ভারতকী প্রধানমন্ত্রী

এক্সিলেন্সী, প্রধান মন্ত্রী দোক্তর লোতে শেরিংগ,

ভুতানদগী মফম অসিদা লেংবিরক্লিবা শক্নাইরবা মীথুংলেন পুম্নমক,

মরূপশিং,

চহি অসি ভারত অমসুং ভুতানগী রাজনিতীগী ওইবা মরীশিংগী গোল্দন জুব্লিগী চহিনি। অসিগুম্লবা পুৱারি ওইরবা অমদি য়াইফরবা চহি অসিদা, প্রধান মন্ত্রী দোক্তর লোতেবু ভারত্তা তরাম্না ওকচবা অসি ঐহাক্কী ওইনা নুঙাইবা ৱাফমনি। ভুতানদা চহি অসিদা অহুমশুবা মীখল মায় পাক্না পাংথোকখিবগীদমক ভুতান সরকার অমসুং ভুতানগী প্রজা মীয়াম, অনিমকপু ঐহাক্না থমোয় শেংনা ইকায় খুম্নজরি। মীখলশিং অদুদা মায় পাক্লকপগীদমক প্রধান মন্ত্রী দোক্তর লোতেবু ঐহাক্কী মায়কৈদগী হন্না হন্না নুঙাইবা অমসুং য়াইফা মঙ্গোল পীজরি। মহাক্কী লুচিং মখাদা ভুতান অসি মায় পাকপা অমসুং হরাও তয়াম্বগী লম্বীদা কুমাং চাওশিনগনি হায়না ঐহাক্না থাজবা থম্লি।

মরূপশিং,

প্রধান মন্ত্রী দোক্তর লোতেনা ভুতানগীদমক মহাক্কী “নেরোয়িং দি গেপ” ভিজনগী মতাংদা ইফমদা শন্দোক্না খংহনবিরে। ঐহাক্না মহাক্কী অশানবা মীৎয়েং অদু পুক্নিং থৌগৎলি, মহাক্কী মীৎয়েং অদুনা ঐহাক্কী “সবকা সাথ, সবকা বিকাস”কী ওইবা মীৎয়েং অদুগা মানবা মওং মতৌ অদুদা ঐহাক নুঙাইবা ফাওই। ঐহাক্না প্রধান মন্ত্রীদা থাজবা পীখি মদুদি ভুতানগী চাওখৎ থৌরমদা ভারতনা মমাংঙৈগী মতৌগুম্না থাজনিঙাই ওইবা মরূপ অমসুং খোংলোই ওইগনি। ভুতানগী ১২শুবা চহি মঙাগী প্লানদা ভারতনা লুপা কোতি লিশিং মরিগা চামঙাগী মতেং পীরগনি। মতেং অসিনা ভুতানগী চংদবা য়াদবা অমসুং মরুওইবশিং মেনশিল্লগনি।

মরূপশিং,

ভারত অমসুং ভুতানগী মতেং পীনবগী শাংলবা পুৱারিদা হাইদ্রো প্রোজেক্তশিংদা মতেং পীনবা অসি মরুওইবা শরুক অমা ওইরি। ঙসি ঐখোয়না মসিগী মরুওইবা সেক্তরদা মরী লৈনবা প্রোজেক্তশিংদা ঐখোয়গী তেংবাং নৌহৌনা য়েংশিনখি। মসি হরাওনিঙাই ৱাফম্নি মদুদি মানগ–দেছু প্রোজেক্ত অথুবা মতমদা লোইশিল্লক্কদৌরে। প্রোজেক্ত অসিগী তারিফতশু য়ানবা পুরকখ্রে। অতোপ্পা প্রোজেক্তশিংদসু খুমাং চাওশিন্না থবক পায়খৎলি। অমদি ঐখোয় অনিনা প্রোজেক্তশিং অসিবু হেন্না খোংজেল য়াংহনবা পাম্লি। ঐখোয়গী তেংবাংদা অনৌবা অমনা স্পেস সাইন্সনি। ঐহাক্না নুঙাইবা ফাওই মদুদি সাউথ এসিয়ান সেতেলাইত্তগী কানবা লৌনবা ইসরোনা ভুতানদা শেমগৎলিবা গ্রাউন্দ–স্তেসন অদুসু অথুবা মতমদা মথৌ পাংথোক্লগনি। প্রোজেক্ত অসি মথৌ পাংথোক্লগদি ভুতানগী অথাপ্পা মফমশিংদশু নোংজু নুংশাগী ফিভম, তেলে–মেদিসিন অমসুং দিজাস্তর রিলিফকুম্বা থবকশিংদা মতেং ওইরগনি।   

মরূপশিং,

ঙসি প্রধান মন্ত্রী দোক্তর লোতেনা ইফমদা নুঙাইবা ৱাফম অমসু খংহনবিরে। ভুতান সরকারনা অথুবা মতমদা রুপে কার্দস হৌদোক্নবা ৱারেপ লৌরে। এক্সেলেন্সী, ৱারেপ অসিগীদমক ঐহাক্না অদোম্বু থমোয় শেংনা অপেনবা ফোংদোকচরি। ঐহাক্না থাজবা থম্লি মদুদি মসিনা লৈবাক অনিগী মরক্তা মীয়ামগী ওইবা মরীশিংদা অহেনবা থৌনা ফংলগনি।

এক্সেলেন্সী,

অদোম্না অদোমগী অহানবা মপাল লৈবাক্কী খোংচৎকীদমক ভারতপু খনবিরে। অমদি, চহী মরিগী মমাংদা, প্রধান মন্ত্রী ওইনা ঐহাক্কী অহানবা মপাল  লৈবাক্কী খোংচৎ অদু ভুতান ওইখি। ঐহাক্না থাজবা থম্লি মদুদি অদোমগী অসিগুম্লবা ভারত খোংচৎ অসিনা ঐখোয়গী মরীশিংদা অনৌবা ইনোৎ অমা পীবদা মহৈ য়াল্লগনি। ৱাফম অসিগা লোয়ননা ঐহাক্না অমুক হন্না অদোম অমসুং অদোমগী খোংলোইবু ভারত্তা থমোয় শেংনা তরাম্না ওকচরি।

থাগৎচরি।

তাশী দেলেগ!