ভারতকী প্রধানমন্ত্রী

আর.বি.আই.গী গবর্নর শ্রী সঞ্জয় মালহোত্রা জী, গ্লোবেল ফিনতেক ফেস্তকী চেয়রমেন, ক্রিস গোপালকৃষ্ণন জী, ফিনতেক্কী লমগী ইন্নোবেতর, লুচিংবা অমসুং ইনভেস্তর পুম্নমক, নুপী অমসুং নুপাশিং।

গ্লোবেল ফিনতেক ফেস্ত অসিদা ভারত অমসুং মপান লৈবাকশিংদগী লাকপা মীথুংলেনশিং অমসুং দেলিগেৎ পুম্নমকপু ঐনা তরাম্না ওকচরি। ঙসি অতোপ্পা হেৎ ত্রিক অমা পাংথোকখিবা অসিদা ঐহাক নুংঙাইবা ফাওই। অহানবা হেৎ ত্রিক অসি ২০২৪দা লৈঙাক অসি অহুমশুবা ওইনা শেমখিবা মতমদা পাংথোকখি। অমসুং অতোপ্পা হেৎ ত্রিক অমনা অদোমগী মরক্তা ঐহাক্না লৈজবা অসিনি। মসি গ্লোবেল ফিনতেক ফেস্ততা ঐহাক্না মথং-মথং শরুক য়াবা অহুমশুবা চহিনি। মসিগী হেৎ ত্রিক অসিনা চাউখৎলবা ভারত অমগীদমক অদোমগী মরুওইবা, অদোমগী থবক কয়া য়াম্না মরু ওইবগে হায়বদু উৎলি।

মরুপশিং,

ঐহাক্না মফম অসিদা লাকপা খুদিংগী, ঐহাক্না নহাশিংবু হেন্না উবা ফংই, ঐহাক্না হেন্না ইনর্জী ফংই। ওইথোকপা য়াবা কয়া অমা ঐনা উবা ফংলি। রিস্ক লৌবগী কেপাসিতী হেনগৎলক্লি, মঙলানশিং অসি হেন্না থৌনা লৈরক্লি হায়বসি ময়েক শেংলে। অমসুং মরম অসিনা, চাউখৎলবা ভারতকী তুংলমচৎকী ঐহাক্কী থাজবা অসি হেন্না মপাঙ্গল কনখৎলক্লি।

মরুপশিং,

ফিনতেককী ইনর্জী অসিগী মরক্তা, মুম্বাইনা হৌজিক্তি কলচরেল ইনর্জীগী অৱাংবা থাক্তা লৈরি। নুমিৎ খরনিগী মতুংদা, গনেশোৎসব অসি মহারাস্ত্র অমসুং লৈবাক শিনবা থুংনা হৌরগনি। ঐখোয়গী চৎনবীগী মতুং ইন্না অফবা থবক খুদিংমক পাংথোক্ত্রিঙৈদা ভগবান গনেশপু নীংশিংবা তাই। গনপতি বাপ্পাগী মফমদা ইকায় খুম্নবা উৎচরি। গ্লোবেল ফিনতেক ফেস্ত ২০২৬কীদমক্তা ঐহাক্না ময়াম পুম্নমকপু য়াইফ-পাউজেল পীজরি।

মরুপশিং,

মালেমগী ফীভম অসি করিনো হায়বদু ময়াম পুম্নমক্না ফজনা খঙনরবনি। মালেম অসি চয়েৎনবা অমসুং তম্বা ঙমদবা মতম অমা থেংনরি। ইনর্জী অমসুং কম্মোদিতীগী সপ্লাই চেন অসি প্রেসরগী মখাদা লৈরি, ললোন-ইতিক্তা তেন্সন লৈরি। হায়রিবা ফিভমশিং অসি থা কয়াদগী লৈরক্লি। এপ্রিলদগী জুন ফাওবগী ক্বার্তর অসি খ্বাইদগী খুদোংচাদবা ওইখি। অসিগুম্বা ফিভম অমদা লৈরবসু, ভারতনা চাদা ৭.৮গী গ্রোথ লৈবা মতমদা, মালেম অসিনা অনৌবা থাজবা অমা ফংলি। অমসুং মসিগী থাজবা অসি, ঐহাক্না অদোমগী মফমসিদা অদোমগী মাইথোংদা ময়েক শেংনা উবা ফংই।

