ভারতকী প্রধানমন্ত্রী

মতৌ করম্না রাজাস্থান্না মসিগী নাৎ অমসুং চৎনবীনা রাজ্য অসি মশাগী ওইবা মশক অমা শেম্লিবনো হায়না ঐনা খল্লি। মী খুদিংমক্না উবদা রাজস্থানগী ফজবা অমসুং মশক অদু উবা ফংই। রাজস্থাননা ঐখোয় খুদিংমক নুংশিবীবা অমসুং থৌজানবীবা ওইরসনু। অদোমগী থৌজালশিং অদুগীদমক ঐনা অদোমবু থাগৎচরি অমসুং অথৌবশিংগী লমদম অসিদা ঐনা কোক নোঞ্জরি।

মরূপশিং,

রাজস্থানদা মহারানা প্রতাপগী থৌনা ফবা, সুরজ মালগী থৌনা ফবা, বামা সাহগী কৎথোকপা, পান্না  ধাইগী কৎথোকপা, মীরা বাইগী লাইনীং চেৎপা, হাদীগী মহারানীগী কৎথোকপা, অম্রিতা দেবীগী মতোল লোম্না কৎথোকপা পুম্নমক অসিনা লমদম অসিগী তোখায়বা মশক অমা শাগৎলিবনি।

অতিয়া পক্না ৱাংবা লানবনশিং, সনাগী পোৎলমশিং, মচু মচুগী কোকয়েৎশিং, ফজরবা লোল, নুংশিরবা ঈশৈ অমসুং চিংলেম্লবা চৎনবীশিং অসিনা রাজস্থানবু মশক তাক্লি। চহি কয়াগী মমাংদগী রাজস্থান অসি লৈবাক অসিগী তমজনফম ওইরক্লি, মসি মহৈ–মরোং পুথোকপদা ওইবা য়াই অমসুং মহৌশাগী অকোয়বগী ফিবম ঙাকপা নৎত্রগা লৈবাক অসি ঙাকপগী ওইবা য়াই।

হৌখিবা চহি মরি অসিদা রাজস্থানগী চাউখৎপগী খোঙজেল অসি শরুক অনি য়াংনা চেল্লি। মফম অসিগী মীয়ামগী হিংবগী থাক ফগৎহন্নবা কেন্দ্র অমসুং রাজ্য সরকার অনিনা খুৎশম্নদুনা থবক তৌমিন্নরি। উদয়পুর, অজমের, কোতা, ধৌলপুর, নাগোর, অলৱার, জোধপুর, চিত্তোর, গাধ, কিষান গাধ, সুজান গাধ, বিকানের, বিলৱারা, মাউন্ত আবু, বোন্দী অমসুং বেভারদা লুপা ক্রোর ২,১০০গী স্কিমশিং উরেপ–উয়ুং তম্বগী খুদোংচাবা ফংবদা ঐ হরাওই। স্কিমশিং অসিগী পান্দমদি রাজস্থানগী শহরশিং অমসুং অপীকপা শহরশিং শেমগৎপা অমসুং স্মার্ত সিতীগী খুদোংচাবা ফংহনবনি। মসি লম্বী চিনবা ফহন্নবা ওইবা য়াই নৎত্রগা অমোৎ–অকায় ফজনা লোইশিন্নবা ওইবা য়াই।

মরূপশিং,

চহিগী মমাংদা লৈরম্বা ফিবম অদোম কাউরম্লোই। করম্বা ফিবমদা বসুনধরাজীনা চহি মরিগী মমাংদা সরকার পায়খিবগে হায়বদু অদোম্না কাওরোইদবনি হায়না ঐনা রাজস্থানগী মীয়ামদা তকশিল্লি। রাজ্য অসিগী মমাংগী সরকারনা অদোম্বু করম্বা মওংদা থম্লমবগে হায়বা কাওবীগনু অমসুং অদোমনা হৌজিক পায়খৎলিবা থবকশিং অসি খঙলক্কনি। রাজস্থানদা রাজনীতি তৌবশিংগী মিং প্লেগতা ইনবা করম্না কৃক–কৃক ইনখিবগে? মতম অদুদা বারমরদা শাখৎখিবা রিফাইনরীদা করি ওইখিবগে হায়বা অপীকপা অঙাং অমনা ফাওবা খঙলবনি। হৌজিক রিফাইনরী অসিদা থবক য়াংনা শুরি। সরকার অসিগী  মখাদা তৌরিবা থবক অসি থেংবসু তৌদে নৎত্রগা অরানবা মওংদা লমজিংদে। কেন্দ্রদা নৎত্রগা রাজ্যদা ওইরবসু, ঐখোয়গী অমত্তা ঙাইরবা পান্দমদি চাউখৎপনি। মসি চাউখৎপনি অমসুং চাউখৎপা খক্তনি।

