ভারতকী প্রধানমন্ত্রী

ফম্বাকথক্তা লেংশিনবীরিবা মহারাস্ত্রগী রাজ্যপাল শ্রীমান বিদ্ধ সাগর, মুখ্য মন্ত্রী শ্রী দেবেন্দ্র, মন্ত্রীমন্দলদা ঐহাক্কী মরূপ নীতিন, দাক্তর সুভাশ ভামরে, রাজ্য সরকারদা মন্ত্রী ওইবীরিবা গীরিশ মহাজন, জয় কুমার রাৱল, ফম্বাকথক্তা লেংশিংনবীরিবা অতোপ্পা শক্নাইরবশিং অমসুং মফম অসিদা মশিং য়াম্না ঐহাকপু থৌজাল পীবীনবা লেংবীরক্লিবা ঐহাক্কী নুংশিজরবা ইচিল–ইনাও অমসুং ইচে–ইচলশিং, অসুক শাখ্রবা অসিদা পুং অনি–অনি, অহুম–অহুমদগী ময়াম্না মফম অসিদা লাক্তুনা ফম্লি হায়বা ইফমদা তাকপীররে। ময়ামগী অসিগুম্লবা তপস্যা অসিবু ঐহাক্না খুরুমজরি।

মরূপশিং, ঙসি পুলৱামাদা ঐখোয়গী জৱানশিংদা চত্থরকপা তেরর এতেক্না মরম ওইদুনা লৈবাক অসিনা খইদৌ থিৎনা শাওরিবা অসিগুম্লবা তঞ্জা অমদা ঐহাক্না ময়ামগী মরক্তা লাকচরি। নাকল অমরোমদা লৈবাক অসি শাওদুনা লৈরি অদুগা নাকল অমদনা মীৎলুদা পীরাং শিন্থরি। মহারাস্ত্রনসু মপারী কায়নরি। খানদেশকী লৈপাক লৈহাওদগী লৈবাক অসিগী থৌনা ফরবা মচাশিংবু অমদি মখোয়বু পোকপীরিবা ইমা পুম্নমকপু ঐহাক্না ইকোক নোন্দুনা খুরুমজরি।

মরূপশিং, ঐখোয়গী অথৌবশিংনা, ঐখোয়গী জৱানশিংনা মতম পুম্নমক্তা লৈবাক অসিগীদমক মশাগী ওইজবা থিদনা থৌদাং পাংথোক্লি। মখোয় করিগুম্বা অমত্তা হায়বা তৌদনা মশাগী মথৌদাং পাংথোক্লি। লৈবাক অমা ওইবনা ঐখোয়গী ইথৌ মসিদগী হৌরে। মশাগী ওইজবা থাদোক্লবা মখোয়শিং অদুগী ইমুং মনুংগা লোয়ননা ঐখোয়না মতম পুম্নমক্তা লেপতুনা লৈগনি। সরকারগী লৈবাক ঙাক্লোনগী ওইনদি মসি মথৌনি, অদুবু নাগরিক অমা ওইনসু ঐখোয়গী চাউরবা ইথৌদাংনি।

মরূপশিং, মসি অৱাবা, নুংঙাইতবা মতমনি, অদুবু ইমুং খুদিংদা ঐহাক্না থাজবা পীরি, মখোয়গী নুংশিজরবশিংবু মাংজরিবা ইমুং মনুংশিং, অদোমগী মীৎতা শিন্থরিবা পিরাং, পীরাংশিং অদুগী মতিক চাবা লমন খুমখিগনি। ভারত অনৌবা থৌওং অমসুং অনৌবা পোলিসীগী লমদম্নি। হৌজিক মসি মালেম অসিনসু খঙলগনি।

ইচিল–ইনাও অমসুং ইচে–ইচলশিং, লৈবাক্কী সেক্যুরিতী ওইগেরা নত্ত্রগা লৈবাক অসিগী মীচম মীয়ামগী পুন্সি মহিং লায়থোকহন্নবা হোৎনবা ওইগেরা। সরকারনা লেপ্পা লৈতনা মশাগী মথৌ তৌরি। ঙসি ধুলেগী চাউখৎ থৌরাংগা মরী লৈনবা কোতি লিশিং কয়াগী প্রোজেক্তশিং শঙ্গাবা অমসুং উরেপ উয়ুং তম্বগী থৌরম পাংথোকখ্রে। ধুলে শহরদা ঈশিং অমসুং সিৱেজগা মরী লৈনবা প্রোজেক্তশিং ওইগেরা, লৌমীশিংগীদমক ইথৈ লৌখোংগা মরী লৈনবা প্রোজেক্তশিং ওইগেরা নত্ত্রগা ধুলেগী কনেক্তিবিতীগা মরী লৈনবা প্রোজেক্ত ওইগেরা, ঐহাক্না ময়াম পুম্নমকপু প্রোজেক্তশিং অসিগীদমক হন্না–হন্না নুংঙাইবা ফোংদোকচরি।

