ভারতকী প্রধানমন্ত্রী

মরুপশিং,

ভারতকী ৱাখল্লোন মালেমদা য়ৌহনবা হায়বা হিরম অসিগী কনফরেন্সতা মমিং লৈরবা আই এম এম কোচিকোদগুম্বা ইন্সতিতুৎ অমদা ৱা ঙাংবা অসি ঐ হরাওই ।  অসিগুম্বা মমিং লৈরবা মহৈলোয়শঙ অসিনা হায়রিবা হিরমশিং অসিদা থৱায় য়াওবা অসি হরাওই । শ্বামি বিবেকানন্দগী মীতম অমা মসিগী কেম্পস অসিদা লৈবা মতমগা চান্না ঐখোয়না ভারতকী ৱাখল্লোন মালেমদা য়ৌহনবা হায়বা হিরমদা ঐখোয়না ৱা ঙাংবা নত্তে । ভারতকী ৱাখল্লোন মালেমদা য়ৌহনবগী মতাংদা শ্বামি বিবেকান্দগী থবকশিং ঐখোয়না কাউথোক্লে । ১৮৯৩গী সেপ্তেম্বর ১১দা চিকাগোদা মহাক্কী মমিং লৈরবা ৱা ঙাংবদা শ্বামি বিবেকানন্দনা ভারতকী চৎনবীশিং পনখি । মহাক্কী ৱারোল অদু মহাক্না ‘অমেরিকাগী ইচলশিং অমসুং ইনাওশিং’ হায়না হৌবদা, খুবাক খুখি । মদু মিত্রং অমগুম থোকখি । মিত্রং অদু ৱাহৈগী নত্তে । মদু ভারতনা মালেমগী মচিন-মনাও ওইবদা থম্লিবা থাজবা অদুনি ।

মরুপশিং, ভারতকী ৱাখল্লোন অসি মখল য়াম্মি অমসুং মতিক মগুন লৈ । মসি লেকচর অমদা নৎত্রগা সেমিনার অমদা নৎত্রগা লাইরিকশিংদা য়াওহনবা অসি য়াম্না চাউই । অদুবু ভারতকী ৱাখল্লোনশিংদা লেংদবা খর লৈরি । মখোয় অদুদি –মীনুংশিং,  নুংশিনবা, অচুম্বা, থবক অমসুং মনিংতম্বনি ।

মরুপশিং ,

ভারত্ত মালেমদা মীৎয়েং চংলিবা অসিগী মতাংদা ঐ হায়গে । অহানবদা শান্তিগী গুনশিং, অপুনবা অমসুং মচিন-মনাও ওইবা অসিনি। লৈবাক অসিদা রাজ্য কয়া, লোল কয়া, লাইনিং কয়া, ফিজেৎ কয়া অমসুং চৎনবী কয়া, চাকচা-য়ুথক কয়া লৈরি । অদুবু চহি কয়া ইংনা লৈমিন্দুনা লাক্লি । চহি চা কয়া ঐখোয়গী লৈবাক্ত মালেম অসি তরাম্না ওক্তুনা লাকলি । অতৈনা চাউখৎত্রিঙৈদা ঐখোয়গী সিবিলাইজেসন অসি চাউখৎলমখি । করিগী ? মরমদি কনাগুম্বনা মফম অসিদা শান্তি অমসুং নুংশিনবা ফংখি ।

মরুপশিং,

ঐখোয়গী ৱাখলশিং অহিংবা চৎনবী ওইবা, মরি লৈনবা অমসুং অরাইবা থবকশিংনা লমজিংবা অসি    ঐখোয়গী থৌনানি । মসিগী ফজবা অসি ঐখোয়না তোঙান-তোঙান্না পাংথোক্নরি ।

