ভারতকী প্রধানমন্ত্রী

অহানবা মক্তদা ঐহাক্না মুম্বাইগী হোস্পিতালদা থোকখিবা লাইবক থিবা থৌদোক অদুগীদমক নুঙাইতবা ফোংদোকচরি। থৌদোক অদুগী মতাংদা ঐহাক্না মুখ্যমন্ত্রীগা ৱারি শানরে। রাজ্য সরকারনা অৱাবা নংলবা ইমুং মনুংশিংগী পাংবা য়াবা মতেং পাংলি। থৌদোক অসিদা লৈখিদ্রবশিংগী ইমুং মনুংগী অৱাবদা ঐহাক্না শরুক য়াজরি।

মরূপশিং,

জর্নেলিস্তশিংনা পুক্নিং থৌগৎলবা, জর্নেলিস্তশিংনা মথৌ পাংথোক্লিবা, শেংলবা জর্নেলিজমগী মশক ওইরিবা, রিপব্লিক তি.ভি, অচেৎপা চাংয়েং অমনি। য়াম্না তেনবা মতমদা অদোমগী চেনেলনা মশাগী ওইবা শক্তম অমা তাক্লি। অদোম ময়াম্না লৈবাক অসিগী মীপুম খুদিংগী মফমদা অচুম্বা ই–পাউ য়ৌহনবদা মরুওইবা থৌদাং লৌরি। ঐহাক্না রিপব্লিক তি.ভি.গী মেনেজমেন্ত অপুনববু, মফম অসিদা থবক তৌরিবা জর্নেলিস্ত পুম্নমকপু, লৈবাক্কী তোঙান তোঙানবা মফমদা থবক তৌরিবা রিপোর্তরশিংবু নুঙাইবা ফোংদোকচরি। লৈবাক অসিগী ওইরিবা ফিভম অমসুং মায়কৈ অদোমদা ৱাখল্লোন ফোংদোকপগীদমক, অসিগুম্বা মখলগী প্রোগ্রাম পোংথোক্তুনা অদোম্না অনৌবা ৱাখল্লোনশিং, অনৌবা সোলুসনশিং অদুগীদমক ময়াম পুম্নমকপু হন্না হন্না নুঙাইবা ফোংদোকচরি।

মরূপশিং,

নীং তম্বা ফংদ্রিঙৈ মমাংদা, নীং তম্বদা ঙাওজবা অদুমক জর্নেলিজম ওইরম্মি। মাস মেদিয়ানা নীং তম্বগী বেঙ্গুল খোংলম্মি। নীং তম্লবা ভারত্তা নুঙাই য়াইফবা লৈবাক্কীদমক অচুম্বা অচেৎপা পাউশিং য়াম্না মরু ওই। লৈবাক মীয়াম্না করিগুম্বা খরা তৌনীংবা পোক্নবা, লৈবাক অসিবু মাংলোমদা পুদুনা চৎনীংবা ফাওনবা, মসি য়াম্না মরু ওই।

সাইন্স ওইগেরা, তেক্নোলোজী ওইগেরা, ইনোবেশন ওইগেরা, শান্ন খোৎনবা ওইগেরা, মতৌ অদুম্না মালেমদা ভারতকী খোঞ্জেল নিলহন্নবগীদমক ঐখোয়গী মীদিয়াসু গ্লোবেলগী থাক্তা য়ৌহনবা, গ্লোবেলগী থাক্তা মশক তাকপা অসি মতম অসিগী অপাম্বনি। ঙসিদি ভারতকী মীদিয়ানা মালেমদা চেলেঞ্জ অসি মায়োক্নগদবনি।  

মরূপশিং,

সর্জিং ইন্দিয়া, ৱাহৈ অনি অসি ভারত মচা কোতি ১৩০ ৱাখল্লোনগী খুদম্নি। সমাজ অসিদা হিংলিবা পুন্সিগী মায়কৈ খুদিংদা মদুনা গ্লোবেলগী ফম্বাকথক্তা অচুম্বা মফম অদুগী মায়কৈদা খোংজেল য়াংনা মাংলোমদা চশিল্লি। ভারতকী শেল থুমগী ফিভম ওইগেরা, ভারতকী হৈজ শিংজবা ওইগেরা, ভারতকী সমাজকী ওইবা ফিভম ওইগেরা, ভারতকী সংস্কৃতিগী মগুন ওইগেরা, থাক খুদিংমক্তা ভারতকী শক্তম হেন্না চেৎশিল্লক্লি।

