ভারতকী প্রধানমন্ত্রী

ইচিল-ইনাওশিং অমসুং ইচল-ইচেশিং,

থবক ফরবা নহারোলশিংনা মখোয়গী চৎনবীশিং থাদোক্লম্লগা, ঐগী থৱায়না পামজবা স্কিম অসিদা থৱায় য়াওনা শরুক য়াররিবা মীয়ামদা ঙসি ঐনা ৱা ঙাংবা ফংজবা অসি ঐগী লাইবক য়াম্না ফবনি। অদোমগুম্বা মীওইশিং অসিনা হান্নগী চৎনবীশিং থাদোক্লগা অদোম ইশাগী লম্বী অমা শেমজরি অমসুং থৌনা ফনা ইশাগী লম্বী শেমজরি। লৈবাক অসিগী নুংঙাই-য়াইফবদা অদোম্না অচৌবা থৌদাং লৌরি ।

ভিদিও কনফরেন্সিংগী খুৎথাংদা ঙসি লৈবাক অসিগী মীয়াম্না অদোমগী থৌনা ফবগী ৱারী, অদোম্না লৌখিবা ৱারেপ, অদোমগী থবক্কী মরমদা তাননবা ঐগা শরুক য়ামিন্নগনি। হৌখিবা থাদা প্রধান মন্ত্রীগী য়ুমদা মুদ্রা স্কিমগী কান্নবা ফংলবশিংগা ৱারী শানবগী খুদোংচাবা অমা ঐনা ফংজখি। মখোয়না থেংনরকপশিং, মখোয়না হোৎনখিবশিং অমসুং মখোয়গী মাইপাকপগী ৱারীশিং অদুনা অপেনবা পোকপগা লোয়ননা ঐগী থমোইদা চাউথোকচবা অমা পোকখি । ঐনা খনখি মদুদি, করিগুম্বা ঐনা খুদোংচাবা অমা ফংলবদি, মুদ্রা য়োজনাগী কান্নবা ফংলবশিংগা ৱারী শানগনি। ঙসিদি তেক্নোলোজীনা মরম ওইদুনা ঐগী অমসুং অদোমগী মতম মাংহন্দ্রে। ঐনা অদোমগী থবকশিং অমসুং ৱাখল্লোনগী মরমদা হকথেংননা খঙলগনি অমসুং ঐখোয়গী মরক্তা অতোপ্পা অমত্তা য়াওররোই।

অদোমগুম্বা ইন্ত্রপ্রিনরশিংনা তৌরিবা থবকশিং অসি লৈবাক্কী শেল-থুমগী ওইনা য়াম্না মরুওইবনি।  রাজনিতীগী খুদোংচাবা ফংনবা চহী ২৫-৩০গী মমাংদা লোনগী মেলা শীনখিবা অদু অদোম খঙবীরমগনি। রাজনিতীগা শম্নবশিং, মখোয়গী খোঙলোইশিং, থিকাদারশিং অমসুং ভোৎ বেঙ্ককী রাজনিতী তৌবশিংনা বেঙ্কতগী শেল লৌরম্মি। বেঙ্কগী লোন অশুক য়াম্না পীখ্রে হায়বগী পাউ ময়াম অমা ফোঙলম্মি। মদুগী মতুংদা করি ওইখ্রবগে হায়বা কনা অমত্তনা খঙলমদে। ঐখোয়না লোনগী মেলাসু শীনদে অমসুং ব্রোকর অমত্তদসু খুদোংচাবা পীখিদে। মখোয় মশাগী ওইবা থবক তৌজবা পাম্বা লৈবাক অসিগী নহারোলশিং, লৈবাক অসিগী ইমাশিং অমসুং ইচলশিং, মখোয় মশানা বেঙ্কগী ওফিসিয়েলশিংগা ৱারী শানবা পামজবশিংগীদমক ঐখোয়না মুদ্রা য়োজনা পুথোক্লে। মসি করিগুম্বা খরা তৌনীংবা লৈবাক অসিগী মীয়ামগী অচৌবা খুদোংচাবা অমনি। ঐখোয়না অপীকপা ইন্ত্রপ্রিনরশিংবু থাজৈ, ঐখোয়না মখোয়গী ললোনবগী হৈশিংবদা থাজৈ, মখোয় মশাগী থবক হৌজনবা অমসুং চাউথোকপা ঙম্নবা ঐখোয়না মুদ্রা য়োজনাগী মখাদা মখোয়দা লোন পীরি। মুদ্রা য়োজনা অসিনা মশানা মশাবু থবক পীজবদা মতেং পাংবদা নত্তনা থবক পীনবা পাম্বৈ অমসু ওইরি।

