ভারতকী প্রধানমন্ত্রী

ঙসি প্রধান মন্ত্রী শ্রী নরেন্দ্র মোদীনা মহাক্কা ফম মান্নবা জর্মনিগী ফেদেরেল চান্সেল্লর দোক্তর এঞ্জেলা মার্কেলগা লোয়ন্না ভিদিও-তেলিকনফরেন্স অমা পাংথোকখ্রে।

য়ুরোপ অমসুং মালেমগী থাক্তা তুংকোইবা অমসুং অকনবা লুচিংবা অমা ওইনা চান্সেল্লর মার্কেলনা মতম শাংনা লৌরক্লিবা থৌদাং প্রধান মন্ত্রীনা থাগৎখি অমসুং ভারত-জর্মিনগী অচেৎপা মরুপ-মপাং ওইবা মরী চাউখৎনবা লমজিংবগীদমক মহাক থাগৎখি।

লৈবাক অনিমক্না মরুওই হায়না লৌনবা মরুওইবা ৱাফমশিং হায়বদি কোবিদ-১৯ লাইচৎ, নাকল অনিগী মরীশিং, লৈবাক অনিগী অমসুং মালেমগী ৱাফমশিং, ভারত-ই.য়ু মরীশিংগী মতাংদা লুচিংবা অনিনা খন্নখি।

ভারতনা তিকা পুথোকপগী মতাংদা প্রধান মন্ত্রীনা এঞ্জেলা মার্কেলদা পাউদমখি অমসুং মালেমগী লৈবাকশিংদা কান্নবা পীনবা লৈবাক অসিনা পাংবা য়াবা মতেং পাংগনি হায়না ভারতকী থাজবা এঞ্জেলা মার্কেলদা পীখি। জর্মনি অমসুং অতোপ্পা য়ুরোপকী লৈবাকশিংদা নৌনা লাইচৎ শন্দোরক্লিবা অসি অথুবদা লাকশিন্নবা মহাক্না মহাক্কী পাউজেলশিং পীখি।

ইন্তরনেসনেল সোলার এল্লাইন্স(আই.এস.এ) শরুক য়ানবা জর্মনিগী ৱারেপ অদু প্রধান মন্ত্রীনা তরাম্না ওকখি অমসুং কোলিএসন ফোর দিজাস্তর রিসিলিয়েন্ত ইনফ্রাস্ত্রকচর(সি দি আর আই)গী মখাদা জর্মনিগী মতেং পাংনবা মখা তানা কনখৎহন্নবা মহাক্কী অপাম্বা ফোঙদোকখি।

চৎলিবা চহি অসি ভারত অমসুং জর্মনিগী মরক্তা নাকল অনিগী মরী থম্নখিবগী চহি ৭০শুবা কুমওন অমসুং স্ত্রাতেজিক পার্তনরসিপকী চহি ২০শুবা কুমওন থোক্লে অমসুং  ২০২১গী অঙনবা শরুক্তা ৬শুবা ইন্তর-গভর্নমেন্তেল কন্সলতেসন(আই.জি.সি) পাংথোকপা অমসুং মীফম অদুগী এজেন্দা অমা শেম্বা হায়না লুচিংবা অনিনা য়ানরে।

******