লৈবাক অসিগী মীওই খুদিংমক হকচাং ফনবা অমসুং স্কিম অমগী মথংদা স্কিম অমা ফংনবা ঐখোয়না মখা তানা থবক পায়খৎলি। স্কিমশিং অসিনা অদোমদা কয়া য়াম্না কান্নবা পীরবগে হায়বা খঙবা অসি ঐখোয়গী থবকনি, স্কিমশিং অসি ফগৎহন্নবা থবক লেপ্তনা পায়খৎলি। ঙাইহাক্কী মমাংদা, অদোমগী মরক্তা কান্নবা ফংলবা মীওই খরনা মখোয়গী পুন্সিদা অহোংবা লাকখিবগী মতাংদা হায়খ্রে। কেন্দ্র সরকারগী স্কিমশিংগী কান্নবা ফংলবশিংগী খক নত্তনা রাজ্য সরকারগী স্কিমশিংগী কান্নবা ফংলবশিংগী ৱারীসু তারি। লাইরিক হৈবী মচানুপীশিং রাজ শ্রী স্কিমগী মখাদা স্কুতী ফংলি, অহলশিং লাইখুরুম্বা চৎপগী স্কিমগী কান্নবা ফংলি, কান্নবা ফংলবশিংগী মীৎতা তারিবা মমি অদু কনা অমত্তনা কাওবা ঙম্লোই অমসুং মসিগী থৌরাং অসিগীদমক ঐনা বাসুনধরাজীবু থাগৎচরি।

ভারতীয় জনতা পার্তী পনবদা তুম্বা য়াদবা কাংবু অমা লৈরে হায়বসি অচুম্বনি। মোদীজী নৎত্রগা বসুনধরাজীগী মিং তাবদা মখোয় লাইহৌ হৌই। অসিগুম্বা থৌরম অসি মখোয়না পামদে। থৌরম অসিগী খ্বাইদগী কান্নবদি কান্নবা ফংলবশিংদগী রাজস্থানগী মীয়াম্না হকথেংননা তাদুনা মখোয় মশামক স্কিমশিং অসিগী মরমদা খঙখি অমসুং মতৌ করম্না মখোয় স্কিমশিং অসিগী কান্নবা ফংগদগে হায়বা খঙবা ঙমখি। অমরোমদা, হায়রিবা স্কিমশিং অসিগী চে–চাংগী থবকশিং পন্দুনা লৈতবদগী মখোয়গী কান্নবা মীচম মীয়ামদা য়ৌহনবা ঙম্মি। সরকারগী থবক শুরিবশিংদা অকনবা ৱাফম থম্বদগী মীয়ামদা অকনবা ৱাফম থমলকখি অমসুং মীয়ামসু ৱাখল তারে অমসুং করিগুম্বা ওফিসর অমনা ফৎত্রবসু মহাক থবক কন্না শুবা তাবনি। মরম অদুননি থৌরম অসি কান্নবা ফংলবা মীয়ামদা য়াম্না কান্নরিবা অমসুং সরকারগী থবকশিং মীয়ামদা য়ৌহল্লিবা। কান্নবা ফংলবশিংনা মসিগী মরমদা হনজিন হনজিন হায়গদবনি মরমদি মসিনা খঙহৌদবশিং খঙলক্তুনা খুদোংচাবা লৌনবা থোরক্কনি।

