ভারতকী প্রধানমন্ত্রী

ঙসি প্রধান মন্ত্রী নরেন্দ্র মোদীনা ভারত অমসুং মপান লৈবাকশিংগী থাউ অমসুং গ্যাস সেক্তরগী সি ই ওশিং অমসুং অখঙ-অহৈশিংগা উনখ্রে।

উনখিবা অদুদা সাউদি অরাবিয়া অমসুং য়ু এ ইগী মন্ত্রীশিং, সাউদি অরামকো, এ দি এন ও সি , বি পি, রোজনেফ, আই ঐচ এস মারকিত, পাইওনর নেচরেল রিসোর্সেস কম্পেনি, ইমরসন ইলেকত্রিক কম্পেনি, তেল্লুরিয়ান, মুবাদালা ইনভেসমেন্ত কম্পেনি, ক্লুম্বরজর লিমিতেদ, ৱুদ মেক্কেনজি, ৱার্ল্দ বেঙ্ক, ইন্তরনেসনেল ইনর্জী এজেন্সি, এন আই পি এফ পি, ব্রুকিংস ইন্দিয়া অমসুং ভারতকী কম্পেনিশিং শরুক য়াখি।

থৌরম অদুদা কেন্দ্রগী মন্ত্রী অরুন জেতলি অমসুং ধরমেন্দ্র প্রধান, নিতি অয়োগকী ভাইস-চেয়রমেন দোক্তর রজিব কুমার অমসুং ভারত সরকার অমসুং নিতি অয়োগকী সেনিয়র ওফিসিয়েলশিং কয়া শরুক য়াখি।

ৱারি শানবা অদুদা হৌখিবা চহি মরিদা ইনর্জী সেক্তরদা ভারত সরকারনা পায়খৎলিবা থবকশিং মালেমগী সি ই ওশিং অমসুং অখঙ-অহৈশিংনা থাগৎপা ফোঙদোকখি। শেন থাদবগী রেঙ্কিংদা ভারতনা ৫৬দগী ৪৪দা হাইগৎলকপদা অখঙ-অহৈশিংনা অখন্নবা মওংদা থাগৎখি। ভারত্তা থাউ অমসুং গ্যাসকী মচাক-মথুমশিং শেমগৎপা, অনৌবা মফম থিদোকপা অমসুং পুথোকপা , সোলার ইনর্জী অমসুং বাইওফুয়েলশিংগী কান্নবা শীজিন্নবা অমসুং কেন্দ্র সরকারনা ইনর্জী সেক্তরদা পায়খৎলিবা অফবা থবকশিং মীফম অদুদা খন্নখি। থৌশিলশিংগী মতাংদা খন্ননবা তোঙান-তোঙানবা মরি লৈনবা কাংলুপশিং য়াউহন্দুনা পাংথোক্লিবা অসিগুম্বা মখলগী ৱারি শানবা অসি অখঙ-অহৈশিংনা থাগৎখি।

ইনর্জী সেক্তরগী মালেমগী অখঙ-অহৈশিংগা ৱারি শানবদা , থাউ অমসুং গ্যাসকী সেক্তরদা ভারতনা লৌরিবা মরুওইবা থৌদাং প্রধান মন্ত্রী নরেন্দ্র মোদীনা পনখি। মহাক্না হায়খি, ভারতকী থাউগী কৈথেল অসি থাউ পুথোক্লিবশিংগী মখা পোল্লি, থাউগী চাং অমসুং মমল অসি থাউ পুথোক্লিবা লৈবাকশিংনা লেপ্পী। থাউ মরাং কাইনা পুথোক্লবসু, থাউ য়োনবগী অখন্নবা ফিবম অসিনা মরম ওইদুনা থাউগী মমল হেনগৎহল্লি। থাউ লৈরিবা অমসুং য়োল্লিবা লৈবাকশিংগী মরক্তা অকনবা মরি থম্নবা প্রধান মন্ত্রীনা তকশিনখি। মসিনা মহৌশাগী ফিবমদা হনজিল্লক্লিবা মালেমগী ইকনোমি লেংদনা থম্বদা মতেং ওইগনি।

ভারতকা মরি লৈনবা মরুওইবা ৱাফমশিংদা প্রধান মন্ত্রীনা অখঙ-অহৈশিংগী পুক্নিং চিংশিনখি। অহানবদা, সুংদোকত্রিবা থাউগী মমল হেনগৎলকপদগী থাউ লৈরিবা লৈবাকশিংনা থেংনরিবা শেন-থুমগী অৱাবশিং পনখি। থাউ য়োল্লিবা লৈবাকশিংনা মতেং পাংবা মতমদা মসিগী অরুবা ফিবম অসি লাকশিনবা ঙমগনি। থাউ পুথোকপা লৈবাকশিংগী অহেনবা শেনফমশিং অদু চাউখৎলক্লিবা লৈবাকশিংগী থাউ থিবগী থবক্তা থাদনবা প্রধান মন্ত্রীনা তকশিনখি। অনিসুবদা, থাউ থিবদা খরচ য়াম্না চংবা অমসুং চাউখৎলবা লৈবাকশিংনা তেক্লোলোজিগী লমদা মতেং পাংনবা মহাক্না তকশিনখি। অহুমসুবদা, মহাক্না গ্যাস সেক্তরদা লনাই শরুক য়াহনবগী মতাংদা পনখি। নেচরেল গ্যাস শেন্দোং তান্নবা পুথোকপদা অৱাংবা তেক্নোলোজিশিং শীজিন্ননবা মতেং পাংনবা মহাক্না অপীল তৌখি। লোকেল করেন্সিদা মতম খরগী ওইনা খুদোংচাবা ফংগদবা পেমেন্তগী মতাংদা অরোইবদা মহাক্না পনখি।

সেক্তর অসিদা মহাক্কী সরকারনা পায়খৎলিবা থৌশিলশিং অমসুং চাউখৎ-থৌরাংগী থবকশিং প্রধান মন্ত্রীনা ফোঙদোকখি ।মহাক্না গ্যাস মমল লেপ্পা অমসুং য়োনবদা পীরিবা মনিং তম্বশিং পনখি অমসুং ঈশিং অরুবা মফমদা অমসুং হায় প্রেসর হায় তেম্পেরেচর তেক্নোলোজি শীজিন্নবগী মতাংদা পনখি। মহাক্না ওপন লাইন্সেসিং পোলিসি, কোয়েল বেদ মিথেন শেন ওন্থোকপা, অপীকপা ফিল্দশিং থিদোকপদা মতেং পীবা আমসুং জাতিগী থাক্তদা সৈস্মিক সর্ভে পাংথোকপগী মতাংদা ফোঙদোকখি।