মরুপশিং,

ভারত্তা থাজবা হেনগৎলক্লিবা অসিগী অতোপ্পা খুদম অমদি ঐখোয়গী সোভরেন রেতিংশিংনি। ইকুই কুইদ্রিঙৈদা, জপানগী ক্রেদিৎ রেতিং এজেন্সী অমনা ভারতকী সোভরেন রেতিংশিং এ কেতেগোরীদা অপগ্রেদ তৌখি। অপগ্রেদ তৌবা হায়বসি নুংঙাইবা ৱাফম অমনি, অদুবু মীওই খরা খক্তনা খংই মদুদি মসিগী শেন্দোং অসি চহি তরাগী খুজিং অহুমগী মতুংদা লাকপনি – চহি কুনথ্রাগী মতুংদা। মসিনা ভারতকী গ্রোথ মোমেন্তম, ঐখোয়গী মেক্রো ইকোনোমিক স্তেবিলিতী, অমসুং হৌখিবা চহিশিংদা পাংথোকখিবা স্ত্রকচরেল রিফোর্মশিংগী মতাংদা মালেমনা করম্না থাজবা লৈবগে হায়বদু উৎলি। অমসুং ঐহাক্না অমুক্কা হন্না হায়জরি, ভারতকী রিফোর্ম এক্সপ্রেস অসি হেন্না থুনা মাংলোমদা চংশিল্লগনি।

মরুপশিং,

ভারতকী ফিনতেককী ৱারী অসি অখন্নবা অমনি। অমসুং মসিগী খ্বাইদগী চাউবা চেম্পিয়নশিংগী মনুংদা অমদি ঐখোয়গী য়ু.পি.আই.নি। মমাং চহিদসু ঐহাক্না মসিগী মতাংদা ঙাংখি। অদুবু হায়রিবা অহোংবা অসি অসি য়াম্না চাউই মদুদি ফিনতেকগী মতাংদা খন্ন-নৈনরকপা মতমদা, মসি য়ু.পি.আই. য়াওদনা মতম পুম্নমক্তা মপুং ফাদ্রি।

মরুপশিং,

নুমিৎ খরনিগী মমাংদা, ওগস্ত ২৫দা, য়ু.পি.আই.না চহি ১০ মপুং ফারে। চহি ১০গী মমাংদা, ঐহাক্না অদোমগী বেঙ্ক অদু অদোমগী খুৎনা ফংবা ঙমগনি হায়না হায়রকপা মতমদা, মীওই খরনা মসি ওইথোক্লোই হায়না খনখি – অমসুং ঐহাক্না ময়েক শেংনা খঙলবা মীওইশিংগী মরমদা ঙাংলি, মখোয়গী মশকশিং অদু নীংশিংউ। ঐনা মতম অদুদা বেঙ্ক একাউন্ত হাংদোকখিবা মীওই মিলিয়ন কয়াগী মতাংদা ঙাংবা নত্তে। মখোয়গী মীরোলশিংনা বেঙ্ক অমগী থোঙ অমুক্তা উখিদ্রি। অদুবু ঙসি, চহি ১০গী মতুংদা, য়েংবীয়ু – মীরোল কয়াদগী বেঙ্কিং সিস্তেমগী মপান্দা লৈরম্বা মীওই মিলিয়ন কয়া অসি ভারত্তা ফিনতেক চাউখৎপগী অচৌবা দ্রাইভরশিং ওইরক্লি।

মরুপশিং,

ঙসি, ওগস্ত থাদা খক্তদা, য়ু.পি.আই.গী খুত্থাংদা ত্রাঞ্জেক্সন করোর ২,৪০০ হেন্না পাংথোকখ্রে। মসিনা তাকপদি, ঐখোয়না মফম অসিদা লৈরিঙৈ মতমগী মনুংদা, মিনিত ১০ খক্তদা, লৈবাক শিনবা থুংনা য়ু.পি.আই. ত্রাঞ্জেক্সন মিল্লিয়ন ৫ হেন্না পাংথোকখ্রে। মসিনা মরম ওইদুনা ফ্রান্সকী রাস্ত্রপতি মেক্রোননা হায়খি মদুদি য়ু.পি.আই. অসি তেক্নোলোজীগী ৱারী খক্তা নত্তে, মসি সিভিলাইজেস্নেলগী স্তোরীনি।

