ভারতকী প্রধানমন্ত্রী

মরূপশা,

চিবই বেক উলে

ইন দম এম

প্রধানমন্ত্রী ওইনা ঐহাক মিজোরমদা অহানবা ওইনা লাকচবগী খুদোংচাবা ফংজরে। মসি ঐখোয়না আইৎ সিস্তর হায়না খঙনবা অৱাং নোংপোক্কী রাজ্যশিংগী মনুংদা ঐনা প্রধানমন্ত্রী ওইনা ঙসি ফাওবা অমুক্তা লাকপা ঙমখিদ্রিবা রাজ্য অমনি। মরম অসিনা খ্বাইদগী হান্না অদোমদা ঙাকপীয়ু হায়জরি। অদুম ওইনমক প্রধানমন্ত্রী ওইদ্রিঙৈগী মমাংদা মিজোরমদা তোইনা লাক্লম্মি। মফম অসিগী ইংনা ফজরবা ফিভম অসি নীংথিজনা খঙজৈ। মফম অসিগী মীনুংশি লৈরবা মীয়ামগী মরক্তা ঐনা নুংঙাইরবা মতম কয়া লেঞ্জখ্রে। হৌজিক অদোমগী মরক্তা লাকপা অসিদা অদুগুম্বা অরিবা ৱাফমশিং অদু নীংশিংলকপা হায়বসি মশানা তারবা ৱাফম্নি।

ঙসি অদোমগী নীংথিজরবা লমদম অসিদা ঐগী খোংচৎ অসিনা, মিজোরমগী মরূপ-মপাং ওইরবা  মীয়ামগা লেনমিন্নখিবা নুংঙাইরবা মতমশিং অদু নীংশিংহল্লে। ঐনা অদোম্দা য়াইফ-মঙ্গল পীজবদগী হৌজগে, তশেংনমকসু মিজোরমগী মীয়াম পুম্নমক, মেরী খৃস্তমাস অমসুং হেপ্পী ন্যু ইয়র।

অনৌবা চহিনা অদোমগী নুংঙাই-য়াইফবা অমসুং ৱাৎত-পাদবা পুরকপা ওইরসনু।

ঐনা য়ৌরকখিবা ঙৈহাক্কী মীকুপ অদুদা, “চীংমীগী লৈবাক”: মিজোরমগী অঙকপতনা থল্লবা ফজবা অদু অমুক হন্না উরনি খনবদা লাংতক্নবা পোকখি।

শান্তি অমসুং ইং-তপ্লবা লৈবাক।

মশা খিংবা অমসুং মীওক-মীচান ফজবা মীয়াম।

ভারতকী খ্বাইদগী লাইরিক হৈবগী চাং ৱাংবশিংগী মনুংদা অমা ওইরিবা রাজ্য।

অৱাং নোংপোক রাজ্যশিংদা চাওখৎ-থৌরাংগী মতাংদা অতলজীগী মতমদগী য়াম্না লুনা খনবা হৌখি। অতলজীনা হায়বীরম্মি মদুদি শেনমিৎলোন ফগৎহনবগী অচৌবা পান্দম অমদি লমদম লমদমগী খেন্নবশিং অদু মপুং ফানা লোইশিনবনি। মাইকৈ অসোমদা মহাক্না থবক কয়াসু পাইখৎপীরম্মি।

২০১৪দা ঐখোয়গী সরকার শেমখিবগা অমুক হন্না লমদম অসিবু, সরকারগী পোলিসী অমসুং ৱারেপশিংদা পুখৎতুনা লাকখি। ঐনদি কাংলোন অমা শেমখি মদুদি নুমিৎ ১৫নিগী মনুংদা কেবিনেৎকী মন্ত্রী অমা নত্রগা অমা অৱাং নোংপোক্কী রাজ্যশিংদা শোইদনা চৎকদবনি। অয়ুক লাক্লগা নুংথিলদা করিগুম্বা ইভেন্ত অমদা শরুক য়ারম্লগা নুমিদাংৱাইরম হনখিবা অদুসু য়ারোই। মন্ত্রীমন্দলগী ঐগী খোংলোইনা মফম অসিদা লৈদুনা, অদোমগী মরক্তা লৈরগা অদোমগী তঙাইফদবশিং অদু খঙদোকপা, মদুগী মতুং ইন্না মখোয়গী মন্ত্রালয়দা পোলিশিং শেম্বা অদু ঐনা পামখি।

