গুরুধাম লাইশঙ অমসুং মারকান্দেয়ামহাদেব লাইশঙ ফজহল্লে ।

বাইরাভকুন্দ, সাগরনাথকুন্দ,লস্কমিকুন্দ অমসুং দুরগানাথকুন্দ ফজহনবগী থবক হান্ননা পায়খৎলে। হৌখিবা চহী মরি অসিদা কাসীগী মীয়াম্না মালেমগী লৈবাক কয়াগী লুচিংবশিং তরাম্না ওক্লি। জপানগী প্রধান মন্ত্রী সিনজো অবে, ফ্রান্সকী রাস্ত্রপতি মেক্রোন অমসুং জর্মনীগী রাস্ত্রপতি ফ্রাঙ্ক ৱালতরনা কাসীগী মীয়ামগী মীওক-মীচান অদু থাগৎলরি অমসুং ৱারিনরি। জপান্না কাসীগী কনভেন্স সেন্তর অমা খুদোল তমখি।

মরূপশিং,

লাক্লিবা জনুৱারীদা মালেমগী মফম কয়াদ লৈরিবা ভারতমচাশিংগী কুম্ভ অমা কাসীদা পাংথোক্কনি। মরম অদুনা থৌরম অদুগীদমক সরকারনা হোৎনবা য়াবা হোৎনরি। অদুবু নখোয় ময়াম্না মতেং পীবা অসি য়াম্না দরকার ওই। বনারসীগী তোখাইবা মশক, ফজবা, মচু অমসুং হেরিতেজ অদু কাচিন-কোয়া অমসুং লৈরক-কোন্সাং খুদিংদা মমি তাহনগদবনি ।মপান লৈবাক্ত লৈখ্রবা ভারতমচাশিং অদুনা মখোয়গী পুন্সি চুপ্পা নিংশিংদুনা লৈহৌনবা খুদম ওইগদবা লু-নানবগী থবক ঐখোয়না পায়খৎপা দরকার ওই। মফম অসিদা প্রাভাসি ভারতিয়া দিৱাস য়াওবা লাকপশিং অদুনা কাসীগী তুরিজমগী এম্বেসেদরশিং ওইহনগদবনি ।মখোয়ন চৎপা মফম খুদিংদা কাসীগী ফজবগী মরমদা হায়নহনগদবনি।

মরূপশিং,

লু-নানবগী মতাংদা কাসীদা অহোংবা কয়া লাকপা উরে। ঙসিদি ঘাতশিং, লম্বীশিং অমসুং কাসীগী কাচিন খুদিংমক লু-নানলে। অনৌবা তেক্নিকশিং শীজিন্নদুনা অমোৎপশিংদগী হার পুথোক্লে।

অমোৎপশিংদগী হার শুংনবা অচৌবা ফেক্তরি অমা কারসারাদা লিংখৎলে। মসিদা অমোৎপা মেত্রিক তন কয়া হার ওন্থোক্লি। অমোৎপগী মৈ পুথোক্নবা প্লান্ত অমসুং কারসারাদা লিংখৎলে। বাভানিয়া,পোখারি,পাহারীয়ামন্দি অমসুং আই দি এ কমপ্লেক্সতা বাইওফুয়েল প্লান্তশিং লিংখৎলে ।

গঙ্গোত্রিদগী গঙ্গাসাগর ফাওবা ইমা গঙ্গা লু-নান্না থম্নবা থবক পায়খৎলি। অনকপা খুঙ্গংশিংদগী অমোৎপশিং গঙ্গা তুরেলদা থাদরকপা থিংনবা লুপা ক্রোর ২১,০০০ রোমগী প্রোজেক্ত ২০০ হেন্না পায়খৎলে।

মসিগী ৱাখলদা বনারসীদা লুপা ক্রোর ৬০০ হেনবগী প্রোজেক্তশিং পায়খৎলে। সিৱেরেজ প্লান্ত অমগী থবক পায়খৎলি। অনৌবা সিৱেরেজ চেম্বরস লিশিং কয়া শাবগী মথক্ত মীয়াম তোইলেত ১৫০ শারে। মীয়ামদা অফবা থক্নবা ঈশিং ফংহন্নবা থবক পায়খৎলি। য়ুম লিশিং কয়াদা মিতর পাল্লবা ঈশিং কন্নেক্সন পীনবা থবক পায়খৎলি।

মরূপশিং,

লম্বী, মৈ অমসুং ঈশিংগী খুদোংচাবশিং অসি বনারসী খক নত্তনা অকোয়বগী খুঙ্গংশিংদসু ফংহল্লি। এম পি অমা ওইনা, অকক্নবা খুঙ্গং খর চাউখৎহনবা অসি ঐগী থৌদাংনি অমসুং নাগেপুরদা অচৌবা ঈশিংগী প্রোজেক্ত অমা পায়খৎলি। খুঙ্গং কয়াদা শান্নবুংশিং, মশা-মরোমদোম থবক পীজফম সেন্তরশিং, লৌমীশিংগী খুদোংচাবা ফংফমশিং অমসুং হকশেলগী সেন্তরশিং লিংখৎলে।