মরূপশিং,

ঙসি ঐহাক মীদিয়াগী ফম্বাকথক্তা লৈরি, ৱাহং হংবা অসি অদোম্না য়াম্না পামজৈ, মরম অদুনা ঐহাকশু ৱাহং খরগা লোয়ননা ঐহাক্কী ৱাফম হৌদোকচগে। হায়নবা লৈ লোয়নবগী মতুং ইন্না মচু ওল্লি, মীকুপ খরা অদোমগা লৈমিন্নবা অদুনা ঐহাকসু হৈনবি অদু লৈরে। অদোমগী ৱাহংশিংদা ৱাফম কয়া অমা লোত্তুনা থম্বা মতৌ অদুগুম্না ঐহাক্কী ৱাহংশিংদসু অদোম্না সর্জিং ইন্দিয়াগী পাউখুম কয়া অমা মশা মথন্তা ফংলগনি।

মরূপশিং,

ভারতনা অশুক য়াম্না থুবা মতমগী মনুংদা ফাইব ত্রিলিয়ন দোলর ইকোনোমীজকী ক্লবতা য়াওনবগী মায়কৈদা খোং খাংজিল্লগনি হায়না চহী মরিগী মমাদা কনাগুম্বা অমত্তনা খনখিবা লৈখিব্রা? চহী মরিগী মমাদা কনাগুম্বা অমত্তনা খনখিবা লৈখিব্রা মদুদি ইজ ওফ দুয়িং বিজিনেসকী রেঙ্কিংদা ১৪২দগী ৭৭তা হায়গৎলগনি, ভারত মকোকথোংবা ৫০গী মনুং চন্নবা খোংজেল য়াংনা মাংলোমদা চংশিল্লি। ভারত্তা ত্রেন তোংদুনা চৎলিবা মীশিংদগী হেন্না প্লেন তোংদুনা চৎলগনি হায়না চহী মরিগী মমাদা কনাগুম্বা অমত্তনা খনখিবা লৈখিব্রা? এরোপ্লেনদা ফমলগনি হায়না? চহী মরিগী মমাদা কনাগুম্বা অমত্তনা খনখিবা লৈখিব্রা মদুদি রিক্সা থৌবা মীওইসু, মনা–মশিং য়োনবা মীওইসু অমসুং চা য়োনবা মীওইসু ভিম এপ্লিকেসন শিজিন্নবা হৌরগনি, মশাগী ফুরিৎখাওদা রুপে দেবিত কার্দ খম্দুনা মশানা মশাবু থাজবা হেঙ্গৎহল্লগনি?

ভারতকী এভিয়েসন সেক্তর য়াম্না থুনা খুমাং চাওশিন্দুনা কম্পেনিশিংনা অনৌবা এরোপ্লেন লিশিং অমা ওর্দর তৌরক্কনি হায়না চহী মরিগী মমাদা কনাগুম্বা অমত্তনা খনখিবা লৈখিব্রা? অদোম্না মসি খংলুবদা অঙকপা ফাওগনি মদুদি ঐখোয়গী লৈবাক অসিদা নীং তম্লবা মতুংদগী হৌজিক ফাওবদা অপুনবা এরোপ্লেন ৪৫০ মথৌ তৌরি, প্রাইভেৎ ওইগেরা, পব্লিক ওইগেরা, সরকারগী ওইগেরা, অমা হেক্তা ওইগেরা। চহি অমদা অনৌবা এরোপ্পেন লিশিং অমা ওর্দর তৌবনা মসি তাক্লি। ভারত্তা নেস্নেল ৱাতরৱেজ অসি অচুম্বা ৱাফম অমা ওইগনি, কোলকত্তাদগী জহাজ অমা গঙ্গা তুরেলদা চৎকনি অমদি বনারস ফাওবা পোৎ পুদুনা চৎকনি হায়না চহী মরিগী মমাদা কনাগুম্বা অমত্তনা খনখিবা লৈখিব্রা? ভারত্তা শাজবা ইঞ্জীন য়াওদবা ত্রেনগী চাংয়েং পাংথোক্লগনি মদুনা পুংদা কিলোমীতর ১৮০গী খোংজেলদা চেল্লগনি হায়না চহী মরিগী মমাদা কনাগুম্বা অমত্তনা খনখিবা লৈখিব্রা?

