ভারতকী প্রধানমন্ত্রী

মালেসিয়াগী প্রধান মন্ত্রী দাতো সেরি অনৱার ইব্রাহিমনা চেপাউ পীরকপদগী, ভারতকী প্রধান মন্ত্রী শ্রী নরেন্দ্র মোদী, ফেব্রুৱারি ৭ দগী ফেব্রুৱারি ৮,২০২৬ ফাওবা মালেসিয়াদা সরকারগী ওইবা খোঙচৎ অমদা লৈরি। লৈবাক অনিগী মরক্ত লৈনরিবা সভেত্যগী মরীশিংদা য়ুম্ফম ওইদুনা, অচেৎপা মরুপ-মপাং ওইবগী মরী অমসুং মীগা মীগা লৈনবা মরীশিংগী মমি খোঙচৎ অসিদা তারে। ইন্দিয়া-মালেসিয়া কমপ্রেহেন্সিপ ষ্ট্রাতেজিক পার্তনরসিপ মখা তানা চৎথনবা অমসুং পাকথোক-চাউথোক্নবা থাজবা লুচিংবশিংনা থাজবা অমুক হন্না পীরে।

১৯৫৭ দা কুতনিতিগী মরী লৈনরকপদগী, অমনা অমবু ইকায়খুম্নবা অমসুং শরুক য়ামিন্নরিবা গুনশিংদা য়ুম্ফম ওইদুনা মালেসিয়া অমসুং ভারত মরী অমা শেমগৎলে, মসি ২০২৪ দা কমপ্রেহেন্সিপ ষ্ট্রাতেজিক পার্তনরসিপ( সি এস পি)গী থাক্ত পুখৎলে।

খোঙচৎ মনুংদা, পেরদানা পুত্রা কমপ্লেক্স, পুত্রাজয়াদা প্রধান মন্ত্রী তরাম্না ওকখ্রে। লুচিংবশিং ফেব্রুৱারি ৮ দা লৈবাক অনিগী ওইবা মীফমশিং পাংথোকখি, অমুক হন্না সি.এস.পিগী ৱারেপ লৌখি। প্রধান মন্ত্রীনা ৱাফম কয়া ফজনা খন্নখি, রাজনিতিগী লমদা থবক তৌমিন্নবা, দিফেন্স অমসুং সেকুরিতিগী মতেং পাংনবা, সমুদ্রগী থবকশিংদা মতেং পীনবা, ললোন-ইতিক অমসুং শেন থাদবা, দিজিতেল ইকোনোমি, সাইন্স অমসুং তেক্নোলোজি, ইনর্জি, লৌউ-শিংউ, হকশেল, লাইরিক-লাইশু, নাৎ, তুরিজম, নহারোলশিং চৎথোক-চৎশিন তৌনবা অমসুং মীগা মীগা মরী লৈনবা, মসিগী মথক্ত লৈবাক অনিনা দরকার ওইবা লমদম লমদমগী অমসুং মালেমগী ওইরক্লিবা ফিবমশিং য়াওনা লৈবাক অনিগী মরীশিং মপুংফানা খন্নখি। প্রধান মন্ত্রী মোদী ইকায়খুম্নবা উৎপা ওইনা প্রধান মন্ত্রী অনৱার ইব্রাহিমনা চাক্লেন অমা শীনখি। ইন্সতিতুৎশিংগী থাক্ত মতেং পাংনবা মখা তানা হেনগৎহন্নবা পান্দম থমদুনা, লৈবাক অনিগী চে-চাং কয়া খুৎশীন্নবদা লুচিংবশিংসু শরুক য়াখি।

লৈবাক অনিগী মরক্ত লৈরিবা মতম কুইরবা পুৱারিগী মরীশিং, চহি চা কয়া শুরবা মরীশিং, মান্নবা নাৎ অমসুং চৎনবীশিং অমসুং গনতন্ত্রগী গুনশিং লুচিংবা অনিনা অমুক খন্নখি অমসুং লৈবাক অনিগী মরীগী অকনবা য়ুম্ফমগীদমক মালেসিয়াদা লৈরবা ভারতমচাশিং অমসুং লৈবাক অসিগী মাইথোঙ য়াম্বা শক্তমশিং মখা তানা ফগৎনবগী মতাংদা খন্নখি। 

রাজনিতিগী মতেং পাংনবা

অৱাংবা থাক্কী খোঙচৎশিং য়াওনা চাংনাইনা ৱারি শানবা অমসুং চৎথোক-চৎশিন তৌনবনা হিরম কয়াদা লৈবাক অনি মতেং পাংনবা অমসুং অমনা অমবু মশক খঙবা হেনগৎহল্লে হায়বা লুচিংবশিং য়ানরে। নাকল অনিনা দরকার ওইবা লৈবাক অনিগী অমসুং মালেমগী ৱাফমশিংদা লেপ্তনা থবক তৌমিন্নবগী মরুওইবা মখোয়না অমুক হন্না থমখি। হিরম অসিগী মতাংদা, ফোরেন ওফিস কন্সলতেসন্স(এফ ও সি) অমসুং জোইন্ত কম্মিসন মীতিংস(জে সি এম) না  মালেসিয়া-ভারতকী মরীশিংগী অকনবা য়ুম্ফম ওইরি।