মরূপশা, ঐঙোন্দা তমখি মদুদি হৌখিবা চহি অহুম অসিদা ঐগী খোংলোইশিংনা অৱাং নোংপোক লমদমগী রাজ্যশিংদা খোংচৎ ১৫০ রোমদগী হেন্না চৎখ্রে। অদোমগী অৱাবশিং, অদোমগী তঙাইফদবশিং ফোংদোক্নবগীদমক অদোম্না দিল্লীদা পাউ য়ৌহনবগী মহুত্তা দিল্লী মশামক অদোমগী নাক্তা লাক্নবগী মিয়েং অসিগা লোইননা ঐখোয় থবক তৌরি।

পোলিসী অসিবু ঐখোয়না মমিং থোল্লি- মিনিস্তর ওফ দোনর এৎ য়্যোর দোর-স্তেপ। মন্ত্রীশিংদগী তোখাইনা, দিব্লপমেন্ত ওফ নোর্থ ইস্ত রিজন মন্ত্রালয়গী সেক্রেতরীসু মখোয়গী ওফিসরশিংগা লোইননা থা খুদিংগী অৱাং নোংপোক্কী রাজ্য অমা নত্রগা অমদা কেম্প তৌই। সরকারগী অসিগুম্বা থৌরাংশিং অসিনা মরম ওইদুনা অৱাং নোংপোক্কী স্কিমশিংদা খোংজেল য়াংশিল্লে, চহি কয়াদগী প্রোজেক্ত পন্দুনা লৈরম্বদু ঙসিদি খোংজেল য়াংনা পাইখৎলক্লে।

ঐনা সেল্ফ-হেল্প গ্রুপশিংনা শেমগৎপা অৱাং নোংপোক্কী রাজ্য নিপালগী পোৎথোকশিং য়াওবা মতিক লৈবা এগজিবিসন অমা উরে। মখোয়গী হৈথোই-শিংথোইবা অমসুং তৌবা ঙম্বা অদুগীদমক ঐনা সেল্ফ হেল্প গ্রুপকী মীহুৎশিংদা থাগৎপা ফোংদোকচরি। মসি কেন্দ্র সরকারনা শেমগৎ-শাগৎপা অমসুং চাওখৎ-থৌরাংগীদমক্তা ফোংদোকখিবা অদুগী ওইথোক্নীংঙাই ওইবা মশক অদুনি। মসি দীন দয়াল অন্ত্যোদয়া য়োজনাগী মরু ওইবা পান্দমশিং অদুগী মনুংদা অমনি।

কেন্দ্র সরকারনা পীবা শেন্দোইগী সবসিদীগা লোইননা নোর্থ ইস্তর্ন দিব্লপমেন্ত ফাইনান্স কোর্পোরেসননা পীবা ক্রেদিৎ লিঙ্কেজশিংগী থোংদা কান্নবশিংসু সেল্ফ হেল্ফ গ্রুপশিং অসিনা  ফংলি।

ঐঙোন্দা খঙহনখি মদুদি অৱাং নোংপোক লমদমগী চাওখৎ-থৌরাংগী মন্ত্রালয়না নোর্থ ইস্তর্ন হেন্দিক্রাফ অমসুং হেন্দলুম দিব্লপমেন্ত কোর্পোরেসনগী অমসুং নোর্থ ইস্তর্ন এগ্রিকলচর মার্কেতিং কোর্পোরেসনগী থবক থৌরমশিংদসু মতেং পাংলি।

মার্কেতিং অমসুং ফুদ প্রোসেসিংগীদমক্তা মসিগী পাব্লিক সেক্তর অন্দর-তেকিংশিং অসিনা খুৎনা পোৎলম শাবশিং, ফী শাবা/শাবীশিং অমসুং লৌমীশিংদা ত্রেনীং পীবগী থবক চৎথরি।       

সিএসআইআর, আইসিএআর অমসুং আইআইতিশিংগুম্বা ইন্সতিত্যুৎশিংনা শেমগৎ-শাগৎপা তেক্নোলোজী অমসুং পোৎথোকশিং লমদম অসোমগী পোৎথোক্তা মগুন লৈহন্নবগীদমক অৱাং নোংপোক্তা শিজিন্নবা য়াবা মওংদা শিজিন্নগদবনি।

মরূপশা! ঙসি ঐখোয় মিজোরমগী পুৱারিদা মরু ওইবা মাইল-স্তোন অমা পাংথোক্নবগীদমক মফম অসিদা পুল্লরিঃ

