ভারতকী প্রধানমন্ত্রী

ঐহাক্কী নুংশিজরবা নহা ওইরিবা মরুপশিং,

লৈবাক অসিদা কুমহৈশিংগী মতম হৌখ্রে। নুংঙাইবা অসিগী মরক অসিদা, ঙসিগী নুমীৎ অসিনা ইমুং লিশিং কয়াগী পুন্সিদা অনৌবা নুংঙাইবা অমা পুরক্লে। ঙসি লৈবাক অসিগী নহা ৫১,০০০দগী হেনবদা লৈঙাক্কী থবক্কীদমক এপোইন্তমেন্ত লেতরশিং ফংলি। ঙসি অদোম্না য়ৌরিবা থাক অসি অদোমগী হোৎনজমন খক্তদগী নত্তে, মসি অদোমগী ইমা-ইপা অমসুং ইমুং-মনুংগী মীওইশিংগী হোৎনজমনসু য়াওরিবনি। ঐহাক্না নহা ওইরিবা মরুপ পুম্নমক অমসুং অদোমগী ইমুং-মনুংশিংদা য়াম্না নুংঙাইবা ফোংদোকচরি। পুন্সিগী অনৌবা খোংচৎ অসিগীদমক ময়াম পুম্নমক্তা য়াইফ-পাউজেল পীজরি।

মরুপশিং,

ঙসি ময়াম পুম্নমক্না লৈবাক অসিনা য়াম্না চাউবা পান্দম অমগী মাইকৈদা মাংলোমদা চংশিল্লিবা মতম অসিদা ভারত লৈঙাক্কা মরী লৈনরে, অমসুং পান্দম অসি ২০৪৭ ফাওবদা ভিক্সিত ভারত শেমগৎপনি। মসিদা নখোয়মগুম্বা নহাশিংগী য়াম্না চাউবা থৌদাং লৈরি। লৈঙাক্তা লৈরিঙৈ মনুংদা অদোম্না ভিক্সিত ভারতকী ঈহৌবু, আত্মনির্ভর ভারতকী ঈহৌবু লেপ্তনা মপাঙ্গল কনখৎহনগদবা ৱারেপ খুদিংমক লৌগদবনি। নহা অমা ওইবগী মরম্না অতৈ নহাশিংগী মতাংদা অদোমগী অখন্নবা থৌদাং লৈরি। ঙসি অদোম্না উরি, ঐখোয়গী নহাশিংগী মতিক-ময়াই অমসুং হৈ-শিংবনা মালেম পুম্বগী থাজবা ফংলে। মালেম্না ঐখোয়গী ইনোভেতরশিং, ঐখোয়গী এন্ত্রপ্রেনরশিং অমসুং ঐখোয়গী নহাশিংগী শক্তিদগী য়াম্না থাজবা থম্লি। নুমিৎ খরগী মমাংদা ব্রিক্স সম্মিত লোইশিনখ্রে। ব্রিক্সকী তেংবাংনবা অসি লৈঙাক খক্তদা অকক্নবা ওইহন্দনবা, ঐখোয়গী এন্ত্রপ্রেনরশিং, ঐখোয়গী লৌমীশিং, ঐখোয়গী নুপীশিং, ঐখোয়গী নহাশিং, মীওই খুদিংমক্না পার্তনরশিপ অসিগী থৱায় য়াওনা শরুক য়াগদবা অমনি হায়বসি ভারতকী খোঙথাং ওইরি। ৱাখল্লোন অসিগা লোয়ননা ব্রিক্স কনেক্ত অমসুং ব্রিক্স এম.এস.এম.ই. কোওপরেসন পোর্তেলসু হৌদোকখ্রে।

মরুপশিং,

ভারতনা হৌখিবা চহি খরা অসিদা লৈবাক ৪০ রোমগা লোয়ননা ফ্রী ত্রেদ এগ্রিমেন্তশিংসু তৌখ্রে। ফ্রী ত্রেদ এগ্রিমেন্তশিং অসিনা ঐখোয়গী নহাশিংগীদমক অনৌবা খুদোংচাবশিংগী থোং হাংদোক্লি। অসিগুম্বা ত্রেদ এগ্রিমেন্তশিং অসিনা ঐখোয়গী এন্ত্রপ্রেনরশিংগীদমক অনৌবা পার্তনরশিপশিংগী লম্বীশিং হাংদোক্লি, অনৌবা কৈথেলশিংগী লম্বীশিং হাংদোক্লি। অমসুং ঐখোয়গী নহাশিংগীদমক কেরিয়রদা অনৌবা খুদোংচাবশিং শেম্লি।