অমসুং মরুপশিং,

য়ু.পি.আই. অসি হৌজিক্তি ভারত খক্তদা য়ুম্ফম ওইদ্রে। চহি খরগী মমাংদা, করিগুম্বা কনাগুম্বা অমনা ভারত্তা লৈবা বেঙ্ক একাউন্ত অমদগী হকথেংননা মপাল লমদা শেল থাদবা য়াগনি হায়রবদি কনাগুম্বা অমত্তনা থাজরম্লোই। অদুবু ঙসিদি, মসি তশেং-তশেংনা ওইরে। ভারতকী য়ু.পি.আই. অসি হৌজিক লৈবাক ১১দা চৎনবা হৌরে। মসি অখন্নবা মশীংশিংনি, ঐখোয়না চৎখিবা খোঙচৎ অসি কয়া শাংখ্রবগে হায়বদু উৎলি। অদুবু হৌজিক লাক্লিবা ৱাহংদি – ঐখোয়না মসিগী খোঙচৎ অসিদা অপেনবা পোক্লব্রা? ভারত্তা ফিনতেককী মায় পাকপা অসি অরোইবা ওইনা লৌগদরা?

মরুপশিং,

পোলিসী অমসুং গবর্নান্সকী ইকোসিস্তেমদা ঐহাক্না চহি ২৫ মপুং ফারক্লি। অমসুং চহিশিং অসিদা ঐহাকপু উখিবা মীওইশিংনা খঙই মদুদি মোদী অসি মাইলস্তোন অমদা লেপচবা, নুংঙাইবা ফোংদোকপা, অমসুং অপেনবা পোকপা মীওই নত্তে। করিগুম্বা ঐহাক্না পান্দম অমা ফংলবদি, ঐহাক্না হেন্না চাউবা পান্দম অমগীদমক খুদক্তা শেম-শাবা হৌই।

মরুপশিং,

ঙসিদি ঐখোয়গী য়ু.পি.আই.না লৈবাক কয়াদা য়ৌশিনখ্রে। অদুবু মসি অহানবা খোংথাং খক্তনি। ঐখোয়গী মথংগী পান্দমদি লৈবাকশিং অসিগী পেমেন্ত সিস্তেমশিংগা শম্নবনি। ঐখোয়না মসি সিঙ্গাপুরগা লোয়ননা হান্ননা তৌখ্রে। মসিনা মরম ওইদুনা, ভারত অমসুং সিঙ্গাপুরগী মরক্তা ত্রাঞ্জেক্সনশিং অসি শহর অমখক্তগী মফম অনিগী মরক্তা তৌবগুম্না পাংথোকই। ঐখোয়না অতোপ্পা লৈবাকশিং, অতোপ্পা কৈথেলশিংগা লোয়ননা চপ মান্নবা মরী অসি শেমগৎকদবনি। ঐখোয়না মসিগী পান্দম অসিগা লোয়ননা মাংলোমদা চংশিনবা তাই। মফম খুদিংমক্তা ভারত মচা কয়ানা মশিং য়াম্না লৈরি, মফম খুদিংমক্তা ভারতনা পাক চাউনা ললোন-ইতিক তৌরি, লৈবাক খুদিংমক্না ঐখোয়গা চৎমিন্ননবা শেম-শারি – ঐখোয়না মখোয় পুম্নমকপু শম্নহন্নবা থবক তৌগদবনি।

মরুপশিং,

মসিসু মথৌ তাই মরমদি মপান লৈবাক্তা, ভারত মচা কয়ানা থবক তৌরি। অমসুং ভারতকী মীওইশিংনা য়ুমদা শেল থাবদা মালেমদা খ্বাইদগী মশিং য়াম্বা ওইরি। অদুবু ঙসিদি, শেল অদুগী শরুক অমা ত্রাঞ্জেক্সন কোস্তশিংদা মাংখ্রে। য়ু.পি.আই.না মসিদসু ভারত মচাশিংবু কনবা ঙমগনি, অমসুং শেল অসি ভারত মচাশিংগী ইমুংশিংদা হেন্না থুনা য়ৌহনবা ঙমগনি।