সংসদকী গনতন্ত্রদা মখোয়না পীখিবা থাজবনা লমজিংদুনা, সংসদকী মতেং পাংনবা অমসুং চৎথোক-চৎশিন হেনগৎহনবা লুচিংবশিংনা পুক্নিং থৌগৎখি, অসিগুম্বা থবক অসিনা ইন্সতিতুসনশিং মরী লৈনবা হেনগৎহল্লে অমসুং অমনা অমবু মশক খঙবা হেনগৎহল্লে হায়না মখোয়না ফোঙদোকখি। অসিয়ান ইন্তর-পর্লিয়ামেন্তরি এশেমব্লি(এ আই পি এ)গী ৪৬শুবা জেনেরেল এশেমব্লিগীদমক সেপ্তেম্বর ২০২৫ দা ভারতকি সংসদকী মীহুৎকাংবু মালেসিয়াদা চৎখিবা; অমসুং মে ৩১-জুন ৩,২০২৫ দা মালেসিয়াদা দল খুদিংমক্কী সংসদকী মীহুৎ কাংবু চৎখিবা অদুগী মথক্ত, জনুৱারি ১৩-জনুৱারি ১৬,২০২৬ ফাওবা ২৮শুবা কনফরেন্স ওফ স্পিকরস এন্দ প্রেসাইদিং ওফিসারস ওফ কম্মনৱেল্থ(সি এস পি ও সি) গীদমক মালেমগী স্পিকর তান শ্রী দেতো দোক্তর জোহারি অবদুল ভারত্ত লাকখিবা অদুদা লুচিংবশিংনা অপেনবা ফোঙদোকখি।

ললোন-ইতিক অমসুং শেন থাদবা মতেং পাংনবা

ভারত মালেমগী শেন-থুমগী মরুওইবা খোঙলোয় অমনি হায়না খঙবগা লোয়ননা, নাকল অনিগী ললোন-ইতিক চাউখৎলকপদা মালেসিয়ানা থাগৎপা ফোঙদোকখ্রে। মরী অসি অনিমক কান্নবা অমসুং মরুওইবা অমনি হায়বা লুচিংবা অনিমক্না ফোঙদোকখ্রে। থোঙ মান্ননা মতেং পাংনবগী ৱাখল্লোন্দা, ললোন-ইতিক্কী খুদোংচাবা হেনগৎহন্নবা অমসুং সেমিকন্দক্তরশিং, দিজিতেল ইকোনোমি অমসুং উদ্যোগকী পুন্না থবক তৌমিন্নবা য়াওনা হিরম কয়াদা মতেং পাংন্নবা খুদোংচাবশিং মশক খঙদোকপদা লুচিংবা অনিমক্না য়ানরে।

মালেসিয়া-ইন্দিয়া কমপ্রেহেন্সিপ ইকোনোমিক কোওপরেসন এগ্রিমেন্ত(এম আই সি ই সি এ) অমসুং অসিয়ান-ইন্দিয়া ত্রেৎ ইন গুদস এগ্রিমেন্ত (আই এ তি আই জি এ)গী মরুওইবা লুচিংবশিংনা থমখি। নাকল অনিমক কান্নবা ফংনবা, ললোন-ইতিক চাউখৎনবা অমসুং মালেমগী হৌজিক ওইরিবা ললোন-ইতিক্কী থবকশিংগা চুন্নবা হৌজিক অসিয়ান-ইন্দিয়া ত্রেৎ ইন গুদস এগ্রিমেন্ত হন্না য়েংশিনবগী থবক চৎথরিবা অসিদা লুচিংবা অনিমক্না তরাম্না ওকখি। শেন-থুমগী মরীশিং ফগৎনবা অমসুং মসি মপুংফানা শীজিন্নবা য়ানবগীদমক লুচিংবা অনিমক্না মালেসিয়া-ইন্দিয়া কমপ্রেহেন্সিপ ইকোনোমিক কোওপরেসন এগ্রিমেন্ত থাগৎপা ফোঙদোকখি।

ইনফ্রষ্ট্রকচর, ইনর্জি, রিন্যুএবল ইনর্জি, এদভান্স মেনুফেকচরিং, সেমিকন্দক্তরশিং, অনা-লাইয়েং, দিজিতেল ইকোনোমি, ফিনতেক, ষ্টার্দঅপশিং, আর্তিফিসিএল ইন্তিলিজেন্স, হোস্পিতেলিতি, গ্রিন তেক্নোলোজিশিং অমসুং মরুওইবা সেক্তরশিং য়াওনা মরুওইবা হিরমশিংদা নাকল অনি শেন থাদবা হেনগৎলকপা অমসুং মতেং পাংনবা হেনগৎলকপদা প্রধান মন্ত্রী অনিনা তরাম্না ওকখি। মালেসিয়াগী কম্পেনিশিংদা শেন থাদবা ভারতনা লৌরিবা মরুওইবা থৌদাং প্রধান মন্ত্রী মোদীনা ফোঙদোকখি অমসুং মালেসিয়াদা অৱাংবা স্কিলগী থবক পীবদা মতেং পাংলিবা ভারতকী মেনুফেকচরিং অমসুং তেক্নোলোজি ফার্মশিং প্রধান মন্ত্রী অনৱার ইব্রাহিমনা তরাম্না ওকখি।

ফেব্রুৱারি ৭,২০২৬ দা কুৱালা লম্পুরদা ভারত-মালেসিয়া সি.ই.ও ফোরমগী ১০শুবা মীফম পাংথোকপদা প্রধান মন্ত্রী অনিনা তরাম্না ওকখি। সি.ই.ও ফোরমদগী য়ানবা পুরকখিবা চে-চাংশিং লুচিংবশিংনা খঙখি অমসুং লৈবাক অনিগী মরক্ত মখা তানা ললোন-ইতিক অমসুং শেন থাদবা হেনগৎহন্নবা ফোরমনা মখা তানা থবক তৌগনি হায়বগী থাজবা ফোঙদোকখি।