মেগা-ৱাৎ ৬০গী তুইরিয়াল হাইদ্রো-পৱার প্রোজেক্ত লোইশিনবা অমসুং জাতিদা কৎথোকপা। মসি অৱাং নোংপোক্তা সেন্ত্রেল সেক্তর হাইদ্রো-পৱার প্রোজেক্ত – কোপিলী স্তেজ-IIগী চহি ১৩গী মতুংদা লাকপনি।

তুইরিয়াল হাইদ্রো-পৱার প্রোজেক্ত অসি মিজোরমদা মাই পাক্না পাইখৎপা অহানবা অচৌবা সেন্ত্রেল সেক্তর প্রোজেক্তনি। মসি রাজ্য অসিদা অহানবা অচৌবা হাইদ্রো-পৱার প্রোজেক্তনি। মসিনা চহি অমদা ইলেক্ত্রিক্কী ইনর্জী য়ুনিৎ মিলিয়ন ২৫১ পুথোক্কনি, অমসুং খুন্নাইগী-শেনমিৎলোনগী চাওখৎ-থৌরাংদা ইনোৎ হাপ্লগনি।

প্রোজেক্ত অসি হৌদোক্লবা মতুংদা, মিজোরম অসি অৱাং-নোংপোক্তা সিকিম অমসুং ত্রিপুরাগী মতুংদা অহুমশুবা পৱার-সর্প্লস ওইরে।

প্রোজেক্ত অসি প্রধানমন্ত্রী ভাজপেয়ীজীগী সরকারনা অহানবা লাওথোকপীরমখি অমসুং অয়াবা পীবীরমখি, মতুংদা ১৯৯৮তা হল্লকখি, অদুবু থেংখি।

প্রোজেক্ত অসি মপুং ফাহনবা অসি ঐখোয়গী পাইখৎলিবা প্রোজেক্তশিং লোইশিন্নবা ফোংদোকখিবা অদুগী খুদম্নি অমসুং অৱাং নোংপোক লমদমনা চাওখৎ-থৌরাংগী যুগ অমদা খোং থাংজিনবনি।

মৈ পুথোকপদা নত্তনা, ঈশিং তুংশিনফম্না অনৌবা নেবিগেসনগী লমজং অমসু হাংদোক্লগনি। মফম স্ক্বার কিলোমিতর ৪৫ হেন্না শন্দোকখ্রিবা অচৌবা ঈশিং তুংশিনফম অসি ঙামীশিংগী চাওখৎ-থৌরাংদা শিজিন্নবসু য়াগনি।

প্রোজেক্ত অসিনা ইকো-তুরিজমদা ইনোৎ পীরগনি, অমসুং থক্ননবা ঈশিং মরাং কাইনা ফংহনবা ঙম্লগনি। ঐঙোন্দা তমখি মদুদি রাজ্য অসিদা মেগা-ৱাৎ ২১০০গী হাইদ্রো-পৱার পোতেন্সিএল লৈ, মসিদগী ঐখোয়না হৌজিক ফাওবদা শরুক অমখক্তমক শিজিন্নরি।

মিজোরমনা নেৎ-পৱার এক্সপোর্তর অমা ওইবা ঙমলোইদবগী মরম ঐ উবা ঙমদে। ঐখোয়গী পান্দম অসি অৱাং নোংপোক রাজ্যশিংগী পৱার সর্প্লস ওইনা শেমগৎপখক নত্তে। ঐখোয়না সর্প্লস পৱার অদু লৈবাক অসিগী অৱাৎপা শরুকশিংদা থাদোকপা ঙম্বা খ্বাইদগী নৌবা ত্রানমিসন সিস্তেম শেমগৎপদসু পান্দম থম্লি।

ঐগী সরকারনা অৱাং নোংপোক রাজ্যশিংদা পৱার ত্রান্সমিসন সিস্তেমদা পাক চাওনা ফগৎহন্নবগীদমক লুপা কোতি ১০,০০০গী ময়াদা ইনভেস্ত তৌরি।