নীংতম্বা হেক ফংবদগী লাইসেন্সকী চৎনবী অসি লৈবাক অসিদা লৈরক্লে। খঙন-চানবা লৈবা মীওইশিং খক্তনা লোন ফংলম্মি অমসুং থবক তৌরম্মি। অসিগুম্বা থৌওং অসিনা লায়রবশিং খুদোংচাবা অমত্তা ফংলমদে, মরমদি মখোয়গা খঙনবা অচৌবা মী লৈরমদে নৎত্রগা চংবা য়াবা অমত্তা লৈরমদে। মসিনা অচৌবা মরম অমা ওইরগা অপীকপা ইন্ত্রপ্রিনর লিশিং কয়া মখোয়গী থবক হৌবা ঙম্লমদে অমসুং পাকথোক-চাউথোকপা ঙমদে। শেল পুনবগীদমক মখোয়না শেল পুথোকপশিংগী লাংদা থুরম্মি।

শেল-থুমগী মন্ত্রী মশানা ফোন তৌদুনা অচৌবা উদ্যোগ মপুশিংদা লোন পীখিনবা হায়বা মতম অমা লৈবাক অসিদা লৈরম্মি। অমরোমদনা, অপীকপা ইন্ত্রপ্রিনরশিংনা শেন্দোই চাদা ৩০-৪০ কাদুনা শেল শান্দোকপশিংদগী শেল পুবদগী মপুন্সি চুপ্পা হৌখৎপা য়াদনা লৈরম্মি। অসিগুম্বা ফিবম অসি নোংমদি থুগায়গদবনি, মসি কনাগুম্বা অমনা থুগায়গদবনি। মসিগী থবক অসিদা ঐখোয়না চংশিল্লি অমসুং ঐখোয়না মাইপাক্লে। অসিগুম্বা ফত্তবা চৎনবী অসি ঐখোয়না মুথৎলে।

ঐখোয়না থাজবা থম্লি, লায়রবশিংদা সরকারনা থাজনা থম্লি, মখোয়গী মঙলান অমসুং থবক কন্না শুবদা থাজবা থম্লি …

হৌখিবা মতমদগী হৌনা লৈবাক অসিগী নহারোলশিংনা মুদ্রা য়োজনাগুম্বগী খুদোংচাবা ফংলম্লবদি শহরশিংদা য়ুম হোংবগী লৈরিবা খুদোংচাদবশিং অসি লৈরম্লোই হায়না ঐনা খল্লি। নহারোলশিংনা গরেন্তী য়াওদনা অমসুং অপীকপা শেন্দোয়দা বেঙ্কতগী লোন লৌবা ফংলবদি নহারোলশিংনা মখোয়গী খুঙ্গংশিং নৎত্রগা শহরশিংদা লৈদুনা মশাগী ললোন-ইতিক তৌবা ফংগনি। ঙসিদি খ্বাইদগী লায়রবশিংনা গরেন্তী য়াওদনা বেঙ্কগী লোন ফংবা ঙম্লে। হৌজিক মীচম অমনা কনাগুম্বা অমগী মতেং য়াওদনা মুদ্রা লোনগী মতেংনা ইন্ত্রপ্রিনর অমা ওইবা য়ারগনি। হৌজিক্তি সরকারদা খঙনা চান্নবা অমসুং মরূপ-মপাং লৈবগী মথৌ তাদ্রে। হৌজিক লৈবাক অসিদা হৈশিংবা মী মশিং ৱাৎপা লৈত্রে। মীপুম খুদিংমক হিরম অমদা নৎত্রগা হিরম অমদা খঙলে হৈরে, দরকার ওইরিবসি মখোয়গী হৈশিংবা অদু খঙবীবা অমসুং পুক্নীং থৌগৎপীবনি। অসিগুম্বা হৈশিংলবা নহারোলশিংদা মুদ্রা স্কিম্না মখোয়গী পাঙ্গল থৌনা হাপ্লি।