ভারতনা অমুক্তদা সেতেলাইৎ চামা থাগৎপগী রেকোর্দ থমগনি হায়না চহী মরিগী মমাদা কনাগুম্বা অমত্তনা খনখিবা লৈখিব্রা, অমদি মদুদসু নত্তনা গগনয়ানগী পান্দমদসু ঙসি মাংলোমদা চংশিল্লি। স্তার্ত অপকী তাইবংপালদগী হৌরগা শান্ন খোৎনবগী তাইবংপালদা ভারতকী ফিভম অসুক য়াম্না মাংলোমদা চংশিল্লক্কনি হায়না চহী মরিগী মমাদা কনাগুম্বা অমত্তনা খনখিবা লৈখিব্রা?

মরূপশিং,

ঐখোয়গী লমদম অসিদা সাইকোলোজী অমা লৈরি মদুদি করিগুম্বা সরকারগী মায়োক্তা মরাল শিরদুনা কনাগুম্বা অমনা কোর্ত্তা চৎপা মতমদা, সরকার অসি মরাল লরমগনি অমদি মরাল শিরিবা মীওই অদু চুমলমগনি হায়না খল্লি। মসি মহৌশানা ঐখোয়গী ৱাখল্লোন্নি, স্কাম ওইগেরা, শেঞ্জা–থুমজাগী মরাল শিরকপা ওইগেরা, মসিগী ৱাখল্লোন অসি ঐখোয়গী পুক্নিংদা লৈখ্রবনি, মরমদি ঐখোয়না মদু মমাংদা উখ্রে। অদুবু মসিমসু অহানবা ওইরি মদুদি সরকারদা শেঞ্জা থুমজাগী মরাল শিরদুনা লৈবাক অসিগী খ্বাইদগী চাওবা কোর্ত্তা চৎখি অমদি কোর্তনা মখোয়দা পাউখুম পীরে মদুদি পাংথোকখিবা থবক অদু অরোন অথুপ য়াওদনা পুকচেল শেংনা পাংথোকখি। ঐখোয়গী লৈবাক্তা অসুম্না ওইরক্কনি হায়না চহী মরিগী মমাংদা কনাগুম্বা অমত্তনা খল্লমলোই।

মরূপশিং,

ঙসি লৈবাক অসিগী মাংদা ২০১৪গী মমাংগী শক্তম অদু লৈরি মদুদা লু নানবগী চাংচৎ অদু চাদা ৪০গী মখাদা লৈরম্মি। হৌজিক ২০১৮গী লোইশিল্লকপদা চাংচৎ অদু হেঙ্গৎতুনা চাদা ৯৭ য়ৌরে। ঙসি লৈবাক অসিগী মমাংদা ২০১৪গী মমাংগী শক্তম অদু লৈরি, মদুদা লৈবাক অসিগী মীওই চাদা ৫০গী মফমদা বেঙ্ক একাউন্ত লৈরমদে। হৌজিক ২০১৮গী লোইশিল্লকপা অসিদা লৈবাক অসিগী ইমুং খুদিংমক বেঙ্কিং সিস্তেম্না শম্নহল্লে। ঙসি লৈবাক অসিগী মমাংদা ২০১৪গী মমাংগী শক্তম অমসু লৈরি, মদুদা তেক্স থিবা মীওইশিংগী মশিং কোতি ৩গা লাখ ৮০ ওইরম্মি। হৌজিক্তি চহি অসিদা মশিং অসি চাওরাক্না কোতি ৭ য়ৌরে।

