ভারতকী প্রধানমন্ত্রী

রিপব্লিক ওফ মালদীবকী মপাল থৌরম পুবা মন্ত্রী শ্রী অবদুল্লা শাহিদনা ঙসি নই দিল্লীদা প্রধান মন্ত্রী শ্রী নরেন্দ্র মোদীগা উনখ্রে। ৬শুবা ইন্দিয়া–মালদীব জোইন্ত কম্মিসন মীফমগীদমক শ্রী অবদুল্লা শাহিদ ভারত্তা ওফিসিয়েল খোংচৎ অমদা লাকপনি।

রাস্ত্রপতি ইব্রাহিম মোহমদ সোলিহনা লুচিংবা সরকারনা চহী অমা মপুং ফারকপদা প্রধান মন্ত্রীনা মপাল থৌরম পুবা মন্ত্রী শাহিদকী মফমদা নুঙাইবা ফোংদোকখি। ভারত অমসুং মালদীবকী মরক্তা লৈনরিবা মরী হেঙ্গৎলকপা অমসুং হৌখিবা চহী অমগী মনুংদা নাকল অনিগী তেংবাং পীনবা মহৈ য়াল্লকপদা মহাক্না অপেনবা ফোংদোকখি। ৬শুবা জোইন্ত কম্মিসন মীফম মনুংদা খন্ন–নৈনগদৌরিবা অসিনা লৈবাক অনিগী মরক্তা লৈনরিবা মরী হেন্না চেৎশিলহল্লগনি হায়না মহাক্না মহাক্কী ওইবা থাজবা ফোংদোকখি। মপাঙ্গল কনবা, দেমোক্রেতিক ওইবা, চাউখৎপা অমসুং শান্তি লৈবা মালদীব অমগীদমক মালদীব সরকারগা থবক তৌমিন্ননবা ভারতকী ৱাফম অদু প্রধান মন্ত্রী মোদীনা অমুক হন্না ফোংদোকখি।

মপাল থৌরম পুবা মন্ত্রী শ্রী অবদুল্লা শাহিদনা ভারত–মালদীবকী মরী মখা চত্থবদা মহাক্কী মীৎয়েং অমসুং ইচং থৌনা লুচিংবগীদমক প্রধান মন্ত্রী মোদীবু থাগৎপা ফোংদোকখি। মালদীবতা হৌজিক পায়খৎলিবা তোঙান তোঙানবা চাউখৎ থৌরাংদা তেংবাং পীনবা খোংথাংশিংদা ভারতকী তেংবাংগীদমক মহাক্না অপেনবা ফোংদোকখি।