লৈবাক অনিগী ললোন-ইতিক অমসুং শেন থাদবা লোকেল করেন্সি শীজিন্নবা হেনগৎহন্নবা রিজার্ব বেঙ্ক ওফ ইন্দিয়া অমসুং বেঙ্ক নেগারা মালেসিয়াগী মরক্ত মখা তানা মতেং পাংনবদা প্রধান মন্ত্রী অনিনা থাগৎপা ফোঙদোকখ্রে অমসুং ভারতকী রুপী অমসুং মালেসিয়া রিঙ্গিৎতা ললোন-ইতিক্কী  ইনভোইসিং অমসুং শেন পীথোক-পীশিন তৌনবা লৈবাক অনিমক্কী উদ্যোগশিংদা পুক্নিং থৌগৎখি।

শেন-থুমগী মতেং পাংনবদা চৎথোক-চৎশিন অসি য়াম্না মরুওইবা অমনি হায়বা লুচিংবশিংনা খঙলে। হিরম অসিগী মতাংদা, লৈবাক অনিগী মরক্ত নোংথক অমসুং ঈশিং লম্বীদা চৎথোক-চৎশিন হেনগৎলকপদা মখোয়না থাগৎপা ফোঙদোকখি অমসুং মসি মখা তানা ফগৎহনবা হায়না য়ানখি।

চীঞ্জাক ৱাৎহন্দবা অমসুং লৌউ-শিংউগী পোৎথোক্ত মতেং পাংনবা

লৈবাক অমনা অমগী থৌশিলশিং ইকায়খুম্নবগা লোয়ননা, চীঞ্জাক অমসুং মচি ওইবা পোৎলমশিংদা হেন্না মতেং পাংনবা হায়না লুচিংবা অনিনা য়ানরে। মখোয়গী মীয়ামদা চীঞ্জাক ৱাৎহন্দনবা অমসুং দরকার ওইবা মচি ওইবা চীঞ্জাকশিং ফংহন্নবা অফবা সপ্লাই চেনশিংগী মরুওইবা মখোয়না খন্নখি। লৌউ-শিংউগী পোৎথোকশিং পুথোকপা অমসুং ললোন-ইতিক্ত অপনবা পীরকপা য়াবশিং কোকহন্নবা চাংনাইনা ৱারি শানবা, ই-পাউ পীথোক-পীশিন তৌনবা অমসুং পুন্না থবক তৌমিন্নবা লুচিংবশিংনা পুক্নিং থৌগৎখি।

প্লাম থাউ মখা তানা পীনবা মালেসিয়াগী থাজবা প্রধান মন্ত্রী অনৱার ইব্রাহিমনা অমুক হন্না পীখি। হিরম অসিদা, ওইল প্লাম থানবা মতেং পাংনবদা লুচিংশিংনা পুক্নিং থৌগৎখি। প্লামগী পোৎথোকশিং মগুন হেনগৎহনবা য়াওনা প্লাম ওইলগী ভেলু চেন শেমগৎনবা পুন্না থবক তৌমিন্নবসু নাকল অনিমক্না য়ানরে। কৈথেলগী মতাংদা মতম চানা ৱারেপশিং লৌনবা থবক পায়খৎপদা নাকল অনিমক্না য়ানরে।

দিজিতেল অমসুং শেন-থুমগী মতেং পাংনবা

মালেসিয়া-ইন্দিয়া দিজিতেল কাউন্সিল(এম আই দি সি) থবক ওইনা পাংথোকপদা লুচিংবশিংনা থাগৎপা ফোঙদোকখি অমসুং দিজিতেলগী মতেং পাংনবা হেনগৎহন্নবা, ফিনতেক, ই-গভর্নান্স, সাইবরসেকুরিতি, আর্তিফিসিএল ইন্তিলিজেন্স, দিজিতেল পব্লিক ইনফ্রাষ্ট্রকচর অমসুং নৌনা থোক্লকপা তেক্নোলোজিশিংগুম্বা হিরমশিংদা অপুনবা প্রোজেকশিং পায়খৎনবা মরুওইবা মফম অমা ওইনা মসিগী কান্নবা মশক খঙলে। লৈবাক অনি দিজিতেলগী থবক তৌমিন্নবা হেনগৎনবা অমসুং লৈবাক অনিমক্ত দিজিতেলগী অওনবশিং পুরকপা মতেং পাংনবা মালেসিয়া-ইন্দিয়া দিজিতেল কাউন্সিল(এম আই দি সি) না অফবা মেকানিজম অমা ওইনা থবক তৌগনি হায়না লুচিংবা অনিমক্না ফোঙদোকখি।

লৈবাক অনি শেন পীথোক-পীশিনগী মরীশিং লৈন্নবা এন.পি.সি.আই ইন্তরনেসনেল লিমিতদ (এন আই পি এল) অমসুং পেনেত মালেসিয়াগী মরক্ত পুন্না থবক তৌমিন্নবদা লুচিংবশিংনা তরাম্না ওকখ্রে। পুন্না থবক তৌমিন্নবা অসিনা ললোন-ইতিক লাইনা পাংথোকপা হেনগৎহনগনি, লমকোয়বা মীওইশিং, মহৈরোয়শিং অমসুং অপীকপা ললোন-ইতিকশিংনা শেন য়াম্না চঙদনা শেন থাদোক-থাজিন তৌবা য়াগনি অমসুং মালেসিয়া অমসুং ভারতকী মরক্ত শেন-থুমগী মরী অমসুং মীগা মীগা লৈনবা মরীশিং ফগৎহনবা ঙমগনি।