ঙসি লৈবাক অসিগী মমাংদা ২০১৪গী মমাংগী শক্তম অমা লৈরি, মদুদা ইন্তরপ্রিনর শুপ্নগী লাখ ৬৫ খক্তনা তেক্স পীনবা রেজিস্তার তৌরম্মি। ঙসিদি শুপ্নগী চহি অমা মখায়গী মনুংদা অনৌবা ইন্তরপ্রিনর লাখ ৫৫ রেজিস্তার তৌনবা থোরক্লে। ঙসি লৈবাক অসিগী মমাংদা ২০১৪গী মমাংগী শক্তম অমা লৈরি, মদুদা মোবাইল শাবা কম্পেনি অনি খক্তমক লৈরম্মি। ঙসিদি অদুগুম্লবা মোবাইল মেন্যুফেকচরিং কম্পেনিশিংগী মশিং হেঙ্গৎতুনা ১২০ হেনখ্রে। ২দগী ১২০।

মরূপশিং,

মমাংগী অমসুং হৌজিক্কী অহোংবশিং অসিনা সর্জিং ইন্দিয়াগী য়াম্না অচেৎপা শক্তম অদু মাংদা থম্লি। মসি পুম্নমক ওইরিবগী মরমদি ঙসি লৈবাক অসিদা পোলিসী দ্রাইবন গোবর্নান্স অমসুং প্রিদিক্তেবল ত্রান্সপরেন্ত পোলিসীশিংবু য়ুমফম ওইদুনা ঐখোয়গী সরকার অসিনা মাংলোমদা চংশিল্লি। মসিগী মহৈ অদুননি ঙসি ভারত্তা খোংজেল শরুক অনি হেঙ্গৎনা হাইৱে শেমলিবা, খোংজেল শরুক অনি হেঙ্গৎনা রেল লাইনশিং অনি ওইহল্লিবা, ইলেক্ত্রিক ফংহল্লিবা, অনৌবা এয়ারপোর্ত অমসুং হেলিপোর্ত ১০০ হেনবদা থবক তৌরিবা, চহি ৩০–৩০, ৪০–৪০দগী পন্দুনা লৈরক্লবা প্রোজেক্তশিংবু মপুং ফানা পায়খৎলিবা।   

ঙসি অদোম্না ভারতকী মফম অমা হেক্তদা চৎপদা সাইনবোর্দ অমা শোইদনা উবা ফংগনি– ‘ৱার্ক ইন প্রোগ্রেস’।

মরূপশিং,

সাইন বোর্দ অসিনা তশেংনা ‘ইন্দিয়া ইন প্রোগ্রেস’ অদু উৎলি। শুপ্নতগী লম্বী–থোংশিং, ফ্লাই ওবর, মেত্রো খক্তা নত্তনা মফম অসিদা অনৌবা ভারত শেমগৎনবা থবক চত্থরি। ঙসি ঐহাক ‘কৈদৌনুংদা লেপ্পা নাইদবা সহর’ হায়নবা অদুগুম্লবা সহর অদুদা লৈরি। ঐহাক্না মফম অসিদা লেপতুনা অদোমদী মফমদা হায়নীংলিবদি ঙসিদি, ‘ভারত অসি কৈদৌনুংদা লেপ্পা নাইদবা সহর অমনি’। লেপ্পা নাইরোই, তপথবা তৌরোই, লোইবা নাইরোই: মসি ভারতনা ৱারেপ লৌরে।

মরূপশিং,

মুম্বাইদশু কিলোমীতর ২২ শাংবা মুম্বাই ত্রান্স হার্বর লিঙ্ক শেমগৎ–শাগৎপা, মুম্বাই–অহমদাবাদ বুলেৎ ত্রেনগী থবক, দবল লাইন সব–অর্বান কোরিদোরগী থবক, কিলোমীতর কয়াগী মেত্রো কোরিদোরগী থবক, পুম্নমক অসি ইং ২০১৪দা কেন্দ্রদা বি.জে.পি.গী সরকার শেম্লবা মতুংদা হৌখিবনি। ইফমদা খংহনবিরে মদুদি অন্ধেরি–বিরারগী চিনখ্রবা সেক্সনদা অনৌবা ত্রেনশিংশু ফংহল্লগনি, মদুনা মসিগী রেল লাইন অসিগী কেপাসিতী চাদা ৩৩ ফাওবা হেঙ্গৎহল্লগনি।