ইচিল–ইনাও অমসুং ইচে–ইচলশিং, ধুলেগা নক্ননা লৈবাক অসিগী য়াম্না মরুওইবা ইন্দস্ত্রীগী শহর অমা শেমগৎপগী ওইথোকপা চাউনা লৈরি। মফম অসিদগী লৈবাক অসিগী তোঙান তোঙানবা শহরশিংদা ললোন ইতিক্কী ওইথোকপা য়াম্না য়াবা লমদম অমা ওইরি। মফম অসিদগী চাউর–চাউরগা নেস্নেল হাইৱে কয়া ফাওদুনা চৎলি। ঙসি অসিগুম্বা কনেক্তিবিতী অসি হেঙ্গৎহন্নবা অনৌবা রেল লাইন অনিগী উরেপ উয়ুং তমখ্রে। রেল লাইন অমা চাউথোকহনবা অমসুং ইলেক্ত্রিফিকেসনগী থবকসু মপুং ফানা পায়খৎপা লোয়রে। মসিগী মথক্তা অনৌবা ত্রেন অহুম অমসু ঙসি লমথাখ্রে।

মরূপশিং, ঙসি ধুলেদগী নরদানাবু শম্নহনগদবা রেলৱে লাইনগী অহানবা ফেজকী থবক হৌরে। তুংদা লাইন অসিনা মনৱারবু ইন্দোরগা শম্নহনবদা মতেং ওইরগনি। মসিগী প্রোজেক্ত অপুনবা অসিদা চাউরাক্না লুপা কোতি লিশিং মাপল চাদিং তৌরবা য়াই হায়না পানরি। মানৱার ইন্দোর রেললাইন শেম্লবা মতুংদা মসিগী কান্নবা ইন্দোর অমসুং মুম্বাইগা লোয়ননা ভারত পুম্বনা ফংলগনি।

মরূপশিং, মসিগী মথক্তা ঙসি মনৱারবু জলগাওগা শম্নহনগদবা অনৌবা রেল লাইনগীসু উরেপ উয়ুং তমখ্রে। মসি মপুং ফানা লোইরবা মতমদা মীয়ামদা কান্নবদি ফংহনবতা নত্তনা নহাশিংগীদমক থবক ফংনবগী অনৌবা তঞ্জা অমসু ফংলগনি।

মরূপশিং, চাউরাক্না চহী তরাগী মমাংদা উধনা জলগাও রেল লাইন পাকথোকহনবগী ফাইলদা থবক হৌখি। মদু হৌজিক্তা মপুং ফানা পায়খৎপা ঙম্লি। লাইন অসি দবলিংগী থবক মপুং ফানা পায়খৎলে লোয়ননা ইলেক্ত্রিফিকেসনগী থবকসু পায়খৎপা লোইরে। ঙসি লাইন অসি জাতিগী মফমদা কত্থোকচখ্রে।

মরূপশিং, রুৎ অসিনা অহানবা কান্নহল্লিবদি অদোম্না ঙসি উধনা–নন্দুরবার অমসুং উধনা–পালসীদা অনৌবা রেল অনি ফংলে। ত্রেন অনিমক ঙাইহাক্কী মমাংদা লমথাদুনা চেনবা হৌখ্রে। তঞ্জা অসিদা উধনাদগীসু ঐখোয়গী মরূপশিং তেক্নোলোজীগী থোংদা ঐখোয়গা শম্নরি।

ঐহাক্না ধুলেদগী মফম অদুদা লৈরিবা ঐখোয়গী মরূপশিংগী মফমদসু হন্না–হন্না নুংঙাইবা ফোংদোকচরি, মফম অদুদসু মতৌ অসুম্না মী য়াম্না তিল্লি। মফম অদুদা ঐখোয়গী রেল রাজ্য মন্ত্রীসু শরুক য়ারি। শ্রীমান রাজেন গোহাই জী, মরূপশিং, মসিগী মথক্তা ভাসাবলদগী বান্দ্রাফাওবা চেনগদবা খানদেশ এক্সপ্রেস ত্রেন্না মুম্বাই অমসুং সুরতপু ধুলেগা কনেক্তিবিতী হেঙ্গৎহল্লগনি।