মরূপশা, নীং খা তম্লবা চহি ৭৫গী মতুংদসু ঐখোয়গী লৈবাক্তা হৌজিক ফাওবা ইলেক্ত্রিক্কী কনেক্সন তৌদ্রিবা য়ুম কোতি ৪ রোম লৈরি। অদোম্না খন্দুনা য়েংবীয়ু মখোয়শিং অদু করম্না ১৮শুবা যুগকী পুন্সি মহিংদা হিংবা তারিবা। মিজোরম অসিদসু হৌজিক ফাওবা অমম্বদা পুন্সি লেল্লিবা য়ুম লিশিং কয়া লৈরি। অদুগুম্বা য়ুমশিং অদুদা মৈ ফংহন্নবা সরকারনা হন্দক্তা ‘প্রধানমন্ত্রী সহেজ বিজলী-হর ঘর’ য়োজনা হায়বদি ‘সৌভাগ্য’ হৌদোকখি। ঐখোয়গী পান্দমদি অথুবা মতমদা লৈবাক অসিগী য়ুমথোং খুদিংদা মৈ ফংহনবনি।

স্কিম অসিদা চাওরাক্না লুপা কোতি লিসিং ১৬ লোম চাদিং তৌগনি। স্কিম অসিগী মখাদা কনেক্সন তৌগদৌরিবা লাইরবশিংদগী কনেক্সনগীদমক সরকারনা পৈসা অমত্তা লৌরোই। লাইরবশিংগী পুন্সি মঙাল নাইবা অদু ঐখোয়না পাম্মি।

মরূপশা, অতৈ শরুকশিংগা চাংদম্নরুরবদি অৱাং-নোংপোক্তা অনৌবা ইন্ত্রপ্রিনরশিপকী মশিং অসি ওইহন্নিংবা চাং অদু য়ৌদ্রি। মসিগী অচৌবা মরম অমদি নহারোলশিংনা মখোয়গী ললোন-ইতিক তৌনবা মথৌ তাবা শেল্লেপ ফংবা ঙমদবননি। নহারোলশিংগী মথৌ তাবা অসি য়েংদুনা সরকারনা প্রধানমন্ত্রী মুদ্রা য়োজনা, স্তার্তঅপ ইন্দিয়া স্কিম, স্তেন্দঅপ ইন্দিয়া স্কিমগুম্বা স্কিমশিং হৌদোকলি। অৱাং নোংপোক্তা অখন্নবা মিয়েং থমদুনা দোনর মন্ত্রালয়না লুপা কোতি ১০০গী শেনফম্না ভেঞ্চর কেপিতেল ফন্দসু শেম্লে। ঐগী মিজোরমগী নহারোলশিংদা হয়জরি মদুদি কেন্দ্র সরকারগী স্কিমশিং অসিগী কান্নবা ঙমলিবমখৈ লৌবীয়ু। মফম অসিগী নহারোলশিং স্তার্তঅপকী তাইবংদা তিন্ননবগী থৌনা লৈ, পাঙ্গল লৈ। ভারত সরকারনা অসিগুম্বা নহারোলশিংগী হেন্দ-হোল্দিংগীদমক্তা লেপ্লি।

ঐখোয় ভারতকী নহারোলশিংগী স্কিল অমসুং পাঙ্গলদা পোন্থা পীরি। ঐখোয়না ঐখোয়গী লৈবাক অসি মীওই লোনচৎপু হোংদোকপা ঙম্বা মথংগী অচৌবা ৱাখল্লোন অমা ওইবা ঙম্ননবা ইনোবেসন অমসুং ইন্তর্প্রাইজগী অচুম্বা ইকো-সিস্তেম অমা শেমগৎলিবা – ‘ইম্পৱার থ্রু ইন্তর্প্রাইজ’দা থাজবা থম্লি।

২০২২দা, ভারত নীং খা তম্বা চহি ৭৫ মপুং ফারগনি, মথংগী চহি মঙাদা চাওখৎ-থৌরাংগী লম খুদিংমক্তা মশক থোক্না চোংখৎপা ঙম্ননবা ঐখোয়গী এচিবমেন্তশিং শেমগৎ-শাগৎনবগী খুদোংচাবা পীরগনি।

২০২২ ফাওবগী মনুংদা অনৌবা ভারত অমা শেম্ননবা ঐখোয় হেনগৎলক্লিবা শেনমিৎলোনগী খোংজেলগী পান্দম অনিদা থবক তৌবগা লোইননা মসিসু লেপথোকপা তাই মদুদি চাওখৎপগী ফল অসি পুম্নমক্না শরুক য়ামিন্নগনি। সবকা সাথ, সবকা বিকাস হায়বা ৱাখল্লোন অসিদা ভারত মচা খুদিংমক্না, কাংলুপকী, পা-পীগী, লাইনীং-লাইশোনগী, থাক্কী খেন্নবা য়েংদনা অনৌবা চাওখৎপা অসিদা মান্ননা খুদোংচাবা লৌমিন্নগদবনি।