মরূপশিং, হৌখিবা চহি ৪ অসিদা সরকারনা পায়খৎলিবা থবকশিং অসি লায়রবশিং, দলিৎশিং, নৈহৎপীরবশিং, তোল্লবশিং, ত্রাইবেলশিং, লৌমীশিং, মমাশিং অমসুং মচানুপীশিংদা মীৎয়েং থমদুনা পায়খৎপনি। ঐখোয়না নীংতম্বা চহি ৭৫ শুবা মতম ২০২২দা লৌমীশিংগী শেন্থোক শরুক অনিদা হেনগৎহন্নবা ঐখোয়না পান্দম থম্লি। লমদম অসিদা পোকপা ঐগী মরূপ গাজেন্দ্র সিংহ সেখাৱতনা লৌউ–শিংউ বিভাগ অসি মাংলোমদা পুখৎনবা হোৎনরি। রাজস্থানগী সোরাজ গাধতগী সোইল হেল্থ কার্দ হৌদোকখিবগী থৌরম অদু ঐ নীংশিংলি। মতম অদুদা সরকারনা সোইল হেল্থ কার্দ ক্রোর ১৪ য়েন্থোক্কনি হায়না পান্দম থমখি অমসুং মদু য়েন্থোকপা ঙম্বদা ঐ হরাওই অমসুং হৌজিক ফাওবদা লৈবাক অসিগী লৌমীশিংদা সোইল হেল্থ কার্দ ক্রোর ১৪.৫০ য়েন্থোকখ্রে। রাজস্থানগী লৌমী লাখ ৯০ রোম হায়রিবা কার্দশিং অসি ফংলে। হায়রিবা কার্দশিং অসিগী মতেংনা বিঞ্জ্যান্নিক ওইনা লৌউবা লাইহল্লে অমসুং পোৎথোক পুথোকপা হেনগৎলে। অদোম্না খঙলে মদুদি চহি কয়াগী মতুংদা লৈবাক অসিদা পোৎথোক ফজনা পুথোকলে।

মরূপশিং,

মহৈ-মরোং পুথোকপদা চংবা শেলফমগী শরুক ১.৫ এম এস পি ওইনবা ৱাশকখিবা অদু সরকারনা ঙাকপা ঙম্বগী নুংঙাইরিঙৈ অসিদা রাজস্থানদা ঐনা অহানবা মীফম পাংথোকপগী খুদোংচাবসু ফংলে। অদোমনা চহি অসিদা চনান, চুজাক অমসুং হৱায়শিংগী থাবদা চংবা চাদিংগী শরুক ১.৫ ফংলগনি।

মরূপশিং,

ঐনা মসিগী ৱাফম অসি রাজস্থানগী লৌমীশিংগা খরা কুপ্না খন্নবা পাম্মি। চনান কুইনতল অমা পুথোকপদা লুপা ৯৯০ চংই, হৌজিক সরকারনা এম এস পি লুপা ১৯৫০দা হেনগৎলে। মসিগা মান্নবদা, চুজাক কুইনতল অমা পুথোকপদা লুপা ১৬২০ চংই অমসুং মসিগী এম এস পি লুপা ২৪৩০দা লেপ্লে। কোর্ন কুইনতল অমা পুথোকপদা লুপা ১১৩০ চংই অমসুং মসিগী এম এস পিনা লুপা ১৭০০দা হেনগৎলে। মুংগ পুথোকপগী মমল অসি লুপা ৪৫৬০নি অমসুং এম এস পিনা লুপা ৭০০০দা হেনগৎলে। মসিগী মথক্তা সরকারনা মাইরোংবী নৎত্রগা শগোল হৱাই নৎত্রগা নুঙ হৱায় নৎত্রগা ফৌগী এম এস পি, অচংবা চাদিংগী শরুক ১.৫দা হেনগৎলে। লৌউ–শিংউগী পোৎথোকশিং লৈশিন্নবা কেন্দ্র সরকারনা রাজ্য সরকারশিংগা থবক পায়খৎলে। লৌমীশিংগী পোৎথোক খুদিংমক বসুনধরাজীগী সরকারনা ফজনা লৈবীগনি হায়না খল্লি। মতম অসিদা সরকারনা লৌমীশিংদগী লুপা ক্রোর ১১,৫০০ রোমগী পোৎথোক লৈরে হায়না ঐনা লাওথোক্লি।

