ভারতকী প্রধানমন্ত্রী

দেনমার্ক্কী প্রধান মন্ত্রী শ্রী লার্স লোক্কে রাসমুসেন বাইবরেন্ত গুজরাত সম্মিত ২০১৯গীদমক ২০১৯গী জনুৱারী ১৮দগী ১৯ ফাওবা ভারতকী খোংচৎতা লাক্লি। দেনমার্ক অসি পার্তনর কন্ত্রী অমগুম শরুক য়ারি। প্রধান মন্ত্রী রাসমুসেন্না মরুওইবা দেনিস কম্পেনিশিংগী সি.ই.ও.শিং য়াওনা বিজিনেস দেলিগেসন অমা লোয়নরক্লি।

প্রধান মন্ত্রী শ্রী নরেন্দ্র মোদী অমসুং প্রধান মন্ত্রী রাসমুসেন্না বাইবরেন্ত গুজরাত সম্মিত অসিগী সাইদলাইন্দা জনুৱারি ১৮, ২০১৯দা লৈবাক অনিগী ওইবা মীফম অমা পাংথোকখি। প্রধান মন্ত্রী অনিমক ২০১৮গী এপ্রিল থাদা স্তোকহোমদা অহানবা ইন্দিয়া–নোর্দিক সম্মিত মনুংদা মমাংদা উনখ্রে।

মীফম অদুদা, লুচিংবা অনিনা লৈবাক অনিগা কোওপরেসনগী তোঙান তোঙানবা লমশিংদা অমনা অমগী পাওতাক লৌনখি অমসুং ম্যুচেল ইন্তরেস্তকী মল্তিলেতরেল ইশুশিংদসু মীৎয়েংশিং একচেঞ্জ তৌনখি। মখোয়না লৈবাক অনিগী মরক্তা লৈবাক অনিগী ওইবা ত্রেদ অমসুং ইনবেস্তমেন্তশিং হেন্না পাকথোক চাওথোকহন্নবগীদমক অচৌবা পোতেন্সিয়েল অদু খংমিন্নখি।

দেনমার্ক অসি তোঙান তোঙানবা নিস তেক্নোলোজীদা গ্লোবেল লিদর অমা ওইরি মদুনা ভারত্তা মরী লৈনরি। প্রধান মন্ত্রী মোদীনা ভারত অমসুং দেনমার্কপু ফুদ সেক্যুরিতী, ৱাতর মেনেজমেন্ত, ক্লাইমেত চেঞ্জ অমসুং সস্তেনেবল দিবেলপমেন্তগুম্বা মরী লৈনবা গ্লোবেল ইশুশিংদা সোলুসন পুথোকপা ঙমগদবা রিসর্স প্লেতফোর্ম অমা লিংখৎনবা পুক্নিং থৌগৎখি।

মীফম অদুগী মনুংদা য়ানাৱারোল অনি একচেঞ্জ তৌনখি– মিনিস্ত্রী ওফ শিপ্পিং ওফ ইন্দিয়া অমসুং মিনিস্ত্রী ওফ ইন্দস্ত্রী, বিজিনেস এন্দ ফাইনান্সিয়েল এফিয়ার্স ওফ দেনমার্ক্কী মরক্তা মেরিতাইম ইশুদা য়ানাৱারোল অমদি ইমাজিন পানাজি স্মার্ত সিতী দিবেলপমেন্ত লিমিতেদ অমসুং ন্যু দিল্লীদা লৈরিবা দেনিস এম্বেসিগী মরক্তা গৱাগী পনাজিদা অর্বান লিভিং লেব অমা লিংখৎনবা য়ানাৱারোল।

ভারত্তা চাওরাক্না দেনিস কম্পেনি ১৩০না শিপ্পিং, রিন্যুয়েবল ইনর্জী, এনবাইরনমেন্ত, এগ্রীকলচর অমসুং ফুদ প্রোসেসিংগুম্বা লমশিংদা ইনবেস্ত তৌরি অমদি স্মার্ত অর্বান দিবেলপমেন্ত অমসুং ৱেস্ত–তু–ইনর্জীগুম্বা অতোপ্পা সেক্তরশিংদা মখোয়গী এঙ্গেজমেন্ত পাকথোক চাওথোকহন্নবা হোৎনরি। অচৌবা দেনিস কম্পেনি কয়া অমসু শিপ্পিং অমসুং রিন্যুয়েবল ইনর্জীদা গুজরাত্তা লৈরি।

খোংচৎ অসিগী মনুংদা প্রধান মন্ত্রী রাসমুসেন্না ২০১৯গী জনুৱারী ১৯দা দেনিস কলচরেল ইন্সতিত্যুৎ অমসুং ন্যু দিল্লীদা দেনিস এম্বেসিগী অনৌবা বিলদিং শঙ্গাগনি। মহাক্না অগ্রাদসু চৎকনি।