মখোয়গী হৈশিংবা অদু পুক্নীং থৌগৎলবা মতুংদা মখোয় মহৈ য়াল্লগনি অমসুং পুন্সিদা অহোংবা লাক্লগনি। খুদম ওইনা, কনাগুম্বা অমনা ফি তুবদা হৈশিংলবদি, নুপা নৎত্রগা নুপী অদুনা মুদ্রা য়োজনাগী মখাদা লোন লৌরগা ফি তুবগী থবক হৌবা য়ারে। মখা তারকপদা নুপা নৎত্রগা নুপী অদু দিজাইন তৌরবা ফিরোলশিং পুথোকপা য়ারে। মতৌ অসুম্না, মুদ্রা য়োজনানা মীচম মীয়ামগী হৈশিংবা অদু মশক থোকহনবগী থবক তৌরি। মসিনা মীয়ামগী হৈশিংবা মশক খঙবা অমসুং মীয়ামদা থৌনা পীবগী থবক তৌরি। মুদ্রা য়োজনাগী মখাদা বেনিফিসরী কোতি ১২দা লুপা কোতি লাখ ৫.৭৫ রোম য়েন্থোকখ্রে।

করিগুম্বা মতমদা স্কিমশিংগীদমক সরকারগী ফন্দ মরাং কাইনা লৈরবসু ফজনা শীজিন্নদবা য়াওরকই। অদুবু অদোম্না অঙকপা পোক্কনি, মদুদি মুদ্রা অসি পান্দম অদুদগী লোনগী শেলফম্না হেনবা স্কিম অমনি।

স্কিম অসিগী মখাদা, অহানবা ওইনা মখোয়গী ললোন-ইতিক্কী থবক পায়খৎপা মীওইশিংদা চাদা ২৮গী চাংদা নৎত্রগা লুপা কোতি লাখ ৩.২৫ পীখ্রে। মসিনা মতম শাংনা থবক ফংদদুনা লাক্লবা মীওইশিংদা থবক ফংহল্লে।

স্কিম অসিগী খ্বাইদগী ফজবা অমনা, স্কিমগী বেনিফিসরীশিংগী চাদা ৭৫দি নুপীনি, হায়বদি নুপী কোতি ৯ বেনিফিসরীশিংনি। নুপী অমনা চাউখৎলকপা মতমদা, মহাক্না শেল-থুমগী মরুওইবা থবক তৌরকপা মতমদা ইমুং অপুনবদুগী ওইনা ফগৎলকই অমসুং মখোয়গী ৱাখল হোংলকই অমসুং খুন্নাই অদু চাউখৎলকই। মসিগা চপ মান্ননা, মুদ্রা য়োজনাগী মখাদা পীখিবা অপুনবা লোনগী চাদা ৫৫দি শোৎথরবা কাংলুপ্তা পীরি। হায়বদি লোনগী চাদা ৫৫, বেনিফিসরী কোতি ১২ অসি এস সি/এস সি অমসুং ও বি সিগী মীওই কাংলুপশিংনি। মুদ্রা য়োজনা অসি মীচং মীখাই নাইদনা শোৎথরবা কাংলুপশিংদা শেল-থূমগী ফিবম অমসুং খুন্নাইগী ফিবম ফগৎনবা থবক তৌবা স্কিম অমনি।

চৈরক অসিদা, লুপ কয়া ইহৌ অসিদা শরুক য়ারক্লে। হৌজিক বেঙ্ক ১১০ খক নত্তনা, মাইক্রো ফাইনান্স ইন্সতিতুৎ ৭২ অমসুং নন-বেঙ্কিং ফাইনান্সিয়েল কম্পেনী (এন বি এফ সি) শিংনা মুদ্রাগী লোন পীবা হৌরক্লে। মুদ্রা লোন পীবগী থবকশিং বেঙ্কশিংনা লাইথোকহল্লে। চে-চাং শুবগী থবক্তা লাইথোকহল্লে অমসুং চে-চাং খোমজিনবা অসি পাখৎনীংঙাই ওইদ্রে। ঙসিদি, ইশানা ইশাবু থবক পীজবা অসি চাউথোকচনীংঙাই ওইরে অমসুং অদোমনা মীওই কয়াগী থৌনা পীবা ঙম্লে।