ভারতকী প্রধানমন্ত্রী
প্রধান মন্ত্রী নরেন্দ্র মোদীনা লুচীংবা কেন্দ্রগী মন্ত্রী মন্দলনা রোদ ত্রান্সপোর্ত অমসুং রোদ ইন্দস্ত্রীগী লমদা মতেং পীননবা ভারত অমসুং রুসিয়াগী মরক্তা এম ও য়ু ইনবা য়ারে। এম ও য়ু অদু রুসিয়াগী রাস্ত্রপতিনা হন্দক ভারত্তা লাক্কদৌরিবা অসিদা খুৎয়েক পীনগনি।
ত্রান্সপোর্ত অমসুং হায়ৱেজ সেক্তরদা মতেং পীননবা চপ চাবা মফম অমা শেমগৎনবা রোদ ত্রান্সপোর্ত অমসুং রোদ ইন্দস্ত্রীগী লমদা মতেং পীননবা এম ও য়ু অমা ইনবা হায়না লৈবাক অনিনা পুন্না ৱারী শানদুনা অরোইবা ৱারেপ লৌখিবনি।
রোদ ত্রান্সপোর্ত অমসুং রোদ ইন্দস্ত্রীগী লমদা লৈবাক অনিমক অমনা অমগী মতেং পাংনগনি অমসুং কান্নবা ফংনগনি। রুসিয়াগা মতেং পীনবা, একচেঞ্জ তৌনবা অমসুং পুন্না থবক তৌমিন্নবনা মতম শাংনবা রোদ ত্রান্সপোর্ত, রোদ ইন্দস্ত্রী অমসুং ইন্তিলিজেন্স ত্রান্সপোর্ত সিস্তেমগী লমদা নাকল অনিমক্না কান্নবা মরি লৈনগনি। মসিনা লম্বী শেমগৎপা, লম্বী শেম্বা, ত্রান্সপোর্তকী থৌশিল, তেক্নোলোজীশিং অমসুং লৈবাক অসিদা হায়ৱেজশিং থবক তৌবগী থৌরাং তৌবা অমসুং শেন্নবদা মতেং ওইগনি অমসুং ভারত অমসুং রুসিয়গী মরক্ত লৈনরিবা মরি অসি চেৎশিনহনগনি।
নুংগী ৱারোল:
ভারত অমসুং রুসিয়া মতম শাংনা অচেৎপা মরি থম্নদুনা লাক্লি অমসুং শেন-থুমগী অচেৎপা মরি লৈনরি। রুসিয়ানা সেতলাইত্তা য়ুমফম ওইবা তোল লৌনবগী সিস্তেম অমা পুথোক্লে। মসিগা চপ মান্ননা, মখোয়না ক্রাস রিপোর্তিং অমসুং মোনিতরিং য়াউনা ইন্তিলিজেন্স ত্রাফিক মেনেজমেন্ত সিস্তেমশিং শীজিন্নরি। রুসিয়ানা লম্বীগী লমদা অনৌবা চাউখৎলবা তেক্নোলোজীশিং শীজিন্নরিবা অসি য়েংলগা, নক্নবা মরি থমদুনা অসিগুম্বা থবকশিংদগী তমহৌবা অসি য়াম্না কান্নগনি। ভারতনা মসিগী হায়ৱেজশিং শেমগৎপগী থবক য়াম্না য়াংনা পায়খৎলি। লম্বী-থোং অসি ফজনা শীজিন্ননবা চৎথোক-চৎশিন অমসুং অশোয়-অঙাম থোক্তনবা তেক্নোলোজী হেনগৎহনবা অসি য়াম্না মথৌ তাই। মসিনা চৎথোক-চৎশিনগী খরচ হন্থহনগনি। ভারতকী পাকচাউনা হায়ৱেজশিং শেমগৎনবা থৌরাং তৌরিবা অসিদা রুসিয়ানা শেন থাদনবগী খুদোংচাবা ফংলগনি। লৈবাক অনিগী অপুনবা মরি অসিনা লৈবাক অনিমক্ন মেম্বর ওইরিবা মালেমগী ফোরমশিংদা পুন্নবা থবক তৌমিন্নবগী খুদোংচাবা ফংলগনি।
