ভারতকী প্রধানমন্ত্রী
প্রধান মন্ত্রী শ্রী নরেন্দ্র মোদী অমসুং উপ-রাস্ত্রপতি, প্রধান মন্ত্রী, দিফেন্স মিনিস্তর অমসুং দুবাইগী লৈঙাকপা ইকায়খুম্নরবা সৈখ মোহমদ বিন রসিদ অল মাকতুমনা ফেব্রুৱারি ১৪,২০২৪ দা দি.পি ৱার্ল্দনা দুবাইগী জেবেল অলি ফ্রি ত্রেদ জোন্দা শাগদবা ভারত মার্তকী উরেপ-উয়ুং তম্বা ভর্চুএল ওইনা পাংথোকখ্রে।
জেবেল অলি হিথাংফমগী মরুওইবা মফম অমসুং চৎথোক-চৎশিনগী খুদোংচাবা অসি শীজিন্নদুনা ভারত মার্তনা ভারত-য়ু.এ.ইগী লৈবাক অনিগী ললোন-ইতিক মখা তানা চাউখৎহনগনি হায়বগী থাজবা লুচিংবা অনিনা থমখি। প্রধান মন্ত্রীনা হায়খি ভারতকী মাইক্রো, স্মোল অমসুং মেদিয়ম সেক্তরশিংগী পোৎথোকশিং মপান্দা থাদোকপদা ভারত মার্তনা মরুওইবা থৌদাং অমা লৌগনি অমসুং মসিনা গল্ফ, নোংচুপ এসিয়া, অফ্রিকা অমসুং য়ুরেসিয়াদা মালেমগী পোৎ লৈরিবা মীওইশিং য়ৌহনবদা কান্নরবা মফম অমা ওইরগনি।