মরূপশিং,

লৈবাক্কী অসিগুম্লবা দরকার ওইবশিং অসি মমাংদসু লৈরম্মি, মুম্বাইগী অসিগুম্লবা দরকার ওইবশিং, অসিগুম্বা মথৌ তাবশিং, মমাংদসু লৈরম্মি, চহী কয়াদগী লৈরম্মি। অদুবু হৌজিক থবক পায়খৎলি। করিগীনো খনবিয়ু? মসিগী পাউখুম অদুসু ঐহাক অদোমদা পীজগে অমদি তি.ভি.গী মীওইশিংগী মওং মতৌ অদুদা পাউখুম পীনবা হোৎনজগে।

মরূপশিং,

অসিগুম্লবা মল্তিপল ৱিন্দো অমা থা খুদিংগী দিল্লীদা প্রধান মন্ত্রীগী ওফিসতসু পাংথোকই। মীফম অদু প্রগতিগী ওই অমদি মদুদা চহি কয়াদগী পন্দুনা লৈরক্লবা প্রোজেক্তশিং য়েংশিল খোৎচিল্লি। হৌখিবা চহি মরিদা মতম কয়াদগী ফাইলশিংদা নমশিন্দুনা লৈরক্লবা অদুগুম্লবা প্রোজেক্ত অদু ঐহাক্না থিদোক্তুনা পুথোক্লে। ঐহাক্না ময়ামদা খংহনজনীংবদি হৌজিক ফাওবদা লুপা কোতি লাখ ১২ হেনবগী অরিবা প্রোজেক্তশিংগী রিভ্যু মীফম অসিদা পাংথোকখ্রে।

মরূপশিং,

ঐহাক্না নীংশিংলি মদুদি চাওরাক্না চহী অহুমগী মমাংদা প্রগতিগী মীফমদা ন্যু মুম্বাই ইন্তরনেস্নেল এয়ারপোর্তকী ৱাফম লাকখি, মদুদা ঐহাক অঙকপা ফাওখি। মুম্বাইদা অনিশুবা এয়ারপোর্তকীদমক ১৯৯৭কী নবেম্বর থাদা অহানবা ওইনা কমিতী শেমখি। মতম অদুদগী হৌরগা চাওরাক্না চহি ২০ ফাওবা ফাইল খক্তমক মফম অমদগী মফম অমদা কোইচৎ চৎলম্মি। মসিগী মরক অসিদা সরকার কয়া অমা লাকখ্রে, কয়া অমা চৎখ্রে, ফাইলশিং কোইপাই পাইদুনা লৈখি, এরোপ্লেনদি কৈদৌনুংদা পায়খিদে। অদুবু ন্যু মুম্বাই এয়ারপোর্তকী ফাইল অদু মাংলোমদা চংশিনবা ঙমলমদে।

প্রগতিগী মীফমদা মল্তিপল ৱিন্দো শেম্দুনা, ওফিসার পুম্নমক, দিপার্তমেন্ত পুম্নমকপু পুন্সিন্দুনা, অমত্তা ওইনা পুরক্তুনা, ঐখোয়গী সরকারনা প্রোজেক্ত অসিগী মাংদা লাক্লিবা অপনবা পুম্নমক কোকহনলে অমসুং হৌজিক ন্যু মুম্বাই এয়ারপোর্ততা খুমাং চাওশিন্না থবক চত্থরি। খনবিয়ু, মসি শুপ্নগী প্রোজেক্ত অমা খক্তগী ৱারিনি। অমদি ঐহাক্না অমুক হন্না হায়রি, অসিগুম্লবা লুপা কোতি লাখ ১২গী প্রোজেক্তশিংবু ঐখোয়না খোংজেল য়াংনা মাংলোমদা চংশিল্লি।