মরুদগী হৌরগা কৈথেল ফাওবগী মতাংদা সরকারনা থবক লোইনা পায়খৎলি। হৌখিবা চহি মরি অসিদা লৌমীশিংগীদমক পায়খৎখিবা স্কিমশিং পায়খৎনবা বসুনধরাজীগী সরকারনা হোৎনরি। প্রধান মন্ত্রী ফসল বিমা য়োজনাগী মখাদা রাজ্য অসিগী লৌমীশিংদা ক্লেমগী শেনফম লুপা ক্রোর ২,৫০০ রোম হৌজিক ফাওবদা য়েন্থোকখ্রে।

মরূপশিং, মমাংগী থৌওংশিংদগী হোংদোক্তুনা বি জে পি সরকারনা লায়রবা মীয়াম য়াইফনবা অমসুং শক্তি পীনবা থৌরাং কয়া পায়খৎলি। মসিগী মহয় ফজনা উবা ফংলে। মালেমগী ওইনা মমিং চৎলবা লুপ অমনা হৌখিবা চহি ২ অসিদা ভারতকী মীওই ক্রোর ৫ রোম লায়রবা কোক্লে হায়না লাওথোকখ্রে। মীওই ক্রোর ৫ লায়রবদগী নান্থোক্লে। লৈবাক অসিনা লায়রবা কোকহনবগী মরমদি– পুকচেল শেংনা অমসুং চাউখৎপগী থবক ফজনা পায়খৎপদগীনি। লৈবাক অসিগী মীওই ক্রোর ১.২৫না সরকার অসি শৌগৎলি অমসুং মসিগী মহৈ ওইনা ক্লিন ইন্দিয়া মিশনগী মখাদা রাজস্থানদা অমাঙশঙ লাখ ৮০ রোম শাখ্রে।

হায়রিবা মতম অসিদা, লৈবাক অসিগী লায়রবশিংগী পুন্না একাউন্ত ক্রোর ৩২ হাংদোকপা মতমদা রাজস্থানগী ওইনা জন ধন য়োজনাগী মখাদা একাউন্ত ক্রোর ২.৫ হেন্না হাংদোকখি। পি এম এ ৱাইগী মখাদা রাজস্থানগী লায়রবা লাখ ৬ হেনবগী য়ুম শাবা লোইশিল্লে। থা অমদা প্রেমিয়ম লুপা ১ অমসুং নোংমদা পৈশা ৯০ থিদুনা রাজস্থানগী মীওই লাখ ৭০ হেন্না ইন্সুরেন্স য়াওরে। 

মরূপশিং,

মুদ্রা স্কিমগী মখাদা রাজস্থানগী ইন্ত্রপ্রিনর লাখ ৪৪ হেন্না গরেন্তর য়াওদনা বেঙ্ক লোন পীরে। মসিগী মথক্তা, সুপ্নগী চহি ১ খক্তা ঙাইরিবা শৌভাগ্য স্কিমগী মখাদা রাজস্থানগী মীওই লাখ ৩ লোম লেম্না মৈ শমহল্লে। উজ্জ্বলা স্কিমগী মখাদা রাজস্থানগী ইমাশিং অমসুং ইচলশিং লাখ ৩৩.৫০দা লেম্না গ্যাস কনেক্সন পীখ্রে। উজ্জ্বলা স্কিমনা নুপীশিংগী পুন্সিদা অহোংবা পুরক্লে।

মরূপশিং ,

স্কিম অসিগী কান্নবা ফংলবা ইমাশিং অমসুং ইচলশিংগা ৱারী শানবদা ঐনা অনৌবা অমা খঙবা ঙম্লে। উজ্জ্বলা স্কিমনা মরম ওইদুনা মহাক্না মৈখু চেন্দবদা নত্তনা ঈশিংসু কনবা ঙম্লে হায়না ইচল অমনা ঐঙোন্দা হায়খি। চাক থোংনবা গ্যাস শীজিন্নবদগী চফু–উয়ান মোৎতবদগী ফেংবদা ঈশিং চংদ্রে। মতৌ অসুম্না স্কিম অসিনা রাজস্থানগী ইমাশিংদা হিরম অনিদা কান্নবা ফংহল্লে।