মরুপশিং,

ঙসি ভারত্তা কার্দকী মতেংনা শেল থাবসি করম্না পাংথোকপগে? সিস্তেম অসি অতোপ্পা মফম অমদা দিজাইন তৌখিবা স্তেন্দর্দশিংদা চৎলি। ঐখোয়না অতোপ্পশিংনা শেমখিবা থাক অমসুং কাংলোনশিং অদু শিজিন্নখি। মতম অদুদা, ঐখোয়গী ইশাগী অপাম্বা লৈরমদে। অদুবু হৌজিক ঐখোয়গী ইশাগী অপাম্বা অমা লৈরে। হৌজিক ঐখোয়না ঐখোয়গী ইশাগী কাংলোনশিং অমসুং স্তেন্দর্দশিং শেম্বা ঙম্মী, অমসুং মখোয়বু মালেমগা শম্নহনবা ঙম্মী। অদোম পুম্নমক্না মসি তৌবা ঙমগনি হায়না ঐহাক্না অদোম পুম্নমক্তা থাজবা থম্লি।

মরুপশিং,

তেক্নোলোজী অসি ইনক্লুজনগী খ্বাইদগী ইফেক্তিব ওইবা খুৎলাইনি। অমসুং য়ু.পি.আই.না মসি উৎখ্রে। ফিনতেক লাকপদা, মসিগী অখন্নবা মগুন অসি ত্রেদিস্নেল মোদেলশিংনা ফংলমদবা মফমশিংদা য়ৌহনবা ওইগদবনি। ত্রেদিস্নেল বেঙ্কশিংনা, বেঙ্ক ব্রাঞ্চশিংনা ফংলমদবা মফমশিংদা, য়ু.পি.আই.না বেঙ্কিং সিস্তেম অদু মফম অদুদা, মীওই অদুদা পুখ্রে।

মরুপশিং,

ঙসিদি, ফিনতেক মার্কেৎকী অচৌবা শরুক অমা পেমেন্ত খক্তনি। অদুবু হৌজিক ঐখোয়না মথংগী থাক্তা চংশিনবা তাই, অমসুং খোঙজেল য়াংনা চংশিনগদবনি। ফিনতেক কৈথেলদা, পেমেন্তশিংগা লোয়ননা ক্রেদিৎ ত্রাঞ্জেক্সনশিংগী শরুকসু হেনগৎকদবনি, ইন্সুরেন্সকী শরুকসু হেনগৎকদবনি, সেভিং, ইনভেস্তমেন্ত অমসুং পেন্সনগী শরুকসু হেনগৎকদবনি।

মরুপশিং,

ত্রেদিস্নেল ফাইনান্সিএল মোদেলশিংনা য়ৌশিনবা ঙমদ্রিবা, নৎত্রগা মতিক চানা অৱাবা কোকহনবা ঙমদ্রিবা লৈবাক অসিগী শক্তি অদু ফিনতেক্না পুথোকপা ঙমগনি হায়না ঐহাক্না থাজৈ। চাউখৎলবা ভারত অমগীদমক, মসিগী শক্তি অসি পুথোকপা অসি য়াম্না মথৌ তাই।

মরুপশিং,

পি.এম. স্বানিধিগী মায় পাকপদা ঐখোয়না মসিগী ইম্পেক্ত অদু উবা ফংলি। ঐখোয়গী লম্বীদা পোৎ য়োল্লিবশিং অসি শহরশিংগী মপুং ওইবা শক্তমনি। অদুবু মখোয় অসি লৈবাক অসিগী বেঙ্কিং সিস্তেমগী মপান্দা লৈরম্মি, ফোর্মেল ক্রেদিৎ সিস্তেমগী মপান্দা লৈরম্মি। পি.এম. স্বানিধিনা লম্বীদা পোৎ য়োনবা মীওই মিলিয়ন কয়াবু ফোর্মেল সিস্তেমগা শম্নহনখি। অমসুং হৌজিক্তি মসিগী কম্পেনীশিং অসিদা স্বানিধি ক্রেদিৎ কার্দসু লৈরে – মসিনা তাক্লিবদি মখোয়দা ফোর্মেল ক্রেদিৎ এক্সেসকী খুৎলাই অমা লৈরে। অমসুং স্তদীশিংনা উৎলি মদুদি হায়রিবা বেনেফিসরীশিং অসিগী চাংচত্তা চহিগী ওইবা ইনকম অসি চাদা ২০ হেনগৎলে। মসি খক্তা নত্তনা, মখোয়গী ইমুং মনুংনা য়ুম, ন্যুত্রিসন, হেল্থকেয়র এক্সেস অমসুং অঙাংশিংগী এজুকেসনদা ফগৎলকপা উবা ফংলে। মরম অসিনা সরকারনা স্কিম অসি ২০৩০ ফাওবা শাংদোক্নবা ৱারেপ লৌরে।