ইনর্জি অমসুং সেমিকন্দক্তরগী মতেং পাংনবা

ইনর্জিগী লমদা, ভারতকী রিন্যুএবল ইনর্জি অমসুং গ্রিন হায়দ্রোজেনগী থবকশিংদা পেত্রোনাস অমসুং জেন্তারিগী শিংথানিঙাই ওইরবা থবকশিং লুচিংবশিংনা খন্নখি। হিরম অসিগী মতাংদা, পাক-শন্না সোলার ইনর্জি পুথোক্নবা থবকশিং, মালেসিয়াগী মৈখু থাংদবা ইনর্জিগী পাম্বৈশিং অমসুং লৈবাক অনিমক নেত-জিরোগী পান্দমশিংদা মখা তানা পুন্না থবক তৌমিন্ননবা লৈরিবা খুদোংচাবা লুচিংবা অনিমক্না খন্নখি। ইন্তরনেসনেল সোলার এল্লাইন্স(আই এস এ) লিংখৎনবা ভারতকী থবক মালেসিয়ানা থাগৎপা ফোঙদোকখি।

মালেমগী তেক্নোলোজিগী লমদা সেমিকন্দক্তর উদ্যোগকী মরুওইবা লুচিংবশিংনা খঙখি অমসুং হিরম অসিদা লৈবাক অনি পুন্না থবক তৌমিন্নবা হেনগৎহন্দুনা অনিক কান্নবা ফংমিন্নবগী মরুওইবা অদু পনখি। তেক্নোলোজিগী অনৌবা থবক, শিন্মীশিং শেমগৎপা অমসুং অৱাবা মায়োক্নবা ঙম্বা অমসুং চাংদম্নবা ঙম্বা ফিবম অমা শেমগৎনবা অফবা সপ্লাই চেন লৈহন্নবা সেমিকন্দক্তর ভেলু চেন মপাঙ্গল কনখৎহন্নবা মতেং পাংনবা হেনগৎহনবগী মরুওইবা মখোয়না ফোঙদোকখি। আই.আই.তি-মাদ্রাস গ্লোবেল অমসুং মালেসিয়াগী এদভান্স সেমিকন্দক্তর একাদেমী অমসুং ইন্দিয়ান ইলেক্ত্রোনিক্স এন্দ সেমিকন্দক্তর এসোসিএসন(আই এফ এস এ) অমসুং মালেসিয়া সেমিকন্দক্তর ইন্দষ্ট্রি এসোসিএসন(এম এস আই এ) গী মরক্ত পুন্না থবক পায়খৎমিন্নবদা প্রধান মন্ত্রীশিংনা থাগৎপা ফোঙদোকখি।

দিফেন্স অমসুং সেকুরিতিগী মতেং পাংনবা

মালেসিয়া অমসুং ভারতকী মরক্ত অফবা দিফেন্সকী মরী লৈনবদা লুচিংবশিংনা অপেনবা ফোঙদোকখি অমসুং চাংনাইনা চৎথোক-চৎশিন তৌনবা, ষ্টাফশিং ৱারি শানবা, এক্সরসাইজশিং অমসুং ত্রেনিং কোর্সশিং পাংথোকপা অমসুং দিফেন্স ইন্দষ্ট্রি পুন্না মতেংনবগী মতাংদা খন্নখি। ষ্ট্রাতেজিক এফেয়ার্স ৱার্কিং গ্রুপ(এস এ দব্লিউ জি) অমা অমসুং সু-৩০ ফোরম লিংখৎনবা তার্মস ওফ রিফরেন্স য়াওনা মালেসিয়া-ইন্দিয়া দিফেন্স কোওপরেসন কম্মিতি(এম আই দি সি ও এম)গী মাইপাক্লবা থবকশিং মখোয়না তরাম্না ওকখি।

অসিয়ান দিফেন্স মিনিষ্টরস মীতিং প্লস ফ্রেমৱার্কতা ভারতনা য়াংনা থবক পায়খৎলকপদা লুচিংবা অনিমক্না থাগৎপা ফোঙদোকখি অমসুং ২০২৪-২০২৭ তার্মগ কাউন্তর-তেরোরিজম ৱার্কিং গ্রুপতা মালেসিয়ানা কো-চিয়ারমেন ওইবদা তরাম্না ওকখি। ভারত অমসুং মালেসিয়ানা কো-চিয়ার ওইদুনা মালেসিয়না য়ুম্বু ওইদুনা ২০২৬ দা পাংথোক্কদৌরিবা এক্সপার্ত ৱার্কিং গ্রুপ ওন কাউন্তর তেরোরিজম তেবল-তোপ এক্সরসাইজদা অসিয়ান দিফেন্স মিনিষ্টরস মীতিং প্লসগী মেম্বরশিং শরুক য়ানবা লুচিংবশিংনা চেপাউ পীখি।

এরো ইন্দিয়া ২০২৫ অমসুং লঙ্কাৱি ইন্তরনেসনেল মেরিতাইম এন্দ এরোস্পেস একজিবিসন(লিমা ২০২৫) য়াওনা দিফেন্স একজিবসনশিংদা মখোয়গী দিফেন্সকী মীহুৎকাংবু অমসুং কম্পেনিশিং চাংনাইনা শরুক য়াবা অদু লুচিংবশিংনা খন্নখি।

ভারতকী রাজস্থান্দা দিশেম্বর ০৫-দিশেম্বর ১৮,২০২৫ দা ভারত লান্মী অমসুং রোয়াল মালেসিয়া আর্মিগী মরক্ত ৫শুবা ইন্দিয়া-মালেসিয়া জোইন্ত মিলিতরি এক্সরসাইজ, হরিমাউ শক্তি পাংথোকপদা লুচিংবা অনিমক্না অপেনবা ফোঙদোকখি।