ইচিল–ইনাও অমসুং ইচে–ইচলশিং, মফম অসিগী য়াম্না মরুওইবা হিরম অমনি– ঈশিং, তাপী তুরেলগী ইচেলনা ফাওদুনা চৎলিবা লমদম ধুলেনা মতম কয়াদগী ঈশিংগীদমক ইখৌ লাংদুনা লাক্লি। থক্নবা ঈশিং অমসুং ইথৈ–লৌখোংগীদমক ঈশিং, মায়োক্নরিবা অনিমক কোকহন্নবগীদমক ঙসি য়াম্না চাউনা হোৎনরি। অখন্ননা ধুলে শহরদা থক্নবা ঈশিংগী সমস্যাবু কোকহনন্নবা কেন্দ্র সরকারনা অমরুৎ স্কিমগী মখাদা প্রোজেক্ত অমা হৌদোক্লে। মসিগী মথক্তা মফম অসিদা শেমগৎকদৌরিবা সিৱেজ সিস্তেম অসিনসু শহর অসিবু লু–নান্না থম্বদা মতেং ওইরগনি।

ইচিল–ইনাও অমসুং ইচে–ইচলশিং, ধুলে য়াওনা মহারাস্ত্রা অমসুং লৈবাক অসিগী মফম কয়াদা ইথৈ–লৌখোংগী ফিভম ফগৎহন্নবা প্রধান মন্ত্রী কৃশি সিঞ্চাই য়োজনা শেম্লে। স্কিম অসিগী মখাদা মতম কয়াদগী পন্দুনা লৈরক্লবা ইরিগেসন প্রোজেক্ত ৯৯দা থবক পায়খৎলি। মদুগী মনুংদা প্রোজেক্ত ২৬তি মহারাস্ত্রা খক্তদগীনি।

ইচিল–ইনাও অমসুং ইচে–ইচলশিং, ঙসি শঙ্গাখিবা লৱর পঞ্জারা সিঞ্চাই প্রোজেক্ত অসি অদুগুম্লবা প্রোজেক্ত ২৬ অদুগী মনুংদা অমনি। চহী ৩৫গী মমাংদা মসিদা থবক হৌখি অমদি মতম অদুদা মসি লুপা কোতি ২১দা পায়খৎপা লোয়রমগদবনি। ঙসিদি মসি লুপা কোতি চামঙা য়াঙ্খৈ হেন্না চাদিং তৌদুনা মপুং ফানা পায়খৎপা লোইরে।

মরূপশিং, মহারাস্ত্রদা ঈশিংগী অৱাৎপা অমদি মসিনা থোকহল্লিবা ইকংগী অৱাবা কোকহন্নবগীদমক কেন্দ্র সরকারনা হোৎনবা য়াবা পুম্নমক হোৎনরি। মরাথৱারা, বীর অমসুং মহারাস্ত্রগী অতোপ্পা অকংবা মফমশিংগীদমক ইথৈ লৌখোংগী প্রোজেক্ত ৯১সু অখন্ননা অয়াবা পীখ্রে। চাউরাক্না লুপা কোতি লিশিং ১৪গী প্রোজেক্তশিং অসি অপীবা মতমগী মনুংদা মপুংফানা লোইশিন্নবগীদমক সরকারনা হোৎনরি। মসিগী প্রোজেক্তশিং অসি মপুং ফানা পায়খৎলবা মতমদা মসিনা হেক্তর লাখ মরি হেনবা লৌফমদা ইথৈ লৌখোংগী খুদোংচাবা ফংহল্লগনি।

মরূপশিং, লৌমীশিংবু ইথৈ–লৌখোংনা শম্নহনবা ওইগেরা মদু নত্ত্রগা ইকং অমসুং ইচাউনা মরম ওইদুনা মাংহন তাকহনবদগী কন্ননবা কেন্দ্র সরকারনা পুকচেল শেংনা লৌমীগী য়াইফনবা থবক তৌরি।

ইচিল–ইনাও অমসুং ইচে–ইচলশিং, লৌমীশিং অমসুং শা–শন লোইবশিংবু চাউখৎহন্নবা হন্দক্কী বজেৎতা কেন্দ্র সরকারনা অচৌবা স্কিমশিং লাওথোকখ্রে। প্রধান মন্ত্রী কিসান সম্মান নিধিনা একর মঙাদগী তানা লৌ লৈবা লৌমীশিংগী বেঙ্ক একাউন্তদা চহী খুদিংগী কেন্দ্র সরকারনা লুপা লিশিং তরুক হাপচিনগনি। মসিনা ঐখোয়গী লৌমীশিংনা মতম চানা হার লৈবা, মরু–মরাং লৈবা, তিন হিদাক লৈবদা মতেং ওইরগনি। মখোয়না শেন্দোয় চাবশিংদগী শেন্দোয় থিদুনা পৈশা লৌবগী মথৌ তাররোই।

