ভারতকী প্রধানমন্ত্রী
অনৌবা ভারত, স্মার্ত ইন্দিয়াগী ৱারেপ্পু থবক ওইনা পাংথোক্নবা পুল্লরিবা নহারোল মরূপ পুম্নমকপু থাগৎপা ফোংদোকচরি।
ঐহাক্না তেক্নোলোজীগী খুত্থাংদা লেপ্পা লৈতনা ময়ামগা ৱারী শান্নরিবা অসি মসিনা অহুমলক শুবা তঞ্জানি। ২০১৭তা ঐখোয়না কেম্পেন অসি হৌদোকখিবা মতম অদুদগী মসি লেপ্পা লৈতনা চাউথোরক্লি।
মরূপশিং, স্মার্ত ইন্দিয়া হেক্কাথোন অসি জাতিগী থাক্তা পাংথোকপা খ্বাইদগী চাউবা ওপন ইনোবেসন মোদেল ওইরক্লি, মফম অসিদা প্লেৎফোর্ম অমখক্তদা মশিং য়াম্লবা ইন্দস্ত্রী, এজুকেস্নেল ইন্সতিত্যুৎশিং, গবর্নমেন্ত এজেন্সীশিং, প্রোফেস্নেলশিং অমসুং মহৈরোইশিংনা অমনা অমগা পুন্দুনা থবক তৌরি। মহৈরোই লিশিং ৩০গা লোয়ননা হৌখিবা হেক্কাথোন অসি ঙসিদি শরুক য়ারিবা মীশিং লাখ ২ ফাওবা য়ৌরে। ঙসি ঐহাক্না হায়জবা ঙম্লে মদুদি ঐখোয়না হোৎনরিবা অসি চুম্লে অমদি ঐখোয় অচুম্বা মায়কৈদা মাংলোমদা চংশিল্লি।
মরূপশিং, হৌজিক ফাওবদা পাংথোকখিবা হেক্কাথোন অনি অদুদা ইনোভেতিবকী ৱাখল্লোন কয়া অমা পুথোকখ্রে। হন্দক্কী অসিগী মমাংদদি শুপ্নতগী সরকারগা মরী লৈনবা, সরকারগী সংস্থানশিংগা মরী লৈনবা সমস্যাশিংবু হেক্কাথোন্দা শরুক য়াহল্লম্মি অদুবু হন্দক্তি ইন্দস্ত্রীনসু মখোয়গী প্রোব্লেমশিংবু অদোম ময়ামগী মাংদা থম্লি।
মসিনা ইনোভেতর অমগী মওংদা অদোম্বু মার্কেৎতা অহেনবা শক্তম ফংবসু ঙমহল্লগনি। মরূপশিং ঐখোয়গী ইকোনোমী অসি অনৌবা ত্রেক অমদা চেল্লি। অনৌবা ভারত অমা শেমগৎনবা ঐখোয় পুম্নমক্না হোৎনরিবা অসি ইনোভেসন অমসুং স্তার্ত-অপকী মালেমদা মাংজিল থানা চংশিল্লি।
গ্লোবেল ইনোভেসন ইন্দেক্সকী মতাংদা ঙসি ঐখোয় ৫৭শুবা মফমদা লৈরে, ২০১৪দা ঐখোয়গী মশিং ৮১ ওইরম্মি। হায়বদি চহী মরি অসিদা ঐখোয়না মফম ২৪ মথকলোমদা চোংখৎলে। মফম অসিদা ঐখোয় লেপথোক্তুনা লৈনীংবা ফাওদ্রি, অথুবা মতমদা ঐখোয় মকোক থোংবা ২৫গী মনুংদা য়ৌগদবনি। ঙসিদি ভারত মালেমগী অহুমশুবা অচৌবা স্তার্ত-অপ নেসন অমনি। হৌখিবা চহী ৩-৪ অসিদা স্তার্ত-অপ্স লিশিং ১৫ হেন্না শকখঙখ্রে। মসি শুপ্নতগী লৈবাক অসিগী চাউরবা শহরশিং খক্তদা নত্তনা চাউরাক্না লৈবাক অসিগী জিলা খুদিংমক্তা শন্দোক্লি।
মতৌ অসুম্না লৈবাক অসিগী তেক্নোলোজী বিজিনেস ইনক্যুবেতর্স চাউরাক্না চামা য়াঙ্খৈদা স্তার্ত-অপকী মশিং চহী অহুমগী মমাং ফাওবদা ১৬০০ ওইরম্বা অদু চহী অসিদা লিশিং ৩ ফাওবা য়ৌরে। হায়বদি শরুক অনি। মরূপশিং, ইনোভেসন অমসুং স্তার্ত-অপকীদমক মসিনা পোজিতিব ওইবা ফিভম অমা ওইরক্লিবা অসিগী তুংদা কন্না হোৎনবা কয়া অমা য়াওরি।
অতল ইনক্যুবেশন মিশনবুদি ময়াম পুম্নমক্না খঙবিরে। লৈবাক পুম্বগী স্কুল লিশিং ৫ হেনবদা অতল তিনকরিং লেবোরেতরীশিংনা ঙসিদি মথৌ তৌবা হৌরে, মফম অসিদা ক্লাস সিক্সকী মহৈরোইশিংনা ফ্যুচর তেক্নোলোজীগা হকথেংননা শম্নহল্লে।
মরূপশিং, স্মার্ত ইন্দিয়া হেক্কাথোনবু শুপ্নতগী চহীগী ওইবা এক্তিবিতী অমগুম য়েংবগী মহুত্তা লেপ্পা নায়দবা থৌওং অমগুম্না য়েংবা তাই। ইন্দস্ত্রী অমা হেক্তা নত্ত্রগা দিপার্তমেন্ত অমা হেক্তনা মখোয়গী সমস্যাশিং পোস্ত তৌবা ঙম্নবা, মদুদা মনা লাওথোকপা ঙম্নবা মসি চহী চুপ্পা পাংথোক্কদবনি।
ঐহাক্না অদোম ময়াম পুম্নমক্কী মফমদা, লৈবাক অসিগী নহারোল মরূপ অমমমগী মফমদা মপুং ফানা থাজবা থম্লি। অদোম ময়াম পুম্নমক অনৌবা ভারতকী অনৌবা থাজবগী য়ুমফম্নি।