মরূপশিং, রাজস্থানগী মীয়াম্ন মখোয়গী মতমগী অয়াম্বা শরুক ঈশিং শোক্নবা হোৎনবদা শীজিন্নৈ হায়বা ঐ খঙলে। মাইকৈ অসিদা বাসুনধারাজীগী সরকারনা থবক পায়খৎলি। মুখ্য মন্ত্রীগী ৱাতর সেল্ফ–দিপেন্দেন্স মিশনগী মখাদা শহরশিং অমসুং খুঙ্গংশিংদা ঈশিং ফংহন্নবা লুপা ক্রোর ৪,০০০ রোমগী প্রোজেক্তশিং লোইশিল্লে হায়না ঐনা খঙহল্লি। খুঙ্গং ১২,০০০ হেনবদা থক্নবা ঈশিং ফংহল্লে।

মরূপশিং,

অদোমগী মীয়াম্না পাম্নরবা মুখ্য মন্ত্রীনা ঐঙোন্দা হায়রি মদুদি রাজস্থান সরকার অমসুং বি জে পিগী এম এল এশিংনা পার্বতী, কালী সিন্ধ অমসুং চম্বল লিঙ্ক স্কিম অসি নেস্নেল প্রোজেক্ত অমা ওইনা লান্থোক্নবা তকশিল্লি। দি পি আর অমা ৱাতর রিসোর্স মন্ত্রলয়দা থাখ্রে অমসুং স্কিম অদু তেক্নিকেলগী ওইবা মওংদা য়েংশিল্লি হায়বা ঐ খঙলে। মসিগী স্কিম অসিনা রাজস্থানগী লম হেক্তর লাখ ২ হেনবদা ইথৈ ফংহনগনি। মসি খক্তা নত্তনা স্কিম অসিনা শহর ১৩ হায়বদি, জয়পুর, অলৱার, ভারতপুর, সৱাই মধোপুর, ঝালৱাদ, কোতা অমসুং বুন্দীদা লৈবা রাজস্থানগী অপুনবা মীশিংগী চাদা ৪০ হেন্না অফবা থক্নবা ঈশিং ফংহনগনি।

মসিগী দিমান্দ অসি কেন্দ্র সরকারনা য়েংশিনগনি হায়না ঐনা থাজবা পীরি। রাজস্থান চাউখৎহন্নবা ৱারেপ অমা, রাজ্য অসিগী লৌমীশিংদা লাইনা ঈশিং ফংহন্নবা, রাজ্য অসিগী মীয়ামদা থক্নবা ঈশিং পীনবা থবকশিং অসি ফজনা পাংথোক্কনি।

মরূপশিং,

লায়রবশিংগী ফিবম ফগৎহন্নবা সরকারনা হকশেল, চিঞ্জাক অমসুং মহৈ–মশিং তম্বগী লমদা অহেনবা মীৎয়েং থম্লি। মমাংদা ঐনা ঝুনঝনুদা লাকপা মতমদা নেস্নেল ন্যুত্রিসন মিশন হৌদোকখি। হৌজিক স্কিম অসি লৈবাক অসি শীনবা থুংনা পায়খৎলে। মসিগী মথক্তা দোক্তরগী মনাক্তা অঙাং পোক্নবা অমসুং মমাশিং অমসুং অঙাংশিং তিকা থাবগী থবক পাংথোক্নবা পুক্নীং থৌগৎলি, মসিগী মহৈ ওইনা অঙাং উনবদা মমা শিবগী চাং ফজনা হন্থরে। হিরম অসিগী মতাংদা থবক ফজনা পায়খৎপা উবদা ঐনা রাজস্থানগী মমাশিং, ইচল–ইচেশিং অমসুং রাজস্থান সরকারবু থাগৎলি। রাজস্থান অসিদা হৌজিক বেতি বচাউ বেতি পরাও স্কিম অসি ফজনা পায়খৎলি। লায়রবশিং লায়েংনবা অয়ুশ্মান ভারতনা থবক কয়া পায়খৎলে। স্কিম অসিগী মখাদা চহি অমদা লায়েংনবা লুপা লাখ ৫ ফাওবা পীরগনি অমসুং মসিনা মীওই ক্রোর ৫০ হেন্না কান্নবা ফংহনগনি। স্কিম অসিগী থবক য়াংনা পায়খৎলি অমসুং অথুবা মতমদা হৌদোক্লগনি।