ভারত অমসুং মালেসিয়াগী মরক্ত মেরিতাইমগী মতেং পাংনবা হেনগৎলকপদা প্রধান মন্ত্রী অনিনা থাগৎপা ফোঙদোকখি। হিরম অসিদা, ওক্তোবর ২০২৫ দা আই.এন.এস সহ্যদ্রি মালেসিয়াগী কেমামান্দা চৎখিবা অমসুং জুলাই ২০২৫ দা হায়দ্রোগ্রাফিক ভেসেল আই.এন.এস সন্ধয়ক মালেসিয়াগী পোর্ত লাংদা চৎখিবা অদু মখোয়না থাগৎপা ফোঙদোকখি। ‘সমুদ্র লক্সমনা’ মিলন, অসিয়ান-ইন্দিয়া মেরিতাইম এক্সরসাইজ(এ আই এম ই) গুম্বা লৈবাক অনিগী অমসুং মালেমগী লৈবাকশিংগী নেভেল এক্সরসাইজশিংদা লৈবাক অনিগী নেভিশিং চাংনাইনা শরুক য়াবদা লুচিংবা অনিমক্না অপেনবা ফোঙদোকখি।

সেকুরিতিগী থবকশিংগী মতেং পাংন্নবা খন্নবা অমসুং অমনা অমগী মতেং পাংন্নবা মফম ওইনা, নৌনা হৌদোকপা মালেসিয়া-ইন্দিয়া সেকুরিতি দাইলোগকী মখাদা মালেসিয়া সরকার অমসুং ভারতকী সরকারগী মরক্ত মতেং পাংনবদা হৌদোকপদা লুচিংবা অনিমক্না অপেনবা ফোঙদোকখি।

ঙমখৈ ৱাংমদগী চৎথরকপা তেরোরিজম য়াওনা মখল খুদিংমক্কী তেরোরিজম প্রধান মন্ত্রী অনিনা য়াম্না কন্না য়ানিংবদা ফোঙদোকখি। তেরোরিজম খাংদুনা লৈথোক্তনবা অমসুং অপুনবা মওং অমদা তেরোরিজম থেংন্নবা মালেমগী থবকশিং পায়খৎনবা মখোয়না তকশিনখি। ই-পাউ অমসুং লৌশিং পীথোক পীশিন তৌনদুনা, খ্বাইদগী ফবা থবকশিং পীথোক-পীশিন তৌনদুনা রেদিকেলাইজেসন অমসুং এক্সত্রিমিজম থেংনবা; তেরোরিজমদা শেন থাদবা থিংবা; তেরোরিষ্টকী থবকশিংগীদমক অনৌবা তেক্নোলোজিশিং শীজিন্নবা থিংবা হায়না মখোয়না য়ানখি। তেরোরিজম অমসুং লৈবাক কয়াদা পাংথোকপা ক্রাইম অনিগী মরক্ত লৈনরিবা মরীশিং খঙলদুনা, ই-পাউশিং অমসুং খ্বাইদগী ফবা থবকশিং শরুক য়ামিন্নদুনা লৈবাক কয়া শীনবা থুংনা পাংথোকপা ওর্গনাইজ ক্রাইমগী হিরমদা মতেং পাংনবা হায়না লুচিংবা অনি য়ানরে। য়ু.এন অমসুং এফ.এ.তি.এফ য়াওনা তেরোরিজম থেংন্নবা লৈবাক অনি অমসুং মালেমগী লৈবাকশিং মতেং পাংনবা হেনগৎহন্নবা লুচিংবা অনিনা অমুক হন্না থাজবা পীখি।

লাইরিক-লাইশু তম্বা অমসুং স্কিল হেনগৎহনবা

লৈবাক অমদা লৈবাক অমগী মশিং য়াম্লবা মহৈরোয়শিং লৈরিবা অমসুং মালেসিয়া তেক্নিকেল কোওপরেসন প্রোগ্রাম(এম সি পি পি) অমসুং ইন্দিয়ান তেক্নিকেল এন্দ ইকোনোমিক কোওপরেসন প্রোগ্রাম(আই তি ই সি)গী মখাদা হৌজিক চৎথিরবা থৌরমশিং লুচিংবা অনিনা খঙখি। নাকল অনিমক মহৈরোয়শিং অমসুং ওজাশিং মশিং য়াম্না চৎথোক-চৎশিন তৌনবা অমসুং মহৈলোয়শঙশিংগী মরক্ত মতেং পাংনবা মখোয়না পুক্নিং থৌগৎখি। ‘ভারত্ত লাইরিক তম্বা’ থৌরমগী মখাদা ভারতনা পীরিবা খুদোংচাবশিং লৌনবা প্রধান মন্ত্রী মোদীনা মালেসিয়াগী মহৈরোয়শিংদা খঙহনখি।

লৈবাক অনিমক্কী দরকার ওইবশিং ফংহনবা ঙম্নবা হৈথোই-শিংথোইবা শিন্মীশিং পুথোক্নবা তেক্নিকেল এন্দ ভোকেসনেল ইজুকেসন এন্দ ত্রেনিং(তি ভি ই তি) দা মতেং পাংনবা হেনগৎহনবগী মরুওইবা লুচিংবশিংনা ফোঙদোকখি। ভোকেসনেল ত্রেনিং ফগৎনবা, থবক ফংবা হেনগৎনবা অমসুং স্কিল হেনগৎহন্দুনা শেন-থুম চাউখৎপদা মতেং পাংনবা অপুনবা থবকশিং, লৌশিং শরুক য়ামিন্নবা অমসুং একচেঞ্জ প্রোগ্রামশিং মখোয়না পুক্নিং থৌগৎখি।