মরুপশিং,

হৌখিবা চহিশিংদা নহাশিংবু তুংলমচৎকীদমক শেম-শাবদা ভারত লৈঙাক্না লেপ্তনা মীৎয়েং থম্লি। নেস্নেল ইজুকেসন পোলিসী, স্কিল ইন্দিয়া মিসন, প্রধান মন্ত্রী কৌশল বিকাস য়োজনা নত্রগা এপ্রেন্তিসশিপ য়োকখৎনবগী খোঙথাংশিং। ঐখোয়গী পান্দমদি নহাশিংগী মহৈ-মশিং অমসুং মখোয়গী হৈ-শিংবশিংনা হোংলক্লিবা ইকোনোমীগী মথৌ তাবশিংগা লোয়ননা চৎমিন্নবা অসিনি। খুদম অমা ওইনা, পি.এম.-সেতু (PM-SETU) স্কীম অসিগী খুত্থাংদা লুপা করোর লিশিং ৬০ থাদরগা লৈঙাক্কী আই.তি.আই. লিশিং অমা মতমগা চুনবা মওংদা শেমগৎলি। মসিদা ইন্দস্ত্রীগী হকথেংনবা শরুক য়াবা শোইদ-ঙাম্দবা ওইহনখ্রে।

মরুপশিং,

ভারতকী নহাশিংগী মতিক-ময়াইগী অতোপ্পা মমি অমা ঐখোয়গী স্তার্তঅপ ইকোসীস্তেমদা উবা ফংলি। ভারতনা ঙসি মালেমগী অহুমশুবা খ্বাইদগী চাউবা স্তার্তঅপ ইকোসীস্তেম ওইরি। অমসুং ভারতকী স্তার্তঅপকী ৱারী অসি হৌজিক অচৌবা শহরশিং খক্তগী ৱারী নত্রে। ঙসিদি মশক খঙলবা স্তার্তঅপ তঙ্খায় রোম তিয়র-তু অমসুং তিয়র-থ্রী শহরশিংদা লৈরি। হায়বদি ঙসিদি খুঙ্গং, তাউন অমসুং অপিকপা শহরশিংগী নহাশিংনসু ভারতকী অনৌবা ইকোনোমীদা মখোয়গী চাউরবা থৌদাং লৌরি। অপিকপা শহরশিংগী ঐখোয়গী নহাশিংনা মখোয়গী ৱাখল্লোনশিংদা থবক তৌরি, অনৌবা কম্পেনীশিং শেম্লি, অমসুং মখোয়গা লোয়ননা অতৈ নহাশিংগীদমক থবক্কী অনৌবা খুদোংচাবশিংসু শেমগৎলি।

মরুপশিং,

প্রাইভেত সেক্তরদসু থবক্কী অনৌবা খুদোংচাবশিং য়াম্না থুনা পাকথোক-চাউথোকপা অসি ঐখোয়গী পান্দমনি। ৱাখল্লোন অসিগা লোয়ননা প্রধান মন্ত্রী ভিক্সিত ভারত রোজগার য়োজনা হৌদোকখ্রে। স্কীম অসিদা লুপা করোর লাখ অমা রোম চাদিং তৌরি। স্কীম অসিগী মতেংনা নহা করোর অনি রোম্না অহানবা ওইনা ৱার্কফোর্সকী শরুক অমা ওইবগী খুদোংচাবা ফংগনি। লৈঙাক্না স্কীম অসিগী মখাদা অহানবা ওইনা থবক ফংবা নহাশিংদা লুপা লিশিং ১৫ ফাওবগী ইন্সেন্তিবসু পীরি। অনৌবা থবক শেমগৎপা এমপ্লোয়রশিংদসু লৈঙাক্না পুক্নিং থৌগৎলি। হায়বদি লৈবাক অসিদা থবক ফংহনবা হেনগৎহন্নবা লৈঙাক্না মাইকৈ খুদিংমক্তা থবক তৌরি।