মরুপশিং,

ঐখোয়গী লৈবাক অসি মালেমদা মমিং লৈরবা লাইনিংশিং হায়বদি হিন্দুজম, বুধিজম, জৈনিজম অমসুং সিখজম পীরি । লৈবাক অসিদা সুফিগী চৎনবী ফজনা লৈরি । হায়রিবা লাইনিং অসিগী মরুওইবদি অহিংশা অসিনি । ২০শুবা চহিচাদা মহাত্মা গান্ধীনা হায়রিবা ৱাখল্লোনশিং অসি শীজিন্নখি অমসুং মসিনা ভারতকী নিংতম ইহৌদা মতেং পাংখি । মতম অসিদা, মখোয়না মপান লৈবাকশিংগী মীওইশিংদা থৌনা পীখি । দোক্তর মারতিন লুথর কিং জুনিয়র নৎত্রগা নেলসন মন্দেলা নৎত্রগা অফ্রিকাগী লৈবাকশিংগী নিংতম ইহৌশিং অসি গান্ধীজিনা ইথিল পীখিবনি । মালেমগী লাঞ্জাও অনিমক্ত ভারতকী লান্মী কয়া থৱায় থাখি । হায়রিবা লানশিং অদু ভারতকা শোক্নবা নৎত্রবসু মখোয়না থৌনা ফনা শোক্নখি । ঐখোয়না কৈদৌঙৈদা অতোপ্পগী লম নৎত্রগা লন-থুমশিং পামখিদে । শান্তি থম্নবা ঐখোয়গী লান্মীশিং লান্থেংনখিবনি । চহি কয়া, য়ু এনগী শান্তি থম্নবা মালেমগী থবকশিংদা ভারতনা চাউনা মতেং পাংলি ।

করিগুম্বা খ্বাইদগী মুকনবা মফমশিংদা শান্তি পুরক্লবদি মদু ঐখোয়গী লান্মীশিংনা থৌদাং লৌবদগী ওইগনি । মালেম অসিনা তেরোরিজম অমসুং মুক্নবদগী মনিংতম্নবা হোৎনবদা ভারতকী থবকশিংনা থাজবগী মঙাল পীরি । মুক্নবা লৈতনবা ভারতকী লম্বী অসি শক্তি শীজিন্নবা নত্তে ৱারি শানবগী শক্তি অদুনি ।

মরুপশিং, ভারতনা শান্তি অমসুং নুংশিনবদা থাজবা থম্লি হায়না ঐনা হায়রিবা অদুদা মহৌশা লাইরেমবী অমসুং ঐখোয়গী অকোয়বগী ফিবমগা নুংশিন্না লৈমিন্নবা য়াওরি।

থৱায় পানবা খুদিংমক্না মখা পোল্লিবা মালেম ইমানা খুদিংমক পীরি ।

ঐখোয়গী চৎনবীশিংদা মালেম অসি ঐখোয়গী ইমানি হায়না খন্নরি । শা-ষন কয়া ভারতনা লাই ওইনা লৌনরি । কৌসিল্যানা পাম্বী অমসুং শা-ষন কয়া কন্নবা ইরমখি । মৈখু চেন্দবা মালেম অমা ওইহন্নবা ভারতনা মাংজিল থাদুনা ইন্তরনেসনেল সোলার এল্লাইন্স শেম্লে । রিনিউয়েবল ইনর্জি শীজিন্নবা হেনগৎহন্নবা থবক কয়া ঐখোয়না পায়খৎলি । এল ই দি ব্লবশিং শীজিন্নবা মীয়ামগী খোঙজং অমা ভারতনা পায়খৎলে । এল ই দি ব্লব ক্রোর ৩৬ য়েন্থোক্লে । লম্বীগী লাইত ক্রোর ১ হেন্না এল ই দিনা মহুৎশীল্লে । মসিনা চাউরাক্না লুপা ক্রোর লিশিং ২৫ রোম কনবা ঙম্লে । মসিনা কারবোন দাইওক্সাইদ তন ক্রোর ৪ থাদোকপা হন্থহল্লে ।

মরুপশিং, ভারতকী অপুনবা কৈ মশিং ২০০৬তগী শরুক অনিদা হেনগৎলে । হৌজিক ভারত্ত কৈ ২৯৭০ লৈরি । মালেমগী অপুনবা কৈ মশিং শরুক মরি থোকপগী অহুম ভারত্ত লৈরি । কৈ ফজনা লৈবা লৈবাকশিংগী মনুংদা ঐখোয়সু অমনি । ২০২২ ফাওবদা কৈ মশিং শরুক অনি হেনগৎহনবা হায়না মালেম্না য়ানরে । মসি ঐখোয়না মাংজৌন্না ফংবা ঙম্লে ।

২০১০দগী ২০১৫ ফাওবগী মনুংদা ভারতকী নোংশা মশিং চাদা ৩০ হেনগৎলে । ২০১০দা মশিং ৪১১ লৈখি । হৌজিক মশিং ৬০০ হেল্লে ।