মরূপশিং,

মমাংগী সরকারনা ফুদ সেক্যুরিতী এক্ত পুদুনা লাকখি, ইশৈ য়াম্না শকখি, মখোয়গী ইশৈ শকপা মীওইশিং অদুনা য়াম্না লাও খোংদুনা ইশৈ শক্তুনা লৈখি। য়াম্না লাংখি, খুবাক য়াম্না খুখি, অদুবু ২০১৪দা ঐখোয়না শক্তি পায়রকপা মতম অদু ফাওবদা শুপ্নতগী রাজ্য ১১ খক্তনা মসিগী কান্নবা ফংলম্মি। খন্থবিয়ু, খুবাক কয়া অমা খুজরবসু ভারতকী মীশিং কয়া অমা মদুগী কান্নবা ফংবা ঙমলমদে।

ঐখোয়না লাক্লবা মতুংদা ৱারেপ লৌরে মদুদি অপুনবা রাজ্য ৩৬ অমসুং য়ুনিয়ন তেরিতোরিশিংগী প্রজাশিংগী মফমদা মসিগী কান্নবা অসি য়ৌহনগদবনি। মতৌ অসুম্না ২০১৩–১৪দা গ্যাসকী সিলিন্দর ১০ পীগনি নত্রগা সিলিন্দর ১২ পীগনি হায়না য়াম্না ঙাংনখি অমদি মসিগী মিংদা মীখল থেংনখি। অদুবু ২০১৪ ফাওবদা ভারত্তা শুপ্নতগী ইমুং চাদা ৫৫ খক্তদা গ্যাস কনেক্সন লৈরম্মি।

অদোম্না খন্থবিয়ু সিলিন্দর ১০ – সিলিন্দর ১২গী মিংদা মীখল থেংনখি অমদি লৈবাক অসিগী প্রজা তঙ্খাই অমগী মফমদা গ্যাসকী কনেক্সন লৈরমদে।

মরূপশিং,

ঐখোয়গী সরকার অসিনা সমস্যাশিংবু মতিক চানা লোইশিন্নবগীদমক থবক তৌরি, লৈবাক্কী মাংদা তারিবা খুদোংচাদবশিং অদুগীদমক পর্মনেন্ত সোলুসনগী মায়কৈদা চংশিল্লি। চহি কয়াদগী লৈবাক্কী চাওখৎ থৌরাংদা পন্থহল্লিবা অদুগুম্লবা সিস্তেমশিং অদু ঐখোয়না থুগাইরি অমসুং মুত্থৎলি। ঐহাক্না অদোমগী মফমদা ইনসোলভেন্সী এন্দ বেঙ্করপসী কোদ হায়বদি আই.বি.সি.গী খুদম পীবা পামজৈ।

ইচিল–ইনাও অমসুং ইচল–ইচেশিং,

হৌখিবা চহি অনি খক্তদা হৌজিক ফাওবদা লুপা কোতি লাখ অমগা লিশিং কুনমঙা অসিগুম্লবা কম্পেনিশিংনা মশা লাক্তুনা বেঙ্কশিংদা হঞ্জিল্লে। মসিগী মনুংদা শেনফম কয়া অমদি অপিকপা সপ্লায়রশিংগী ওইরম্মি, অপিকপা ইন্তরপ্রিনরশিংগী ওইরম্মি, এম.এস.এম.ই. সেক্তরগী ওইরম্মি। অইনগী চৈথেং ফংলবা অদুগুম্লবা কম্পেনিশিং অদুদগী হৌজিক ফাওবদা লুপা কোতি লাখ অমগা লিশিং হুমফুতরা মঙাগী শেন্দোল লৌশিল্লে। হায়বদি অমরোমদা য়েংলবদি ২০১৬তা অনৌবা আইন শেমখিবা মতুংদগী চাওরাক্না লুপা কোতি লাখ অহুমগী শেন্দোল অদুগুম্লবা করোরপতিশিংনা, মখোয়গী কম্পেনিশিংনা মখোয়গী বেঙ্কশিংদা শিংদবা য়াহনদ্রে। অমদি মসিগী মতৌ অসি ঙসিসু মখা চত্থরি।