নাৎ, তুরিজম অমসুং মীগা মীগা মরী লৈনবা

মীগা মীগা লৈনবা অচেৎপা মরীশিংগী মীৎয়েংদা, শিন্মীশিং অমসুং শীনফম কয়াগী মীওইশিং মখা তানা চৎথোক-চৎশিন তৌনবা হায়না প্রধান মন্ত্রী অনি য়ানরে।

লৈবাক অনি মতেং পাংনবা অমসুং মালেসিয়া অমসুং ভারতকী মরক্ত মীগা মীগা লৈনবা মরীশিংগী তুরিজমনা মরুওইবা য়ুম্বী অমনি হাববা লুচিংবশিংনা অমুক হন্না ফোঙদোকখি। হিরম অসিগী মতাংদা, ভারতনা ভিজিত মালেসিয়া ২০২৬ কেম্পেন তরাম্না ওকখি অমসুং মালেমসিয়ানা ভারতকী ‘ইনক্রেদিবল ইন্দিয়া’ তুরিজম কেম্পেন তরাম্না ওকখি। শেন-থুম চাউখৎপা অমসুং অমনা অমবু মশক খঙবদা শৌগৎনবা তুংকোইনা চৎনবা য়াবা অমসুং খুদিংমক কোনশিনবা তুরিজমগী মরুওইবা নাকল অনিমক্না থমখি। মখা তানা তুরিজমগী মতেং পাংন্নবা অমসুং লৈবাক অনিগী মরক্ত লমকোয়বা মীওইশিং চৎথোক-চৎশিন হেনগৎহন্নবা মখোয়গী থাজবা লুচিংবা অনিনা ফোঙদোকখি।

মীগা মীগা লৈনবা অচেৎপা মরীশিং খঙলদুনা, লমকোয়বা মীওইশিং অমসুং ললোন-ইতিক্কী চৎথোক-চৎশিন ফগৎহল্লিবা হৌজিক চৎথরিবা ভিসা কোমথোকপা অসি লুচিংবশিংনা তরাম্না ওকখি।

অনিম থাজনবা অমসুং অনিমক কান্নবা ফংবগী ৱাখল্লোন্দা মালেসিয়া অমসুং ভারতকী মরক্ত নোংথক্কী লম্বীদা চৎথোক-চৎশিন হেনগৎহন্নবা লুচিংবা অনিনা মখোয়গী থাজবা অমুক হন্না পীনখি। মখা তানা পেসেঞ্জরগী দরকার ওইবা হেনগৎলকপা অমসুং তুরিজম, ললোন-ইতিক অমসুং মীগা মীগা চৎথোক-চৎশিনগী মরুওইবা হেনগৎলক্লিবা অসি খঙলদুনা, সিবিল এভিএসনগী লমদা মতেং পাংনবা মখা তানা হেনগৎহনবা হায়না সরকার অনিমক য়ানরে।

হিরম অসিদা, হৌজিক লৈরিবা ত্রাফিক রাইতশিং মখা তানা হেনগৎহন্নবা মালেসিয়াগী মাইকৈদগী ৱাফম পুখৎলকখি। হায়জরকপা ৱাফম অদু ভারতনা খঙজিনখি।

য়ুনিভর্সিতি মালায়া(য়ু এম) দা তিরুবাল্লুবার চিয়ার ওফ ইন্দিয়ান ষ্টদিজ থবক পাংথোকপদা লুচিংবা অনিনা থাগৎপা ফোঙদোকখি অমসুং য়ুনিভর্সিতি মলায়াদা তিরুবাল্লুবার স্কোলারসিপ লিংখৎপদা তরাম্না ওকখি। মালেসিয়ামচাশিংগীদমক তিরুবাল্লুবার স্কোলারসিপ লিংখৎপদা প্রধান মন্ত্রী অনৱার ইব্রাহিমনা তরাম্না ওকখি।

অনা-লাইয়েংগী মতেং পাংনবা

অনা-লাইয়েং অমসুং মমাংঙৈগী হিদাক-লাংথকশিংগী লমদা পুন্না থবক তৌমিন্ননা লুচিংবা অনিমক্না অমুক হন্না থাজবা পীনখি। লমদম অসি শীনবা থুংনা অরুবা মেদিকেলগী দরকার ওইবশিং ফংহন্নবা হকশেলগী থবকশিং খঙদোক্নবা লুচিংবা অনিনা থাজবা পীখি। 

আই.তি.ই.সি প্রোগ্রামগী মখাদা ত্রেদিসেনল ইন্দিয়ান মেদিসিন(তি আই এম) অখঙ-অহৈশিং মখা তানা মালেসিয়াদা থাজবা দরকার ওইবা থবকশিং পায়খৎনবা মালেসিয়ানা মখা তানা থাজবা পীখি অমসুং ভারতকা লোয়ননা য়াম্না খন্ন-নৈনবা পাংথোক্লি। মসিনা হেল্থ মিনিষ্ট্রিগী খনখৎলবা হোস্পিতালশিংদা মখা তানা অমুক হন্না ত্রেদিসেনল ইন্দিয়ান মেদিসিন পায়খৎপদা মতেং পাংগনি, অপুনবা অমসুং অফবা অনা-লাইয়েংগী মাইকৈ অমদা চঙশিনবদা এল্লোপেথিক মেদিসিনগী মতেং পাংগনি।