মরূপশিং,

নখোয় ময়ামগী মতেংদগী কাসী অসি হৌজিক নোংপোক ভারত্তা অনা-লায়েংগী মফম অমা ওইরে। মতম খর অসিদা লৈবাক্কী মফম কয়াদা লৈরিবা হোস্পিতালশিং কাসীদা লাক্তুনা মফম অসি নোংপোক ভারতকী অনা-লায়েংগী মফম অমা ওইহল্লগনি। বি ঐচ য়ুগী মোদর্ন ত্রোমা সেন্তর অসিনা মীওই লিশিং কয়াগী পুন্সি কল্লি। হৌজিক বনারসীদা অনৌবা কেন্সর হোস্পিতাল অমসুং সুপর-স্পিসিয়েলিতি হোস্পিতাল শাগৎলি।

মালেমগী থাক্ত লৈবা হেল্থ ইন্সতিতুৎ অমা শেমগৎনবা হন্দক্ত বি ঐচ য়ুগা এ আই আই এম এসকা য়ানচে অমা খুৎয়েক পীনখ্রে।

মরূপশিং,

ঙসি বি ঐচ য়ুদা রিজনেল ওপথালমোলোজী ইন্সতিতুৎ অমা হৌদোক্লে। চহি ৫৪গী মমাংদা লাল বাহদুর সাস্ত্রিজিনা মফম অসিদা ওপথালমোলোজী দিপার্তমেন্ত হাংদোকখিবনি। মসি রিজনেল সেন্তর অমা ওইনা হাংদোকপগী খুদোংচাবা ঐনা ফংলে। মসিনা ফজনা শেমগৎলকপা মতমদা উত্তর প্রদেসকী নোংপোক থংবা শরুক, বিহার, ছতিসগর, মৈধ্য প্রদেস, ঝারখান্দ অমসুং নেপালগী মীওই ক্রোর কয়া কান্নবা ফংহল্লগনি।

মরূপশিং,

য়ু পিদা বি জে পিগী য়োগী জি মাইপাক্লবা মতুংদা মমাংদা অমুক্ত ওইখিদ্রিবা খোঙজেলদা চাউখৎ-থৌরাংগী থবকশিং পায়খৎলে। অয়ুসমান ভারত স্কিম শরুক য়াবগীদমক ঐনা য়োগীজি অমসুং মহাক্কী কাংবু থাগৎলি। মসিগী স্কিম অসিনা লৈবাক অসি লায়রবা ইমুংশিংদা চহি অমদা লুপা লাখ ৫ দগী লুপা লাখ ১০ ফাওবা লেম্না লায়েংবগী খুদোংচাবা ফংহন্নবা পান্দম থম্লি। স্কিম অসি সেপ্তেম্বর ২৩দগী লৈবাক শীনবা থুংনা চৎনরগনি।

মরূপশিং,

সরকার অসিনা হকশেলগা লোয়ননা এজুকেসন অসি চাউখৎনবা হোৎনরি। মহৌশাগী এজুকেসনগা লোয়ননা অনৌবা এজুকেসন ফংহনবা অসি মালভিয়া জিগী মঙলান্নি। মহাক্কী মঙলান অদু মঙফাওনহন্নবা বি ঐচ য়ুদা অনৌবা সেন্তর কয়া হৌদোক্লে। বেদিক সাইন্স সেন্তর অমা অমসুং অতল ইনকুবেসন সেন্তর অমা হৌদোক্লে।

নহারোলশিং,

ঐখোয়গী মমাংঙৈগী কলচর অমসুং চৎনবগীগা লোয়ননা তুংগী অনৌবা তেক্নোলোজিশিংদা ঐখোয় চংশিল্লি। নহারোল ক্রোর ৮০ হেন্না লৈরিবা লৈবাক অসিনা তেক্নোলোজিগী লম্বী অমদা চংশিল্লি। তুংগী তেক্নোলোজি শেমগৎনবা বি ঐচ য়ুদা অতল ইনকুবেস সেন্তর অমা হাংদোক্লে। মসিনা তুংদা স্তার্দ-অপশিংদা অনৌবা থৌনা পীগনি।

লৈবাক শীনবা থুংনা স্তার্দ-অপ ৮০ না মসিদা শরুক য়াবা পামলি অমসুং স্তার্দ
অপ ২০ মসিদা শরুক য়াখ্রে। মসিগী সেন্তর অসিগীদমক ঐনা বনারসীগী নহারোলশিং থাগৎলি।