মরূপশিং,

মতৌ অসুম্না বেঙ্কশিংবু লুৎ তৌদুনা চেনখিবা মখোয়শিং অদুগীসু অকনবা আইন্না মখোয়গী তৌফম থোকপা মথৌ তৌরি। হৌজিক্তি লৈবাক অসিদা খক্তা নত্তনা মীরৈবাক্তসু অসিগুম্লবা মরাল লৈরবশিংগী মরন মথুম ফাজিল্লি। অসিগুম্লবা মরাল লৈরবশিংবু মালেমগী কাচিন অমা হেক্তদা লোৎ্পা ফংহন্দনবা সরকার অসিনা অথিংবা থম্লি।

মরূপশিং,

শেঞ্জা–থুমজাবু ভারত্তা অনৌবা নোর্মেল ওইনা লৌনরি। ভারত্তা মসি চৎনরি, মসি ফাওবদি চৎনরি। করিগুম্বাদা কনাগুম্বা অমনা মখোল থোক্না চৎন–লোনচৎ্ নীংশিংলকপা মতমদা খুদক্তা মাংলোমদগী পাউখুম লাক্লম্মি মদুদি, মসি ভারতনি, মফম অসিদা মসিমক চৎনৈ। করিগীদমক মতৌ অসুম্না চৎনহল্লিবনো? করম্বা মতম ফাওবা চৎনখিগনি? অসিগুম্লবা ফিভম অসি হোংদোকপা করিগী পামলোই। 

মরূপশিং,

হৌখিবা চহী ৪ চহী মরি মখায় অসিদা, ঐহাক্না ফিভম অসিবু হোংদোক্নবা হোৎনরি, লৈবাক অসিবু তুংলোমদা পুরিবা অপনবশিং অসিবু থুগায়নবা থবক পায়খৎলি। মীওই খরনা লৈবাক অসিবু মাংহন তাকহন্নবা হোৎনরি। অদুবু ঐহাক্না অচুম্বগী শক্তিদা থাজবা থম্লি, অমদি পুচেল শেংলবা প্রজা মীয়ামদা ঐহাক্না মপুং ফানা থাজবা থম্লি।

ইচিল–ইনাও অমসুং ইচল–ইচেশিং, ঙসিদি ভারতকী ফোরেন পোলিসী লৈবাক মনুংগী ৱাফমশিং, অতোপ্পবু পেলহন্নবগী প্রেসরদা ঐখোয়না চত্থবা তৌদে, ঐখোয়গী নীতি পুম্নমক, স্কিম পুম্নমক লৈবাক্কী কান্ননবা ৱাফমদা ৱারেপ লৌরি। ঐখোয়না কদায়দা চৎকনি, করম্বা লৈবাক্কা মরী থমগনি হায়বদু লৈবাক অনিগী ওইবা কান্নগদবা অদুগী মতুং ইন্না লেপ্পি।

মদুনা মরম ওইরগা ভারতকী পাসপোর্তকী শক্তি অসি ঙসিদি হেঙ্গৎলে। ঙসিদি মালেম পুম্বদা ভারতকী খোংজেল অসি য়াম্না লুম্না তাবা ফংলি। মালেমগী খুৎকন পাঙ্গনবা সংস্থানশিংদা ভারতসু মীহুৎ ওইরে। ও.পি.ই.সি. গুম্বা সংস্থানশিংদা মীহুৎ ওইদ্রবা ফাওবা ভারতকী ৱা তাবিরি।

মরূপশিং,

মসি মালেমদা ভারতপু থাজবা অমসুং ঐখোয়গী অচেৎপা মরীশিং অদুগী মহৈনি, মদুদি ভারতপু মীনম্বীরম্বা মখোয়শিং, ঐখোয়গী সিস্তেমদা শিংনরকপশিংবু আইনগী থোংদা পুথোক্লি। মখোয়বু ভারত্তা শিন্নরক্লি।