মরুপশিং,

য়ু.পি.আই.না লৈরমদ্রবদি পি.এম. স্বানিধিনা মসিগী মায় পাকপা অসি ফংলম্লোই। স্কিম অসি মায় পাকহনবদা য়ু.পি.আই.না অচৌবা থৌদাং লৌখি। অসিগুম্বা এক্সপরিয়েন্স অসিদগী তম্লদুনা, ঐখোয়না ফিনতেক্কী শক্তি অসি ইকোনোমিক এক্তিবিতীশিং মখা তানা হেনগৎহন্নবা শীজিন্নগদবনি। ঐহাক্না কেপিতেল অমসুং ক্রেদিৎকী মালেমদগী খুদম অমা পীজগে। অপীকপা দুকান অমা চলাইরিবা ঐগী ইচননুপী অমা লৈ। মহাক্না নুমিৎ খুদিংগী দিজিতেল পেমেন্তশিং ফংই। হৌজিক্তি মহাক্কী ইনকম অমসুং শেল থাদবগী মওং অসি ময়েক শেংনা উবা ফংলে। মহাক্কী ললোন-ইতিক অসি ফজনা চৎলি। মহাক্না অপীকপা কেপিতেলনা মতিক চানা লৈবগী থাক অদুদগী হেন্দোকখ্রে। হৌজিক মহাক্কী ব্যুজিনেস পাকথোক চাউথোকহন্নবা পোৎলমশিং, খুৎলায়শিং মথৌ তাই, অমসুং মসিগীদমক্তা মহাক্না শেল হেন্না চঙই। মসি য়াম্না চাউবা ক্রেদিৎ নত্তে। অমসুং মহাক্কী বিজিনেস অসি হৌজিক ফাওবদা য়াম্না পীক্লি মরমদি ত্রেদিস্নেল ক্রেদিৎ মোদেলশিংনা মহাকপু মপুং ফানা মতেং পাংবা ঙমদে। ফিনতেক্না এনালাইসিস তৌবা, মাংজৌননা খংদোকপা অমসুং থেংননবা মথৌ তাবা অসিগুম্বা বিজিনেস কয়া অমা লৈ। অমসুং অসিগুম্বা ললোন-ইতিক্কী মশিং অসি য়াম্না চাউই।

মরুপশিং,

তেক্নোলোজীনা অসিগুম্বা বিজিনেসশিংগী ইকোনোমিক এক্তিবিতীশিং নৈনবদা অমসুং মখোয়গীদমক্তা ক্যুরেতেদ মোদেলশিং দিজাইন তৌবদা মতেং পাংই। ঐনা থাজৈ মদুদি ফিনতেক্কী মথংগী পন্দুপ অসি মফম অসিদা ইগনি। ঐখোয়না শেল থাদবগী চাং অমসুং অঙম্বা থৌওং উৎলি। হৌজিক ঐখোয়না নন-পেমেন্ত ত্রাঞ্জেক্সনগী শরুক হেনগৎহনবদা মতেং পাংগদবনি। খুদম ওইনা, দেলিভরী পার্তনর অমা, নৎত্রগা অপীকপা থবক খরা তৌরিবা মীওই অমা – মহাক্না থা খুদিংগী শেল ফংগনি, অদুবু মহাক্না সেভিং অমসুং পেন্সনগী পোৎলমশিংগুম্বা সর্ভিসশিং ফংহনবা মথৌ তাই। ফিনতেক্না অসিগুম্বা মীওইশিংগী মথৌ তাবশিংদু কোকহনবা ঙম্মি। মসিগা মান্ননা, ফিনতেক্না ইন্সুরেন্স প্রদক্তশিং অমসুং অতোপ্পা ফাইনান্সিএল সর্ভিসশিং ফংহনবদা হেন্না লায়থোকহনবা য়াই। মসি পুম্নমক অসি ঙসি ক্যু.আর. কোদ শীজিন্নদুনা শেল থাদবগুম্না অচম্বা, লায়না অমসুং খুদোংচাবা ফংহনবা য়াই।