মমল হোংবা অনা-লাইয়েং অমসুং হিদাক-লাংথক্কী লমদা হৌজিক লৈবাক অনি মতেং পাংনরিবা অসি লুচিংবশিংনা খঙজিনখি অমসুং দ্রগ রিগুলেসন, ফার্মাকেপিয়া মশক খঙবা অমসুং নর্সগী থবকশিং মশক খঙবগী হিরমদা মতেং পাংন্না নাকল অনি খন্নবদা তরাম্না ওকখি।

ওক্তোবর ২০২৫ দা সেন্ত্রেল কাউন্সিল ফোর রিছার্স ইন হোমোপেথি(সি সি আর ঐচ), ইন্দিয়া অমসুং সাইবরজয়া য়ুনিভর্সিতি, মালেসিয়াগী মরক্ত এম.ও.য়ু খুৎয়েক পীনবদা লুচিংবা অনিনা তরাম্না ওকখি অমসুং মসিনা হোমোপেথিদা পুন্না থবক তৌমিন্নবা, ত্রেনিং অমসুং অখঙ-অহৈশিং চৎথোক-চৎশিন তৌনবা হেনগৎহল্লে।

তুংকোইনা চৎনবা য়াবা চাউখৎ-থৌরাংগী মতেং পাংনবা

লম্লক্কী থৱায় পানবশিং ঙাক-শেন্নবা মখোয়গী কৎথোকপা অমসুং ইন্তরনেসনেল বিগ কেত এল্লাইন্সকী ফাউন্দিং মেম্বর অমা ওইনা মালেসিয়ানা লৌরিবা থৌদাং মখোয়না ফোঙদোকখি। থিজিনবা, কেপাসিতি হেনগৎহনবা, তেক্নোলোজি ফংহনবা অমসুং খ্বাইদগী ফবা থবকশিং শরুক য়ামিন্নবগী খুৎথাংদা মালেসিয়া অমসুং ভারত য়াওনা মালেমদা লৈরিবা অচৌবা মখলগী হৌদোঙশিং ঙাক-শেন্নবগী মখোয়গী থাজবা অমুক হন্না পীখি।

মহৌশা অমসুং মীওইবনা থোকহনবা  অমাঙ-অতাশিংদা লৈবাক অনিমক খুদোংথিনিঙাই ওইরিবা অসি খঙলদুনা, অমাঙ-অতাশিং ঙাকথোক্নবা মতেং পাংনবা হেনগৎহনবগী তঙাইফদবা অদু লুচিংবা অনিনা ফোঙদোকখি। মসিগী মনুংদা অখঙবা শরুক য়ামিন্নবা, দিজাষ্টার মেনেজমেন্ত অমসুং মী থিবা অমসুং মী কনবগী মতাংদা মীওইশিং ত্রেনিং পীবা অমসুং অপুনবা ওইনা এক্সরসাইজ পাংথোকপা য়াওরি। হায়রিবা থবকশিং অসি লৈবাক অনিগী নেসনেল দিজাষ্টার মেনেজমেন্ত ওথোরিতিশিংগী মরক্ত দিজাষ্টার মেনেজমেন্তগী এম.ও.য়ুগী মখাদা পাংথোক্কনি। অমাঙ-অতা থোকপা হন্থহন্নবা অমসুং মায়োক্নবা ঙম্নবা মালেমগী ওইনা মতেং পাংনবদা, কোলিএসন ফোর দিজাষ্টার রিসিলিয়েন্ত ইনফ্রাষ্ট্রকচর(সি দি আর আই) য়াওনা লমদম অসিগী অমসুং মালেমগী থবকশিংগী মরুওইবা অদু লুচিংবশিংনা খঙখি।

লমদম অসিগী অমসুং মালেমগী ওইনা মতেং পাংনবা

লুচিংবশিংনা লমদম অসিগী অমসুং মালেমগী থৌদোক-ৱাথোকশিংগী মতাংদা মখোয়গী ওইবা ৱাখল্লোনশিং ফোঙদোক্নখি। ৱারি শানবা অমসুং কুতনিতিগী খুৎথাংদা শান্তি ওইনা ৱারোইশিন পুরকপগী দরকার ওইবা অদু মখোয়না তকশিনখি।

ভারতনা ২০২৫ ব্রিক্স চিয়ারমেন ওইবদা মালেসিয়ানা তরাম্না ওকখি অমসুং ব্রিক্স পার্তনর কন্ত্রি অমা ওইনা মালেসিয়ানা শৌগৎপদা ভারতনা অমুক হন্না থাজবা ফোঙদোকখি অমসুং ব্রিক্সকী মেম্বর অমা ওইনবা মালেসিয়াগী অনিংবা অদু খঙখি। মসিগী মতেং পাংনবা অসি হেন্না থোঙ মান্নবা অমসুং লৈবাক কয়া শরুক য়াবা মালেমগী চৎন-কাংলোন অমা লৈহন্নবা মাইকৈদা মরুওইবা খুমাঙচাউশিনবা অমনি হায়না লুচিংবা অনিনা ফোঙদোকখি। থোঙ মান্নবা মালেমগী লৈঙাক অমা লৈনবা অমসুং তুংকোইনা চাউখৎপদা মতেং পাংনবা অসিগুম্বা থবকশিংনা শেন-থুমগী মরুওইবা মফমশিং পীগনি হায়না লুচিংবা অনিনা মখোয়গী ওইবা ৱাখলশিং ফোঙদোক্নখি।