ঐগী সরকারনা কম্পিতিতিব অমসুং কোওপরেতিব ফেদরেলিজমদা থাজবা থম্মি, মসিদা রাজ্যশিংগী মরক্তা মশা-মউ ফবা অথোই-অহেন তান্নৈ। ঐনা থাজৈ মদুদি রাজ্য অসি অহোংবগী মকোকনি।

মরূপশা, ঐখোয়গী লৈবাক্কী শরুক অসি, য়াম্না লাইনা মশাবু কার্বোন নেগতিবনি হায়না লাওথোকপা ঙমগনি। ঐখোয়গী খোংলোই ভুতান্না অসুম্না তৌদুনা উৎখ্রে। রাজ্য সরকারশিংগী মাইকৈদগী হোৎনবা হেনগৎলবদি অৱাং-নোংপোক্কা রাজ্য নিপাল কার্বোন নেগতিব ওইবা ঙমগনি। কার্বোন নেগতিব ওইবা রাজ্যশিংগী শক্তাক্না লৈবাক অসিগী লমদম অসিগী শরুক অসিবু মালেম অপুনবগী মেপতা অচৌবা ব্রান্দ অমা ওইনা শেমগৎপা য়াগনি। সিকিম্না মশাবু ১০০% ওর্গানিক রাজ্য ওইনা লাওথোকখিবগুম অৱাং নোংপোক্কী অতৈ রাজ্যসু মাইকৈ অসোমদা মখোয়গী হোৎনবা অদু খোংজেল য়াংশিনবা য়াই।

ওর্গানিক ফার্মিং চাওখৎহন্নবদীদমক কেন্দ্র সরকারনা পরম্পরাগৎ কৃষি বিকাস য়োজনা হৌদোক্লে।

মসিগী মখাদা লৈবাক অপুম্বদা ওর্গানিক ক্লস্তর লিশিং ১০দগী হেন্না লিংখৎলি। অৱাং-নোংপোক্তসু ১০০ ফার্মর প্রদ্যুসর্স ওর্গনাইজেসন্স লিংখৎলে। মসিদা লৌমী লিশিং ৫০ রোম হেনবনা য়াওরক্লে। মফম অসিগী লৌমীনা ওর্গানিক পোৎথোক দিল্লীদা য়োনবা ঙম্নবগীদমকসু থৌরাং তৌরে।

মরূপশা, ২০২২দা ঐখোয়গী লৈবাক নীং খা তম্বগী চহি ৭৫ শুরকপগী থৌরম পাংথোক্কনি। মিজোরমনা ৱাশক অসি শকপা য়াই মদুদি ২০২২ ফাওবগী মনুংদা মশাবু চাদা ১০০ ওর্গানিক অমসুং কার্বোন নেগতিব রাজ্য ওইনা শেমগৎকনি। ঐনা মিজোরমগী মীয়ামদা থাজবা অসি পীজরি মদুদি ৱাশক অসি ঙাকপদা কেন্দ্র সরকারনা মওং থুদিংমক্তা মখোয়গা লোইননা লেপ্লি। ঐখোয়না অদোমগী অৱাবা মচা মচাশিং খঙদুনা মদু লোইশিন্নবা হোৎনরি। ঐনা অদোমদা ৱাগী খুদম অমা পীজরি।

অৱাং নোংপোক্কী মীওই লাখ কয়াগী হিংননবগী লম্বী অমা ওইরিবা ৱা অসি, য়াম্না অথিংবা লৈবা লৈবাক্কী ঙাকলোন অমগী মখাদা লৈরম্মি। পার্মিৎ য়াওদনা অদোম্না অদোমগী ইংখোলদগী ৱা য়োনবা নত্রগা পুথোকপা য়াদে। ঐখোয়গী সরকারনা মসিগী থৌওং অসিবু হন্থহন্নবা লৈবাক্কী ঙাকলোন অসি হোংদোক্লে। হৌজিক্তি লৌমীশিংনা মখোয়গী মশাগী ইখোলদগী পুথোকচবা ৱা অমসুং মসিগী পোৎথোকশিং পুথোকপা অমসুং য়োনবদা পার্মিৎ অমত্তগী মথৌ তাদ্রে। মসিনা লৌমী লাখ কয়ামরুমদা কান্নবা ফংহল্লগনি অমসুং ২০২২ ফাওবদা লৌমীশিংগী চাগা শরুক অনি হেনগৎহনবদা ইনোৎ হাপ্লগনি।