মরূপশিং,

ঐহাক অমসুং ঐহাক্কী সরকারগী ৱাখল্লোন অমসুং মীৎয়েং ময়েক শেংই। মালেমদা ইনখৎলক্লিবা নহা খ্বাইদগী য়াম্না লৈবা লৈবাক্না অপিকপা মংলান মংবা য়াদে। মংলান, এস্পিরেসন অমসুং পান্দমদি অৱাংবা থাক্কী ওইগদবনি। ঐখোয়না অচৌবা পান্দমগী মায়কৈদা পুকচেল শেংনা হোৎনগনি, অদু ওইরবদি মদুসু ফংবা ঙমগনি। অদুবু পান্দম অদুমক চাওদ্রগদি মায় পাকপা অদুসু পিকনা উগনি।

মরূপশিং,

সরকারগী সিস্তেম পুম্নমক, মেশিনরী পুম্নমক চহী ৭০গী চাওখৎ থৌরাংগী শক্তিনা শেম্বনি। চহী মরি মরি মখায়গী মমাংদশু সিস্তেম অসিমক লৈরম্মি, মেশিনরি অসিমক লৈরম্মি। অদুবু ঙসিদি থবক তৌবগী স্পীদ অমসুং স্কেল অনিমক শরুক কয়া হেঙ্গৎলে। ঙসিদি খোংজেল য়াংনা মাংলোমদা চংশিল্লিবা মশিং য়াম্লবা পান্দম কয়া অমা লৈরে। পুম্নমক্কী মফমদা মশাগী ময়ুম লৈজনবা, য়ুম খুদিংদা পুং ২৪ মৈ ফংহন্নবা, অফবা ঈশিং অমসুং মৈখু চেন্দবা ফুয়েল পুম্নমক্না ফংনবা, ঙসিদি ভারত পান্দমশিং অসিগা য়াম্না নক্নরে। অঙাংশিংবু মহৈ মশিং তমহনবা, নহাশিংবু শেল তালহনবা, অহনশিংবু হিদাক লাংথক, লৌমীশিংবু ইথৈ লৌখোং অমসুং মীপুম খুদিংমক্কী ৱা তাবা, পান্দমশিং অসি ফংনবগীদমক ঐখোয়গী মীৎকুপ অমমম কৎথোক্লি।

মরূপশিং,

অনৌবা থাজবা অমা পুদুনা, ন্যু ইন্দিয়া, মালেমগী থাক্তা মসাগী থৌদাং অদু লেপলি। অনৌবা গ্লোবেল ওর্দরদা মসাগী থৌদাংবু নৌনা মায়কৈ য়াৎলি। লাক্কদৌরিবা নুমীৎ নিনিদা থৌদাং অসিদা লৈবাক অমসুং মীরৈবাক্তগী অপুনবা অতিথিশিংনা মফম অসিদা য়াম্না কুপ্না খন্ন–নৈনরগনি, মসিগীদমক ঐহাক্কী মায়কৈদগী ময়াম পুম্নমকপু হন্না হন্না য়াইফ পাউজেল পীজরি। অনৌবা ইনর্জীদা তোংদুনা ন্যু ইন্দিয়াগী মরমদা হায়জনবা অদোম্না তঞ্জা পীবিরে, মসিগীদমক ময়াম পুম্নমকপু হন্না হন্না থাগৎচরি। অমদি ঐহাক্না থাজবা থমলি মদুদি মংলান অমগা লোয়ননা জর্নেলিজমগা মরী লৈনরিবা নহা খরনা রিপব্লিক তি.ভি. শিজিন্নরি অমদি হৌজিক্তি হিন্দিদশু শন্দোক্লে। লৈবাক অসিগী অতোপ্পা লোনশিংদসু শন্দোক্নবা খন্নগনি অদুবু মালেমদসু ঐখোয়গী মফম ফংনবা মংলান অদু পুদুনা চৎকনি, য়াইফ পাউজেল অসিগা লোয়ননা হন্না হন্না থাগৎচরি।