মরুপশিং,

নহাশিংগীদমক অনৌবা খুদোংচাবশিং অদু লৈবাক্কী ইকোনোমীনা মাংলোমদা চংশিল্লকপা মতমদা, ইনভেস্তমেন্ত হেনগৎলকপা মতমদা, অনৌবা ইন্দস্ত্রীশিং লিংখৎলকপা মতমদা অমসুং অনৌবা সেক্তরশিং পাকথোক-চাউথোক্লকপা মতমদতা শেমগৎলি। ঙসি ভারত অসি য়াম্না থুনা চাউখৎলক্লিবা অচৌবা ইকোনোমী অমনি। ফাইনান্সিয়েল চহি অসিগী অহানবা ক্বাতরদা ভারতকী গ্রোথ রেত চাদা ৭.৮ ওইখি। ইনভেস্তমেন্ততা চাদা ১২ রোম হেনগৎখ্রে। রেতিং এজেন্সীশিংনা ভারতকী রেতিং ফগৎহল্লি। অমসুং খুমাং চাউশিনবা অসিসু মালেম অসিদা তংদাংবা লৈতবা ফীভম কয়া অমগী মনুংদা লৈরিবা মতম অসিদা ফংবা ঙম্লি। ভারতকী গ্রোথ অসিগী মখাদা হৌখিবা চহিশিংগী রিফোর্মশিংগী অচৌবা থৌদাং লৈরি। অদোম্না অদোমগী থবক্কী মতমদা রিফোর্মশিংবু লেপ্তনা য়াংখৎহনগদবনি। তেক্স অমসুং কমপ্লাইয়েন্স লাইথোকহনবা ওইরবসু, ইজ ওফ দুয়িং বিজিনেস হেনগৎহনবা ওইরবসু, ইজুকেসন অমসুং স্কিলিংদা রিফোর্ম তৌবা ওইরবসু, নত্রগা অনৌবা সেক্তরশিংবু ইনোভেসনগীদমক হাংদোকপা ওইরবসু নত্রগা ইজ ওফ লিভিংগী ৱাফম ওইরবসু, থাক খুদিংমক্তা লৈবাক অসিদা রিফোর্ম এক্সপ্রেস অসি লেপ্তনা মপুং ফানা য়াংনা চেলহনবা মথৌ তাই। অমসুং লৈঙাক্কী থৌমী অমা ওইবগী মরম্না হৌজিক অমসুং লাক্কদৌরিবা চহিশিংদা মসিদা অদোম পুম্নমক্কী য়াম্না চাউবা থৌদাং লৈগনি।

মরুপশিং,

ঐহাক্না নুমিৎ খরা মমাংদা হায়খি, নুমিৎ ঐখোয়গী ওইসনু, সমুদ্রসু ঐখোয়গী ওইসনু। নুমিৎ ঐখোয়গী ওইসনু, সমুদ্রসু ঐখোয়গী ওইসনু। হি ঐখোয়গী ওইসনু, হি ঐখোয়গী ওইসনু, হিহোনবাসু ঐখোয়গী ওইসনু। ইথকশিংদা মাইপাকপা ইশি, ইথকশিংদা মাইপাকপা ইশি, থৌনাবু ঐখোয়গী ওইসনু। ঙসি ভারতকী নহাশিংনা থৌনা অসিগা লোয়ননা মাংলোমদা চংশিল্লি। হৌজিক অদোম পুম্নমক্না ভারত লৈঙাক্তা লৈরিঙৈ মনুংদা লৈবাক্কী নহাশিংগী মঙলানশিং খঙলদুনা অদোমগী থবক্তা মপুং ফানা শিনগদবা অসি অদোমগী থৌদাংনি। ঐহাক্না অমুক হন্না তকশিনজরি, অদোমগী ৱারেপ খুদিংমক, ফাইল খুদিংমক্তা তৌখিবা খুয়েক অদু নহাশিংগী মঙলানশিংবু মাংলোমদা পুখৎপা অমা ওইগদবনি। অদোম্না অদোমগী থবক্কী মতমদা নহাশিংগী লম্বীগী অপনবা অদু লৌথোক্নবা, মখোয়গী ৱাখল্লোনশিং মাংলোমদা পুখৎনবগী খুদোংচাবা ফংনবা, ইনোভেসন্দগী ইনভেস্তমেন্ত হেনগৎনবা অমসুং ইনভেস্তমেন্ততগী ইমপ্লোইমেন্তকী অনৌবা খুদোংচাবশিং শেমগৎনবা য়েংগদবনি।