মরুপশিং, ভারতকী উমংগী পাকচাউবা হেনগৎলকলি । ২০১৪দা ঙাকশেল্লিবা মফম ৬৯২ লৈখি । মসি ২০১৯দা মশিং ৮৬০দা হেনগৎখি । ২০১৪দা কম্মুনিতি রিজার্ব ৪৩ লৈখি । হৌজিক ১০০ হেন্না লৈরে । মসিনা মরম ওইদুনা অকোয়বগী ফিবম অমসুং লমলক্কী শা-উচেকশিং নুংশিজবশিং ভারত্ত চিংশিল্লি । নহাক্না মেন ভরসেস ৱাইল্ড য়েংলম্লগনি । মদুনা ভারত পাম্নবা হেনগৎহনখি ।

মরুপশিং, ঙসিদি ফজনা হিংবা, হকচাংগী খল্লগা চাবা, মখল কয়াগী শাজেলশিং চাংনাইনা শানবা অসি পাম্নরে । হায়রিবা হকশেলগী থবকশিং অসিগী অয়াম্বা শরুক ভারত্তগী হৌখিবনি হায়বা নহাক্না খঙলে । চহিচা কয়াগী মমাংদগী ভারতকী মুনিশিংনা য়োগা শানদুনা লাকখিঅমসুং মালেমদা অয়ুরবেদা খুদোল তমখি । য়োগনা হকচাং অমসুং ৱাখল ফহল্লি । আই এম এমগী মীওইশিং অসি য়াম্না হৈবা ঙাক্তনি অমসুং মখোয় অয়াম্বা থবক য়াম্না চিল্লি । থবক ফজনা পাংথোকপা অসিনা চাংনাইনা লাংতক্নবা পুরকই । নখোয় ময়াম্না য়োগা শান্নবা ঐনা হায়জরি । মসিনা নখোয়দা অফবা অহোংবা অমা পুরকপা ঙমগনি ।

মরুপশিং, লৈবাক অসিগী শিংথানিংঙাই ওইবা ৱাফম অমনা নুপীশিং ইকায়খুম্নবা অসিনি । চহি কয়া ভারতকী লুচিংবশিংনা নুপীশিংদা শক্তি পীদুনা লাকলি । ভারতকী ভক্তি সেন্তশিং কনানা কাউবা ঙমগনি ? রাজা রাম মোহন রোই অমসুং ঈশ্বর চন্দ্র বিদ্যা সাগরগী থৌদাংশিং কনানা কাউবা ঙমগনি ? মহাত্মা ফুলে অমসুং সাবিত্রি বাই ফুলেগী থবকশিং কনানা কাউবা ঙমগনি ?

নোংচুপ লোমগী লৈবাকশিংনা নুপীশিংদা ভোৎ থাদবগী হক ফংহনবদা চহি কয়া চংখিবা অদু ঐখোয়গী সমবিধান শেম্বশিংনা অহানবা নুমিৎতগী হৌনা নুপীশিং ভোৎ থাদবগী হক ফংহনখি ।

ঙসিদি, মুদ্রা লোন ফংলবশিংগী চাদা ৭০দি নুপীশিংনি । ঐখোয়গী আর্মদ ফোর্সশিংদা নুপীশিংনা চাউনা মতেং পাংলি । নুপী নেভি ওফিসার কাংবু অমা সমুদ্রদা মালেম অসি কোইখি । মদু পুৱারি অমনি ।

ঙসিদি ভারত্ত নুপী এম পি মশিং খ্বাইদগী য়াম্না লৈরে । ২০১৯গী লোক সভা মীখলশিংদা নু্পী চাং য়াম্না থোরকখি ।  মহাত্মা গান্ধীনা হায়রমখি :

“ ঐগী য়ুমগী ফক্লাংগী নাকল খুদিংমক অমসুং ঐগী থোঙনাওশিং খাজিনবা ঐনা পামদে । লম খুদিংমক্কী চৎনবীশিং ঐগী য়ুমদা হুমলকপা ঐনা পাম্মি । অদুবু করিগুম্বা অমনা ঐগী খোঙ হুমদোকখিবা ঐ পামদে ।“

ঐখোয়গী চৎনবগী চাউথোকচবা অমসুং চৎনবগী মনিংতম্বা অমসুং মসিনা নুংশিন্না লৈমিন্নবা অদু গান্ধীজিনা উৎলি ।