ঐনা মিজোরমদা লাক্লগা ফুৎবোলগী মতাংদা পন্দবা অসি ওইথোক্তে। মফম অসিগী অফাওবা শান্নরোই জেজে ললপেখলুরনা লৈবাক অপুম্বগী মিয়েং চিংশিনখি। অমসুং মিজোরমদা ফুৎবোল অসিদি য়ুমথোং খুদিংগী শরুক অমনি। ঐঙোন্দা তমখি মদুদি ফিফাগী পাইলোৎ প্রোজেক্ত অমসুং আইজোল ফুৎবোল ক্লবনা মফম অসিগী তেলেন্তপু হেন্না মপাঙ্গল হাপ্লি।

মিজোরমনা ২০১৪দা অহানবা ওইনা সন্তোষ ত্রোফী লৌখিবদা লৈবাক অপুম্বগী ফুৎবোলবু পামজবশিংনা মিজোরমগীদমক্তা খুবাক খুখি। ঐনা মিজোরমগী মীয়ামদা শান্নবগী তাইবংদা মখোয়না মাই পাকপা অসিগীদমক হন্না হন্না নুংঙাইবা ফোংদোকচরি। ফুৎবোল অসি অসিগুম্বা সোফ্ত-পৱার অমনি, মসিগী মতিংদগী মিজোরমনা মালেম অপুম্বা অসিদা মশাগী শক্তাক শেমজবা ঙমগনি।

ফৎবোলগী সোফ্ত-পৱারনা মিজোরমবু মালেমগী ওইবা শক্তাক অমা পীবা ঙমগনি। রাজ্যগী অমসুং লৈবাক অসিগী মীংচৎ পুরকখিবা মিজোরমদগী শক্নাইরবা শান্নরোই কয়া অমসুং লৈরি। মখোয়গী মনুংদা ওলেম্পিয়ন আর্চর সি. লালরেমসঙ্গা, বোক্সর কুমারী জেন্নী লালরেমলীয়ানী, ৱেৎ লিফতর কুমারী লালছাহিমী অমসুং হোক্কী শান্নরোই কুমারী লালরুআৎফেলী য়াওরি।

ঐনা থাজৈ, মিজোরমনা মালেমগী থাক্তা অথোইবা শান্নরোই কয়া পুথোরকখিগনি।              

মরূপশা, মালেম অসিগী লৈবাক কয়ামরুমগী শেনমিৎলোনশিং শুপ্নগী স্পোর্তকী পাম্বৈনা পাংথোক্লি। তোঙান-তোঙানবা মখলগী মশান্নশিংগীদমক্তা মথৌ তাবা ফিভম শেমদুনা অসিগুম্বা লৈবাকশিংনা মালেম অপুম্বগী মীয়াম্বু মমিৎ থক্কৎহল্লি। অৱাং-নোংপোক্তা স্পোর্তকী লোইবা নাইদ্রবা থৌনা অসিবু য়েংদুনা কেন্দ্র সরকারনা লমদম অসোমদা, ইম্ফালদা স্পোর্ত য়ুনিবর্সিতীসু শাগৎলি।

স্পোর্ত য়ুনিবর্সিতী শারবা মতুংদা মফম অসিগী নহারোলশিংনা স্পোর্ত অমসুং মসিগা মরি লৈনবা মখল খুদিংমক্কী ত্রেনিং লৌবদা লাইনা থোক্লগনি। ঐখোয়গীদি মসিসু শেম শারি মদুদি য়ুনিবর্সিতী লৈরবা মতুংদা মসিগী কেম্পস ভারত্তদা নত্তনা মালেমগী অতোপ্পা লৈবাকশিংদসু হাংদোক্কনি, মরমদি মসিনা মফম অসিগী শান্নরোইশিংনা অতোপ্পা লৈবাকশিংদা চৎতুনা ত্রেনিং লৌবা ঙমলগনি।

ঐনা আইজোল অসি মচু-মচুগী অমসুং কুম্মৈগী শেৎ চাবা উরি, অমসুং খৃস্তমাস পাংথোক্নবগীদমক মপুং ফানা শেম শারি। ঐনা অমুক্কা হন্না মিজোরমগী মীয়ামদা মেরী খৃস্তমাসকী য়াইফ-পাউজেল পীজরি।

অদোম্বু থাগৎচরি।

ইন বায়া ছুঙ্গা ক-লৌম এ মঙ্গছা