মরুপশিং,

২১শুবা চহি চাগী অহানবা ক্বার্তর লোইখ্রে। হৌজিক ঐখোয়না ২০২৬কী চহিদা লৈরি। অনিশুবা ক্বার্তর অসিনা ঐখোয়গীদমক অনৌবা ওইথোকপা য়াবশিং পুরক্লি। এজেন্তিক এ.আই., তোকেনাইজেসন, ক্বান্তম – অসিগুম্বা তেক্নোলোজীশিং অসিনা ফাইনান্সিএল সেক্তরদা অনৌবা ওইথোকপা য়াবশিংগী থোঙ হাংলি। হৌজিক ঐখোয়গী মায়োক্তা লৈরিবা শিংনবসি ওইথোকপা য়াবশিং অসিবু মতৌ করম্না অশেংবা ইম্পেক্ত অমদা ওন্থোক্কদগে হায়বসিনি। অমসুং মসিগীদমক্তা, ঐহাক্না ঐখোয়গী ফিনতেক কম্পেনীশিংবু মখোয় মশাগীদমক থবক খরা লেপহন্নবা পাম্মি। অমসুং ঐহাক্না অদোমগী মমাংদা খোংথাং খরা থমজবা পাম্মি। অহানবদা – ঐখোয়না ভারত্তা সাইবর সেক্যুরিতী অসি খ্বাইদগী ৱাংবা থাক্তা পুখৎকদবনি। অনিশুবদা – ঐখোয়গী ইন্দস্ত্রীদা দেতা ঙাকপগী মশাগী ইথিকেল স্তেন্দর্দ লৈগদবনি। অহুমশুবদা – ঐখোয়না ফিনতেক রিগুলেতর ইন্দস্ত্রী ইনোবেসন ইকোসিস্তেম অমা মপাঙ্গল কনখৎহনগদবনি। মরিশুবদা, ঐখোয়না ফিনতেক কঞ্জুমর প্রোতেক্সন ইন্দেক্স অমা লৈগদবনি, মদুগী য়ুম্ফমদা কম্পেনী খুদিংমক্না ত্রান্সপরেন্ত রেতিং অমা ফংগনি। করিগুম্বা ঐখোয়না হায়রিবা পেরামিতরশিং অসিদা মশানা মশাবু চাংয়েং তৌরবদি, ভারতকী ফিনতেক সেক্তর অসি মশিং থীঙমদ্রবা ওইথোকপা য়াবশিংগী থোঙজং ওইরকপা য়াই। ঐখোয়গী এক্সপরিয়েন্স লৈ, অমসুং মসি লমদমসিদা চৎনহন্নবা পাম্বৈসু লৈ। মরম অদুনা, ঐখোয়না অথুবা মতমদা থবক তৌগদবনি।

মরুপশিং,

দিজিতেল ইন্দিয়াগী মায় পাকপগী ৱারী অসি অনৌবা পন্দুপ অমগীদমক হৌজিক শেম শাদুনা লৈরে। হৌজিক ফাওবদা ঐখোয়গী ফিনতেক ৱারীগী মায় পাকপা অসি স্কেল, স্কোপ, সেক্যুর সিস্তেমশিং, তেক্নোলোজীগী দেমোক্রেতাইজেসন, অমসুং মীয়ামগী থাজবা ওইরি। মপুং ওইবা ভেল্যুশিং অসি ৱাখলদা থমদুনা, ফিনতেক সেক্তরনা মথংগী জেনরেসনগী ইনোবেসনদা মীৎয়েং থমগদবনি। মসিগী আপিল অসিগা লোয়ননা, ঐহাক্না অমুক্কা হন্না ময়াম পুম্নমকপু য়াইফ-পাউজেল পীজরি। হন্না-হন্না থাগৎচরি।

***