মরুপশিং,

মনিংতম্বা অমসুং তোঙান–তোঙানবা অনিংবশিং ইকায়খুম্নবা উৎপা মতমদা মহৌশানা অনৌবা থোরকই । ভারতমচাশিংগী অনৌবা পুথোকপগী থৌনা অসিনা ভারত অসি মালেম্না পুক্নিং চংশিল্লি । ঐখোয়গী লমদগী জিরোগী ৱাখল পোকখি, মসিনা মালেমগী ওইনা য়ানরবা ৱাফম্নি । মসিনা অঙ্ক তম্বদা অওনবা পুরকখি । ঐখোয়গী লৈবাক অসি নহারোল য়াম্না লৈবা অমনি । ঐখোয়গী মী মখল কয়া অসিনা শেন থাদনিংবা পোকহল্লি । ঙসিদি মী খুদিংমক ভারতকা লোয়নবা পাম্লে । চহি ২০গী মমাংদা লৈখিবা ঐখোয়গী সোফৱায়র ইন্দস্ত্রি অমসুং ঙসি লৈরিবা ঐখোয়গী স্তার্দ–অপশিং থবকশিং অসিনা ভারতকী নহারোলশিংগী শক্তি অদু উৎলে ।

মরুপশিং,

ঐখোয়না গ্লোবেলাইজেসন অমসুং ভারতকী ৱাখল্লোনগী মতাংদা ৱারি শানবা মতমদা মসিগী শীজিন্নফমগী খন্নবা অসি য়াম্না মরুওই । ভারতকী চৎনবী অমসুং সিস্তেমশিংদগী হৌরকপদা মী খুদিংমক চাউথোকচবা পোক্লি । ভারতনা চাউখৎপগী লম্বীদা মাংলোমদা চৎলি । নহাক্না মসি ভারতনা মী খুদিংমক শেন–থুমগী থবক্ত কোনশিনবগী লমদা মাইপাক্লিবা অসিদা উবা ফংগনি । ঐখোয়না মালেমদা খ্বাইদগী চাউবা অনা–লায়েংগী থবক লৌখৎলিবা অসিদা উবা ফংগনি । নৎত্রগা কমদৌনা ভারতনা চাকশঙ ক্রোর কয়া মৈখু থাংহন্দবগে হায়বা অসিদা উগনি । লায়রবশিংগী মনুংদগী খ্বাইদগী লায়রবশিংগী য়ুম মিল্লিয়ন কয়া শারে ।

ঐখোয়গী মীখলগী থবকশিং য়েংসি । ভোত্তর মিল্লিয়ন কয়া ইংনা ভোৎ থাদরি । মনুংহুঞ্জিনবা মফমশিংদা , ভোত্তর অমা খক্তগী পোল্লিং বুত থম্লি । মালেমগী ওইনা ভারতনা ফিবম ফগৎলকপদা কনাগুম্বা অমতনা অঙকপা পোক্তে ।

মরুপশিং, ভারতকী ৱাখল্লোনশিংনা মালেমদা মতেং কয়া পাংলি অমসুং অমুক্কা হেন্না মতেং পাংগনি । ঐখোয়না গ্রহ অসিনা থেংনরিবা খুদোংচাদবশিং কোকহন্নবা উপায় কয়া লৈবাক অসিনা পুথোকপা ঙম্লে ।

মী খুদিংমক নুংঙাইহনসি । মী খুদিংমক অনা–অয়েক লৈহল্লোইসি । মী খুদিংমক অফবা ওইহনসি । অৱাবা অমতা লৈহল্লোইসি ।

মফম অসিদা মী খুদিংমক হায়রিবা অসি ভারত অমসুং ভারতমচাশিং খক নত্তে ।

মসি মালেম পুম্নমক য়াওরি।

ভারতনা চাউখৎপা মতমদা মালেম চাউখৎলি হায়বা ভারতনা থাজবা থম্লি । মালেম্না নুংঙাইবা মতমদা ভারতনা মদুগী কান্নবা ফংলি । অসিগুম্বা সেমিনারশিংনা মীয়াম মরক্ত ভারতকী ৱাখল্লোনশিং পাম্নবা হেনগৎহনগনি ।

মসিগা লোয়ন্না ঐগী ৱারোল লোইশিঞ্জরে অমসুং আই এম এম কোচিকোদতা ঐগী য়াইফ–পাউজে পীজরি ।

থাগৎচরি !