মরূপশিং,

বি জি পি সরকারনা পায়খৎলিবা স্কিম খুদিংমক্কী পান্দমদি থোং মান্ননা চাউখৎহনবা অমসুং মীপুম খুদিংমক ইকায় খুম্নবা, চিংলেম্বা অমসুং মশানা মশাবু ইকায় খুম্নবা লৈহনবনি। হৌজিক লৈবাক অসিদা মীয়ামগী অচৌবা ইহৌ অমা চৎথরি, মদুগী মমিং নেস্নেল ভিলেজ সেল্ফ –রুল মিশন্নি। খুঙ্গং চাউখৎহন্নবা হিরম কয়াদা খন্নদুনা থবক পায়খৎলি। মসিগী মখাদা খুঙ্গংগী মীওই খুদিংমক বেঙ্ক একাউন্ত লৈহনবা, য়ুম খুদিংমক গ্যাস কনেক্সন পীবা অমসুং মৈ পীবা, মীপুম খুদিংমক তিকা থাবা, মীপুম খুদিংমক ইন্সুরেন্স য়াওহনবা অমসুং য়ুম খুদিংমক এল ই দি বল্ব লৈহনবা য়াওরি। স্কিম অসিগী মখাদা চহি অসিগী ওগষ্ট ১৫দা রাজস্থানগী খুঙ্গং ১৫০০ স্কিম অসিগী কান্নবশিং ফংহল্লগনি।

মরূপশিং,

খুঙ্গং ওইগেরা নৎত্রগা শহর ওইগেরা চাউখৎ থৌরাংগী থবকশিং অসি সবকা সাথ সবকা বিকাস হায়বা পান্দমদা য়াংনা পায়খৎলি। লৈবাক অসিগী শহর ১০০দা স্মার্ত সিতীগী খুদোংচাবশিং ফংহন্নবা থবক য়াংনা পায়খৎলি। হায়রিবা শহরশিং অদুগী মনুংদা ঐখোয়গী জয়পুর, উদয়পুর, কোতা  অমসুং অজমের য়াওরি। লম্বীশিং, মৈ অমসুং ঈশিংগী য়াওনা হায়রিবা শহরশিং অসি ফজনা শেমগৎনবা সরকারনা লুপা ক্রোর ৭,০০০ কাইথোকপদা অয়াবা পীরে। হায়রিবা প্রোজেক্তশিং অসিগী থবকশিং রাজস্থান সরকারনা য়াংনা পায়খৎলি।

মরূপশিং,

হৌজিক পায়খৎলিবা থবকশিং অসি মমাংদা পায়খৎলম্বা য়াবা ঙাক্তনি। অদুবু মমাংগী সরকারনা করম্বা ৱাখলদা থবক তৌরম্বগে হায়বা অদোমনা খঙলবদুনি। মীয়াম্না খঙলবা অদুনা মরম ওইদুনা মীয়াম্না কংগ্রেস অসি শন গারী অমনি হায়নরিবা। মসি বেল (শন) গারী অমা নত্তে, মসি বেল লৌনবা খুৎলাই অমনি। মরমদি হৌজিক কংগ্রেসগী মকোক থোংবা রাজনীতিৱালাশিং অমসুং মুখ্য মন্ত্রীশিং বেলদা লৈরি। কংগ্রেসগী লৈঙাক পামদবদগী অদোমনা বি জে পিদা থাজবা পীরকপনা মীয়ামগী থাজবা অদু কনখৎহন্নবা বি জে পি সরকারনা অহিং–নুংথিল নাইদনা থবক শুরি। অনৌবা ভারত অমা শেম্নবগী ৱাশক্কা লোয়ননা ঐখোয় মাংলোমদা চংশিল্লি। ২০২২দা লৈবাক অসি নীংতম্বা চহি ৭৫ মপুং ফারগনি, মসিগী মমাংদা মথং চহিগী মার্চ থাদা রাজস্থান অসি চহি ৭০ মপুং ফারগনি। অনৌবা রাজস্থান অমা য়াওদনা অনৌবা ভারত অমা শেম্বা ওইথোক্লোই। অসিগুম্বা ফিবম অসিদা রাজ্য অসিগী মীয়াম্না লৈবাক অসি শেমগৎপদা শরুক য়ানবগী তাংলবা তাঞ্জা অমা ফংলবনি।

