ভারতকী প্রধানমন্ত্রী
ঙসি রিপব্লিক সমিৎতা প্রধান মন্ত্রী নরেন্দ্র মোদীনা মরুওইবা ৱারোল পীখ্রে। চহি অসিগী সমিৎকী পান্দমদি “ভারতকী মতম লৈবাক্না অহানবা”নি হায়বসিনি।
থৌরম অদুদা প্রধান মন্ত্রীনা হায়খি খঙনীংবা লৈবাক অমা ওইরম্বদগী ভারত অসি লৈবাক্কী হান্না খনবা অমা ওইরে। চহি কয়া লোইশিনদনা লৈরকপা থবকশিং হৌজিক ৱারোইশিন পুরক্লে। মসি মীওই করোর ১৩০না লৈবাক্কী হান্না হায়বা ৱাফম অসি খনবদগী ওইথোকপনি।
মহাক্না হায়খি মসিগী মরুমদা তেরোরিজম লৈবদগী ভারতনা কশ্মীরদগী আর্তিকল ৩৭০ লৌথোকপগী অচৌবা মরমনি। ইমুং খরনা মরম ওইদুনা সংবিধানগী ৱারোলদা আর্তিকল ৩৭০না জে. অমসুং কে.দা অখন্নবা ফিবম অমা পীরম্বনি, মসি লেংদবা অমনি হায়না খনখি।
মহাক্না হায়খি লৈবাক্কী হান্না খনবা মতমদা, লৈবাক অসিনা অচৌবা ৱারেপ লৌই। ৱারেপ অদু লৈবাক্না য়াবা মতমদা লৈবাক মাংলোমদা চংশিল্লি। মীয়াম্না সুপ্রীম কোর্ত্তা চৎপা মতমদা আইন্না আধার অসি শকখঙখিদে। হায়রিবা মীওইশিং অসিনা আধার অসি মাংহনবা পাম্মি। অদুবু মখোয়গী অশেংবা মশক অদু উৎথোকপদা আধারনা মতেং পাংখি। লুপা করোর লাখ ১.৫ হুরানবশিংগী মখুৎতগী আধারন কনবা ঙমখি। ঐখোয়না ভারতকী হান্না খনবদগী মসিগী য়াম্লবা শেনফম অসি মাংখিগদবদগী কনবা ঙম্বনি।
প্রধান মন্ত্রীনা হায়খি মমাংদা লৈবাক অসিদা জি.এস.তি. চৎনরমদে। মমাংগা য়েংনবদা হৌজিক মীচম মীয়ামগা মরি লৈনবা পোৎলমশিংগী চাদা ৯৯ তেক্স লৌরে। মতম অমদা রেফ্রিজেরেতরশিং, মিক্সরশিং, জুইসরশিং, ভেকম ক্লিনরশিং, গিজরশিং, মোবাইল ফোনশিং, ৱাশিং মেচিনশিং, ঘরীশিং তেক্স চাদা ৩১ লৌরমখি। হৌজিক হায়রিবা পোৎলমশিং অসি তেক্স চাদা ১০দগী ১২ ফাওবা হন্থরে।
মহাক্না হায়খি চহি কয়া দিল্লীগী মীওই মিল্লিয়ন কয়া তম্বা ঙমদবা ফিবম অমদা লৈরমখি। মীয়াম্না ৱানা তানবা শেনফমশিংনা য়ুমশিং লৈখি অদুবু মখোয়না মপুংফানা মপু ওইবা ঙমখিদে। মসিগী খুদোংচাদবা অসি লোইশিন্নবা ঐখোয়গী সরকারনা ৱারেপ লৌরে অমসুং দিল্লীগী ইমুং লাখ ৫০ হেন্না মখোয়গী য়ুম ফংলে। মসিনা ঐখোয়গী মিদল ক্লাসশিংদা কান্নবা ফংলগনি অমসুং মখোয়না পামজবা য়ুম ফংলগনি।
প্রধান মন্ত্রীনা হায়খি ঙসি ভারতনা পায়খৎলিবা থবক্কী পাক-চাউবা অমসুং খোঙজেল অসি মমাংদা অমুক্তা ওইখিদ্রি। থা ৬০গী মনুংদা ভারতমচা করোর ৬০দা তোইলেতশিং ফংহল্লে। হায়রিবা থবকশিং অসি লৈবাক্কী হান্না হায়বা অসিদা পায়খৎপনি। নহাক্না নশাগী ওইজবা থাদোকপা মতমদা, মী খুদিংমক্না শৌগৎকনি অমসুং থৌশিল অমসুং রাজনিতীদা মী খুদিংমক্না থাজবা থমগনি। লৈবাক অসিগী চাউখৎপা দরকার ওইরিবা জিলা ১১২ শেমখৎনবা হৌজিক থবক পায়খৎলি।
প্রধান মন্ত্রীনা হায়খি লৈবাক্কী হান্না খনবা হায়বা ৱাখল্লোন অসিদা লায়রবশিংগা বেঙ্ককা শম্ননবা বেঙ্ক একাউন্ত করোর ৩৭ হাংদোক্লে। লৈবাক হান্না খন্দুনা জল জীবন মিসন হৌদোক্লে। লাক্লিবা মতমদা মসিগী মিসন অসিনা লুপা করোর লাখ ৩.৫ চাদিং তৌদুনা লৈবাক অসিগী মনুং হুঞ্জিনবা মফমশিংদা লৈরিবা মীওইশিংদা অফবা থক্নবা ঈশিং ফংহনগনি।
মহাক্না মখা তানা হায়খি মীয়ামগী শেন্থোক হেনগৎহন্নবা পান্দমদা লৈবাক অসিগী দোল্লর ত্রিল্লিয়ন ৫গী ইকোনোমী অমা লৈহন্নবা লৈবাক অসিনা পান্দম থমলি। লৈবাক হান্না খনবা হায়বা ৱাখল্লোন অসিদা ঐখোয় থাজবা থমলি অমসুং ৱারেপ খুদিংমক্কী চপ চাবা মহয় ফংগনি অমসুং পানদম খুদিংমক লৈবাক অসিনা ফংবা ঙমগনি। মসিগী ৱাখল্লোন অসিগা লোয়ননা অনৌবা ভারতকী অনৌবা খুদোংচাবশিংগী মতাংদা ঐখোয়না কুপ্না খন্নগনি।
***