মরুপশিং,

হৌজিক অদোম মশামক লৈঙাক্কী পথাপ অসিগী শরুক অমা ওইরে। মরম অদুনা অদোম্না মায়োক্নখিবা অৱাবশিং নত্রগা অদোমগী ‌ইমা-ইপানা মায়োক্নখিবা অৱাবশিং অদু অতোপ্পা নহাশিংদা মায়োক্নহন্দনবা অদোম্না হোৎনগদবনি। অদোমগী ইমা-ইপানা নংখিবা অৱাবশিং, অদোম্না কৈদৌঙৈদবা নংখিবা অৱাবশিং অদু হৌজিক ঐখোয়গী লৈবাক্কী মীয়াম অমত্তদা নংহন্দনবা, থবক অসি অদোম্না লৈঙাক্কী পথাপতা লাকপগা তৌগদবনি।

মরুপশিং,

ঙসি লৈবাক অসিদা, লম খুদিংমক্তা য়াম্না থুনা অহোংবা লাক্লি। অদোম্না লেপ্তনা তমজদুনা, মফম অসিদা য়ৌরক্লি, হৌজিক মফম অসিদগী লেপ্তনা তমজবগী অনৌবা খোঙচৎ অমা হৌরে। অদোম্না অদোমগী স্কিলশিংবু লেপ্তনা ফগৎহনগদবনি। অনৌবা তেক্নোলোজী অমসুং অনৌবা সীস্তেমশিং খঙগদবনি। মিসন কর্ময়োগিনা পান্দম অসি ফংবদা অদোমদা মতেং পাংই। ঙসি আই.গোত কর্ময়োগী প্লেতফোর্মদা লৈঙাক্কী থৌমী করোর ১ লাখ ৭০ দগী হেন্না য়াওখ্রে। অমসুং অদোমগুম্বা অনৌবা মরুপশিংগীদমক কর্ময়োগী প্রারম্ভ অসি অখন্ননা শেমখিবনি। নহাক্না নহাকপু হেন্না ফগৎহনবগা লোয়ননা, নহাক্না লৈবাক অসিগী নাগরিকশিংদা হেন্না ফজনা সেবা পীবা ঙমগনি।

মরুপশিং,

অদোম্না অতোপ্পা ৱাফম অমা মতম পুম্নমক্তা নিংশিংগদবনি। লৈঙাক্কী অশেংবা শক্তি অসি লৈবাক্কী মীয়ামগী থাজবনি। অদোম্না মন্ত্রালয় অমহেক্তদা ওইরবসু, দিপার্তমেন্ত অমহেক্তদা ওইরবসু, অদোমগী থবক্না মওং অমদা নত্রগা অমদা লৈবাক্কী চাউখৎলবা মীয়ামগী পুন্সিদা শোক্কনি। অহল অমগী পেন্সন অদোমগী থবক্তগী মাংলোমদা চংশিনগনি। মহৈরোই অমগী স্কোলরশিপ অদোমগী থৌদাংগা মরী লৈনগনি। লৌমী অমনা ফংলিবা খুদোংচাবা অদু অদোমগী দিপার্তমেন্ততগী লাকপা ওইগনি। মীয়াম অমগীদমক্তদি অদোম্না লৈঙাক্কী মশক ওইবা য়াই। অদোমগী লমচৎ, অদোমগী য়েংশিনবা, অদোমগী ইফিসিয়েন্সী, অদোমগী অনেস্তী, মসি পুম্নমক্না মীয়াম অদুগী লৈঙাক্কা লৈনবা এক্সপিরিয়েন্স করম্না লৈবগে হায়বা লেপকনি।

মরম অদুনা মরুপশিং,

লৈঙাক্কী সেবাদা ঐখোয়গী মন্ত্রদি – নাগরিক দেবো ভব, নাগরিক দেবো ভব ওইগদবনি। মীয়ামগী সেবা, লৈবাক্কী সেবানি। অদোমগী থবক্না মীয়াম অমগী পুন্সি লাইথোকহল্লকপা মতমদা অদোমগী মাইপাকপা অদু হেন্না চাউগনি। ঐহাক্না থাজৈ, অদোম্না মফম অমহেক্তদা লৈরবসু, দিপার্তমেন্ত অমহেক্তদা লৈরবসু, থৌদাং অমসুং সেবাগী ৱাখল্লোনগা লোয়ননা অদোমগী থৌদাং পাংথোক্কনি। ঐহাক্না অমুক হন্না ময়াম পুম্নমকপু নুংঙাইবা ফোংদোকচরি।

য়াম্না থাগৎচরি।

*****