চৎলিবা চহি অসিদা লৈবাক অসিগীদমক থৱায় কৎখিবা পরমবীর চক্র ফংলবা সহিদ পীরু সিংহগী চহি ১০০ শুবা মপোক কুমওন থোক্লি। নুমিৎ খরনিগী মতুংদা মহাক্না থৱায় কৎখিবা অদু চহি ৭০ মপুং ফারগনি। মহাক্কী থৱায় কৎখিবা অথৌবা অসিদা ঐনা কোক নোঞ্জরি। অচৌবা মীওইশিং অসিগী থৌনা ফবা, কৎথোকপা অমসুং মরৈবাক নীংবদা থাজবা থমদুনা ঙসিগী ঐখোয়গী লৈবাক অসিনা মালেম অসি থেংনবা ঙম্লগনি। লাইবক থিবদি ঐখোয়গী রাজনীতিগী লম্বাশিং অসিনা লান্মীশিং ফাওবা লেম্না থাদ্রে। সরকারগী মথক্তা ৱাহং হংবদা করিসু অকায়বা লৈতে, অদুবু লান্মীগী তৌবা ঙম্বগী মতাংদা ৱাহং হংলকপা অসি পাপ অমা লংশিনবনি। মসি মমাংদা অমুক্তা থোকখিদ্রি। অসিগুম্বা মখলগী রাজনীতি তৌরিবা মীওইশিং অসি রাজস্থানগী মীয়াম অমসুং লৈবাক অসিগী মীয়াম্না কৈদৌঙৈদা ঙাকপীরোই।

মরূপশিং,

শাগৈ–নাতৈগী রাজনীতি তৌনীংবশিংনা তৌবা য়াই। অদুবু, লৈবাক অসিগী ঙাকশেন অমসুং ইকায় খুম্নবগী মতাংদা ঐখোয়গী অনীংবদি হোংলোই অমসুং ঐখোয়গী থৌশিলশিং অসি অরোনবা লৈতে। মসিগী মরম অসিননি ৱান রেঙ্ক–ৱান পেন্সনগী ৱাথোক অসি চহি কয়া পন্দুনা লাক্লগা মসিগী সরকার অসিনা লোইশিনখিবা।

মরূপশিং,

ঙসিগী ঐখোয়গী লৈবাক অসি য়াম্না মরুওইবা তাঙ্কক অমদা লৈরি। ঐখোয় অনৌবা মাইওন অমদা চৎপা হৌরে অমসুং অরুবা পান্দম কয়া ফংবা ঙম্লে অমসুং অনৌবা পান্দম কয়া ফংনবা ঐখোয় থবক পায়খৎপা হৌরে। অদোম ময়াম্না ফজনা থৱায় য়াওনা শরুক য়ারবদি সরকার অসিনা ৱাশকখিবশিং অদু ফংবা ঙমগনি হায়না ঐনা থাজবা মপুং ফানা থম্লি। ঐগী ৱারোল অসি লোইশিঞ্জরে অমসুং স্কিমশিং অসি ঙসিদগী হৌদোকপদা ঐনা রাজস্থানগী মীয়াম থাগৎচরি।

ময়াম ঐগা লোয়ননা লাওমিন্নসি:

ভারত ইমানা য়াইফরে

ভারত ইমানা য়াইফরে

ময়াম্বু থাগৎচরি!