মরূপশিং, স্কিম অসিগী মখাদা মথংগী চহী তরাদা লৌমীশিংগী একাউন্তশিংদা লুপা কোতি লাখ তরেৎ মখায় দিপোজিৎ তৌরগনি। মসিগী মথক্তা মসিমসু ৱারেপ লৌরে মদুদি শা–শন লোইবশিংসু হৌজিক্তি কিশান ক্রেদিৎ কার্দ শিজিন্নদুনা লোন লৌবগী খুদোংচাবা ফংলগনি।

মরূপশিং, ঙসি মীয়াম তিল্লিবা মফম অসি গৌমাতামক্কী মফম্নি। অফাওবা ফ্রীদম ফাইতর রামেশ্বরম প্রসাদনা একর ১৪গী ওইবা মশাগী লম শনগী সেবাগীদমক কত্থোকখি। ধুলেগী অসিগুম্লবা ত্রেদিসন অসি হৌজিক্তি অহেনবা শক্তি ফংলগনি। কেন্দ্র সরকারনা হন্দক্কী বজেৎতা কামধেনু আয়োগ শেম্নবা ৱারেপ লৌরে।

মরূপশিং, খুঙ্গং ওইগেরা, লায়রবা ওইগেরা নত্ত্রগা ঐখোয়গী ত্রাইবেলশিং ওইগেরা কেন্দ্রগী সরকার অমসুং মহারাস্ত্রগী সরকারনা লেপ্তনা থবক তৌরি। সবকা সাথ সবকা বিকাসকী ৱাফম অদু থবক ওইনা পাংথোক্নবা হোৎনরি। মালেম অসিগী খ্বাইদগী চাউবা হেল্থ স্কিম, আয়ুশ্মান ভারত য়োজনানা মহারাস্ত্রগী লায়রবা, শোত্থরবা অমসুং ত্রাইবেল ইমুং মনুংশিংদা চাউনা কান্নবা ফংহল্লে। মসিগী মখাদা হৌজিক ফাওবদা লৈবাক অসিদা লায়রবা অনাবা লাখ ১২ হেনববু লেম্না লায়েংবা ফংহনখ্রে। মদুগী মনুংদা মহারাস্ত্রগী লিশিং ৭০ হেনবা অমসুং ধুলেগী চাউরাক্না অনাবা ১৮০০না মসিগী কান্নবা ফংখ্রে।

চহী খুদিংগী লুপা লাখ ৫ ফাওবা লেম্না লায়েংবা ফংহনগদবা স্কিম অসিনা লায়রবা, শোত্থরবা, ত্রাইবেল ইমুংশিংদা অনৌবা আশা অমা ফাওরে। হৌজিক ফম্বাকথক অসিদা লাকত্রিঙৈ মমাংদা ঐহাক্না আয়ুশ্মান ভারত য়োজনাগী কান্নবা ফংলবশিংগী মরক্তগী খরগা উনদুনা ৱারী শানবগী খুদোংচাবা অদু ঐহাক্না ফংজখি। মমাংদা মতৌ করম্না লায়েংবগী চাদিংগী খল্লুরগা লায়েংদবা, অনাবা খাংখিবা, শিবা ঙাইখিবা। অদুবু মখোয়না আয়ুশ্মান ভারত য়োজনাগী মতাংদা হেক খঙবগা, মখোয়না মদুগী কান্নবা লৌরে।

ইচিল–ইনাও অমসুং ইচে–ইচলশিং, ঐহাক্না অমুক হন্না ময়াম পুম্নমকপু চাউখৎ–থৌরাংগী প্রোজেক্তশিং অসিগীদমক হন্না–হন্না য়াইফ পাওজেল পীজবগা লোয়ননা ঐহাক্না ঐহাক্কী ৱাফম লোইশিনজরি।

অদোম্না খুৎ অনিমক খুৎতুম তাশিন্দুনা অহৌবা খোংজেলগা লোয়ননা ঐহাক্কা লাওমিন্নরসি

ভারত ইমানা য়াইফরে

খোংজেল অসি খানদেশকী মফম পুম্নমক্তা তানবা লাওরসি

ভারত ইমানা য়াইফরে

ভারত ইমানা য়াইফরে

ভারত ইমানা য়াইফরে

হন্না–হন্না থাগৎচরি।