য়ু.এন য়াওনা মালেমগী লুপশিং মতেং পাংনবা হেনগৎহনবদা প্রধান মন্ত্রী অনিমক য়ানরে অমসুং মালেমগী লুপশিং অহোংবা পুরকপদা শৌগৎখি। য়ু.এন.এস.সি য়াওনা মালেমগী লুপশিংদা লৈবাকশিং হেন্না শরুক য়ানবা পুন্না থবক তৌমিন্নবা মখোয়না ৱাশকখি। মালেমগী ফোরমশিংদা অমনা অমবু শৌগৎনবগী অকনবা ৱাখল্লোন মমি তারদুনা, তোঙান তোঙানবা মালেমগী মীরেপশিং ওইবদা অমনা অমবু শৌগৎন্নবা লুচিংবা অনিনা খন্নখি। অওনবা পুরক্লবা য়ু.এন.এস.সি অমদা ভারতনা লেংদ্রবা মেম্বর অমা ওইবদা মালেসিয়ানা শৌগৎপদা ভারতনা থাগৎপা ফোঙদোকখি।

শেঞ্জা-থুমজা থিংনবা মতেং পীন্নবা এম.ও.য়ু খুৎয়েক পীনবা; দিজাষ্টার মেনেজমেন্তগী এম.ও.য়ু; মালেসিয়াদা ভারতমচাশিং অশোই-অঙাম থোক্তনবা সোসিএল সেকুরিতি প্রোগ্রামশিং অমসুং থবকশিংগী মতেং পাংন্নবা এম.ও.সি আমসুং ওদিও ভিজুয়েল কো-প্রদক্সনদা এগ্রিমেন্ত লৈনবা লুচিংবা অনিনা তরাম্না ওকখ্রে। সেমিকন্দক্তরশিং, অনা-লাইয়েং, নেসনেল সেকুরিতি অমসুং ভোকেসনেল ইজুকেসন অমসুং ত্রেনিংগী হিরমশিংদা মালেসিয়া অমসুং ভারতকী মরক্ত চেরোলশিং খুৎশীন্নবদা লুচিংবা অনি শরুক য়াখি। মসিগী মথক্ত, য়ুনাইতেদ নেসন্স পীছকিপ্পিং কোওপরেসনদা এম.ও.য়ু অমুক নৌথোক্নবা একচেঞ্জ ওফ লেত্তরস(ই ও এল) অমসুং ইন্তরনেসনেল বিগ কেতস এল্লাইন্সকী ফ্রেমৱার্ক এগ্রিমেন্ত মালেসিয়ানা শেমদোকপদা লুচিংবশিং খঙখি।

নিংতম্না জহাজ হোনবা অমসুং লৈবাক লান্না মথক্ত পাইনবগী ইকায়খুম্নবা ঙাক্নবা অমসুং য়ুনাইতেদ নেসন্স কনভেন্সন ওন লো ওফ সি (য়ু এন সি এল ও এস) ১৯৮২ গী মতুংইন্না মালেমগী আইনদা য়ুম্ফম ওইদুনা আইন্না য়াবা ললোন-ইতিক পাংথোক্নবা মখোয়গী থাজবা লুচিংবা অনিনা অমুক হন্না ফোঙদোকখি। য়ুনাইতেদ নেসন্স কনভেন্সন ওন লো ওফ সি (য়ু এন সি এল ও এস) ১৯৮২ য়াওনা মালেমগী আইনশিংগী মখাদা য়ানদবা খুদিংমক শান্তি ওইনা ৱারোইশিন পুরক্নবা লুচিংবা অনিনা লৈবাকশিং তকশিনখি।

অসিয়ানগী অপুনবা অমসুং অসিয়ান্না ময়াইদা লৈবদা ভারতনা মপুংফানা অমসুং লেংদনা শৌগৎপদা প্রধান মন্ত্রী অনৱার ইব্রাহিমনা তরাম্না ওকখি। ২০২৫ দা মালেসিয়ানা মাইপাক্না অসিয়ানগী চিয়ারমেন ওইবদা প্রধান মন্ত্রী মোদীনা থাগৎপা ফোঙদোকখি অমসুং অপুনবা ওইনা অসিয়ান-ইন্দিয়া কমপ্রেহেন্সিপ ষ্ট্রাতেজিক পার্তনরসিপ মপাঙ্গল কনখৎহনবদা মখোয়না শৌগৎপদগীদমক মালেসিয়া অমসুং অতোপ্পা অসিয়ান লৈবাকশিং থাগৎপা ফোঙদোকখি।

নিংতম্বা, অথিংবা লৈতবা অমসুং নিয়মদা য়ুম্ফম ওইবা শান্তি লৈবা অমসুং নুংঙাই য়াইফবা ইন্দো-পেসিফিক অমা লৈহন্নবা লুচিংবা অনিনা মখোয়গী থাজবা অমুক হন্না ফোঙদোকখি। লমদম অসিদা শান্তি, তুংদু-লৈতাবা অমসুং নুংঙাই য়াইফবা পুরক্নবা অসিয়ান আউতলুক ওন ইন্দো-পেসিফিক(এ ও আই পি) দা অসিয়ান জোইন্ত ষ্টেৎমেন্ত থবক ওইনা পায়খৎনবা থবক কনখৎপদা নাকল অনিনা তরাম্না ওকখি।

খোঙচৎ মনুংদা মহাক অমসুং মহাক্কী মীহুৎকাংবু তরাম্না ওকপগীদমক প্রধান মন্ত্রী শ্রী নরেন্দ্র মোদীনা প্রধান মন্ত্রী অনৱার ইব্রাহিম অমসুং মালেসিয়াগী মীয়াম থাগৎপা ফোঙদোকখি। অথুবা মতমদা ভারত্ত লাক্নবা প্রধান মন্ত্রী অনৱার ইব্রাহিমদা প্রধান মন্ত্রী মোদীনা চেপাউ অমা পীখি।

***