মরূপশিং,

হৌখিবা চহি মরি মখাই অসিদা লৌমীশিং অমসুং খুঙ্গংগী ইকনোমি ফগৎনবা থবক পায়খৎলি। য়াম্না থুংনা পুমগনবা মনা-মশিং লিদুনা থম্নবা পেরিসেবল কার্গো সেন্তর অমা রাজা তালাবতা জুলাইদা লিংখৎলে। মসিগী সেন্তর অসিনা উহৈ-ৱাহৈশিং অমসুং মনা-মশিংশিং অতোপ্পা শহরশিংদা পুবদা মতেং ওইরগনি ।

মফম অসিদা ইন্তরনেসনেল রাইস রিছাস সেন্তর অমা লিংখৎনবা থবক লোইশিল্লক্লে। মসিনা তাক্লি মদুদি তুংদা অফবা চাথোক লৈবা মখলগী ফৌ পুথোকপদা কাসীনা মরুওইবা থৌদাং লৌগনি। মসিনা বনারসীগী লৌমীশিংনা অহেনবা শেন্থোক ফংনবা থৌরাং অমা ওইহল্লগনি।

ঙাইহাক্কী মমাংদা লৌমীশিংদা খোই উপুশিং পীখ্রে। খোইশিংনা পোৎথোক হেনগৎহনবতা নত্তনা মসিনা খোইহি পুথোকতুনা অহেনবা শেন ফংনবগী উপাই অমনি। লৈবাক অসিনা খোইহি য়াম্না পুথোকপগা লোয়ননা মহৈ—মরোংগী পোৎথোক রিকোর্দ ওইনা পুথোক্লি।

মরূপশিং,

বনারসী অমসুং নোংপোক ভারত অসি ফিশাবশিং, খুৎহৈবশিং অমসুং লৈবাক অসি সনা ওন্থোকপা মীওইশিংগী মফমনি। হেন্দিক্রাফ ইন্দস্ত্রিদা তেক্নিকেলগী মতেং পীনবা ত্রেদ ফেসিলিতেসন সেন্তরশিং লিংখৎলে। ফিশাবশিংনা পোৎথোক হেন্না পুথোক্নবা কম্মন ফেসিলিতেসন সেন্তরশিং মফম ৯দা লিংখৎলে।

লৈবাক্কী চফু শারিবা ইনাওশিং অমসুং ইচলশিংদা তেক্নিকেলগী মতেং পীরি। মসিগী থৌরম অসিদা ঙসি ইনাওশিং অমসুং ইচলশিংদা ইলেকত্রিক চার্জশিং পীরে। লৈখোম কংহন্নবা অমসুং নম্নবা অনৌবা মেছিনশিং পীরে। মসিনা নখোয়না চফুগী পোৎলমশিং শাবদা মতম চংবা অমসুং পাঙ্গল ৱাবা অদু হন্থহনগনি।

মরূপশিং,

বনারসীদা লৈরবা কাংলুপ খুদিংমক্কী মীওইশিংগী পুন্সি মহিং ফগৎহন্নবা থবক লেপ্তনা পায়খৎলি। হৌজিক বনারসী অসি পাইপলাইন্দ চাক থোংনবা গ্যাস পীবা শহরশিংগী মরক্ত য়াওরে। মসিগীদমক এল্লাহবাত্তগী বনারসী ফাওবা পাইপলাইনশিং তিংলে। হৌজিক ফাওবদা বনারসীগী য়ুম ৮০০০দা গ্যাস পাইপলাইন তিংলে। লাক্কদৌরিবা মতমদা য়ুম লিশিং ৪০ হেন্না মসিগী থবক অসি পায়খৎনবা হোৎনরি।
ইনাওশিং অমসুং ইচলশিং,

নখোয় ময়াম্না ঐহাক প্রধান মন্ত্রী অমা ওইনা খল্লবসু ঐ নখোয়গী এম পি অমা ওইবনা ঐগী থৌদাং য়াম্না লৈরি। হৌখিবা চহি ৪ মখাই অসিদা ঐনা এম পি অমা ওইনা পাংথোকখিবা থবকশিং উৎলে। নখোয়গী মীনাই অমা ওইনা, মীয়ামগী মীহুৎ অমা ওইনা নখোয় ময়াম অসি ঐগী বোসনি নৎত্রগা হাই কমান্দনি ।মরম অদুনা শীজিন্নখিবা শিকি অমগী অমসুং মতমগী একাউন্ত পীবা অসি ঐগী দাইত্বনি।

পর্লিয়ামেন্তরিয়ান অমা ওইনা, পাংথোকখিবা থবকশিং অমসুং চাউখৎ-থৌরাংগী থবকশিং নখোয় ময়ামগী মমাংদা উৎপা অসিদা ঐ হরাওই। অমুক হন্না ঐগী থম্মোয়নুংদগী নখোয় ময়াম থাগৎচরি।

ঐগী লোয়ননা হায়মিন্নসি- ইমা ভারতনা য়াইফরে!

ইমা ভারতনা য়াইফরে!

ইমা ভারতনা য়াইফরে!

থাগৎচরি!

***